Momwe aliyese mumpingu angathandizire mapfunziro ya Baibolo kuti yafikane pakubatiziwa

1-2. Ko nimbani angathandize mapfunziro ya Baibolo kuti yafikane pakubatizika?

NKAZI munango dzina yake Amy yemwe ankukhala ku Fiji adati: ‘Ningakonda maninge vomwe ningapfunzira m’Baibolo, ndipo ningatsimikizira kuti ni choonadi. Koma kucheza maninge na abale na alongo ndiko kudanithandiza kuchinja vinthu pamoyo kuti nifikane pakubatiziwa.’ Vimwevi vinkutsindika mpfundo yakuti: Pfunziro ya Baibolo ingafikane pakubatiziwa peno inkuthandiziwa na abale na alongo mumpingu.

² Wofalisa aliyese angathandizire kuti mpingu ukule. (Aef. 4:16) Mpainiya munango dzina yake Leilani, yemwe achakhala ku Vanuatu adati: ‘Nivoshupa kuti munthu m’bodzi alere mwana. Nchibodzibodzimbo na mapfunziro yathu ya Baibolo, kuti yafikane pakubatiziwa, wose mumpingu achadikana kuthandizira.’ Azibereki, azibale, azishamwali na maticha ku shikola wose anaudindo wothandizira kuti mwana akule bwino. Iwo achachita vimwevi mwakumulimbikisa na kumupfunzisa nkhani zodekana. Mwakulingana na mwevi, abale na alongo mumpingu anaudindo wolangiza, wolimbikisa na kupereka chitsanzo chabwino kumapfunziro ya Baibolo kuti ayathandize kufika pakubatizika.—Miy. 15:22.

3. Ko munkupfunzira chani pa vomwe Ana, Dorin, na Leilani adafotokoza?

³ Ndawa chani wofalisa achadikana kukondwa peno anango mumpingu ankuthandiza pfunziro yake? Bvani vomwe Ana mpainiya wapadera wa ku Moldova adanena. Iye adati: ‘Nivoshupa kuti munthu m’bodzi akwanirise vosowa vose va pfunziro ya Baibolo kuti ipite patsogolo.’ Dorin mpainiya wapadera yemwe ankutumikirambo mudziko mweyi adalewambo kuti: ‘Kazinji-kazinji wofalisa anango achafotokoza vinthu vomwe vichafika pamoyo pa wopfunzira wangu, vinthu vomwe nenze nikanati naviganizirako.’ Pakufotokoza ndawa yake tichadekana kukhala wokondwa anango akambathandiza pfunziro yathu, Leilani adati: ‘Wopfunzira wathu akambawona chikondi na chithandizo chomwe abale na alongo ankumuwonesa, adzazindikire mosashupa kuti ndisedi wanthu wa Yahova.’—Yoh. 13:35.

4. Ko tipfunzire chani mu nkhani ino?

⁴ Koma panango mungadzibvunze kuti, ‘manje nchani chaningachite kuti nithandize mapfunziro ya Baibolo kupita patsogolo podiya kuti niribe mapfunziro yangu-yangu?’ Naboni tikambirane vomwe tingachite tikakhala tachemerewa na munzathu kuti tichitise pfunziro, na vomwe tingachite peno wopfunzira wayamba kugumanika pa misonkhano. Tiwone soti momwe akulu angathandizire mapfunziro ya Baibolo kuti yafikane pa kubatizika.

MUKACHEMERAWA KUKACHITISA PFUNZIRO

5. Ko udindo wanu ni uponi mukachemerewa kuti mukachitise pfunziro na munzanu?

⁵ Wopfunzisa ndiye anaudindo wothandiza munthu kubvesa Mawu ya Mulungu. Vikakhala kuti munthu wakuchemerani kuti mukachite naye pfunziro, muchadekana kudzikonzekeresa. Udindo wanu nikumuthandiza. (Mla. 4:9, 10) Ko nchani chomwe mungachite pakuwonesa kuti munkuthandiza pa pfunziro?

