NKHANI YOPFUNZIRA 32
NYIMBO NA. 38 Adzakulimbitsa
Ko Yahova, atithandiza tani kupirira?
“Mulungu yemwe awonesa kukoma ntima kose kukulu . . . adzakupaseni mphanvu, adzakuthandizeni kuti mupitirize kukhala okhulupirika ndipo adzakulimbiseni.”—1 PET. 5:10.
CHOLINGA
Tione vinthu vinayi vomwe Yahova atipasa na chakulinga chakuti atithandize kupirira na momwe tingaphindulire na chirichose pa vinthu mwevi.
1. Ndawa chani tinkudekana kupirira, ndipo nimbani angatithandize? (1 Petulo 5:10)
NDAWA yakuti moyo ni woshupa ntsiku zomalizira zino, tose tinkudekana kupirira. Anango ankulimbana na matenda yakulu, anango ana chisoni ndawa yakuti adaferewa munthu yemwe amukonda, pomwe anango ankubonera ndawa ya kuti ankutsutsiwa na wanthu wa m’banja mwawo panango kutsutsiwa na boma. (Mat. 10:18, 36, 37) Koma mungatsimikizire kuti viribe basa bvuto yomwe munkulimbana nayo, Yahova angakuthandizeni kuti mukwanise kupirira.—Werengani 1 Petulo 5:10.
2. Ko mphanvu zomwe zitithandiza kupirira zichokera kuponi?
2 Kupirira, kutanthauza kupitiriza kukhala olimba nkusaluza chidikhiro, olo pomwe tinkulimbana na mabvuto, chidzudzo panango chiyeso. Koma tingakwaniserini kupirira na mphanvu zathu zokha. Vimwevi vikwanisika ndawa yakuti Yahova atithandiza ndipo atipasa “mphanvu yoposha yachibadwa.” (2 Akor. 4:7) Mu pfunziro mweino, tione vinthu vinayi vomwe Yahova atipasa kuti tikwanise kupirira. Kuingizira pamwapa, tione momwe tingaphindulire na chirichose pa vinthu vimwevi.
PEMPHERO
3. Ko ndawa chani tingalewe kuti pemphero nichodabwisa chomwe chitithandiza kuyankhula na Yahova?
3 Yahova adachita chinthu chodabwisa kuti tikwanise kupirira. Iye adachitisa kuti olo kuti ndise ochimwa timbakwanise kuyankhula naye. (Aheb. 4:16) Ganizirani vinthu ivi: Tingapemphere kwa Yahova nthawe iriyose kukumbira chinthu chirichose chomwe tinkufuna. Tingayankhule naye mu chiyankhulo chirichose, pa malo yaliyose pomwe tiri tekha panango pomwe tiri mudjeri. (Yona 2:1, 2; Mac. 16:25, 26) Ndipo tikakhala okhumudwa maninge nkusowa mawu yoyankhula mpemphero, Yahova akwanisa kubvesa vomwe tinkufuna kunena. (Aro. 8:26, 27) Shuwadi, pemphero ni chinthu chodabwisa maninge chomwe tiphatisa basa pa kuyankhula na Yahova!
4. Ko tinkudziwa tani kuti kupemphera kuti tipirire vibverana na chifuniro cha Yahova?
4 M’Baibolo, Yahova atitsimikizira kuti “chirichose chomwe tingamukumbire mobverana na vomwe afuna, atibvera.” (1 Yoh. 5:14) Ko tingapemphere nkumukumbira Yahova kuti atithandize kupirira? Inde. Kuchita vimwevi kubverana na chifuniro chake. Tinkudziwa tani vimwevi? Tikambapirira olo kuti tinkugumana na mabvuto, tithandiza Yahova kudawira munthu yemwe amutsutsa yemwe ni Satana Dyerekezi. (Miy. 27:11) Kuingizira pamwapa, Baibolo inena kuti ‘Yahova ankufuna maninge kuonesa mphanvu zake kwa wanthu odzipereka na ntima wose kwa iye.’ (2 Mbiri 16:9) Ndipomwapa, tingatsimikizire kuti Yahova anamphanvu kuti atithandize kupirira ndipo iye ankufuna kuchita vimwevi.—Yes. 30:18; 41:10; Luka 11:13.
