NKHANI YOPFUNZIRA 33
NYIMBO NA. 4 “Yehova Ndi M’busa Wanga”
Bvumani chikondi cha Yahova
‘Nankukwekweta kuti ubwere kwa inepano ndawa ya chikondi changu chokhulupirika.’—YER. 31:3.
CHOLINGA
Kupfunzira kudekana kotsimikizira kuti Yahova atikonda, kuona momwe tingaingizilire chikhulupiriro chathu pa chonadi mwechi.
1. Ko ndawa chani mudadzipereka kwa Yahova? (Onani pomwe foto.)
KO MUNKUKUMBUKIRA pa nthawe yomwe mudadzipereka kwa Yahova? Imwepo mudachita chosalula mwechi ndawa yakuti mudamudziwa bwino ndipo mudayamba kumukonda. Mudamupolomisa kuti mudzaikhe vofuna vake pa malo yoyamba, nakuti nthawe zose mudzamukonde na ntima wose, moyo wanu wose na mphanvu zanu zose. (Maliko 12:30) Kundochokera pamwapa, chikondi chanu kwa iye chidapitiriza kukula. Manje ko mungadawire tani peno munthu angakubvunzeni kuti: “Ko imwepo mukonda Yahova?” Mosakaika imwepo mungamudawire kuti: “Inepano nikonda Yahova koposha chinthu chirichose panango munthu aliyese.”
Ko munkukumbukira chikondi chomwe mwenze nacho kwa Yahova pomwe mudadzipereka kwa iye nkubatizika? (Onani ndime 1)
2-3. Ko Yahova ankufuna kuti timbatsimikizire chani, ndipo tikambirane chani mu nkhani ino? (Yeremiya 31:3)
2 Koma mungadawire tani peno munthu angakubvunzeni kuti: “Ko munkutsimikizira kuti Yahova akukondani?” Ko imwepo mungachite kuganiza kawiri kuti mumudawire, panango mungaganize kuti imwepo munkudekanalini chikondi cha Yahova? Mulongo munango yemwe adagumana na vinthu voshupa alimwana adanena kuti: “Inepano nikudziwa kuti nikonda Yahova, ninkutsimikizira vimwevi. Koma nthawe zizinji nikayikira kuti peno Yahova anikonda.” Ko mungadziwe tani vomwe Yahova aganiza kwa imwepo?
3 Yahova ankufuna kuti imwepo mukhale na chitsimikizo chakuti iye akukondani. (Werengani Yeremiya 31:3.) Chaivo ni vakuti adayamba ni Yahova kukukwekwetani kuti mukhale mu gulu yake. Pomwe imwepo mudadzipereka na kubatizika mudawina mphaso yodekana maninge yomwe ni chikondi chokhulupirika cha Yahova. Vimwevi vinkutsimikizira kuti Yahova akukondani na ntima wose ndipo angakusiyenilini ne pang’ono. M’chikondi mwechi chomwe chichitisa Yahova kuona atumiki wake kuphatanidzapo imwepo ninge ‘chuma chapadera.’ (Mal. 3:17) Yahova afuna kuti imwepo mumbadzibve ninge momwe ntumi Paulo ambadzibvera. Iye ambatsimikizira na ntima wose kuti Yahova ambamukonda. Ndipomwapa, iye adanemba kuti: “Ndawa natsimikiza ntima kuti impfa, moyo, angelo, maboma, vinthu vomwe viripo, vinthu vomwe vinkubwera, mphanvu, msinkhu, kunoka panango cholengewa chirichose, vidzakwaniselini kutilekanisa na chikondi cha Mulungu.” (Aro. 8:38, 39) Mu nkhani mweino, tione kuti ndawa chani tidekana kuingizira chikhulupiriro chathu chakuti Yahova atikonda, ndipo ni chani chomwe chingatithandize kuchita vimwevi.
KO NDAWA CHANI NI VODEKANA KUTSIMIKIZIRA KUTI YAHOVA ATIKONDA?
