NKHANI YOPFUNZIRA 21
NYIMBO NA. 21 Muziika Ufumu Pamalo Oyamba
Fagani thaundi yomwe mudzakhalemo mpakana kalekale
“Koma tinkufunisisa thaundi yomwe inkubwera.”—AHEB. 13:14.
CHOLINGA
Kuona momwe lemba ya Aheberi msolo 13 ingatithandizire manjeuno komasoti kutsogolo.
1. Ko nchani chomwe Yesu adanena kuti chidzachitikire Yerusalemu?
NTSIKU zinganani Yesu akanati kufa, iye adanena va polomisi yomwe idakwanirisiwa koyamba mu ntsiku zomalizira za utongi wa Ayuda. Iye adachenjeza kuti ntsiku inango, thaundi ya Yerusalemu idzazunguliriwe na “magulu ya nkhondo.” (Luka 21:20) Yesu, adauza pomwe opfunzira wake kuti akandodzaona vimwevi vinkuchitika, iwo adekana kudzathawiratu nthawe imweyo. Mawu mwaya yadakwanirisika pomwe masocha ya Chiroma yadazungulira Yerusalemu.—Luka 21:21, 22.
2. Ko ni chenjezo iponi yomwe ntumi Paulo adaipereka kwa Akhrisitu omwe ambakhala ku Yerusalemu na ku Yudeya?
2 Kwandosala magole pang’ono kuti masocha ya Chiroma yazungulire Yerusalemu, ntumi Paulo adanemba chinthu chodekana maninge chomwe ni bukhu ya Aheberi. M’bukhu mweyi iye adapereka malangizo kwa Akhrisitu wa ku Yerusalemu na ku Yudeya, yomwe yadakawathandiza kukonzekera vinthu vomwe venze vidandosala pang’ono kuchitika. Ko nchani chomwe chimbafuna kuchitika? Paulo adachenjeza va thaundi ya Yerusalemu kuti: “Ndawa pakali pano tiribe thaundi yokhazikika, koma tinkufunisisa thaundi yomwe inkubwera.” (Aheb. 13:14) Yerusalemu ambadzadzongewa. Peno Akhrisitu ambafuna kupulumuka, iwo ambadekana kukhala okonzeka kusiya nyumba zawo na bizi zawo.
3. Ko “thaundi yomwe Mulungu ndiye adakonza mapulani yake” ni iponi ndipo ndawa chani tinkuifaga?
3 Akhrisitu omwe adasaina kusiya thaundi ya Yerusalemu komasoti Yudeya, ambatsutsiwa komasoti kunyozewa. Koma chosalula chimwechi chidapulumusa moyo wawo. Ntsiku zinombo, isepano titsutsiwa ndawa yakuti tithembalini wanthu panango kobiri ndipo tiganizalini kuti kukhala na moyo wabwino kungatiteteze. “Ndawa tinkudikhira thaundi yomwe Mulungu ndiye adakonza mapulani yake.” “Tinkufunisisa thaundi yomwe inkubwera,” panango kuti Ufumu wa Mulungu. (Aheb. 11:10; Mat. 6:33) Ko ndawa chani tinkuchita vimwevi? Ndawa yakuti tinkudziwa kuti dongosolo ino ntsiku zake ni zowerengeka. Mupfunziro ino tione makhalidwe yomwe Paulo adalimbikisa Akhrisitu kukhala nayo kuti apitirize kufaga Ufumu wa Mulungu na kuti adzikonzekerese ku vinthu vomwe vimbadzachitika kutsogolo. Tipfunzire pomwe momwe makhalidwe mwaya yangatithandizire manjeuno.
