Yobo
8 Gungima, Biledade muenya gu Shuha wamuvutudile egi:
2 “Uu nu tangua ditshi mbawulandula guzuela mu luholo elu?
Mbimbi jia mukano diaye jidi gifua muhehe wakola!
3 Nzambi mbawusombegesa usopheshi wenji ba?
Nga ndo Nzambi wa Ngolo Jiagasue mbawusombegesa ndaga jiabonga ba?
4 Gula an’aye a mala amukalegele gubola,
muene wabembele egi ahanewe ndola mukunda nu gulumbuga guawo.*
5 Uvi gula nga wakambele Nzambi
nu wabubidile Nzambi wa Ngolo Jiagasue ha guguvuila khenda,
6 gula nga wakhalele diago waphelegeta nu wakhalele muthu wabonga,
muene wakhalele naye gugubamba*
nu guguvutula ha fundo diaye diabonga.
7 Ngatshima gu gisendeselo wakhalele muthu wazonda,
mu masugu adi muza wakhalele naye gubua muthu wakoma.
8 Ngabuba, hula akhakh’etu,
tadila muabonga ndaga jiakotelesele ene.
9 Handaga esue hamene haha tuavualewa getu, tushigo mujiya nga gima,
handaga masugu etu ha mavu adi gifua givule-vule.
10 Akhakh’etu mbaashigo gugulongesa
nu guguwambela ndaga adi mujiya ba?*
11 Mutshi wa papirise wajiya gukula fundo dishigo nu meya ba?
Matetete* ajiya gukula gula meya ashigo guene ba?
12 Hadi ene mumuangunuga* tangua adi khenji abatudiwa galego,
mbaamigina gutuama dia mitshi iko.
13 Yene ndaga yana buila* athu agasue ana buita Nzambi mutshima,
handaga felela dia muthu udi mutuna Nzambi* mbaditota,
14 Muthu muene udi musha mutshima mu gima gia tangua diazonda
udi nji musha mutshima mu gima gidi gifua wanda wa gabube.*
15 Muene mbawuzegemena gu wanda wa gabube,* uvi wene mbawubua;
mbawukamba gujinginyina guene, uvi wanda wene mbawumuangana.
16 Muene udi gifua mutshi wa gibisu ha muanya,
miji yenji idi mumuangana mu gilanga.
17 Miji yenji idi ya gudilanga mu maseso;
udi mukamba inzo mukatshi dia maseso.*
18 Uvi tangua mbaamuvumbula ha fundo dienji,
fundo diene mbadimutuna, mbadizuela egi: ‘Khenji ngagumonelego.’
19 Ayi, mbawutota ngenyi,
gungima athu ako mbaazoga mu fuphi.
20 Yadiago Nzambi mbagashigo mutuna athu abonga;*
mbagashigo nji mukuatesa* athu abola,
21 handaga muene mbawuzalesa kano diaye pha nu tola
ivungu yaye mbayizala pha nu milolo ya gusuanguluga.
22 Athu adi gugubambela umbalagaji mbaazala pha nu musonyi,
tenta ya athu abola nji mbayishigo mukhala luko guene.”