4. Ko tingalimbane tani na ubodzi mwa misapha ya Satana?
4 Tikambatsimikizira kuti Yahova atikonda, tikwanisa kulimbana na vochitika ‘voipa’ va Satana. (Aef. 6:11) Satana ayesese kuchita vomwe angakwanise kuti atiletse kutumikira Yahova. Ubodzi mwa misapha yomwe aphatisa basa ni bodza yakuti Yahova atikondalini. Ayi kuyebwa kuti Satana aphatisira basa mpata uliwose. Kawirikawiri iye atigopsa tikakhala kuti ndise osatetezeka, panango tikakhala na nkhawa na vomwe vidatichitikira kumbuyo, mabvuto yomwe tinkugumana nayo manjeuno panango kumbakaikira va tsogolo yathu. (Miy. 24:10) Satana ali ninge mphondolo yomwe iphata nyama ikakhala kuti niyosatetezeka. Tikakhala kuti ndise ofoka, Satana aphatisa basa mwayi moyu kuti atichitise kusiya kutumikira Yahova. Koma tikapitiriza kulimbisa chikhulupiriro chathu chakuti Yahova atikonda tidzakwanise ‘kumutsutsa’ Satana na misapha yomwe iye aphatisa basa manjeuno.—1 Pet. 5:8, 9; Yak. 4:7.
5. Ndawa chani tidekana kudzibva kuti Yahova atikonda?
5 Tikambatsimikizira kuti Yahova atikonda tikwanisa kumufenderera maninge. Ndawa chani tinkulewa mwevi? Yahova adatilenga munjira yakuti timbakonde anango komasoti kuti timbakondewe. Tikakhala kuti tinkukondewa, mwachibadwa tikwanisambo kumukonda munthu muyo. Ndipomwapa, tikambadzibva kuti Yahova atikonda komasoti atiikhira nzeru, tidzafunembo kumuwonesa chikondi. (1 Yoh. 4:19) Ndipo tikambamukonda maninge, iyembo adzatikonde maninge. Baibolo inena mwa sitiriti kuti: “Fendererani Mulungu ndipo iyembo adzakufenderereni.” (Yak. 4:8) Manje tingalimbise tani chikhulupiriro chathu chakuti Yahova atikonda?
KO NCHANI CHOMWE CHINGATITHANDIZE KUBVUMA CHIKONDI CHA YAHOVA?
6. Kuti tibvume chikondi cha Yahova, ko tidekana kukumbira chani mpemphero?
6 Pitirizani kupemphera kwa Yahova kuti akutsimikizireni kuti iye akukondani. (Luka 18:1; Aro. 12:12) Kumbirani kuti Yahova akuthandizeni kudziona momwe iye akuwonerani. Ndipo peno nkodekana, chitani vimwevi mobwerezabwereza ntsiku iriyose. Ni shuwadi kuti ni voshupa kuti ntima wathu utsimikizire kuti Yahova atikonda peno tinkukaikira. Koma kumbukirani kuti Yahova, ni nkulu koposha ntima wanu. (1 Yoh. 3:19, 20) Yahova akudziwani kuposha momwe mudzidziwira mwekha, iye aona vinthu mwa imwepo vomwe imwepo mungakwaniselini kuviona. (1 Sam. 16:7; 2 Mbiri 6:30) Ndipomwapa, ayi kuleka kupitiriza ‘kumukhuthulira’ Yahova va mu ntima mwanu, kukumbira thandizo kuti mubvume chikondi chake. (Sal. 62:8) Patsogolo pakuti mwapemphera, ni vabwino kutewedzera vinthu vinango vomwe ni vabwino maninge. Naboni tione vinthu vimwevi.
7-8. Ko lemba ya Salimo ititsimikizira tani kuti Yahova atikonda?
