Ngimbo
Maskile* a Asafe.
78 Enue athu ami, tegelelenu mukhuala wami;*
hagenu matshui muvue mbimbi jidi muzoga mu kano diami.
2 Mbangukangula kano diami ha guta gishima.
Mbanguta ishima ya mualeha.
3 Ndaga tuavile nu tudi mujiya,
jinyi ashi’etu atuwambelele,
4 mbatushigo gujisuegela ajigulu awo;
mbatuwambela gindongo gidi muza
ndaga jiakoma jiakalegele Yehowa nu ngolo jienji,
ndaga jia gushimana jiakalegele muene.
5 Wahanele mukhuala gudi ajigulu a Yakoba,
wahagele mukhuala mukunda nu ajigulu a Isalele;
wawambelele ashi’etu
ha guwambela an’awo ndaga jiene.
6 Hagula gindongo gidi muza,
gindongo gia ana mbaavualewa gungima, ajiye ndaga jiene.
Ene nji gu khanda yawo mbaawambele an’awo ndaga jiene.
7 Ngenyi mbaashila Nzambi mutshima.
Mbaashigo mujimbila midimo ya Nzambi.
Uvi mbaatumagela mikhuala yenji.
8 Ngenyi ene mbaakhadigo gifua akhakh’awo,
gindongo gia enya mito yakola nu gia mbundudi,
gindongo gia athu akhalele nu mitshima mbadi,*
akhalelego ya gujinginyina gudi Nzambi mu mitshima yawo.
9 Enya Efrayime akhalele nu mata a manana,
uvi alengele mu lusugu lua ita.
10 Anemeselego gikotelo gia Nzambi,
atunyile gutumagela mukhuala wenji.
11 Ajimbidile nji ndaga jiakalegele muene,
midimo yenji ya gushimana yaadijigile muene.
12 Muene wakalegele ndaga jia gushimana ha meso a akhakh’awo,
mu gifutshi gia Ejipitu, mu mavu a Soana.
13 Muene wakhaphumuine kianga hagula azawuge,
wamagenesele meya gifua gibayi.
14 Mu muanya, wakhalele guatuameza nu tuta,
mu phipha ya mudidi, wakhalele guatuameza nu zenyi* dia tshuya.
15 Muene watawile maseso mu mavu a luselenga,
waahanele meya, anuile, akutshile gifua akhalele gu muta wakoma.
16 Muene wazolele meya moshi’a seso diakoma,
meya ene asendesele gubulumuga gifua muta.
17 Uvi ene alanduile gukalagala ndaga jiabola gu meso enji,
alumbugile Nzambi wa Gudinyinyiga mu mavu a luselenga;
18 alolele Nzambi mu mitshima yawo
tangua amutogele ima ya gudia yakhalele ene muvila nzala yakola.
19 Azuelele ndaga jiabola mukunda nu Nzambi,
azuelele egi: “Nzambi wajiya diago gutuhana ima ya gudia mu mavu a luselenga ba?”
20 Tala! Muene wawasele seso
hagula meya azoge nu asendese gubulumuga.
“Muene wajiya nji gutuhana dipha,
nga guhana athu enji mbiji ba?”
21 Tangua Yehowa wavile ndaga akhalele muzuela, wavile khabu jiakola;
watumile tshuya ha guhana Yakoba ndola,
wavidile Isalele khabu jiakola.
22 Handaga ene ashilego gutshigina gudi Nzambi;
ene ashilego mutshima egi udi nu ngolo jia guahuluisa.
23 Hene muene watumile matuta a mu dilu,
wakangudile nji mifulo ya mu dilu.
24 Wakhalele guanogesela mana ha gudia;
waahanele mbuto jia mu dilu.
25 Athu adile mapha a anjelo;*
waahanele ima ya gudia yavula hagula akute.
26 Muene wazugishile muhehe wa gu mazogelo a kumbi mu dilu,
mu ngolo jienji, watshitshile egi muhehe wa gu khanda ya sud ubunde.
27 Muene waanogeselele misunyi gifua fuphi,
waanogesele tunjila tuavula gifua gishegele gu khulo ya muta.
28 Muene watubuishile hakatshi na katshi dia phundo yenji,
mu khulo jiagasue jia tenta jienji.
29 Adile akutshile uu nu ha muminyo;
waahanele ima yakhalele ene muvila nzala yakola.
30 Uvi hakhalele ene khenji atema gukuta ndo,
tangua ima ya gudia yakhalele mu makano awo,
31 Nzambi waavidile khabu jiakola.
Washiyile mala awo a ngolo;
washiyile mavuala a gu Isalele.
32 Uvi ikhale ngenyi, ene atshitshile luko gubola guavula.
Amoneselego gutshigina gu midimo yenji ya gushimana.
33 Wasugishile masugu a monyo wawo gifua muhehe wa githuhu,
waahanele malamba akola, wasugishile ivo yawo.