5. Ko pemphero ingatithandize tani kukhala na ntendere? (Yesaya 26:3)
5 Baibolo inena kuti mukambamuuza Yahova nkhawa zanu “ntendere wa Mulungu womwe wanthu angakwaniselini kuubvesa, udzateteze mitima yanu na maganizo yanu.” (Afil. 4:7) Umoyu ni mwayi ukulu maninge. Wanthu omwe atumikiralini Yahova agumanambo na mabvuto. Azinji ayesesa kunyang’ana ntendere wa m’maganizo munjira zosiyanasiyana. Mwakulinganiza, anango ayesesa kuleka kuganizira chirichose na cholinga chakuti achose maganizo yomwe yawachitisa kukhala na nkhawa. Koma kuleka kuganizira chirichose, ni ngozi ikulu maninge kwa isepano mwauzimu. (Linganizani na Mateyu 12:43-45.) Kuingizira pamwapa, ntendere womwe Yahova atipasa tikapemphera, niukulu maninge kuposha ntendere uliwose womwe munthu angaugumane ndawa yophatisa basa njira zinango. Tikapemphera tionesa kuti tinkuthemba maninge Yahova, ndipo phindu ni yakuti iye atipasa ‘ntendere wosapera.’ (Werengani Yesaya 26:3.) Ko iye achita tani vimwevi? Njira ibodzi yomwe aiphatisa basa, nkutikumbusa malemba yomwe yatitsimikizira kuti atikonda komasoti atifunira vinthu vabwino. Kukumbukira malemba mwaya, kuteteza ntima wathu na maganizo yathu.—Sal. 62:1, 2.
6. Ko imwepo mungaphatise tani basa mwayi wa pemphero? (Onani pomwe foto.)
6 Ko imwepo mungachite tani? Pomwe munkulimbana na chiyeso choyesa chikhulupiriro, ‘mutulireni Yahova nkhawa zanu.’ Ndipo pempherani kwa iye nkumukumbira ntendere. (Sal. 55:22) Kumbirani pomwe nzeru kuti mukwanise kulimbana na bvuto mweyo. (Miy. 2:10, 11) Kuingizira pamwapa, m’mapemphero yanu ayi kuyebwa kutembeja Yahova. (Afil. 4:6) Khalani tcheru kuti muone njira zomwe Yahova ankuphatisa basa kuti akuthandizeni, ndipo tembejani ndawa ya vimwevo. Ayi kubvuma kuti mabvuto yakuchitiseni kuleka kuona madaliso yomwe munkutambira.—Sal. 16:5, 6.
Imwepo mukapemphera, mukhala kuti munkuyankhulana na Yahova. Mukakhala kuti munkuwerenga Baibolo, Yahova akhala kuti ankuyankhula namwe (Onani ndime 6)b
MAWU YA MULUNGU
7. Ko ndawa chani kupfunzira Baibolo kutithandiza kupirira?
7 Yahova adatipasa Mawu yake kuti yatithandize kupirira. Pomwe tinkupfunzira Baibolo tigumana malemba yazinji yomwe yatitsimikizira kuti Yahova atithandiza. Onani chitsanzo chibodzi ichi. Lemba ya Mateyu 6:8 inena kuti: “Ndawa Ababa wanu adziwa vomwe munkufunikira mukanati mwawakumbira.” Adanena mawu mwaya ni Yesu, ndipo palibe yemwe amudziwa bwino Yahova kuposha iye. Ndipomwapa, tingatsimikizire na ntima wose kuti tikambalimbana na mabvuto, Yahova adziwa vomwe tinkudekana ndipo adzatisamalire. M’Baibolo muli malemba yazinji ninge mwaya yomwe yangatipase mphanvu kuti tikwanise kupirira.—Sal. 94:19.