6. Mukachemerewa kukachitisa pfunziro, mungaphatise tani basa Miyambo 20:18?

⁶ Konzekerani kukachitisa pfunziro. Chakuyamba, bvunzani munichiro wa pfunziro va pfunziro yake. (Lewengani Miyambo 20:18.) Mungamubvunze kuti: ‘Vinthu viritani pa moyo wa pfunziro yanu? Mukapfunzire naye nkhani yanyi? Chakulinga cha nkhani mweyi ni chani? Pali vinthu vinango vomwe vingakhalelini bwino kukavilewa kwa iye? Ko ningamulimbikise tani kuti apite patsogolo?’ Nivodziwikiratu kuti, wopfunzisa angakuuzenilini vinthu vinango vomwe ni vachintsintsi, koma vomwe angakuuzeni vingakhale vothandiza. M’mishonale munango dzina yake Joy achabvunza vimwevi akauziwa kuti akathandize kuchitisa pfunziro ya Baibolo. Iye adafotokoza maganizo yake kuti: ‘Mibvunzo ninge mwaya yachathandiza kuti woperekeza aidziwe bwino pfunziro nakuwona vangachite kuti amuthandize pa kupfunzira naye.’

7. Ndawa chani woperekeza achadekana kukonzekera?

⁷ Mukachemerewa kukachitisa pfunziro, vingakhale bwino kukonzekereratu nkhani yati mukapfunzire naye. (Ezara 7:10) M’bale Dorin watafotokoza kumayambiriro adati: ‘Nichakondwa peno munzangu woniperekeza wakonzekerambo pfunziro. Ndipo akachita vimwevi vichakhala vothandiza maninge.’ Kuthimizira mwapa, wopfunzira angakwanise kuwona kuti mose mwakonzekera, ndipo vimwevi vingamupase chitsanzo chabwino. Mukakhala mulibe kukonzekera nkhani yati mukapfunzire, vingakhale bwino kugumana nthawe yoikha mumsolo mpfundo zikulu-zikulu za mupfunziro.

8. Ko mungachite tani kuti pemphero yanu ikhale yobveka bwino pa pfunziro ya Baibolo?

⁸ Pemphero ni chinthu chodekana maninge pa pfunziro, ndipomwapa kumbukirani vamungakanene mu pemphero akakakukumbirani. Ndipo pemphero yanu ichadekana kukhala yobveka bwino. (Sal. 141:2) Hanae yemwe ankukhala ku Japão adakakumbukira mapemphero ya mulongo munango yemwe ambaperekeza angamupfunzisa. Iye adati: ‘Nidawona momwe iye aliri pa ushamwali wolimba na Yahova, ndipo ningada kukhalambo ninge iye. Nimbakomedzewa maninge akambaguma dzina yangu pakumaliza pemphero yake.’

9. Mobverana na Yakobo 1:19, ko nchani chomwe mungachite peno ndimwe woperekeza ku pfunziro ya Baibolo?

⁹ Thandizani wopfunzisa nkati mwa pfunziro. Omamuyovbi yemwe ankuchita upainiya wapadera ku Nigéria adati: ‘Woperekeza wabwino ni ule achathandiza pfunziro ikambafamba. Woperekeza achathandiza maninge koma osati ambayankhule vizinji, nivabwino kumusiya munikachiro wa pfunziro kuti ambatsogolere.’ Peno muchada kuyankhula chinthu, ko mungachite tani? (Miy. 25:11) Mumbatetekere bwino pomwe wopfunzisa na wopfunzira ankukambirana. (Lewengani Yakobo 1:19.) Mukachita teno mudzayankhule vothandiza pa nthawe yabwino. Komasoti, muchadekana kumbakumbuka mukanati mwayankhula. Panthawe zinango, muchadekanalini kuyankhula maninge, kumugwata mawu wopfunzisa, panango kuyambisa nkhani inango. Koma peno muchada kuyikhapo ndemanga panango chitsanzo chichadekana kubverana na nkhani yamunkupfunzira ndipo imbakhale yachigwato. Pa nthawe zinango mungawone kuti vingakhalelini bwino kuyikhirapo ndemanga pa pfunziro. Koma mukambamulimbikisa wopfunzira mwakuchita naye chidwi pa vachachita, mudzamuthandize kuyenda patsogolo.