34 Uvi tangua diagasue diakhalele muene guashiya, akhalele gumukamba;
akhalele muvutuga ha gukamba Nzambi,
35 akhalele muwunguluga egi Nzambi wakhalele Seso diawo;
akhalele nji muwunguluga egi Nzambi wa Gudinyinyiga muene wakhalele guakula.*
36 Uvi akambele gumuhuiga nu mbimbi jiawo,
ndaga amuwambelele nu madimi awo jiakhalelego jia giamatshidia.
37 Mitshima yawo yakhalelego ya gujinginyina gudi muene;
anemeselego nji gikotelo gienji.
38 Uvi muene wakhalele guavila khenda;
wakhalele guatotesela* gubola guawo, gakhalelego guahana ndola yakola.
Mbala jiavula, ha fundo dia guavila khabu jiakola,
muene wakhalele gudikanda.
39 Handaga wakhalele mujiya egi ene akhalele ana a athu,*
muhehe udi muzoga nu ushigo muvutuga luko.*
40 Amulumbugile mahugo avula mu mavu a luselenga,
amuhanele lamba mu mavu a luselenga!
41 Alolele Nzambi mahugo avula,
ahanele Muthu wa Gijila wa gu Isalele gikenene.*
43 Awungulugilego ijiyishilo yamonesele muene gu Ejipitu
nu ndaga jia gushimana jiakalegele muene mu mavu a Soana,
44 nu luholo luabuishile muene meya a misalala* ya Nile mahatshi
hagula nga muthu mumoshi ganuigo meya a misalala yene.
45 Muene watumine tudimu tuavula ha gusuma enya Ejipitu
nu minonge ha guasagesa.
46 Muene watumile matulu ha gubolesa mbuto jiawo.
Watumile matulu avula ha gubolesa midimo ya mago awo.
47 Muene wabolesele vinyo yawo nu may’a-nzanza,
nu mitshi yawo ya sikomole nu may’a-nzanza akoma.
48 Washiyile shitu jiawo jiakoma nu may’a-nzanza,
washiyile shitu jiawo jiko nu khuba.
49 Nzambi wavidile enya Ejipitu khabu jiabala,
waavidile khabu, waasagesele,
watumine thundu jia anjelo ha guabatela malamba.
50 Muene gakandelego khabu jienji.*
Gaabembelego nu monyo;
waatumidile misongo ya gisambugila.
51 Gu gisugishilo, muene washiyile ana agasue a somi a gu Ejipitu,
ana a thomo avualewe* mu tenta jia Kame.
52 Gungima wazolele athu enji gifua imeme,
waatuamezele gifua imeme mu mavu a luselenga.
53 Muene waatuamezele muabonga,
ene avilego woma.
Kianga giatshuigile mbalagaji jiawo.
54 Muene waabatele mu mavu enji a gijila,
mavu wawa a gu khanda ya milundu atambudile muene nu koko dienji dia madia.
55 Wakayele ifutshi gutuama diawo;
wathesele mavu nu shinga ha guahana khapho diawo;
wahagele iphuta ya Isalele mu jinzo jiawo.
56 Uvi, alanduile gulola Nzambi wa Gudinyinyiga, akhalele gumulumbugila;
atumagelego mikhuala yenji.
57 Amutunyile, akhalele mutshita ndaga jiabola gifua akhakh’awo.
Akhalelego athu a gushila mutshima gifua muana khala uta wa manana wa guhengelela.
58 Alanduile gukombelela nzambi jia mambo mu mafundo a gukombelela* ha gumuhana khabu,
amuhanele khabu jiakola* nu isongo yawo.
59 Hamonele Nzambi ndaga yene, wavile khabu jiabala.
Hene, watunyile diago Isalele.
60 Gungima wakatugile gu tabernakle ya gu Shilo,
tenta yakhalele muene mukhala mukatshi dia athu.
61 Wabembele egi gima giana monesa ngolo jienji giye mu uhiga;
wabembele egi lutumbu luenji luye ha mago a mbalagaji.
62 Wabembele mbalagaji ha guashiya nu phogo,
wavidile khapho dienji khabu jiakola.
63 Tshuya tuakondele mavuala enji a mala,
ayimbidilego tundongo tuenji ngimbo jia ulo.*
64 Nganga-nzambi jienji jiashiyiwe nu phogo ya khusa,
akaji’awo adidilego.
65 Gungima, Yehowa wazugile gifua wakhadi gu tulo,
gifua muenya ngolo wakuatewe matombe, uvi henyaha matombe ahua gu meso.
66 Wakayele mbalagaji jienji;
waahanele musonyi mayilago.
67 Watunyile tenta ya Yozefe;
gatombelego giphuta gia Efrayime.
68 Uvi watombele giphuta gia Yuda,
mulundu wa Siona, unu wana zumba muene.
69 Wahagele fundo dienji dia gijila ha gukhala ivo yavula gifua dilu,
ha gukhala mayilago gifua mavu afugile muene.
70 Watombele muenya mudimo wenji Davidi,
wamuzudile mu madinda a imeme,
71 fundo diakhalele muene mubamba imeme yakhalele muwamuesa;
wamubuishile mubambi wa Yakoba, mubambi wa athu enji,
wamubuishile mubambi wa Isalele, khapho dienji.
72 Waabambele* nu mutshima wabonga,
waatuamezele nu gutema guagasue.