NKHANI YOPFUNZIRA 32
Tewedzerani Yahova ndipo khalani ololera
“Wanthu wose adziwe kuti ndimwe ololera.” —AFIL. 4:5.
NYIMBO NA. 89 Khalani Omvera, Kuti Mulandire Madalitso
VOMWE TIPFUNZIREa
Ko ndimwe khaindi iponi ya muti? (Onani ndime 1)
1. Ko Nkhrisitu angakhale tani ninge muti wodeba? (Onani pomwe foto.)
“WANTHU anango alewa kuti, mphepo igwesalini muti womwe ni wodeba.” Mawu mwaya yankuthandauza kuti miti yanango kuti yakhale yolimba kukabwera mphepo yachadekana kubvuma kuyenda kulikose komwe mphepo inkuyenda. Molingana na vimwevi kuti tikwanise kutumikira Yahova mokondwa tichadekana kukhala obvera tikagumana na mabvuto pa moyo wathu. Kuti tikwanise kulimbana na kuchinja kulikose komwe kungachitike pa moyo wathu na kulemekeza maganizo ya anango na momwe achaonera vinthu. Tichadekana kukhala ololera.
2. Ko ni makhalidwe yaponi yomwe yangatithandize kuzolowera vinthu vikachinja pa moyo wathu? Ndipo tione chani mu nkhani mweyi?
2 Ninge atumiki wa Mulungu, tinkufunika kuonesa kuti ndise ololera. Tichadekana kukhala okoma ntima na odzichepesa. Mu pfunziro mweyi, tione momwe makhalidwe mwaya yadathandizira Akhrisitu ananago kuti alimbane na kuchinja komwe kudachitika pa moyo wawo. Ndipo tione pomwe momwe makhalidwe mwaya yangatithandizire. Koma chakuyamba, naboni tione vomwe tingapfunzire pachitsanzo cha Yahova na Yesu womwe ni chitsanzo chabwino maninge pa nkhani ya kulolera.
YAHOVA NA YESU NI OLOLERA
3. Ko tinkudziwa tani kuti Yahova ni wololera?
3 Yahova achemerewa ‘kuti Ngaka’ ndawa yakuti iye ni wolimba na wosagunduzika. (Deut. 32:4) Koma panthawe ibodzibodzi mweiyo ni wololera. Mu dziko iyi vinthu vinkuchinja mwakankulumize. Koma mweyi nibvuto lini kwa Yahova ndawa yakuti iye ni wololera. Ndipo ankutsimikiza kuti mapolomisi yake yose yadzakwanilisike. Yahova adalenga wanthu muchifanizo chake, ndawa yavimwevi isepano tingakwanise kuzolowera vinthu vikachinja pa moyo wathu. M’Baibolo tigumana mpfundo zomwe zingatithandize kusalula vinthu mwanzeru, viribe basa vinthu vomwe vingabwere pa moyo wathu. Yahova na mpfundo zomwe achatipasa zititsimikizira kuti podiya kuti iye ‘ni Ngaka,’ iye ni wololera.
4. Perekani chitsanzo choonesa kuti Yahova ni wololera. (Levitiko 5:7, 11)
4 Vose vomwe Yahova achachita ni vaungwiro ndipo vionesa kuti iye ni wololera. Iye aperekalini malamulo yoshupa kwa wanthu wake. Mwakulinganiza, onani momwe iye adakhalira wololera na ntundu wa Aizirayeli. Ambakumbiralini kuti Aizirayeli olemera na osauka ambapereke ntsembe zolingana. Koma adauza Aizirayeli kuti aliyese angapereke ntsembe mobverana na momwe vinthu viriri pa moyo wake.—Lewengani Levitiko 5:7, 11.
5. Fotokozani momwe Yahova adaonesera chifundo na kudzichepesa.
5 Kukhala wodzichepesa na wachifundo kuchitisa kuti Yahova akhale wololera. Mwakulinganiza, kudzichepesa kwa Yahova kudaonekera bwinobwino pomwe iye ambafuna kudzonga wanthu oipa mu Sodomu. Pakuphatisa basa angelo Yahova adauza Loti munthu wokhulupirika kuti achoke nkuyenda kudera ya kumaphiri. Koma iye wenze na mantha ndipo ambafunalini kuyenda ku dera mweyi. Pamwapo Loti adakumbira kuti iye na banja yake athawire ku Zowari, thaundi ing’ono yomwe Yahova ambafunakale kuidzonga. Pamwapa Yahova adakandomuuza Loti kuti aphatisire basa malangizo yomwe Iye wenze adamupasa. Koma m’malo mwakuti amuuze teno Yahova adabvuma pomwe Loti adakumbira ndipo adachinja maganizo yake yakuti adzonge thaundi mweyire. (Gen. 19:18-22) Magole patsogolo pake, Yahova adawonesa pomwe chifundo kwa wanthu omwe ambakhala ku Nineve. Iye adatumiza mneneri wake Yona kuti akapereke chenjezo yakuti wanthu na nthaundi mweyire anzongewe. Koma pomwe wanthu wa ku Nineve adalapa Yahova adawabvera ntsisi ndipo alibe kudzonga nthaundi mweire.—Yona 3:1, 10; 4:10, 11.