THEMBANI YAHOVA NDIPO IYE ADZAKUSIYENILINI
4. Ko ndawa chani thaundi ya Yerusalemu yenze yodekana kwa Akhrisitu?
4 Thaundi ya Yerusalemu yenze yodekana maninge kwa Akhrisitu. Mpingo wakuyamba wa Chikhrisitu udakhazikisiwa muthaundi mweyi mugole ya 33 Yesu wayenda kale kudzulu, ndipo abale wa mbungwe yotonga ambakhala pomwe kumoku. Ndipo Akhrisitu azinji enze na nyumba na vinthu vinango vodekana. Olo venze teno Yesu adachenjeza ateweri wake kuti ambadekana kudzachoka mu Yerusalemu na dera yose ya Yudeya.—Mat. 24:16.
5. Ko Paulo adawakonzekeresa tani Akhrisitu ku vomwe vimbadzachitikira Yerusalemu?
5 Paulo ambafuna kuti Akhrisitu wa ku Yerusalemu akhale okonzeka pa vomwe vimbadzachitika. Ndipomwapa, iye adawathandiza kuti ambaone vinthu molingana na momwe Yahova ambavionera pa nkhani ya thaundi mweire. Paulo adakumbusa Akhrisitu mwawa kuti kwa Yahova kachisi na ntsembe zomwe wantsembe ambapereka, venzelini pomwe vodekana kwa Yahova. (Aheb. 8:13) Wanthu azinji omwe ambakhala ku Yerusalemu, enze adalamba Mesiya. Ndipo kachisi wenze adaleka kukhala malo yopempherera chaiko. Ndipomwapa, thaundi kuphatanidzapo kachisi, vimbadzadzongewa.—Luka 13:34, 35.
6. Ko ndawa chani Akhrisitu ambadekana malangizo yomwe Paulo adayapereka pa Aheberi 13:5, 6?
6 Pomwe Paulo adanembera kalata Akhrisitu wa ku Heberi, Yerusalemu yenze thaundi yobvekera maninge. Mpakana wonemba mabukhu wa Chiroma pa nthawe mweyi, adenemba kuti: “Thaundi ya Yerusalemu, yenze yobvekera maninge pa dziko yose yapasi.” Ndipo Ayuda wa m’madera yosiyanasiyana, ambayenda ku thaundi mweyi kuti akachite mafesta. Vimwevi vimbathandizira kuti thaundi mweyi ikhale yobvekera maninge. Vinkuchita kuonekeratu kuti Akhrisitu anango ambaphindulambo na kudala kwa thaundi mweyi. Panango vimwevi ndivo vomwe vidachitisa Paulo kunena kuti: “Ayi kumbakonda kobiri, koma mumbakhutire na vomwe muli navo panthawe mwiyo.” Iye adakumbusa pomwe Akhrisitu va polomisi yodekana maninge yomwe Yahova wenze adaichita. Iye adati: “Nidzakusiyenilini panango kukutayani olo pang’ono.” (Werengani Aheberi 13:5, 6; Deut. 31:6; Sal. 118:6) Akhrisitu omwe ambakhala ku Yerusalemu na ku Yudeya, ambadekanadi chitsimikizo chimwechi. Ko ndawa chani? Ndawa yakuti pomwe padandopita kanthawe pang’ono wandotambira kalata mweyi, iwo ambadekana kusiya nyumba zawo, bizi zawo komasoti vinthu vose vomwe enze navo. Ambadekana pomwe kukayamba moyo unyowani ku dera yachilendo, ndipo vimwevi venze vinthu voshupa maninge.
7. Ko ndawa chani tidekana kupfunzira kuthemba maninge Yahova manjeuno?
7 Vomwe tinkupfunzira: Manjemanjepa, tidzaone kumala kwa dongosolo mweino, pa “chisautso chikulu.” (Mat. 24:21) Ninge Akhrisitu wa ku Yerusalemu, tichadekana kukhala maso komasoti okonzeka. (Luka 21:34-36) Pa nthawe ya chisautso chikulu, panango pangadzadekane kusiya vinthu vathu vinango panango vose, nkundothemba na ntima wose kuti Yahova atisiyelini. Kundoyambira manjeuno chisautso chikulu chikanati kuyamba, tina mwayi woonesa chinthu chomwe tinkuthemba. Dzibvunzeni kuti: ‘Ko vosalula vangu na vomwe ninkufuna kudzachita kutsogolo vionesa kuti nithembalini kobiri koma Mulungu yemwe adanipolomisa kuti adzanisamalire?’ (1 Tim. 6:17) Chitsanzo cha Akhrisitu wakumbuyo chingatithandize kupitiriza kukhala okhulupirika. Koma vomwe adagumana navo, niving’ono maninge pakulinganiza na vomwe tidzagumane navo pa “chisautso chikulu.” Manje, ko tingadziwe tani vomwe tidzachite chisautso chikulu chikadzayamba?
