Itshi Yajiya Gugukuatesa ha Gubamba Gusuanguluga Guaye Gula Wabua Muthu wa Gukola?

1-2. Luholo lutshi Yehowa wana tadila akombeledi enji agujinginyina adi athu agukola? (Ngimbo 92:12-14; Tala nji holu dia gizula.)

MU MEMBO ako, athu ana tangiza egi gubua muthu wa gukola gudi lutumbu. Uvi mu mafundo ako, athu ana tshita yagasue hagula abuigo athu agukola. Ha gufezegesa, gula amona jinvi muzoga mu muto, ana gujikatula muphushi. Ikhale ngenyi, ndaga yene yanago guakanga njila ha gubua athu agukola.

² Uvi Yehowa wana tangiza itshi mukunda nu akombeledi enji adi athu agukola? (Ish. 16:31) Wana guafuanesa nu mitshi yabonga. (Tanga Ngimbo 92:12-14.) Mukunda natshi? Handaga mitshi idi nu ivo yavula yana khala yabonga nu yana khala nu iyaji nu mayiji avula. Ha gufezegesa, gu Japon guana khala nu mitshi yabonga diago yana tamegewa egi cerisiers, mitshi yene yatshita gale ivo yavula, iko idi gale nu ivo gubalega 1000. Luholo lumoshi nji, aphangi agukola adi nu ndando yavula gu meso Nzambi. Yehowa wana suanguluga muavula nu makalegelo awo abonga gifua gukolesela nu gujinginyina guawo gudi muene. Wana suanguluga nji nu ivo yagasue abalegesa gale mu mudimo wenji.

3. Hana gifezegeselo gidi mumonesa luholo Yehowa wana kalegela athu agukola.

³ Gubua muthu wa gukola guanago gumanyisa ndando ya muthu gu meso a Yehowa.a Matangua avula, Yehowa wana kalegela athu agukola ha gukalagala ndaga jiabonga nu jia gushimana. Ha gufezegesa, Sara wakhalele wabui gale muthu wa gukola tangua Yehowa wamuwambelele egi mbawubua khakha wa gifutshi gia ngolo nu khakha wa Masiya. (Gis. 17:15-19) Moize wakhalele muthu wa gukola tangua Yehowa wamuwambelele ha guzola enya Isalele gu Ejipitu. (Guz. 7:6, 7) Mupostolo Yone nji wakhalele muthu wa gukola tangua Yehowa wamutumine ha gusonega mikanda thano ya Biblia mu ukuateshi wa nyuma yenji.

4. Ha gutadila Ishima 15:15, itshi yajiya gukuatesa aphangi agukola ha gukolesela mu malamba adi mutagana nawo? (Tala nji gifuanesa.)

⁴ Aphangi agukola ana gutagana nu malamba avula. Phangi mumoshi wa mukhetu wa gukola wazuelele mu ilelesa egi: “Gubua muthu wa gukola gushigo mudimo wa ana azonda.” Uvi gusuangulugab guajiya gukuatesa aphangi agukola ha gukolesela mu malamba adi mutagana nawo. (Tanga Ishima 15:15.) Mu longo edi tuza muzuelela ndaga aphangi agukola ajiya gutshita ha gubamba gusuanguluga guawo. Tuza nji mumona luholo aphangi ako ajiya gukuatesa aphangi agukola a mu mahungu awo. Thomo, tutadilenu mukunda natshi yajiya gukhala lamba ha gubamba gusuanguluga guetu tangua tudi muya nu gubua athu agukola.