7 Thembani vomwe Yahova anena. Yahova adauzira wonemba Baibolo kuti afotokoze momwe iye aliri. Onani momwe Davide adafotokozera mwachikondi pakuonesa kuti Yahova atidera nkhawa maninge. Iye adanena kuti: ‘Yahova ali pafupi na wanthu wokwinyirira ndipo apulumusa wanthu omwe ni wokhumudwa.’ (Sal. 34:18) Mukakhala kuti ndimwe wokwinyirira, mungaganize kuti palibe munthu yemwe angakubveseni momwe imwepo munkubvera. Koma Yahova apolomisa kukhala pafupi na imwepo ndawa yakuti pa nthawe imweyi iye aona kuti imwepo munkudekana maninge thandizo yake. Pa Salimo inango, Davide adanemba kuti: ‘Sungani misozi yangu muthumba yanu.’ (Sal. 56:8) Yahova akwanisa kuona mukakhala kuti ndimwe wokwinyirira komasoti munkubonera. Iye akuderani nkhawa maninge, ndipo abvambo ululu womwe imwepo munkubva. Ninge momwe kadotho kamadzi kaliri kodekana kwa munthu yemwe ankufamba m’nchipululu, misozi yathu ni yodekana maninge kwa Yahova. Salimo 139:3, inena kuti: ‘Imwepo Yahova mudziwa chilichose chomwe ninkuchita.’ Yahova akwanisa kuona vose vomwe imwepo muchita, koma iye aikhira nzeru maninge pa vinthu vabwino vomwe imwepo muchita. (Aheb. 6:10) Ndawa chani? Ndawa yakuti iye atembeja vose vomwe imwepo mumuchitira kuti mumukondwerese.a
8 Na malemba mwaya yolimbikisa ya m’Baibolo, viri ninge Yahova ankunena kuti: “Inepano ninkufuna kuti iwepo udziwe kuti nikukonda maninge ndipo nikudera nkhawa.” Koma ninge momwe taonera pakuyamba, Satana ankufuna kuti timbawone vimwevi munjira yosiyana. Manje nthawe inango mukambadzakaikira vakuti Yahova akukondani, mudzadzibvudze kuti: ‘Ko nibvere mbani? “Baba wabodza” panango “Mulungu yemwe anena chaivo”?’—Yoh. 8:44; Sal. 31:5.
9. Ko Yahova awatsimikizira chani wose omwe amukonda? (Ekisodo 20:5, 6)
9 Ganizirani momwe Yahova aonera wanthu omwe amukonda. Ganizirani vomwe Yahova adauza Mose na Aizirayeli. (Werengani Ekisodo 20:5, 6.) Yahova adapolomisa kuti adzapitirize kuonesa chikondi kwa wanthu omwe amukonda. Mawu mwaya yatitsimikizira kuti vingakwanisikelini kwa Yahova kuleka kukonda wanthu omwe amukonda. (Neh. 1:5) Manje, mukayamba kukaikira kuti Yahova akukondani, dzibvunzeni kuti: ‘Ko inepano nikonda Yahova?’ Peno imwepo mukonda Yahova ndipo mukuyesesa kuchita vomwe mungakwanise kuti mumukondwerese, ankukutsimikizirani kuti akukondani na ntima wose. (Dan. 9:4; 1 Akor. 8:3) Mwa mawu yanango, peno imwepo mukaikiralini kuti mukonda Yahova, ko ndawa chani mukaikira kuti peno iye akukondani? Chikondi na kukhulupirika kwa Yahova ni vapadzulu maninge.
10-11. Ko Yahova afuna kuti mumbaione tani dipo? (Agalatiya 2:20)
10 Mbaganizirani va dipo. Ntsembe ya dipo ya Yesu Khrisitu, ni mphaso ya padzulu maninge yomwe Yahova adapereka kwa wanthu. (Yoh. 3:16) Koma ko ni mphaso ya padera kwa imwepo pamwekha? Inde. Mwakulinganiza, ganizirani va ntumi Paulo. Iye wenze adachita vinthu vizinji voipa, ndipo patsogolo pakuti wakhala Mkhrisitu ambadekana kupitiriza kulimbana na kusowa ungwiro kwake. (Aro. 7:24, 25; 1 Tim. 1:12-14) Iye ambaona dipo ninge ntsembe yomwe Yahova adaipereka kwa iye payekha. (Werengani Agalatiya 2:20.) Kumbukirani kuti ni Yahova yemwe adauzira ntumi Paulo kunemba mawu mwaya ndipo vose vomwe viri m’Baibolo vidanembewa kuti vitipfunzise. (Aro. 15:4) Ndipomwapa, mawu ya Paulo, yankuonesa momwe Yahova afunira momwe timbaiwonere dipo. Iye afuna kuti mumbaiwone ninge mphaso yapadera kwa imwepo pamwekha. Mukambawona dipo mwanjira mweyi, mudzakwanise kulimbisa chikhulupiriro chanu chakuti Yahova akukondani imwepo pamwekha.
11 Titembeja Yahova ndawa yotumiza Yesu kubwera pano pa dziko yapasi kudzatifera. Koma chifukwa chinango chomwe chidachitisa Yesu kumbwera pa dziko yapasi, ni chofuna kuuza wanthu anango va chonadi cholewa va Mulungu. (Yoh. 18:37) Chonadi mwechi chikuphatanidza chikondi chikulu chomwe Yahova anacho kwa wana wake.