10. Ko mbiri ya moyo wanu ingathandize tani wopfunzira Baibolo?

¹⁰ Fotokozani mbiri ya moyo wanu. Peno nivokwanisika, mungamufotokozere wopfunzira mwachigwato momwe mudapfunzirira choonadi, momwe mudapiririra mabvuto, panango momwe mudawonera Yahova ankukuthandizani pa moyo wanu. (Sal. 78:4, 7) Vingachitike kuti vimwevi ndivo vomwe wopfunzira achada kuvibva. Vimwevi vingamulimbikise chikhulupiriro kuti apite patsogolo mpakana kubatizika. Panango vimwevi vingamuthadize kuwona momwe angagwebanirane na mabvuto yomwe ankugumana nayo. (1 Pet. 5:9) Gabriel waku Brasil yemwe manje ankutumikira ninge mpainiya, adakakumbuka mwadaphindulira pangapfunzira Baibolo. Iye adati: ‘Pomwe ningabva abale ankufotokoza mbiri ya moyo wawo, nidapfunzira kuti Yahova achawona mabvuto yomwe tichagumana nayo. Ndipo peno iwo adakwanisa kupirira mabvuto, inembo ningakwanise.’

PENO WOPFUNZIRA BAIBOLO ANKUGUMANIKA PA MISONKHANO

11-12. Ndawa chani tichadekana kumbatambira na moyo wose pfunziro ya Baibolo ikafika ku misonkhano?

¹¹ Kuti wopfunzira Baibolo apite patsogolo kufika pa kubatizika, achadekana kugumanika pa misonkhano nthawe zose na kuphindula nayo. (Aheb. 10:24, 25) Ninge wopfunzisa, tichadekana kumbamuchemerera kumisonkhano. Iye akadzabwera, tose tingamutembeje na kumulimbikisa kuti apitirize kubwera ku Nyumba ya Ufumu. Ko ni njira ziponi zatingachitire vimwevi?

¹² Mumbamutambire wopfunzira na moyo wose. (Aro. 15:7) Wopfunzira Baibolo akadzibva kuti watambiriwa bwino, angapitirize kumbabwera ku Nyumba ya Ufumu. Mosachita kumupanikiza, mupaseni moni wopfunzira wanu mokondwa, ndipo mudziwikiseni kwa anango. Chezani naye, ndawa vingachitike kuti achamupfunzisa alibe kubwera, panango wapanikizika na vinthu vinango. Bveserani bwino-bwino vomwe wopfunzira angayankhule ndipo muwoneseni chidwi. Ko iye adzabve tani mukachita vimwevi? Bvani vomwe Dmitrii yemwe adabatizika magole ya manje-manje adanena, ndipo iye ankutumikira ninge ntumiki wothandiza. Iye adakakumbuka misonkhano yoyamba yomwe adachita, iye adati: ‘M’bale munango adaniwona nili imirire ku saidi inango ya Nyumba ya Ufumu, nenze na nkhope yokalipa, ndipo mokoma moyo adanitenga nkungenanane. Azinji adabwera kudzanimonisa. Nidadabwa maninge ndipo nidakonza vakuti nimbagumanike pamisonkhano mwaya sondo iliyose. Nenze nikanati nachitiriwako vimwevi chikhaliro.’