YAJIYA GUKHALA LAMBA HA GUBAMBA GUSUANGULUGA GUAYE GULA WABUA MUTHU WA GUKOLA

5. Itshi yajiya gulebesa aphangi ako agukola muila?

⁵ Itshi yajiya gugulebesa muila? Yajiya gukhala egi udi gudisagesa handaga ushigo luko nu ngolo jia gutshita ndaga gifua tangua wakhalele muvuala. Wajiya nji gusendesa gutangiza tangua wakhalele muvuala nu sante yabonga. (Mulo. 7:10) Ha gufezegesa, phangi wa mukhetu Ruby udi muzuela egi: “Nu guene gusudiga milele guakhala lamba handaga muila wami wagasue wana gungukata, ngana khalago nji nu luholo lua gudinyigisa gifua luholo ngudi mutshigina. Matangua ako, nu guene gutuphula kulu diami ha gusudiga chaussette guakhala lamba. Mago ami ana gungukangama, ngana khala nji nu rhumatisme, ndaga yene yana gungukanga njila ha gukalagala nu tuene tumidimo tuazonda.” Phangi Harold wakhalele mutshita mudimo gu Betele udi muzuela egi: “Ngushigo luko gudijiya, matangua ako ndaga yene yana gunguhana khabu. Ngakhalele mutshita sport muavula. Ngakhalele musuanguluga muavula ha gukena saga yana tamegewa egi baseball. Tangua tuakhalele mukena, athu avula akhalele muzuela egi: ‘Hanenu ndundu gudi Harold handaga muene wana guta muabonga.’ Uvi henyaha ngushigo mutangiza egi ngajiya luko guta ndundu muabonga.”

6. a) Ndaga jitshi jiko jiajiya gulebesa aphangi agukola muila? b) Itshi yajiya gukuatesa phangi wa gukola ha gujiya gula udi naye gubemba guwendesa gamiyo nga ndo? (Tala longo “Ngudi Naye Gubemba Guwendesa Ba?” mu zulunalu eyi)

⁶ Wajiya nji guleba muila handaga ushigo luko nu luholo lua gukalagala ndaga aye hakhaye. Yajiya gukhala egi udi nu funu ya muthu muko ha gugukuatesa nga ndo udi naye guya mukhala gumbo dia mun’aye. Nga ndo yajiya gukhala egi waleba muila handaga ushigo luko nu sante yabonga nga ndo meso aye ashigo luko mumona muabonga hagula wajiya guya mu mafundo ako aye hakhaye nga guwendesa moto, velo nga gamiyo. Ndaga yene yajiya diago gugusagesa! Uvi ikhale ushigo nu luholo lua gutshita ndaga jiavula gifua luholo wakhalele guyitshita thomo, jiya egi wakhala nu ndando gu meso a Yehowa nu gu meso a athu ako. Tuajiya nji gusha mutshima egi Yehowa wana gutukotelesa muabonga. Ndaga yana khala nu ndando gu meso enji idi guzumba tuana khala nago mukunda nu muene nu mukunda nu aphangi’etu.​—1 Sam. 16:7.

7. Itshi yajiya gukuatesa aphangi adi gudisagesa egi ajiya gufua gutuama egi gisugishilo gia mavu awa gize?

⁷ Wajiya nji guleba muila handaga udi mutangiza egi wajiya gufua gutuama egi gisugishilo gia mavu awa gize. Itshi yajiya gugukuatesa gula udi mutangiza ngenyi? Tshita yagasue ha guwunguluga egi Yehowa nji wana nengena tangua mbadiza muene mushiya mavu awa abola. (Yesh. 30:18) Uvi Yehowa ganago gulaba gunengena. Wana tshita ngenyi handaga wana tshigina guhana athu avula luendu lua gumujiya nu lua gumukombelela. (2 Phet. 3:9) Hene, gula waleba muila, jiya egi khadilo dia gunengenena dia Yehowa didi mukuatesa athu avula ha gumujiya gutuama egi gisugishilo gize. Yajiya gukhala egi athu ako mukatshi diawo adi enya fami yaye.