8. Ko ni malangizo yaponi yomwe Baibolo itipasa, ndipo munkuona kuti mpfundo mwezi zingatithandize tani kupirira.
8 Mfundo za m’Baibolo zingatithandize kupirira. Inde, ndawa zitipasa nzeru kuti tikwanise kuchita vosalula vabwino. (Miy. 2:6, 7) Mwakulinganiza, Baibolo itilimbikisa kuti tileke kuda nkhawa na vinthu vamangwana (Mat. 6:34) Tikambakhala na chizolowezi chowerenga Baibolo komasoti nkumbaganizira mozama vomwe tawerenga, vidzakhale vosashupa kukumbukira mavesi ya m’Baibolo pa nthawe yomwe tinkuyafuna.
9. Ko nkhani za m’Baibolo zitithandiza tani?
9 M’Baibolo tigumanamo nkhani za wanthu ninge isepano omwe adathemba Yahova ndipo iye adawathandiza (Aheb. 11:32-34; Yak. 5:17) Kuganizira nkhani zimwezi kuingizira chikhulupiriro chathu chakuti Yahova ni ‘malo yothawirako komasoti mphanvu zathu ndipo ni thandizo yogumanika mosashupa pa nthawe ya mabvuto.’ (Sal. 46:1) Kuganizira vitsanzo va atumiki okhulupirika mwawa, kutilimbikisa kuti titewedzere chikhulupiriro chawo na kupirira kwawo.—Yak. 5:10, 11.
10. Ko imwepo mungaphindule tani na Mawu ya Mulungu?
10 Ko imwepo mungachite tani?. Mbawerengani Baibolo ntsiku iriyose ndipo khalani na ndandanda ya malemba yomwe yakuthandizani. Azinji awona kuti ni vabwino kuyamba ntsiku na kuchita lemba ya ntsiku ndawa yakuti angakhale na vinthu vabwino vomwe angaviganizire ntsiku yose. Ni vimweviletu vomwe vidachitikira mulongo munango dzina yake Marie,a pomwe ababa na amayi wake adagumanika na matenda ya khansa. Ko nchani chomwe chidamuthandiza kupirira? Pomwe angasamalira azibereki wake pa minyezi yomalizira ya moyo wawo, iye adanena kuti: “Ntsiku iriyose nimbawerenga lemba ya ntsiku ndipo nimbaganizira vomwe nawerenga. Chizolowezi mwechi chidanithandiza kukhala na maganizo yabwino nkuleka kumbandoganizira va ine na vomwe vinkunichitikira.”—Sal. 61:2.
ABALE NA ALONGO WATHU
11. Ko tibva tani tikambaganizira va khama ya abale wathu?
11 Yahova aphatisa basa abale na alongo kuti atithandize kupirira. Kundodziwa kuti ‘abale wathu pa dziko yose yapasi ankugumanambo na mabvuto ninge mwaya,’ vitithandiza kutsimikizira kuti tirilini tekha. (1 Pet. 5:9) Pa dziko yose, pana abale omwe ankugumanambo na mabvuto ninge isepano koma ankukwanisa kupirira. Vimwevi vinkuwonesa kuti viribe basa mabvuto yomwe tinkugumana nayo tingakwanisembo kupirira.—Mac. 14:22.
12. Ko abale na alongo wathu angatithandize tani, ndipo isepano tingawathandizembo tani? (2 Akorinto 1:3, 4)
12 Abale na alongo wathu, angatithandize kupirira na vomwe ayankhula na kuchita. Ntumi Paulo adaonambo vimwevi. Nthawe zizinji m’makalata yake iye ambatembeja thandizo ya abale yomwe ambatambira pomwe wenze mudjeri ndipo nthawe zinango ambachita kuwatomoleratu madzina. Abale adamulimbikisa ndipo adamupasa thandizo yakuthupi yomwe ambadekana (Afil. 2:25, 29, 30; Akol. 4:10, 11) Ntsiku zino vinkuchitikambo vimwevi. Tikadekana thandizo, abale na alongo akhala kumbali yathu, ndipo iwo akadekanambo thandizo isembo tikhalambo kumbali yawo.—Werengani 2 Akorinto 1:3, 4.