13. Ko khalidwe yanu ingathandize tani pfunziro ya Baibolo?

¹³ Khalani chitsanzo chabwino. Khalidwe yanu ingachitise pfunziro ya Baibolo kutsimikizira kuti yachigumanadi choonadi. (Mat. 5:16) Vitalii yemwe ankutumikira ninge mpainiya ku Moldova, adati: ‘Nidawona momwe anango mumpingu angakonderana, kuganizirana, na kukhulupirirana. Vimwevi vidanichitisa kutsimikizira kuti Mboni za Yahova ni gulu yomwe Mulungu akuitsogolera.’

14. Ko chitsanzo chanu chingamuthandize tani munthu kupita patsogolo?

¹⁴ Kuti wopfunzira apite patsogolo mpakana kukabatizika, achadekana kumbaphatisa basa vomwe achapfunzira. Koma nthawe zinango kuchita vimwevi nikoshupa. Koma pfunziro ikawona momwe imwepo munkuphindulira ndawa yophatisa basa mpfundo za m’Baibolo, iye angayambe kukutewedzerani. (1 Akor. 11:1) Onani chitsanzo cha Hanae yemwe wafotokozewa kumbuyo. Adati: ‘Abale na alongo angachita vinthu mosasiyana na vomwe ningapfunzira. Nidawona momwe ningalimbikisire wanthu, kuwakhululukira na kuwaonesa chikondi. Nthawe zose angasimba vinthu vabwino va anzawo. Ndipo vimwevi vimbanichitisa kuyamba kuwatewedzera.’

15. Ko lemba ya Miyambo 27:17 ingatithandize tani kuwona momwe tingakhalire pa ushamwali na pfunziro yomwe inkupitiriza kugumanika pa misonkhano?

¹⁵ Khalani pa ushamwali na pfunziro yanu. Wopfunzira wanu akambapitiriza kugumanika pa misonkhano mbamuwonesani chidwi. (Afil. 2:4) Vingakhale bwino kumbacheza naye. Vimwevi vidzawonese kuti munkumuyikhira nzeru, ndipo mungamulimbikise pa chinthu chilichose chomwe wawonesa kuchinja. Mungamubvunze va momwe achapfunzirira Baibolo payekha, momwe banja yake iliri, komasoti momwe basa yake inkufambira. Khayindi mweyi ya macheza idzachitise kuti mudziwane bwino. Mukakhala pa ushamwali na pfunziro yanu, mudzamuthandize kupita patsogolo mpakana kubatizika. (Lewengani Miyambo 27:17.) Hanae manje ankutumikira ninge mpainiya wokhazikika. Pakukumbukira nthawe yoyamba yomwe adagumanika pa misonkhano, iye adati: ‘Panidakhala na azishamwali azinji mumpingu, nimbafunalini kushota kumisonkhano, ndipo nimbayenda podiya nikhale woneta. Nimbakondwa kukhala pabodzi na azishamwali wangu anyowani, ndipo mwawa adanithandiza kumalisa ushamwali na wanthu omwe achatewedzalini mpfundo za m’Baibolo. Ningada kukhala pa ushamwali wolimba na Yahova na abale na alongo. Ndipomwapa nidasalula kudzipereka na kubatizika.’

16. Ko mungachite soti chani kuti muthandize pfunziro kudzibva kuti niyodikana mumpingu?

¹⁶ Wopfunzira akapitiriza kupita patsogolo na kuwonesa kuchinja, muthandizeni kudzibva kuti niwondekana mumpingu. Ndipo mungachite vimwevi mwakumutambira bwino. (Aheb. 13:2) Pakukumbukira mwevenzere mu ntsiku zomwe angapfunzira Baibolo Denis adati: ‘Nthawe na nthawe inepano na nkazi wangu tingachemerewa na abale kuti tiyende kumisonkhano. Iwo adatiuza momwe Yahova adawathandizira pa moyo wawo, ndipo vimwevi vidatilimbikisa maninge. Nthawe mwiyi idatithandiza kutsimikizira kuti tingadekana kutumikira Yahova kuti tikhale na moyo wabwino maninge.’ Peno wopfunzira wafika pakukhala wofalisa, mumbamutenge pakuyenda kukalalikira. Diego yemwe ni wofalisa wa ku Brasil adati: ‘Abale azinji anganitenga kuti tiyendere pabodzi mu umboni. Ndipo vimwevi vidanithandiza kuti niwadziwe bwino. Panidachita vimwevi, nidapfunzira vizinji, ndipo nidakhala pa ushamwali wolimba na Yahova na Yesu.’

