Yesu udi Nganga-nzambi Wetu Wakoma nu wa Khenda

1-2. a) Mukunda natshi Yehowa watumile mun’enji ha mavu? b) Itshi tuza mumona mu longo edi? (Hebelu 5:7-9)

IVO 2 000 yabalega gale sendese tangua Yehowa Nzambi watumile mun’enji wana zumba muene muavula ha mavu. Mukunda natshi? Mukatshi dia ndaga jiakhalele naye gukalagala Yesu ha mavu, ndaga iko yakhalele gukula athu mu uhiga wa gubola nu wa gufua nu ha gulonda ndaga jiabolesele Satana. (Yone 3:16; 1 Yone 3:8) Yehowa wakhalele mujiya egi gula Yesu waza ha mavu, yakhalele naye gumukuatesa ha gukhala Nganga-nzambi Wakoma wabonga wana guzumba athu, wana guavuila khenda nu wana gudisha ha fundo diawo. Yesu wabuile Nganga-nzambi Wakoma gungima dia gubatijiwa guenji mu givo 29 G.Y.a

² Mu longo edi tuza mumona luholo guza gua Yesu ha mavu guamukuatesele ha gubua Nganga-nzambi Wakoma wana guvuila athu khenda. Gujiya ndaga eyi gudi nu ndando handaga guza gutukuatesa ha gukhala nu khadilo dia gukombelela Yehowa nu gukolesa ufuta wetu n’enji ikhale tudi gudisagesa mukunda nu gubola tuakalagala.​—Tanga Hebelu 5:7-9.

MUN’A NZAMBI WAZA HA MAVU

3-4. Ndaga jitshi jiabembele Yesu ha guza ha mavu? Monyo wenji wakhalele luholo lutshi ha mavu?

³ Athu avula mukatshi dietu asombegesele gale ndaga jiko mu monyo wawo gifua gubemba jinzo jiawo, enya fami jiawo nu mafuta awo ha guya ha fundo diko. Ndaga jia luholo elu jiakhala diago lamba. Uvi gushigo nu muthu wasombegesele gale ndaga jia mu monyo wenji gifua Yesu. Wakhalele muanjelo wabalega ndando mukatshi dia anjelo agasue a Yehowa mu dilu. Wakhalele nu gusuanguluga guavula ha gukalagala mudimo gu “koko dia madia” dia Nzambi. Yehowa wakhadile nji gumuzumba muavula. (Ngi. 16:11; Ish. 8:30) Uvi Filiphi 2:7 yana zuela egi Yesu “wabembele ima yagasue yakhalele naye muene” nu mutshima umoshi, wajile ha mavu ha gukhala nu athu ashigo atagana.

⁴ Tala nji ndaga jiabuidile Yesu mu ulenge wenji. Wavuadiwe mu fami ya phutu; mulambu wahanyile mvuaji jienji havuadiwe muene udi mumonesa ndaga yene. (Levi 12:8; Luka 2:24) Havuile Fumu wabola Helode lumene lua guvuadiwa guenji, wakambile gumushiya. Fami yawo yalengele ha guya gu Ejipitu ha guhuluisa monyo wenji. (Mat. 2:13, 15) Monyo wa Yesu ha mavu wakhalele diago wa gudisha nu monyo wakhalele nawo muene mu dilu!

5. Ndaga jitshi jiamonele Yesu ha mavu? Luholo lutshi jiamukuatesele ha gukhala Nganga-nzambi Wakoma? (Tala nji gifuanesa.)

⁵ Hakhadile Yesu ha mavu, wamonele athu avula mumona malamba. Wakotelesele luholo athu ana gudivua gula afuisa athu handaga muene nji wafuishile athu avula gifua sh’enji Yozefe. Tangua Yesu wakhalele muya nu gulongesa, watagenele nu enya hute, ifofo, athu akhalelego nu luholo lua gudinyigisa nu mvuaji jiafuishile an’awo, waavuidile nji khenda. (Mat. 9:2, 6; 15:30; 20:34; Mako 1:40, 41; Luka 7:13) Idi yadiago egi, hakhalele muene mu dilu, wamonele athu mumona malamba. Uvi guza guenji gua ha mavu guamukuatesele ha gukotelesa muabonga malamba a athu ako. (Yesh. 53:4) Guamukuatesele nji ha guvua luholo athu ana gudivua nu ha gukotelesa lamba ana guvua gu mutshima gula atagana nu malamba. Wakhadile nji guhuila, guvua lamba nu gikenene gifua athu ako a ha mavu.