KO YESU ATITHANDIZA TANI KUBVUMA CHIKONDI CHA YAHOVA?
12. Ko ndawa chani tidekana kutsimikizira pa vomwe Yesu adanena vokhudza Yahova?
12 Pomwe wenze pano pa dziko yapasi, Yesu ambakonda kuuza wanthu va makhalidwe yomwe Yahova anayo. (Luka 10:22) Tina vifukwa vabwino maninge, vomwe vitichitisa kukhulupirira vomwe Yesu adanena vokhudza Yahova. Inde, ndawa yakuti iye adakhala magole yazinji maninge na Yahova akanati kubwera pano pa dziko yapasi. (Akol. 1:15) Yesu chaiye ambadzibva kuti Yahova amukona maninge. Iye adaona pomwe momwe Yahova akondera wana wake omwe ni okhulupirika. Manje ko Yesu atithandiza tani kutsimikizira kuti Yahova atikonda?
13. Ko Yesu ankufuna kuti timbamuone tani Yahova?
13 Yesu atithandiza kuti timbamuwone Yahova ninge momwe iye amuwonera. M’Malemba yonena va ntontholo wabwino wa Yesu, iye adachemera Yahova maulendo yokwana 160 kuti “Ababa”. Pomwe ambayankhula na ateweri wake, Yesu ambanena Yahova kuti “Ababa wanu” panango “Ababa wanu wakudzulu.” (Mat. 5:16; 6:26) “Atumiki wa Yahova omwe adakhalapo Yesu akanati wabwera pa dziko yapasi, ambaphatisa basa madzina yazinji pakunena Yahova. Iwo ambanena kuti: ‘Waphanvu yose,’ ‘Wandzulundzulu,’ panango ‘Mulengi nkulu.’ Koma Yesu ambaphatisa basa kawirikawiri dzina yakuti ‘Ababa,’ yomwe yenze dzina yosashupa komasoti yodziwika. Na vimwevi iye adaonesa kuti Mulungu ankufuna kuti atumiki wake ambadzibve kuti alipafupi maninge na iye.” Vinkuchita kuonekeratu kuti Yesu afuna kuti isepano timbamuwone Yahova ninge momwe iye amuonera. Ninge baba wachikondi yemwe akonda maninge wana wake. Naboni tione vitsanzo viwiri vomwe vionesa momwe Yesu adaphatisira basa mawu yakuti “Ababa” pakufuna kuonesa momwe Yahova aliri.
14. Ko Yesu adaonesa tani kuti aliyese wa isepano ni wodekana kwa Yahova? (Mateyu 10:29-31) (Onani pomwe foto.)
14 Chakuyamba, onani vomwe Yesu adanena pa lemba ya Mateyu 10:29-31. (Werengani.) Mpheta ntumbalani tung’onotung’ono tomwe tungakwaniselini kukonda panango kutumikira Yahova. Olo nteno, Yahova atuganizira ito, ndipo adziwa iriyose ikagwa pasi. Manje ganizirani momwe Yahova atikondera na momwe aderera nkhawa aliyese wa isepano yemwe amutumikira ndawa ya chikondi. Ndipo Yesu adaingizira pomwe kuti: “Olo tsitsi yose ya munsolo mwanu aiwerenga.” Ndawa yakuti Yahova adziwa vinthu ving’onoving’ono kwa isepano, tingakaikirelini ne pang’ono kuti iye atikonda. Yesu afuna kuti aliyese wa isepano, ambadziwe kuti ndise wodekana pa maso pa Ababa wathu wakudzulu.