6. Ko nivitsanzo viponi vomwe vinkuonesa kuti Yesu adatewedzera Yahova pa nkhani ya kulolera?
6 Yesu adatewenzera chitsanzo cha Ababa wake ndipo iyembo wenze wololera. Iye adatumiziwa padziko yapasi kuti akalalikire ‘kwa Nkhosa zotayika za nyumba ya Aizirayeli.’ Koma iye wenze wololera ndipo adalalikirapomwe kwa wanthu anango. Nthawe inango nkazi munango yemwe wenzelini mu Izirayeli adakumbira Yesu kuti amuchirisire mwana wake nkazi yemwe wenze na ‘mzimu wakuti ukamuphata umbamudzudza mwa nkhanza.’ Koma ndawa yachifundo Yesu adachita vomwe nkazi moule adamukumbira ndipo adamuchirisira mwana wake. (Mat. 15:21-28) Onani pomwe chitsanzo chinango. Kumayambiriro kwa utumiki wake, Yesu adalewa kuti: ‘Yemwe anilambe . . . , Inepano nidzamulambembo.’ (Mat. 10:33) Koma Yesu alibe kumulamba Petulo, podiya kuti iye wenze adamulamba Yesu maulendo yatatu. Iye ambadziwa kuti Petulo walapa ndipo ni mwamuna wokhulupirika. Pambuyo pakuti Yesu wamukisiwa adaonekera kwa Petulo ndipo mosakaika adamutsimikizira kuti amukonda ndipo wamukhululukira.—Luka 24:33, 34.
7. Mobverana na Afilipi 4:5, ko tichadekana kukhala na mbiri iponi?
7 Pakufika pano taona kuti Yahova na Yesu nthawe zose awonesa khalidwe imweyi ya kulolera. Manje tani isepano? Yahova adikhira kuti tichitembo chibodzibodzi. (Lewengani Afilipi 4:5.) Mu Baibulo inango vesi mweyi idatsumbudzuliliwa kuti: ‘Mbadziwikani na mbiri yakuti ndimwe ololera.’ Dzibvunzeni kuti: ‘Ko wanthu anidziwa kuti ndine wololera na wokonzeka kugonja? Panango anidziwa kuti ndine woshupa na wodzikuza? Panango nichichimiza anzangu kuti achite vinthu ninge momwe inepano ninkufunira kuti vichitikire? Ko nibvera malangizo ya anzangu na kuyatewedza pakafunika kuteno?’ Vithemba momwe tiriri ololera koma tikachita teno tidzaonese kuti tinkutewedza Yahova na Yesu. Naboni tione vinthu viwiri vomwe nivabwino maninge pakukhala wololera. Chakuyamba vinthu vikachinja pa moyo wathu, chachiwiri pomwe vosalula na maganizo yanzathu yakakhala yosiyana na yathu.
KHALANI OLOLERA VINTHU VIKACHINJA PA MOYO WANU
8. Ko nchani chomwe chingatithandize kukhala ololera vinthu vikachinja pa moyo wathu? (Onani pomwe mawu yanyantsi.)
8 Vinthu vikachinja pa moyo wathu tichadekana kukhala ololera. Kuchinja kumouku kungatibweresere mabvuto yomwe timbadikhiralini kuti yangatichitikire. Mwakulinganiza, tingadwale mwadzidzi, bvuto yosowa kobiri panango ndale zingachitise kuti vinthu vikhale voshupa maninge pa moyo wathu. (Mla. 9:11; 1 Akor. 7:31) Nthawe zinango utumiki wathu ukachinja ingakhale pomwe bvuto ikulu maninge kwa isepano. Viribe basa vomwe vingachitike, tingakwanise kuzolowera kuchinja kumouku peno tinkutewedza vinthu vinayi ivi: (1) kubvuma vinthu vomwe vinkuchitika, (2) kunyang’ana vinthu vantsogolo, (3) kuganizira vinthu vabwino ndipo (4) kuthandiza wanthu anango.bTione vomwe vidachitika vomwe vinkuonesa kuti vinthu vinayi vimwevi vingatithandize.