13. Ko nchani chidathandiza Maya kupirira?
13 Mu 2020 masocha yanango yadayenda kakasecha m’nyumba ya mulongo munango dzina yake Maya. Patsogolo pake adamutenga nkuyenda naye ku tiribunali ndawa ambayankhula va chikhulupiriro chake na wanthu anango. Pa chochitika mwechi, abale na alongo adamulimbikisa maninge Maya. Iye adanena kuti: “Penze nthawe zinango pomwe inepano nenze wokhumudwa maninge, pamwapa abale na alongo ambaniligaliri, kuninembera mamesaje nkumbaniuza kuti anikonda. Nthawe zose nimbadziwa kuti nina banja ikulu komasoti yachikondi. Kundochokera mu gole ya 2020 nidazindikira vimwevi munjira yapadera maninge.”
14. Ko tingachite tani kuti tiphatise bwino basa thandizo ya abale wathu? (Onani pomwe foto.)
14 Ko imwepo mungachite tani? Mukakhala kuti munkulimbana na mabvuto khalani pafupi na abale na alongo, ayi kuchita manyazi kukumbira thandizo ya akulu. Iwo angakhale malo ‘yobisalirapo chimphepo na malo yothawirapo chinvula champhepo.’ (Yes. 32:2, mawu ya m’nyantsi.) Kuingizira pamwapa, mbakumbukirani kuti abale na alongo ankugumanambo na mabvuto. Mukathandiza m’bale yemwe ankudekana thandizo, imwepo mukwanisa kuona vinthu mwachikatikati ndipo vikuthandizani kuti mupirire.—Mac. 20:35.
Khalani pafupi na abale na alongo (Onani ndime 14)c
CHIDIKHIRO CHATHU
15. Ko chidikhiro chidathandiza tani Yesu, ndipo isepano chingatithandizembo tani? (Aheberi 12:2)
15 Chidikhiro chomwe Yahova atipasa ni chaicho ndipo chitithandiza kupirira. (Aro. 15:13) Ni vimweviletu vomwe vidachitika na Yesu. Iye ambadziwa kuti akapitiriza kukhala wokhulupirika vithandize kuchenesa dzina ya Yahova. Yesu ambadikhira mwachidwi nthawe yokakhala pomwe na Ababa wake kudzulu ndipo patsogolo pake nkuyamba kutonga pabodzi na azibale wake. Chidikhiro mwechi chidamuthandiza kuti apirire ntsiku yoshupa maninge pa moyo wake pano pa dziko yapasi. (Werengani Aheberi 12:2.) Mwanjira ibodzibodzi, chidikhiro chathu chodzakhala mu dziko inyowani mpakana kalekale chitithandiza kulimbana na bvuto iriyose yomwe tingagumane nayo mu dziko ya Satana iyi.
16. Ko chidikhiro chidathandiza tani mulongo munango kupirira, ndipo imwepo mwapfunzira chani na vomwe iye adanena?
16 Onani momwe chidikhiro chodzakhala mu dziko inyowani chidathandizira mulongo munango waku Rússia dzina yake Alla. Mwamuna wake adaikhiwa mudjeri yodikhirira pakudikhira kutongewa kwa mulandu wake. Pomwe vimwevi vidachitika, Alla adanena kuti: “Kupempherera va chidikhiro chathu chakutsogolo, kudanithandiza kuti nileke kukhala na nkhawa maninge. Ninkudziwa kuti vose mwevi vidzamale manjemanje. Yahova adzawine ndipo isembo tidzawine.”