8. Ndaga jitshi aphangi agukola ajiya gutshita matangua ako gula adi mukata?

⁸ Gula tushigo gudivua muabonga, tuajiya guzuela nga gutshita ndaga jinyi tuajiya gudibela gungima ikhale tudi athu agukola nga ndo. (Mulo. 7:7; Yak. 3:2) Ha gufezegesa, Yobo wakhalele genji wa gujinginyina gudi Nzambi, uvi hatagenele muene nu malamba, mu tangua dimoshi ngenyi wasendesele guzuela “izuele-zuele.” (Yobo 6:1-3) Luholo lumoshi nji, gula aphangi agukola adi mukata, matangua ako ajiya guzuela nga gutshita ndaga jinyi akhalelego naye guzuela nga gutshita gula ashigo mukata. Uvi ikhale tudi mukata nga ndo tudi athu agukola, tushigo naye gukalegela okazio yene ha guzuela mbimbi jiajiya gusagesa athu ako nga guatoga egi atukalegele ndaga jiagasue tuatshigina. Gula tuakotelesa egi tuazuedi ndaga imoshi yabola yasagesa muthu, tudi naye gumutoga ha gututotesela.​—Mat. 5:23, 24.

ITSHI YAJIYA GUGUKUATESA HA GUBAMBA GUSUANGULUGA GUAYE?

9. Mukunda natshi tudi naye gutshigina ukuateshi wa athu ako? (Tala nji ifuanesa.)

⁹ Tshigina ukuateshi wa athu ako. (Gal. 6:2) Thomo, mbawutangiza egi gutshita ngenyi gudi lamba. Phangi wa mukhetu Gretl udi muzuela egi: “Matangua ako yakhala lamba ha gutshigina ukuateshi wa aphangi handaga ngana tangiza egi mbanguabuila ginemo. Yanguzudile tangua diavula ha gusombegesa matangi ami nu ha gutshigina nu gudibulumuisa guagasue egi ngudi nu funu ya ukuateshi wa athu ako.” Gula watshigina ukuateshi wa athu ako, mbawakuatesa ha gukhala nu gusuanguluga guana khala nago athu gula akhaphela athu ako ima. (Makal. 20:35) Aye nji mbawukhala nu gusuanguluga ha gumona luholo athu ako ana guguzumba nu ana gudisagesa mukunda nu aye.

10. Mukunda natshi udi naye guhana athu ako mersi? (Tala nji ifuanesa.)

¹⁰ Khala muhana mersi. (Kol. 3:15; 1 Tes. 5:18) Tangua athu ako ana gutukalegela ndaga jiabonga, yana gutusuanguluisa; uvi matangua ako tuajiya gubuita mutshima ha guahana mersi. Uvi gula tuamuemueta nu tuahana aphangi ene mersi, yajiya guasuanguluisa nu guatuma ha gudivua egi adi nu ndando. Phangi Leah wana kuatesa aphangi agukola gu Betele, udi muzuela egi: “Phangi mumoshi wa mukhetu mukatshi dia aphangi ngana kuatesa wana gunguhana mersi tangua diagasue, wana gungusonegela mbimbi jiabonga ha tupapie tuazonda. Wana sonega mbimbi jiazonda, uvi jiana gungusuanguluga. Ngana zumba tupapie tuene muavula, tuana gungukuatesa ha gujiya egi phangi muene wana suanguluga nu ukuateshi wami.”

11. Luholo lutshi wajiya gukuatesa athu ako? (Tala nji ifuanesa.)

¹¹ Kamba luholo lua gukuatesa athu ako. Gula udi gudihana muavula ha gukuatesa athu ako, mbayigukuatesa ha gutuna gudisagesa muavula mukunda nu milonga yaye. Gishima gimoshi gia gu Afrique giana gufuanesa athu agukola nu bibliothéque idi yaguzala pha nu mikanda idi nu ujiyi wavula. Uvi gula athu ashigo mutanga mikanda yene, ajiyilego gujiya mene nga ndaga jidi muene. Luholo lumoshi nji, mavuala ajiyilego gujiya malongo a ndando gula ushigo muta nawo maga ha guawambela ndaga udi mujiya. Hene, khala guahula mihu, khala nji guategelela. Akuatese ha gujiya egi gutumagela mikhuala ya Yehowa gudi nu ndando yavula nu mbaguakuatesa ha gukhala nu gusuanguluga mu monyo wawo. Mbawukhala nu gusuanguluga gula udi mukuatesa mavuala nu udi guahana gikhesa.​—Ngi. 71:18.