YESU WAKHALELE MUVUILA ATHU KHENDA

6. Profesi ya Yeshaya idi muzuelela khenda jia Yesu ha mulonga nu athu idi gutulongesa itshi? (Yeshaya 42:3)

⁶ Tangua diakhalele Yesu ha mavu, wavuidile athu akhalele mumonesewa malamba khenda. Hakalegele muene ngenyi, watagenesele profesi idi mu mukanda wa Yeshaya. Mu gitshinyi gia Biblia giasonegewe mu Hebelu, athu akhala nu gutshigina guakola gudi Yehowa ana gufuanesewa matangua ako nu dihia diana gumbiwa meya tangua diagasue nga nu mitshi yakoma yaleha. (Ngi. 92:12; Yesh. 61:3; Yel. 31:12) Uvi athu ashigo nu ukuateshi nu athu ana gumonesewa malamba ana fuanesewa nu ditetete dia gufugula nga nu shinga ya muenda ushigo mulema muabonga. (Tanga Yeshaya 42:3; Mat. 12:20) Mu njila ya nyuma ya Nzambi, profete Yeshaya wakalegele mbimbi jiene jia gifuanesa ha gumonesa guzumba mbagukhala nago Yesu nu khenda jienji mukunda nu athu ana monesewa malamba nu anago guzudiwa nu ndando.

7-8. Luholo lutshi Yesu watagenesele profesi ya Yeshaya?

⁷ Matayo wamonesele egi Yesu watagenesele profesi ya Yeshaya yana zuela egi: “Muene mbagashigo mubogola ditetete didi dia gufugula, mbagashigo mujima shinga ya muenda ushigo mulema muabonga.” Ndaga jiko jia gushimana jiakalegele Yesu jiakuatesele athu akhalele gudivua gifua ditetete dia gufugula nu athu akhalelego nu felela nu akhalele gudivua gifua shinga ya muenda ushigo mulema muabonga unu wakhalele mutshigina gujima. Mukatshi dia athu ene, guakhalele nu yala wakhalele nu hute muila wagasue. Yajiya gukhala egi wakhalele mutangiza egi gajiyilego gusagewa nga guheta luholo lua gubalegesa tangua hamoshi nu enya fami yenji nga mafuta enji. (Luka 5:12, 13) Guakhalele nji nu yala muko wakhalele gifua matshui (kahuku) nu gakhalelego muzuela muabonga. Tangiza gale luholo luakhalele gudivua muene tangua akhalele mumona athu ako muta maga uvi muene gashigo guavua. (Mako 7:32, 33) Uvi guakhalele nji nu athu ako akhalele mumona malamba.

⁸ Tangua diakhalele Yesu ha mavu, enya Yuda avula akhalele mutshigina egi gula muthu udi gikata nga ndo udi nu misongo, idi ndola yaheta muene mukunda nu gubola guenji nga gubola gua mvuaji jienji. (Yone 9:2) Ndaga yene yakhalele mutshita egi athu akhadigo muzula athu a luholo elu nu ndando. Uvi ha gutagenesa profesi ya Yeshaya, Yesu wasagele athu ene nu waakuatesele ha gujiya egi Yehowa wana gudisagesa mukunda nu ene nu wana guazula nu ndando. Ndaga eyi idi gutulongesa itshi?