MUMBABVERE OMWE ANKUNYANG’ANIRA
8. Ko ni malangizo yaponi yomwe Yesu adapasa opfunzira wake?
8 Pomwe idandopita nthawe pang’ono Akhrisitu wa ku Heberi watambira kalata ya Paulo, iwo adaona masocha ya Chiroma yankuzungulira Yerusalemu. Chimwechi chenze chizindikiro chakuti iwo athawe ndawa yakuti thaundi mweyi imbafuna kudzongewa. (Mat. 24:3; Luka 21:20, 24) Manje, ko iwo adakayenda kuponi? Yesu wenze adandowauza kuti: “Omwe ali mu Yudeya adzayambe kuthawira kumapiri.” (Luka 21:21) Koma kwenze mapiri yazinji maninge kudera mweire. Ko manje iwo adakathawira kuponi?
9. Ko ndawa chani venze voshupa kwa Akhrisitu kusalula komwe ambadekana kuthawira? (Onani pomwe mapa.)
9 Onani madera yanango yomwe Akhrisitu mwawa adakathawirako: Mapiri ya ku Samariya, Galileya, phiri ya ku Herimoni, mapiri ya ku Lebanoni na yanango yomwe yenze ku dera inango ya Yorodano. (Onani mapa.) Mathaundi yanango yomwe yambakhala dera mweyi ya mapiri, panango yambaoneka yotetezeka. Mwakulinganiza, thaundi ya Gamla, yenze padzulu pa phiri itali maninge. Ndipo kwenze koshupa kufikako. Ayuda anango adaona thaundi mweyi kuti kwenze kwabwino kuthawirako. Koma thaundi ya Gamla, yadakhala malo ya nkhondo komwe kumbachitika vipiringu pakati pa Ayuda na Aroma. Ndipo wanthu azinji omwe ambakhala kumoku adafa.a
Penze mapiri yazinji maninge yomwe Akhrisitu adakathawirako. Koma ni yoselini komwe kwenze kotetezeka (Onani ndime 9)
10-11. (a) Ninge momwe taonera, ko Yahova adatsogolera tani Akhrisitu? (Aheberi 13:7, 17) (b) Ndawa chani venze vabwino kwa Akhrisitu kubvera omwe ambanyang’anira mumpingo? (Onani pomwe foto.)
10 Vinkuoneka kuti Yahova adatsogolera Akhrisitu pakuphatisa basa abale omwe ambanyang’anira mumpingo. Wonemba nkhani munango dzina yake Eusébio, adanemba kuti: “Ndawa ya nzeru ya Mulungu, wanthu wa mumpingo wa Yerusalemu, adatambira chivumbuluso choperekewa na amuna obvumizika . . . iwo adalamuliwa kuti achoke mu thaundi, nkhondo ikalibe kuyamba nkukakhala mu thaundi inango ya Pereya yomwe imbachemerewa kuti Pela.” Thaundi mweyi, idakhala malo yabwino maninge kwa Akhrisitu. Ndawa yakuti thaundi mweyi yenzelini kutali na Yerusalemu, ndipo kwenze kosashupa kufikako. Kuingizira pamwapa, wanthu azinji wa mu thaundi mweyi enze wa makhaindi yanango. Ndipomwapa, thaundi mweyi iribe kusokonezewa na Ayuda omwe enze otengeka maganizo, omwe adamenyana na Aroma.—Onani mapa.