12. Ha gutadila Yeshaya 46:4, ndaga itshi Yehowa udi mulaya aphangi agukola? (Tala nji ifuanesa.)

¹² Khala mutoga Yehowa ha guguhana ngolo. Matangua ako, wajiya guhuila nga guleba muila; ndaga yene yajiya diago gugusagesa. Uvi ujimbilago egi Yehowa udi Nzambi wa ngolo jiagasue, muene ganago ‘guhuila nga guleba.” (Yesh. 40:28) Mbawuguhana diago ngolo. (Yesh. 40:29-31) Udi nji gugulaya egi mbawugukuatesa. (Tanga Yeshaya 46:4.) Ndaga ya giamatshidia idi egi Yehowa wana tagenesa ndaga jiagasue jiana laya muene. (Yosh. 23:14; Yesh. 55:10, 11) Gula watshita gisambu, Yehowa mbawuguhana diago ngolo; ndaga yene mbayigukuatesa ha gukotelesa egi wana guguzumba diago nu mbawukhala nu gusuanguluga.

13. Ha gutadila 2 Kolinto 4:16-18, itshi udi naye gujiya? (Tala nji ifuanesa.)

¹³ Khala mujiya egi gudi nu lusugu mbawubua luko muvuala nu mbawukhala nu sante yabonga. Yakhala yaleba ha gukolesela lamba dimoshi ngenyi gula tudi mujiya egi didi mukunda nu tangua diazonda. Biblia yana gutuwambela nji egi mu masugu adi muza athu mbaashigo luko mukola nga gukata. (Yobo 33:25; Yesh. 33:24) Hene wajiya gusha mutshima egi mu masugu adi muza, mbawukhala nu ngolo nu sante yabonga nu mbawukhala nji wabonga gubalega mangino. (Tanga 2 Kolinto 4:16-18.) Uvi luholo lutshi athu ako ajiya gukuatesa aphangi agukola?

LUHOLO LUTSHI WAJIYA GUKUATESA APHANGI AGUKOLA?

14. Mukunda natshi gutamega nga guya mutala aphangi agukola guakhala nu ndando?

¹⁴ Khala mutamega aphangi agukola, khala nji muya guatala muavula. (Heb. 13:16) Matangua ako, aphangi agukola ana guvua gikenene handaga ana balegesa tangua diavula hakhawo. Phangi Camille wana gudivua nji ngenyi, udi muzuela egi: “Matangua ako ngana guvua gikenene nu khabu handaga ngana khala monzo sendese mu gimenegena uu nu mu ngueze. Ngana khalago nu ndaga jiavula jia gutshita.” Tangua tuana guya mutala aphangi agukola, tuana guahana gikhesa nu tuana guakuatesa ha gudivua egi tuana guazumba nu ana khala nu ndando gu meso etu. Aye muwunguluga tangua dimoshi ngenyi watangijile ha gutamega nga ha guya mutala phangi mumoshi wa gukola wa mu hungu dienu, uvi gungima wabuita gaye mutshima ba? Gula idi ngenyi, udisagesa muavula handaga mukut’etu agasue tuana khala nu ndaga jiavula jia gutshita. Na itshi yajiya gutukuatesa ha gutshita “ndaga jiabalega ndando,” gifua guya mutala aphangi agukola? (Fili. 1:10) Wajiya gusonega majina a aphangi agukola a mu hungu dienu nu masugu wajiya guatamega nga guatumila mesaje. Wajiya nji gulonda programe ya guya guatala; tomba lusugu mbawutshita ngenyi hagula ubuitshigo mutshima.