KO AKULU ANGATHANDIZE TANI?

17. Ko akulu angathandize tani mapfunziro ya Baibolo?

¹⁷ Khalani na nthawe yocheza na mapfunziro. Akulu dziwani kuti khalidwe yanu ya chikondi kwa mapfunziro, ingawathandize kuti afikane pa kubatizika. Vingakhale bwino kumbacheza nthawe na nthawe na mapfunziro pa misonkhano. Mungawonese chidwi kwa iwo mwakusunga mumsolo madzina yawo, maka-maka pomwe waimisa djanja kuti apereke ndemanga. Mbagumanani nthawe yoperekeza wofalisa akambamuchitisa pfunziro ya Baibolo. Imwepo mungadziwelini momwe vimwevi vingamuthandizire. Mpainiya munango dzina yake Jackie yemwe ankukhala ku Nigéria adati: ‘Wopfunzira azinji achadabwa vikakhala kuti m’bale yemwe wamuperekeza ni nkulu. Wopfunzira Baibolo munango adati: ‘Abusa wathu angachitelini vimwevi. Iwo achazungira wanthu olemera okha kuti awapase mali.’’ Pfunziro mwiyi manje ichagumanika pa misonkhano.

18. Ko akulu angakwanirise tani basa yomwe adapasiwa, mobverana na Machitidwe 20:28?

¹⁸ Pfunzisani ndipo limbikisani wopfunzisa. Akulu munaudindo ukulu wothandiza ofalisa kuti ambapfunzise bwino mu umboni kuphatanidzapo mapfunziro yawo. (Lewengani Machitidwe 20:28.) Peno munango ankuchita manyazi kuchitisa pfunziro imwepo mulipo, kumbirani kuti muchitise. Jackie yemwe tamutomola manje-manjepa adati: ‘Akulu nthawe zose achanibvunza kuti adziwe momwe vinkufambira na mapfunziro yangu. Nikambagumana na mabvuto pakuchitisa pfunziro ya Baibolo, iwo achanipasa malangizo yothandiza.’ Akulu angachite vizinji pakulimbikisa wopfunzisa kuti ambapirire. (1 Ates. 5:11) Jackie adalewa pomwe kuti: ‘Vichanikomedza akulu akambanilimbikisa na kuniuza kuti akutembeja basa yomwe nikuphata mwakhama. Mawu ninge mwaya yachanikhazika moyo pasi, kukhala ninge ninkumwa madzi yozizira pomwe kuna dzuwa. Malangizo yawo yachanichitisa kuti nimbawathembe na kuti chimwemwe changu chithimizirike pakuchitisa mapfunziro ya Baibolo.’—Miy. 25:25.

19. Ko tose tingakhale wokondwa ndawa ya chani?

¹⁹ Podiya kuti manjeuno tiribe pfunziro ya Baibolo yathu-yathu, tingakwanise basi kuthandiza munthu kukula mwauzimu. Mosayankhula vizinji, tingafotokoze mwachigwato ndemanga zatakonzekera. Tingakhale pa ushamwali na mapfunziro yomwe yachabwera ku Nyumba ya Ufumu, na kuyesesa kukhala chitsanzo chabwino kwa iwo. Ndipo akulu angalimbikise wopfunzisa na wopfunzira mwa kupatula nthawe ya kuwapfunzisa. Mwachidziwikire, tidzakhale wokondwa ndawa ya kudziwa kuti tachita vose vatingakwanise kuti tithandize munthu kuyamba kukonda Ababa wathu Yahova na kumutumikira.