11 Akhrisitu omwe adathawira ku mapiri, adatewedza malangizo ya Paulo yakuti “mumbabvere omwe ankukutsogolerani” mumpingo. (Werengani Aheberi 13:7, 17.) Kubvera, kudapulumusa moyo wawo. Nkhani mweyi itsimikizira kuti Mulungu alibe kusiya wanthu wale omwe “ambadikhira thaundi chaiyo, thaundi yomwe Mulungu ndiye adakonza mapulani yake.”—Yomwe ni Ufumu wa Mulungu.—Aheb. 11:10.
Pela yenze thaundi yotetezeka ndipo yenze kufupi na ku Yerusalemu (Onani ndime 10-11)
12-13. Ko Yahova, watsogolera tani wanthu wake mu nthawe zoshupa?
12 Vomwe tinkupfunzira: Yahova aphatisa basa omwe ankunyang’anira mumpingo kuti apereke malangizo yobveka bwino kwa wanthu wake. M’Baibolo, mu na vitsanzo vizinji maninge va momwe Yahova adaphatisira basa amuna okhulupirika, kuti atsogolere wanthu wake mu nthawe yoshupa. (Deut. 31:23; Sal. 77:20) Ndipo ntsiku zino tina vitsanzo vizinji maninge, vakuti Yahova ankupitiriza kutsogolera wanthu wake pa kuphatisa basa abale omwe ankunyang’anira.
13 Mwakulinganiza, pomwe matenda ya Koronaviru yadayamba, abale “omwe . . . anyang’anira,” adatipasa malangizo yodekana. Akulu adatambira malangizo ya momwe angasamalilire vosowa vauzimu va pa mpingo. Pomwe matenda ya Koronaviru yadandoyamba, tidakhala na nsonkhano wosayebweka womwe udaulutsiriwa pa interneti, pa TV, na m’maradiyo mu viyankhulo voposha 500. Kugawira chakudya chauzimu, kulibe kusokonezewa. Ndipo phindu yake, ni yakuti tidapitiriza kukhala obvana. Tinkutsimikiza kuti, viribe basa mabvuto yomwe tidzalimbane nayo kutsogolo, Yahova adzapitirize kuthandiza abale omwe atinyang’anira, kuti akwanise kusalula vinthu mwanzeru. Koma kuingizira pa kuthemba Yahova na kukhala obvera, ko ni makhalidwe yanango yaponi yomwe yangatithandize kukonzekera kuti tidzakwanise kulimbana na chisautso chikulu nakuti tidzakwanise kuchita vinthu mwanzeru pa nthawe yoshupa mweyi?
PITIRIZANI KUKONDA ABALE NA KUMBATAMBIRA ALENDO
14. Mobverana na lemba ya Aheberi 13:1-3, ko ni makhalidwe yaponi yomwe Akhrisitu ambadekana kuyaonesa, kumapeto kwa dongosolo ya Ayuda?
14 Manjemanjepa, tidzadekane kuonesana chikondi maninge kuposha kale yose. Chomwe chidzatithandize, ni kutewedza chitsanzo cha Akhrisitu omwe ambakhala ku Yerusalemu na ku Yudeya. Iwo, ambaonesana kale chikondi. (Aheb. 10:32-34) Koma kumapeto kwa dongosolo ya Ayuda iwo ambadekana ‘kukondana maninge’ na “kutambira alendo.”b (Werengani Aheberi 13:1-3.) Pa nthawe ya chisautso chikulu, isembo tidzadekane kuchita vimwevi.
15. Ko ndawa chani Akhrisitu ambadekana kuonesana chikondi na kutambira alendo, komwe adathawira?
15 Pomwe masocha ya Chiroma yadazungulira Yerusalemu patsogolo pake nkubwerera, Akhrisitu adathawa koma alibe kutenga vinthu vizinji. (Mat. 24:17, 18) Pomwe ambayenda ku mapiri na kukayamba moyo unyowani, iwo ambadekana kumbathandizana. Shuwadi, abale azinji ambadekana chakudya, vovala komasoti na malo yokhala. Vimwevi vidapasa mwayi Akhrisitu kuti aonesane chikondi chaicho komasoti kukhala otambira alendo na kugawana vinthu vomwe iwo wenze navo.—Tito 3:14.