17. Ko tingachite tani kuti tiphindule na chidikhiro chomwe Yahova atipasa? (Onani pomwe foto.)
17 Ko imwepo mungachite chani? Patulani nthawe yoganizira tsogolo yabwino yomwe Yahova watipolomisa. Linganizani kuti munkukhala mu dziko inyowani ndipo mbaganizirani vinthu vose vomwe vimbadzakuchitiseni kukhala okondwa. Mukachita vimwevi mabvuto yose yomwe mudzalimbane nayo manjeuno yadzawoneke kuti ni ‘yakanthawe komasoti yang’ono.’ (2 Akor. 4:17) Kuingizira mwapa, chitani vose vomwe mungakwanise kuti mufotokozere anango va chidikhiro mwechi. Ganizirani momwe viriri voshupa kwa wanthu kulimbana na mabvuto ya dziko ya Satana iyi pomwe ankudziwalini chidikhiro chakutsogolo chomwe Mulungu watipasa. Macheza yang’ono maninge yangakhale yokwana kuti iwo ayambe kukhala na chidwi na chidikhiro mwechi.
Khalani na nthawe yoganizira va tsogolo yabwino yomwe Yahova ankutipolomisa (Onani ndime 17)d
18. Ndawa chani tidekana kuthemba mapolomisi ya Yahova?
18 Patsogolo pakuti wapirira mabvuto yazinji, Yobu adauza Yahova kuti: ‘Manje nadziwa kuti imwepo mukwanisa kuchita vinthu vose komasoti palibe chirichose chomwe mungafune kuchita chomwe mungakwaniselini.’ (Yobu 42:2) Yobu adapfunzira kuti palibe chomwe chingakangise Yahova kukwanirisa cholinga chake. Chonadi mwechi chingatipase mphanvu kuti tikwanise kupirira. Ganizirani chitsanzo ichi: Nkazi yemwe ana matenda yakulu niwokhumudwa ndawa yakuti wagumana na mafulumero yazinji, koma palibe yemwe wakwanisa kumuchirisa. Koma manje mfulumero yemwe ni wodziwa vizinji yemwe amuthemba wazindikira bvuto ya nkazi moyu ndipo ankumuuza thandizo yomwe atambire. Olo kuti ankudziwa kuti atenge nthawe kuti achire iye ankudzibva kukhala womasuka. Ko nchani chomwe chinkumuthandiza kukhala wopirira? Ni chidikhiro chabwino chomwe iye anacho, chidikhiro chakuti achire matenda yake. Mwanjira ibodzibodzi mweyi, kutsimikizira kuti chidikhiro chathu chakutsogolo chidzakwanirisike, kutithandiza kupirira.
19. Ko tidekana kuchita chani kuti tipirire?
19 Ninge momwe taonera, pemphero, Mawu ya Mulungu, abale wathu komasoti chidikhiro chathu ni thandizo yomwe Yahova atipasa kuti tikwanise kupirira. Tikambaphatisa bwino basa iriyose mwa mpfundo mwezi, tidzabve kuti Yahova ankutisamalira pa bvuto iriyose yomwe tinkugumana nayo. Komasoti tidzakwanise kupirira mpakana pa ntsiku yomwe mabvuto yose yoyambisiwa na dziko ya Satana iyi yadzamale.—Afil. 4:13.
NYIMBO NA. 33 Umutulire Yehova Nkhawa Zako
a Madzina yanango yachinjiwa.
b MAWU YOFOTOKOZERA MAFOTO: Pomwe nthawe inkuyenda, m’bale wachikulire ankupitiriza kupirira.
c MAWU YOFOTOKOZERA MAFOTO: Olo kuti papita magole yazinji, m’bale wachikulire ankupitiriza kupirira.
d MAWU YOFOTOKOZETRA MAFOTO: Pomwe minyezi inkuyenda m’bale ankupitiriza kupirira.