Chapter Tu
Mekhae Long Jehovah Olsem Datfala Only Tru God
1. Hu nao datfala only tru God?
BIBLE sei nomata pipol ting long planti samting olsem god, “iumi garem wanfala God datfala Father nomoa.” (1 Corinthians 8:5, 6) Datfala “wanfala God” hem Jehovah, Creator bilong evri samting. (Deuteronomy 6:4; Revelation 4:11) Jesus story abaotem hem olsem “God bilong mi and God bilong iufala.” (John 20:17) Hem agree witim Moses, wea sei: “Jehovah hem trufala God; no eniwan moa olsem hem.” (Deuteronomy 4:35) Jehovah hem moa hae winim eni samting wea pipol worshipim, olsem olketa idol, man wea pipol mekem kamap olsem god, or enemy bilong hem Satan datfala Devil, “god bilong disfala system.” (2 Corinthians 4:3, 4) Long difren wei from evri samting hia, Jesus kolem Jehovah datfala “only tru God.”—John 17:3.
2. Taem iumi lane abaotem God, hao nao diswan shud affectim living bilong iumi?
2 Pipol wea garem fasin for tinghae, wea lane abaotem olketa nambawan fasin bilong God and wanem hem duim finis and bae duim for iumi, olketa kam long hem. Taem love bilong olketa for Jehovah hem grow, diswan muvim olketa for mekhae long hem. Long wanem wei? Wanfala wei hem for talem nara pipol abaotem hem. Romans 10:10 sei: “Witim mouth man talemaot long pablik for salvation.” Narafala wei hem for followim hem long toktok and fasin. Ephesians 5:1 sei: “Followim wei bilong God, olsem olketa pikinini wea hem lovem.” For duim long wei wea moa big, iumi need for savve long really fasin bilong Jehovah.
3. Wanem nao olketa main fasin bilong God?
3 Insaed long Bible, planti toktok showimaot olketa nambawan fasin bilong God. Fofala main fasin bilong hem nao wisdom, justice, paoa, and love. ‘Wisdom stap witim hem.’ (Job 12:13) “Evri wei bilong hem followim justice.” (Deuteronomy 32:4) Hem “maeti long paoa.” (Isaiah 40:26) “God hem love.” (1 John 4:8) Nomata olsem, long fofala main fasin bilong God, which wan nao barava nambawan, wea showimaot klia hem wanem kaen God?
“God Hem Love”
4. Wanem fasin bilong God nao muvim hem for creatim universe and evri samting wea laef?
4 Tingim samting wea muvim Jehovah for creatim universe and olketa spirit and man wea garem savve. Waswe, hem wisdom or paoa? Nomoa, from nomata God iusim tufala samting hia, olketa no samting wea muvim hem. And justice wea hem garem no needim hem for sharem present bilong laef. Bat, bigfala love wea God garem nao muvim hem for sharem olketa hapi bilong laef witim olketa narawan wea garem savve. Love muvim hem for mekem purpose for olketa man wea obey for laef olowe insaed Paradaes. (Genesis 1:28; 2:15) Love muvim hem for aotem panis wea sin bilong Adam putim long olketa man.
5. Olsem Bible talem, Jehovah hem barava stand for wanem fasin, and why nao olsem?
5 So, long evri fasin bilong God, love nao hem barava nambawan. Hem wei bilong hem. Nomata wisdom, justice, and paoa bilong hem important, Bible nating sei Jehovah hem eniwan long olketa fasin hia. Bat Bible sei hem nao love. Tru nao, Jehovah barava stand for love. No olketa feeling, bat olketa principle nao leadim disfala love. Olketa principle bilong truth and raeteous fasin nao kontrolem love bilong God. Jehovah God seleva nao hem example bilong diskaen love wea hae winim evri narakaen love. Kaen love olsem hem kamaot from wei wea barava no selfish and evritaem showaot long samting wea man duim.
6. Wanem nao mekem iumi fit for followim example bilong God, nomata hem moa hae winim iumi?
6 Disfala spesol fasin, love, hem openem wei for iumi followim example bilong diskaen God. From iumi olketa man wea no perfect and savve mekem mistek, maet iumi ting iumi no savve win for duim olsem. Bat tingim narafala example bilong bigfala love bilong Jehovah: Hem luksavve long olketa samting wea iumi no fit for duim and no expectim iumi for perfect. Hem savve iumi farawe from wei for perfect. (Psalm 51:5) Dastawe Psalm 130:3, 4 sei: “Sapos olketa mistek nao samting wea iu luk aotem, O Jah, O Jehovah, hu nao savve standap? From iu garem trufala wei for forgive.” Tru nao, Jehovah hem “God wea garem mercy and kaenfala fasin, slow for kros and garem bigfala loving-kaeness.” (Exodus 34:6) “Iu, O Jehovah, nao gud and redy for forgive.” (Psalm 86:5) Datwan barava comfortim iumi! Hem gud tumas for servem disfala nambawan God and kasem loving kea and mercy bilong hem!