9. Ko banja inango ya amishonale idalimbana tani na m6abvuto yosadikhirika?
9 Bvumani vinthu vomwe vinkuchitika. Emanuele na Francesca adatumiziwa kuti akatumikire kudziko inango ninge amishonali. Pomwe adandoyamba kupfunzira chiyankhulo chinango na kudziwana na abale na alongo, matenda ya Koronaviru yadayamba. Ndipo venze vosabvumizika kuti agumane na abale na alongo ndawa ya matenda mwaya. Ndipo mosadikhirika amayi wa Francesca adamwalira. Pa nthawe imweyi iye ambafuna maninge kukhala na wanthu wa m’banja yake koma ndawa ya Koronaviru alibe kukwanisa kuyendako. Ko nchani chidathadiza Francesca kulimbana na bvuto imweyi? Chomwe chidamuthandiza ni mapemphero yomwe Emanuele ambapereka kwa Yahova pa kukumbira nzeru zamomwe angachitire vinthu ntsiku iliyose. Yahova adadawira mapemphero mwaya kuchokera pa chakudya chauzimu chomwe iye ambapereka pa nthawe yake. Mwakulinganiza, iwo adalimbikisiwa maninge na vomwe m’bale munango adalewa kuti: “Tikazolowera mwakankulumize momwe vinthu vachinjira pa moyo wathu, tidzabwezerese mwakankulumize kukondwa komwe tenze nako nakuphatisa basa bwino nthawe yathu pomwe vinthu vachinja pa moyo wathu.”c Iwo adakwanisa kuchinja nkuyamba kuphatisa basa ulaliki wa pa foni mpakana adakwanisa kukhala na pfunziro ya Baibolo. Kuingizira pamwapa, iwo adabvuma na kutembeja thandizo yomwe abale wamudera mweire ambawapasa ndipo adakhala wokondwa maninge. Mwakulinganiza, mulongo munango wachikondi ambawatumizira mensaje ntsiku iliyose, zomwe zimbakhala na lemba ya m’Baibolo. Mulongo moyu adachita vimwevi kwa gole ibodzi. Tikambabvumambo kuchinja komwe kwachitika pa moyo wathu, tidzakhalembo okondwa maninge pakutumikira Yahova na momwe vinthu viriri pa moyo wathu.
10. Ko mulongo munango adazolowera tani kuchinja komwe kudachitika pa moyo wake?
10 Kunyang’ana vinthu va ntsogolo na kuganizira vinthu va bwino. Christina, mulongo munango waku Romena yemwe akhala ku Japão, adakhala okhumudwa maninge padabva kuti mpingu wa Chingelezi yemwe iye ambasonkhana uyimisiwe. Koma iye ambandoganiziralini vimwevi, koma adayenda ku mpingu unango wachiyankhulo cha chi Japonês. Iye adachita vomwe angakwanise kuti ambakwanise kulalikira mu chi Japonês ndipo adakumbira munzake wachikulile waku basa kuti amupfunzise kuyankhula chi Japonês. Adakumbira shamwali wake moyu kuti aphatise basa Baibolo na bukhu yakuti Kondwani na moyo mpaka kalekale! kuti amupfunzise chi Japonês ndipo shamwali wake moyu adabverana navo. Mphindu yake ni yakuti Christina alibe kundodziwa kuyankhula chabe chi Japonês koma shamwali wake moyu adayamba kuchita chidwi na chonadi. Tikambaleka kuganizira vinthu vakumbuyo nkumbachita vinthu vabwino, tidzabvese kuti kuchinja kosadikhirika kungabwerese maphindu na madaliso yomwe timbadikhiralini.
11. Ko banja inango idakwanisa tani kulimbana na bvuto yosowa kobiri?
11 Kuthandiza wanthu anango. Banja inango yomwe ikhala ku dziko yomwe basa yathu ni yolambiziwa idayamba kukhala na bvuto yosowa kobiri pomwe dziko mweyi yenze yosauka. Ko iwo adazolowera tani? Chakuyamba iwo adayamba kukhala moyo wosafuna vizinji. Ndipo m’malo mwakuti ambandoganizira va mabvuto yawo iwo adayamba kumala nthawe ikulu maninge mu umboni kuti athandizembo anango. (Mac. 20:35) M’bale adalewa kuti: “Tikambaikha maganizo yathu mu umboni vidzatithandize kuti tileke kumbandoganizira vinthu vosathandiza koma kumbandoganizira cholinga cha Mulungu.” Vinthu vikachinja pa moyo wathu tichadekana kuganizira maninge kuthandiza anango makamaka abale na alongo wathu mu mpingu.