15. Ndaga jitshi mavuala nu aphangi agukola ajiya gukalagala hamoshi?

¹⁵ Gula udi muvuala, wajiya gudihula gula maga atshi wajiya guta nu aphangi agukola nga ndaga jia luholo lutshi muajiya gutshita mukuta. Uvi udisagesago muavula mukunda nu ndaga yene. Tshita yagasue ha gukhala futa diabonga mukunda nu ene. (Ish. 17:17) Khala muta nawo maga gutuama nga gungima dia gudibungisa. Wajiya guahula ha guguwambela verse jiana guasuanguluisa nga ha gugutela lumene lua ndaga imoshi akalegele mu ulenge wawo. Wajiya nji guatamega ha gutala nawo emisio ya JW Télédiffusion. Gudi nji nu ndaga jiko wajiya gutshita ha gukuatesa aphangi agukola. Ha gufezegesa, wajiya guakuatesa ha gukalagala ba mise à jour mu apareyi jiawo nga guakuatesa ha gu télécharger mikanda ihe-ihe tuana kalegela mu gudibungisa. Phangi Carol udi muzuela egi: “Khala mutoga aphangi agukola ha gutshita nawo ndaga wana tshigina gutshita. Ikhale ngudi muthu wa gukola, ngana suanguluga gutshita ndaga jiavula gifua guya musamba ima, gudia mu restaurant nga guya mutala ima yafugile Nzambi.” Phangi Maira udi nji muzuela egi: “Futa diami mumoshi udi nu ivo 90. Uvi ame ngudi nu ivo 33. Ikhale ngenyi, tuana gulela muavula nu tuana tala nji filme jiavula hamoshi. Gula muthu mumoshi mukatshi dietu watagana nu mulonga, tuana gudikuatesa nu tuana gudihana malongo.”

16. Mukunda natshi tudi naye gutuala aphangi agukola gu opitale?

¹⁶ Khala mutuala aphangi agukola gu opitale. Tangua udi muya guatuala, khala nawo hagula wajiya gujiya gula minganga idi guakalegela ndaga muabonga nu idi guasaga muabonga. (Yesh. 1:17) Wajiya nji guakuatesa gula udi musonega ndaga jidi guawambela munganga. Phangi Ruth udi muthu wa gukola, udi muzuela egi: “Matangua avula gula ngaya gu opitale hakhami, munganga ganago gutshigina ndaga ngana gumuwambela. Minganga yana gunguwambela egi: ‘Ushigo diago mukata; aye udi mulaba guvudisa misongo.’ Uvi gula ngaya nu muthu muko, munganga wana gungukalegela ndaga mu luholo luabonga. Ngudi muhana mersi gudi aphangi’ami a mala nu a akhetu ana gungutuala gu opitale.”

17. Mu maluholo atshi wajiya gulongesa nu aphangi agukola?

¹⁷ Khala mulongesa nawo hamoshi. Aphangi ako agukola ana khalago luko nu ngolo jia gulongesa inzo nu inzo. Gula luholo ludi guene, wajiya gulongesa nu phangi wa mukhetu wa gukola gu présentoir mobile. Wajiya nji gumubatela nguasa hagula wajiya gukhala hehi nu présentoir yene. Nga ndo wajiya guzula phangi wa yala wa gukola ha guya mutala muthu wana longesa Biblia nga ha gulongesela muthu muene gumbo dia phangi muene wa gukola. Akulu ajiya gulondega ndaga hagula gudibungisa mukunda nu mudimo wa gulongesa gukhale mukalegewa gumbo dia aphangi agukola ha guakuatesa ha guheta muthu wa guya n’enji mu mudimo wa gulongesa. Yehowa wana suanguluga muavula tangua tuana zumba nu tuana nemesa aphangi agukola.​—Ish. 3:27; Roma 12:10.

18. Itshi mbatuzuelela mu longo didi mulandula?

¹⁸ Longo edi diatukuatesa ha guwunguluga egi Yehowa wana zumba aphangi agukola nu wana guazula nu ndando. Esue nji tuana zumba nu tuana nemesa aphangi agukola a mu mahungu etu! Aphangi agukola, ikhale mudi mutagana nu malamba, Yehowa wajiya gumikuatesa ha gubamba gusuanguluga guenu. (Ngi. 37:25) Khalenu mujiya egi mu masugu adi muza, mbamukhala nu gusuanguluga nu mbamukhala nu sante yabonga! Uvi aphangi ako mukatshi dietu ana kuatesa enya fami jiawo adi athu agukola nga ndo ana kuatesa mun’awo nga futa diawo udi mukata. Itshi yajiya guakuatesa ha gubamba gusuanguluga guawo? Longo didi muza mbadihana mvutu gu muhu wene.