9. Luholo lutshi Hebelu 4:15, 16 yana monesa egi Nganga-nzambi wetu Wakoma wana guvuila athu ashigo atagana khenda?

⁹ Tanga Hebelu 4:15, 16. Tuajiya gusha mutshima egi Yesu wana gutuvuila khenda tangua diagasue. Ndaga yene idi mukotelesa itshi? Muthu wana guvuila athu ako khenda wana kamba gujiya luholo athu ene adi gudivua nu wana guakalegela ndaga nu gisemo. Mbimbi ya Greke yabalumuiwe egi “guvuila athu ako khenda” yana kotelesa gudihaga ha fundo dia athu ako nu guvua lamba nu gikenene gifua ene. (Tala nji Hebelu 10:34, Phaula wakalegele nji mbimbi yene ya Greke mu verse yene.) Tangua tuana gutanga mene jia Biblia jiana monesa luholo Yesu wakuatesele athu, yana gutukuatesa ha gumona egi Yesu wakhalele diago guavuila khenda. Yesu gasagelego athu ene ha gutagenesa ginemo gimoshi ngenyi. Uvi waasagele handaga wakhalele gudisagesa mukunda nu ene nu wakhalele mutshigina guakuatesa. Ha gufezegesa, Yesu wakhalele nu luholo lua gusaga muenya hute muene gualeha, uvi wasuenele hehi n’enji, wamukuatele gu muila. Yajiya gukhala egi mu ivo yagasue yakhalele yala muene nu misongo, Yesu wakhalele muthu wa thomo wamukuatele gu muila! Yesu wadihagele nji ha fundo dia muthu wakhalele gifua matshui tangua diayile n’enji muene gu khanda ha gumusaga. Luko, tangiza ndaga yakalegewe tangua mukhetu mumoshi wakhalele mutshita ndaga jiabola uvi wabalumuine mutshima, wawevuele malu a Yesu nu masoji enji nu wamukungumuine nu sanga dienji. Mufalese mumoshi wazuelele ndaga jiabola mukunda nu mukhetu muene, uvi Yesu wamunginyidile nu wadingidile mufalese muene. (Mat. 8:3; Mako 7:33; Luka 7:44) Yesu gatunyilego ikata nga athu akalegele gubola guakoma. Uvi waazumbile nu waatamegele ha guza gudi muene. Hene, tuajiya gusha mutshima egi wana gutuvuila nji khenda.

TUANA LANDULA GIFEZEGESELO GIA NGANGA-NZAMBI WETU WAKOMA MANGINO

10. Itshi tuajiya gukalegela ha gukuatesa ifua matshui nu ifofo mangino? (Tala nji ifuanesa.)

¹⁰ Luholo tudi alandudi a Yesu, tuana kalagala yagasue ha guzumba athu, guavuila khenda nu gudisha ha fundo diawo. (1 Phet. 2:21; 3:8) Tushigo nu luholo lua gusaga ifofo nu ifua matshui, uvi tuajiya gualongesa nu guakuatesa ha gukuata ufuta nu Yehowa. Ha gufezegesa, henyaha tudi gale nu bavideo mu mazuelelo gubalega 100 a tutabu (mbobo). Tudi nji nu mikanda mu braille mu mazuelelo gubalega 60 nu video jiavula jiana khala nu muthu udi mukotelesa (audiodescription) mu mazuelelo gubalega 100 ha gukuatesa ifofo. Ima eyi yagasue yana gukuatesa ifua matshui nu ifofo ha gukolesa ufuta wawo nu Yehowa nu Yesu.

11. Luholo lutshi ulondegi wa Yehowa wana landula gifezegeselo gia Yesu gia guvuila athu agasue khenda? (Makal. 2:5-7, 33) (Tala nji ifuanesa.)

¹¹ Ulondegi wa Yehowa wana tshita yagasue ha gukuatesa athu a maluholo agasue ha gujiya Yehowa. Tangiza ndaga yakalegele Yesu gungima dia gufuzumuga guenji! Wabundudile nyuma ya Nzambi gudi alandudi enji hagula ajiya gulongesa lukuma luabonga gudi athu agasue adibungishile gu Wano wa Pantekote, muthu nu muthu “mu zuelelo dienji.” (Tanga Makalegelo 2:5-7, 33.) Mangino nji, mu utuameji wa Yesu, ulondegi wetu wana guzola mikanda mu mazuelelo gubalega 1 000; mazuelelo ako mukatshi dia mazuelelo ene ana guzuelewa phamba gudi athu azonda. Ha gufezegesa, mazuelelo ako ana guzuelewa gudi athu azonda lume akhala gu Nord nu gu Sud ya Amérique. Uvi mikanda yetu idi mu mazuelelo gubalega 160 a luholo elu nu yana gukuatesa athu avula ha guvua lukuma luabonga. Mikanda yetu idi nji mu mazuelelo gubalega 20 adifuana nu mazuelelo a enya Roma. Athu avula ana zuela mazuelelo ene abuile gale akombeledi a Yehowa.

12. Ukuateshi utshi uko tuana heta mu ulondegi wa Yehowa?

¹² Katula gukuatesa athu ha gujiya lukuma luabonga, ulondegi wa Yehowa wana tshita yagasue ha gukuatesa aphangi ana tagana nu malamba a mu gisagumuisa. Aphangi avula a mala nu a akhetu ana gudihana ha gukuatesa aphangi ana tagana nu malamba a luholo elu. Ulondegi wana gudihana nji muavula ha gutunga Jinzo jia Ufumu ha gukuatesa athu ha gujiya ndaga jiavula jiatadila Yehowa Nzambi wa guzumba.

