Mek-thri Leta blo John
1 Mi datfala elder,* and mi raet go lo iu, gud fren blo mi Gaius, wea mi barava lovem.
2 Gud fren blo mi, mi prea for iu gohed gud and for iu garem gudfala health, olsem hao iu stap gud distaem. 3 Mi hapi tumas taem olketa brata kam and storyim hao iu faithful lo truth wea iu kasem, and iu gohed wakabaot followim truth.+ 4 No eni samting hem winim hapi wea mi kasem taem mi herem olketa pikinini blo mi gohed wakabaot followim truth.+
5 Gud fren blo mi, olketa samting wea iu duim for olketa brata, nomata iu no savve lo olketa hem showimaot iu faithful.+ 6 Olketa brata hia storyim lo kongregeson love wea iu showimaot lo olketa. Taem olketa lusim iu, plis duim samting for helpem olketa wea bae mekem God hapi.+ 7 Bikos olketa go for preach and olketa duim diswan bikos lo nem blo God, and olketa no kasem eni samting+ from pipol lo world. 8 So iumi garem responsibility for lukaftarem olketa brata olsem,+ mekem iumi savve waka tugeta for sapotim truth.+
9 Mi raetem wanfala leta go lo kongregeson, bat Diotrephes, wea hem laek for leader blo olketa,+ hem nating respectim samting wea mifala talem.+ 10 Dastawe, sapos mi kam, bae mi talemaot olketa samting wea hem duim for spredim olketa laea story for spoelem mifala.+ And hem no datwan nomoa, taem olketa brata kam lo iufala, hem no showimaot respect lo olketa tu.+ And hem trae for stopem olketa wea laek for welkamim olketa brata hia, and hem aotem olketa from kongregeson.
11 Gud fren blo mi, no followim samting wea nogud, bat followim samting wea gud.+ Man wea duim samting wea gud hem blo God.+ Man wea duim samting wea nogud hem no savve lo God.+ 12 Evri brata nao storyim hao Demetrius hem gudfala man, and wei wea hem followim truth hem showimaot datwan. Mifala tu talem sem samting abaotem hem, and iufala savve samting wea mifala talem hem tru.
13 Mi laek for talem staka samting lo iu, bat mi no laek raetem kam lo disfala leta. 14 Bat mi hope klosap nao bae mi kam lukim iu, and bae iumi story feis tu feis.
Peace stap witim iu.
Olketa fren* lo hia pasim love for iu. Pasim love blo mi for evri fren lo kongregeson.