16. Ko tingaonese tani chikondi abale wanthu omwe ankudekana thandizo? (Onani pomwe foto.)
16 Vomwe tinkupfunzira: Chikondi, chitilimbikisa kuthandiza atumiki anango wa Yahova peno ankudekana thandizo. Mwakulinganiza, manjemanjepa, abale na alongo anango ambadekana kuthawa m’madziko yawo ndawa ya nkhondo komasoti matsoka ya nchilengedwe. Koma azinji mwa abale wathu pa dziko yose, adadzipereka kuthandiza mwakuthupi komasoti mwauzimu. Mulongo munango wa ku Ucrânia yemwe ambadekana kuthawira kudziko inango ndawa ya nkhondo, adanena kuti: “Isepano tidaona djanja ya Yahova inkutitsogolera na kutithandiza pakuphatisa basa abale. Iwo adatitambira bwino komasoti adatithandiza ku Ucrânia ku Hungria komasoti kuno ku Alemanha.” Wale omwe ni otambira alendo komasoti asamalira vosowa va abale wawo, ni wanthu odekana maninge kwa Yahova.—Miy. 19:17; 2 Akor. 1:3, 4.
Ntsiku zino, abale azinji omwe athawa m’madziko yawo, adekana thandizo yathu (Onani ndime 16)
17. Ko ndawa chani ni vodekana kupfunzira kukonda abale na kutambira alendo manjeuno?
17 Shuwadi, thandizo yomwe tipereka kwa abale na alongo wathu, idzakhale yodekana maninge kutsogolo. (Hab. 3:16-18) Yahova, ankutipfunzisa manjeuno, ndipo makhalidwe mwaya yadzakhale yodekana maninge pa nthawe ya chisautso chikulu.
VOMWE TINKUDIKHIRA KUTSOGOLO
18. Ko tingatewenzere tani chitsanzo cha Akhrisitu omwe adathawa ku Yerusalemu?
18 Nkhani ya kudzongewa kwa thaundi ya Yerusalemu, ititsimikizira kuti Akhrisitu omwe adabvera nkuthawira ku mapiri, adakwanisa kupulumuka pomwe thaundi mweyi idadzongewa. Iwo ambadekana kusiya thaundi, koma Yahova alibe kuwasiya. Ko tingatewedzere tani chitsanzo chawo? Tinkudziwalini vose vomwe tinkudikhira kutsogolo. Koma Yesu, adachenjeza kuti tidekana kukhala okonzeka komasoti obvera. (Luka 12:40) Ndipo tikaganizira pomwe vomwe Paulo adanembera Akhrisitu wa ku Heberi, malangizo mwaya yangakhale pomwe yodekana manjeuno ninge momwe yenzere yodekana pa nthawe mweire. Kuingizira pamwapa, tingakumbukire pomwe polomisi ya Yahova yakuti adzatisiyelini. (Aheb. 13:5, 6) Na vimwevi m’maganizo mwathu, tinkufuna kupitiriza kufaga thaundi yomwe idzakhalepo mpakana kalekale, womwe ni Ufumu wa Mulungu. Ndipo tikachita vimwevi, tidzatambire madaliso yazinji maninge.—Mat. 25:34.
NYIMBO NA. 157 Kudzakhala Mtendere
a Vimwevi vidachitika mu gole ya 67 Yesu wayenda kale kudzulu, pomwe Akhrisitu adandothawa ku Yerusalemu na ku Yudeya.
b Mawu yakuti “kukonda abale” yangatanthauze chikondi chomwe chiripo pakati pa wanthu wa m’banja ibodzi. Koma Paulo adaphatisa basa mawu mwaya pakufuna kunena va chikondi champhanvu, chomwe tinacho kwa abale na alongo wathu mumpingo.