12. Ko chitsanzo cha Paulo chingatithandize tani kuti timbachinje njira zolalikilira?
12 Mu umboni tichadekanapomwe kukhala ololera. Tikambalalikira tigumana na wanthu omwe tichasiyana nawo chikhalidwe vomwe tichakhulupirira komasoti khaindi. Mtumi Paulo ambakwanisa kuchinja ndipo isepanombo tingapfunzire vizinji pa chitsanzo chake. Yesu adamuikha Paulo kuti akhale ‘mtumi wa makhaindi yose.’ (Aro. 11:13) Paulo adalalikira kwa Ayuda kwa Agiriki, Kwa wanthu osapfunza, kwa wanthu wamaudindo na mafumu. Kuti awafike pa ntima wanthu, Paulo adakhala ‘chilichose kwa wanthu wose.’ (1 Akor. 9:19-23) Iye ambaganizira komwe wanthu wachokera na vomwe achakhulupirira. Ndawa ya vimwevi iye ambachinjachinja njira zomwe ambalalikilira. Isepanombo tingaingizire buya yathu mu umboni tikambaganizira va mabvuto yomwe wanthu ankugumana nayo nkuchinja ulaliki wathu kuti ubverane na vinthu vomwe ankugumana navo.
MBALEMEKEZANI MAGANIZO YA ANANGO
Peno imwepo ndimwe ololera mudzalemekeze maganizo ya anango (Onani ndime 13)
13. Ko ni gozi iponi yotomolewa pa 1 Akorinto 8:9 tingakwanise kupewa tikambalemekeza maganizo ya anango?
13 Kukhala ololera kudzatithandize kulemekeza maganizo ya anango. Mwakulinganiza, alongo anango akonda makeyaji pomwe anango akondalini. Ndipo abale anango akonda kumwako pang’ono pomwe anango amwalini ne pang’ono. Koma tose isepano tifuna moyo wa thanzi koma tichasalula mosiyanasiyana momwe tichasamalilira moyo wathu. Tikambaganiza kuti ndise olungama nkumbachichimiza anango kuti achitembo vinthu ninge momwe isepano tinkuchitira, tidzachitise kuti anango akhumudwe ndipo tidzayambise kusabvana mu mpingu. Shuwadi, tinkufunalini kuti vimwevi vichitike! (Lewengeni 1 Akorinto 8:9; 10:23, 24) Naboni tione vinthu viwiri vomwe vinkuonesa kuti tikambaphatisa basa mpfundo za m’Baibolo, tidzakwanise kukhala munthu wachikatikati na kukhazikisa bverano mu mpingu.
Peno imwepo ndimwe ololera mudzalemekeze maganizo ya anango (Onani ndime 14)
14. Ko tichadekana kubaganizira chani tikambasalula momwe tigadzikongolesere na kavalidwe kathu?
14 Mavalidwe yathu na momwe tichagerera tsitsi. Yahova achatiuzalini momwe tingavarire koma iye achatipasa malangizo yakuti titewedze. Isepano tichadekana kuvala molemekeza Yahova Mulungu, mwanzeru na ‘moganiza bwino.’ (1 Tim. 2:9, 10; 1 Pet. 3:3) Isepano tichadekanalini kuti wanthu ambandoganizira momwe tichavalira. Vingathandize pomwe akulu kuti ayi kuti ambaikhe malamulo yamomwe tingavalire panango kudzikogolesa. Mwakulinganiza, mu mpingu unango akulu ambafuna kuthandiza abale omwe ambavala tsisi ifupi koma yosokoneza. Ko akulu mwawa adakathandiza tani alumbwana mwawa koma osachita kuwaikhira malamulo? Onyang’anira dera adathandiza akulu mwawa kuti akalewe ivi pakuuza alimbwana wale: “Mukakhala kuti munkukamba nkhani obvesera ankunyang’ana maninge momwe imwepo mwavalira koma ankuikhilalini nzeru pa nkhani yomwe imwepo munkukamba, mwevi vinkuonesa kuti pali kabvuto kamomwe imwepo muchavalira na momwe muchadzikogolesera.” Kufotokoza mwa njira mweyi kudathandiza abale wale kuti achinje koma mosachita kuwaikhira malamulo.d
Peno imwepo ndimwe ololera mudzalemekeze maganizo ya anango (Onani ndime 15)
15. Ko ni malamulo na mpfundo ziponi zomwe zingatithandize tikambasalula vinthu vokhudza thanzi yathu? (Aroma 14:5)