Yahova adera nkhawa maninge mpheta ndipo adziwa olo ibodzi ikagwa pasi. Manje linganizani momwe iye angakukondereni imwepo, munthu yemwe mumukonda komasoti kumutumikira. (Onani ndime 14)
15. Ko ni vinthu vinango viponi vomwe mawu ya Yesu yatipfunzisa pa nkhani ya Yahova? (Yohani 6:44)
15 Onani pomwe chitsadzo chachiwiri, pomwe Yesu adaphatisa basa mawu yakuti “Ababa” pa lemba ya Yohani 6:44. (Werengani.) Ni Yahova yemwe ndawa ya chikondi chake komasoti kukoma ntima kwake, adakukwekwetani imwepo kuti mubwere mu chonadi. Ko ndawa chani iye adachita mwevi? Ndawa yakuti Ababa wanu wakudzulu, adaona kuti imwepo muna ntima wabwino komasoti makhalidwe yabwino. (Mac. 13:48) Pomwe Yesu adanena mawu yomwe yali pa lemba ya Yohani 6:44 panango ambafotokoza va mawu yomwe yali pa lemba ya Yeremiya pomwe pachokera msolo wa nkhani yathu. Iye adanena kuti: ‘Nakukwekwetera kwa inepano ndawa ya chikondi changu chokhulupirika panango kuti nidzapitirize kukuonesa chikondi chokhulupirika.’ (Yer. 31:3; mawu ya m’nyantsi; onani pomwe Hoseya 11:4.) Ganizirani tanthauzo ya vimwevi. Ababa wathu wakudzulu, ankupitiriza kuona makhalidwe yanu yabwino yomwe panango imwepo mukwanisalini kuyaona.
16. (a) Ko Yesu ankutipfunzisa chani vokhudza Yahova, ndipo ndawa chani tidekana kumukhulupirira? (b) Ko mungalimbise tani chikhulupiriro chanu chakuti Yahova ni Baba wabwino maninge yemwe mudekana kukhala naye? (Onani bokosi yakuti: “Baba yemwe tose isepano tinkudekana.”)
16 Pomwe Yesu ambanena Yahova ninge Ababa wathu, venze ninge ankunena kuti: “Yahova ni Ababa wangulini nekha, imwepo pomwe ni Ababa wanu. Ninkunkutsimikizirani kuti akukondani, ndipo akuderani nkhawa.” Ndipomwapa, nthawe zinango mukambakaikira va chikondi cha Yahova, dzibvunzeni kuti: ‘Ko ni vabwinolini inepano kukhulupirira mawu ya Yesu yemwe adziwa bwinobwino Ababa wake kuposha munthu aliyese yemwe anena chaivo?’—1 Pet. 2:22.
PITIRIZANI KUKHULUPIRIRA KUTI YAHOVA AKUKONDANI
17. Ndawa chani tidekana kupitiriza kulimbisa chikhulupiriro chathu chakuti Yahova atikonda?
17 Tidekana kuchita virivose vomwe tingakwanise kuti tilimbise chikhulupiriro chathu chakuti Yahova atikonda. Ninge taonera mu nkhani mweyi, Satana ni m’zondi wathu yemwe ni woipa maninge yemwe afuna maninge kuti tifoke nkusiya kutumikira Yahova. Iye adzalekerini ne pang’ono kuyesa kugunduza chikhulupiriro chathu pakutinamiza kuti Yahova atikondalini. Ayi kuti tipusisike na bodza mweyi.—Yobu 27:5.
18. Ko mungalimbise tani chikhulupiriro chanu pa chikondi cha Yahova?
18 Kuti mulimbise chikhulupiriro chanu pa chikondi cha Yahova, pitirizani kukumbira kuti akuthandizeni kudziona ninge momwe iye akuonerani. Ganizirani va malemba ya m’Baibolo yomwe yafotokoza va chikondi cha Yahova na kuti adera nkhawa maninge wanthu omwe amukonda. Ganizirani kuti munthu akambakonda Yahova, vingakwanisekelini kuti Yahova aleke kumukonda munthu muyo. Ayi kuyebwa kuti dipo ni mphaso ya Yahova kwa imwepo pamwekha. Ndipo tsimikizirani pa vomwe Yesu adanena kuti: Yahova ni Ababa wanu wakudzulu. Manje munthu akakubvunzani kuti: “Ko munkutsimikizira kuti Yahova akukondani?” Imwepo mudzadawire mosaganiza kawiri kuti: “Inde iye anikonda. Ndipo inepano niyesesa kuchita vomwe ningakwanise ntsiku iliyose kuti nionese chikondi changu kwa iye.”
NYIMBO NA. 154 Chikondi Sichitha
a Kuti muone mavesi yanango yolimbikisa yomwe yatsimikizira chikondi cha Yahova kwa isepano, onani nkhani yakuti: “Kudzikayikira.” Mu bukhu ya Malemba yotithandiza pa moyo wathu wachikhrisitu.