Yobo
33 Yobo, ngabuba tegelela mbimbi jiami;
tegelela ndaga jiagasue ngudi muzuela.
2 Tala, ngabuba! Ngudi naye gukangula kano diami;
ludimi luami ludi naye guzuela.
3 Mbimbi jiami jidi mumonesa gubonga gua mutshima wami,
ivungu yami idi muzuela giamatshidia gia ndaga ngudi mujiya.
4 Nzambi wangufugile nu nyuma yenji,
muhehe wa Nzambi wa Ngolo Jiagasue wanguhanele monyo.
5 Nguhane mvutu gula luholo ludi guene;
dilondege uhane matangi’aye gutuama diami.
6 Tala! Ngudi gifua aye gutuama dia Nzambi wa giamatshidia;
ame nji ngalondewe nu wuma.
7 Unguvuilago woma,
ngushigo gugusagesa nu mbimbi jiami.
8 Ngavui ndaga wazuedi,
yadiago, ngategelela ndaga wakhalele muzuela egi:
9 ‘Ngudi ngaphelegeta, ngashiyilego nga mukhuala;
ngudi ngaphelegeta, ngushigo nu gubola.
10 Uvi Nzambi udi mukamba gubola guami ha gunguluisa;
muene udi gungumona gifua mbalagaji wenji.
11 Muene udi mumba malu ami mu milulu;
udi mutala muabonga njila jiami jiagasue.’
12 Uvi ndaga udi muzuela jishigo jia giamatshidia, magana nguguhane mvutu:
Nzambi udi diago wakoma gubalega muthu wa ha mavu.
13 Mukunda natshi udi gumubogutshila?*
Idi handaga muene gahanelego mvutu gu mbimbi jiaye jiagasue ba?
14 Handaga Nzambi wana zuela mbala ya thomo nu ya mbadi,
uvi gushigo nga nu muthu wana gumutegelela muabonga,
15 mu nzoji, mu vizio ya mu phipha,
tangua tulo tuakola tuana kuata athu
tangua ana banda ha itanda* yawo.
16 Ngenyi muene wana kangula matshui awo,
wana sonega* malongo enji mu matangi’awo,
17 ha gukuatesa athu ha gutuna gutshita ndaga jiabola,
nu ha gubamba athu hagula abuigo nu lulendo.
18 Nzambi wana huluisa monyo wa muthu* mu malumba,*
wana huluisa nji monyo wenji hagula gafuigo gu phogo ya khusa.*
19 Muthu wana zula nji malongo hadi muene mumona lamba ha gitanda gienji
nu tangua didi muene mulandula guvua gubala mu ifuwa yenji,
20 hagula atune diago dipha,
atune nji nu yene ima yabonga ya gudia.
21 Wakhuwa muavula, muila wenji wasala ifuwa-ifuwa,
ifuwa yenji yakhalele ya gusuega yazoga haphelo.
22 Monyo wenji udi musuena hehi nu malumba;*
udi nji muya gudi athu ana bata gufua.
23 Gula nga gudi nu mutumiwi* mukunda nu muene,
muzueledi mumoshi mukatshi dia athu 1 000,
ha gumuwambela ndaga idi yabonga,
24 ngenyi Nzambi amuvuile khenda azuele egi:
‘Mukuatesenu hagula gayigo mu malumba!*
Ngaheta gibawu!
25 Muila wenji uvutuge* gifua mu ulenge wenji;
avutuge gifua muakhalele muene nu ngolo mu ulenge wenji.’
26 Muene mbawububila Nzambi, munu mbawumutshigina,
mbawumba miyelele ya gusuanguluga tangua mbadimona muene phala ya Nzambi,
Nzambi mbawuvutula gubonga guenji gudi muthu wa ha mavu.
27 Muthu muene mbawuwambela* athu egi:
‘Ngatshitshi gubola, ngatshitshilego ndaga jiabonga,
uvi ngahanewego ndola.*
28 Muene wasumbi luko monyo wami hagula nguyigo mu malumba,*
monyo wami mbawumona muanya.’
29 Yadiago, Nzambi wana tshita ndaga eji jiagasue
mbala jiyadi,* nga thathu mukunda nu muthu.
31 Yobo, ngutegelele muabonga!
Hena tedie, ame ngulandule guzuela.
32 Gula udi nu ndaga ya guzuela, nguwambele.
Zuela, handaga ngudi mutshigina gumonesa egi ndaga wazuedi jidi jia giamatshidia.
33 Gula ushigo nu gima giaguzuela, ngutegelele;
hena tedie, ame mbangugulongesa gutema.