Yobo
32 Mala ene thathu amuhanelego luko mvutu, handaga Yobo wakhalele diago nu gutshigina egi udi muthu wabonga.* 2 Uvi Elihu mun’a Balakele muenya gu Buze wa mu fami ya Rama wavuile khabu jiakola. Wavuidile Yobo khabu jiakola handaga wakhalele mutshigina gumonesa egi udi muthu wabonga gubalega Nzambi. 3 Wavuidile nji mafuta a Yobo thathu khabu jiakola handaga ahetelego mvutu ya guhana Yobo, uvi azuelele egi Nzambi udi muthu wabola. 4 Elihu wanengenene ha guhana Yobo mvutu, handaga mukut’awo agasue akhalele mambuta enji. 5 Tangua diamonele muene egi mala ene thathu akhalelego luko nu mvutu ya guhana, wavuile khabu jiakola. 6 Hene Elihu mun’a Balakele muenya gu Buze wasendesele guzuela egi:
“Ame ngudi galenge*
uvi enue mudi mambuta.
Gishina giene ngahenyi tedie ha guminemesa,
ngamiwambelelego nji ndaga ngudi mujiya.
7 Ngatangijile egi: ‘Ngubembe mambuta* azuele,
ngubembe athu adi nu ivo yavula amonese gutema.’
8 Idi nyuma idi mukatshi dia athu,
muhehe wa Nzambi wa Ngolo Jiagasue wana guahana ndunge.
9 Ishigo phamba gukhala nu ivo yavula guana* gubuisa muthu watema,
ishigo nji phamba athu a gukola ana kotelesa ndaga jiabonga.
10 Hene ngudi muzuela egi: ‘Ngutegelelenu,
hagula ngumiwambele nji ndaga ngudi mujiya.’
11 Tala! Ngakhadi munengena ha guvua mbimbi jienu;
ngategelela muabonga matangi enu
tangua muakhadi mukamba mbimbi jia guzuela.
12 Ngamitegelela muabonga
uvi gushigo nga nu muthu wamonesa egi ndaga jiazuedi Yobo jidi jiabola*
nga guhana mvutu gu ndaga jiazuedi muene.
13 Hene muzuedigo egi mudi muatema;
idi Nzambi wamonesa egi ndaga jiazuedi muene jidi jia mambo, uvi ishigo muthu.
14 Tangua diakhadi muene muzuela, gakhalelego gunguwambela ame,
hene ngushigo mukalegela ndaga muazuedi ha gumuhana mvutu.
15 Ene aleba muila, ashigo nu mvutu jiko jia guhana;
ashigo nji nga nu gima giko gia guzuela.
16 Nganengenena, uvi ene ashigo muzuela luko;
amagana gawo hene, ashigo nga nu mvutu iko ya guhana.
17 Hene ame nji ngudi muhana mvutu;
ngudi muzuela nji ndaga ngudi mujiya,
18 handaga ngudi nu ndaga jiavula jia guzuela;
nyuma idi mukatshi diami idi gungutuma ha guzuela.
19 Ima idi mu vumo diami idi gifua matombe ashigo nu fundo dia guzogela,
gifua milondo ihe-ihe ya ilema ya shitu idi mutshigina gubudiga.
20 Ngubembenu nguzuele hagula ngudivue muabonga!
Ngudi naye gukangula kano diami ha guhana mvutu.
21 Ngushigo mumonesa khadilo dia gutomba-tomba nga gudi muthu mumoshi;
ngushigo nji mulepha* nga muthu mumoshi,
22 handaga ngushigo mujiya gulepha muthu;
gula ngatshita ngenyi Mufugi wami mbawungukatula muphushi.