NGANGA-NZAMBI WETU WAKOMA WAJIYA GUGUKUATESA

13. Yesu wana gutukuatesa mu maluholo atshi?

¹³ Yesu mubambi wetu wabonga wana tshigina egi tukhale nu ima yagasue yajiya gutukuatesa ha gubamba ufuta wetu nu Yehowa. (Yone 10:14; Ef. 4:7) Matangua ako, tuajiya gutagana nu ndaga jiko mu monyo wetu jinyi jiajiya gututuma ha gudivua gifua shinga ya muenda ushigo mulema muabonga nga gifua ditetete dia gufugula. Misongo yakola nga gubola tuakalegele nga mulonga tudi nawo nu phangi muko yajiya gutulebesa diago muila. Mu matangua a luholo elu, yajiya gukhala lamba ha gutuna gudisagesa nga gusha matangi etu mu felela dietu mukunda nu masugu adi muza. Ikhale ngenyi, tujimbilago egi Yesu udi mujiya muabonga ndaga tudi mutagana najio nu wana gutukotelesa muabonga. Wana tshigina gutukuatesa handaga wana gutuvuila khenda. Ha gufezegesa, wajiya gukalegela nyuma ya Nzambi ha guguhana ngolo gila muila waguleba. (Yone 16:7; Tito 3:6) Wajiya nji gukalegela akulu nu aphangi a mala nu a akhetu ha gugukuatesa nu ha guguhana gikhesa.​—Ef. 4:8.

14. Itshi wajiya gutshita gula muila waguleba?

¹⁴ Gila muila waguleba, zula tangua dia gutangigiza ginemo giakhala nagio Yesu gifua Nganga-nzambi wetu Wakoma. Ujimbilago egi Yehowa wamutumile ha mavu ha guhana monyo wenji gifua mulambu mukunda nu esue nu ha gukotelesa muabonga luholo athu ashigo atagana ana gudivua gula atagana nu malamba. Hene, gula waleba muila ha mulonga nu gubola gumoshi wakalegele, jiya egi Yesu udi hehi ha gugukuatesa “mu tangua diabonga.”​—Heb. 4:15, 16.

15. Itshi yakuatesele phangi mumoshi ha guvutuga mu hungu?

¹⁵ Yesu wana gutuameza akombeledi a Yehowa ha gukuatesa athu azolewe mu hungu ha guvutuga luko gudi Yehowa. (Mat. 18:12, 13) Tutadilenu lumene lua phangi Stefano.b Lusugu lumoshi wazudile desizio dia guya mu gudibungisa gungima dia ivo 12. Udi muzuela egi: “Ngavuile sonyi, uvi ngakhalele mutshigina guvutuga mu fami ya Yehowa. Akulu ngatele nawo maga anguyambele muabonga. Matangua ako, ngakhalele muvua gikenene mu luholo ngabembele Yehowa, ngakhalele nji muleba muila. Uvi aphangi anguwunguluishile egi Yehowa nu Yesu ana tshigina egi ngukolesele. Tangua ngavutugile mu hungu, aphangi agasue a mu hungu anguyambele nu fami yami nu gusuanguluga guagasue. Gungima mukaji’ami wasendesele gulonguga Biblia; mangino tuana kombelela Yehowa mu fami yetu.” Nganga-nzambi wetu Wakoma wana khala nu gusuanguluga ha gumona luholo mukut’etu agasue mu hungu tuana gukuatesa athu azolewe mu hungu ha guvutuga gudi Yehowa!

16. Mukunda natshi tuana hana Yehowa mersi mukunda Nganga-nzambi wetu Wakoma nu wa khenda?

¹⁶ Hakhalele Yesu ha mavu, wakuatesele athu avula mu tangua diabonga. Mangino, tuajiya lume gusha mutshima egi mbawutukuatesa nji mu tangua diabonga. Mu mavu ahe-ahe, mbawutukuatesa ha gukhala nu monyo watagana unu mbawushigo mukhala nu gubola. Tuana hana Yehowa Nzambi wetu mersi mukunda nu guzumba guenji nu khenda jienji jiamutumile ha guhaga mun’enji gifua Nganga-nzambi wetu Wakoma nu wa khenda!