15 Kusamalira thanzi. Nkhrisitu aliyese achadekana kusalula momwe angasamalilire thanzi yake. (Agal. 6:5) Nkhrisitu akambasalula chithandizo cha mankhwala achadekana kuganizira nkhani ya kuikhiwa magazi na kutumikira mizimu. (Mac. 15:20; Agal. 5:19, 20) Nkhrisitu aliyese angasalule khaindi ya mankhwala yomwe angatambire. Anango andonyang’ana thandizo yamankhwala kuti achile pomwe anango anyang’ana thandizo inango ya mankhwala. Koma isepano tichadekana kulemekeza ufulu uliose womwe m’bale aliyese ali nawo wosalula thandizo ya mankhwala. Viribe basa peno tinkubverana navo panango neye. Pa vochitika mwevi tichadekana kuganizira vinthu ivi: (1) Ufumu wa Mulungu wokha ndiye yemwe udzamalise matenda yose. (Yes. 33:24) (2) Nkhrisitu aliyese achadekana kukhala ‘wokondwa na vomwe angasalule.’ (Lewengani Aroma 14:5.) (3) Ayi kuyesa kukhala chinthu chomwe chingawakhumudwise. (Aro. 14:13) (4) Akhrisitu aonesa chikondi ndipo adziwa kuti mbverano mu mpingu ni wodekana maninge kuposha maganizo yathu. (Aro. 14:15, 19, 20) Nthawe zose tikambaganizira mpfundo zinayi zimwezi tidzakwanise kukhala pa ushamwali na abale na alongo na kulimbikisa mbverano mu mpingu.
Peno imwepo ndimwe ololera mudzalemekeze maganizo ya anango (Onani ndime 16)
16. Ko nkulu angaonese tani kuti ni wololera akambachita vinthu na akulu anzawo? (Onani pomwe foto.)
16 Akulu achadekana kukhala chitsanzo chabwino pa nkhani ya kulolera. (1 Tim. 3:2, 3) Mwakulinganiza, nkulu achadekanalini kuti nthawe zose ambaganize kuti malangizo yake ndiyo yomwe yangaphatisiwe basa ndawa yakuti ni wachikulire kuposha akulu anango. Iye achadeka kumbaganizira kuti mzimu wa Yahova ungaphatisire basa nkulu aliyese kuti ayankhule vinthu vomwe vingathandize kuti asalule bwino vinthu. Peno akulu azinji ankubverana na maganizo yanango yomwe yankusiyanalini na mpfundo za m’malemba, nkulu wachikatikati angathandizire maganizo mwaya olo kuti iye anamaganizo yosiyana.
KUKHALA OLOLERA KUPHINDULISA MANINGE
17. Ko ni maphindu yaponi yomwe tingagumane tikakhala ololera?
17 Akhrisitu omwe ni ololera adalisiwa maninge. Mwakulinganiza, tikhala pa ushamwali na abale na alongo vomwe vilimbikisa mbverano mu mpingu. Ndise okondwa ndawa tinamwayi wodziwana na abale na alongo wamakhaindi yosiyanasiyana na vikhalidwe vosiyanasiyana. Ni vodabwisa maninge pakudziwa kuti olo kuti ndise osiyanasiyana tose titumikira Yahova mobverana. Koposha vose ndise okondwa kudziwa kuti tinkutewedza Ababa wathu wakudzulu Yahova yemwe ni wololela.
NYIMBO NA. 90 Tizilimbikitsana
a Yahova na Yesu ni ololera, ndipo afunambo kuti isepano tikhalembo teneuyu. Kukhala na makhalidwe mwaya vidzakhale vosashupa kuzolowera vinthu vikachinja pa moyo wathu. Mwakulinganiza, vinthu vingachinje pa nkhani ya kobiri panango thanzi yathu. Tikakhala ololera tidzalimbikise ngwirizano na ntendere mu mpingu.
b Onani nkhani yakuti “Zimene Mungachite Zinthu Zikasintha” mu Galamukani! Na. 4 2016.
c Nyang’anani vidiyo yakuti Kucheza Ndi M’bale Dmitriy Mikhaylov yobverana na nkhani yakuti “Yahova achachitisa chidzudzo kukhala ulaliki” mu Utumiki na moyo— wathu wachikhrisitu 2021 Março-Abril.
d Kuti mudziwe vizinji pa nkhani ya kavalidwe na momwe mungadzikongolesere, onani msolo 52 wabukhu yakuti Kondwani na moyo mpaka kalekale!