7. Hao nao love bilong Jehovah hem showaot thru long creation bilong hem?
7 Love bilong Jehovah showaot tu long creation bilong hem. Tingim planti gudfala samting wea Jehovah givim for iumi enjoyim, olsem olketa maunten, forest, lake, and sea wea luk naes tumas. Hem givim iumi planti difren kaen kaikai for mekem iumi hapi and for strongim iumi. And tu, Jehovah givim planti difren flaoa wea luk and smel naes and tu olketa barava interesting animal. Hem wakem olketa samting wea bae mekem olketa man hapi, nomata hem no need for duim olsem. Hem tru, from iumi no perfect and iumi stap insaed disfala wicked world, iumi no savve enjoyim evribit olketa samting wea hem creatim. (Romans 8:22) Bat tingim samting wea Jehovah bae duim for iumi long Paradaes! Man wea raetem psalm talem iumi: “Iu openem hand bilong iu and givim long evriting wea laef [stretfala] samting wea olketa wantem.”—Psalm 145:16.
8. Wanem nao example bilong love wea Jehovah showim for iumi wea winim evri narawan?
8 Wanem nao example bilong love wea Jehovah showim for olketa man wea winim evri narawan? Bible sei: “God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (John 3:16) Waswe, hem from gudfala fasin bilong man nao Jehovah duim diswan? Romans 5:8 givim disfala ansa: “God showim love bilong hem long iumi long wei wea, taem iumi sinner yet, Christ hem dae for iumi.” Tru nao, God sendem perfect Son bilong hem long earth for givim laef bilong hem olsem wanfala ransom sakrifaes for baem bak iumi from panis bilong sin and dae. (Matthew 20:28) Diswan openem wei for pipol wea lovem God for kasem laef olowe. Iumi hapi tumas love bilong God hem for evriwan wea want for duim will bilong hem, from Bible sei long iumi: “God hem no saed witim eniwan, bat long evri nation man wea fraet long hem and duim raeteous fasin nao hem acceptim.”—Acts 10:34, 35.
9. Wei wea Jehovah givim Son bilong hem olsem wanfala ransom for iumi shud affectim iumi long wanem wei?
9 Hao nao wei wea Jehovah givim Son bilong hem olsem wanfala ransom for iumi, wea openem wei for laef olowe, affectim hao iumi iusim laef bilong iumi distaem? Hem shud mekem moa deep love wea iumi garem for trufala God, Jehovah. Long semtaem, hem shud mekem iumi want for lisin long Jesus, wea stand for God. “[Jesus] hem dae for evriwan mekem olketa wea laef no stap for olketa seleva, bat for man wea dae for olketa.” (2 Corinthians 5:15) Man savve kasem hapi taem hem followim step bilong Jesus, bikos hem barava followim love and fasin for kea wea Jehovah garem! Diswan hem showaot long samting wea Jesus talem long hambol pipol: “Kam long mi, iufala evriwan wea stragol and karem bigfala hevi, and mi bae strongim iufala. Karem yoke bilong mi and lanem samting from mi, from mi garem kwaet fasin and mi hambol long heart, and iufala bae faendem samting for strongim soul bilong iufala. From yoke bilong mi hem kaenfala and lod bilong mi hem no hevi.”—Matthew 11:28-30.
Showim Love for Nara Pipol
10. Wanem nao samfala wei wea iumi savve showimaot love for olketa narafala Christian?
10 Hao nao iumi savve showimaot iumi garem semkaen love for olketa narafala Christian wea Jehovah and Jesus showimaot long iumi? Lukim planti wei wea iumi savve duim diswan: “Love hem long-safaring and kaen. Love hem no jealous, hem no tok praod, hem no bighed, hem no duim fasin wea no fitim, hem no luk aotem samting bilong hemseleva nomoa, hem no savve kros. Hem no keepim record bilong rong wea samwan duim. Hem no hapi long samting wea no raeteous, bat hem hapi witim truth. Hem kavarem evri samting, bilivim evri samting, hope long evri samting, hem stand strong long evri samting. Love hem nating savve fail.”—1 Corinthians 13:4-8; 1 John 3:14-18; 4:7-12.
11. Iumi shud showimaot love for hu, and hao nao for duim olsem?
11 Iumi shud showimaot love for hu moa, and hao nao iumi duim olsem? Jesus sei: “Go and mek disaepol long pipol bilong evri nation, baptaesim olketa long nem bilong Father and bilong Son and bilong holy spirit, teachim olketa for duim evri samting wea mi komandim long iufala.” (Matthew 28:19, 20) Diswan minim for talemaot gud nius abaotem niu world paradaes bilong God long olketa wea no Christian brata bilong iumi yet. Jesus talemaot klia hao iumi shud no showimaot love long olketa wea biliv olsem iumi nomoa, taem hem sei: “Sapos iufala [only] lovem olketa wea lovem iufala, wanem reward nao iufala kasem? Waswe, olketa man for tekem tax no duim sem samting? And sapos iufala sei hello long olketa brata bilong iufala nomoa, wanem difren samting nao iufala duim? Waswe, pipol bilong olketa nation tu no duim sem samting?”—Matthew 5:46, 47; 24:14; Galatians 6:10.
“Wakabaot Long Nem Bilong Jehovah”
12. Why nao nem bilong God hem fitim hem nomoa?
12 Narafala important part bilong wei for mekhae long trufala God hem for savve, iusim, and teachim nara pipol abaotem spesol nem bilong hem, Jehovah. Man wea raetem psalm talem disfala toktok wea kam from heart: “Mekem pipol savve hao iu, wea nem bilong iu Jehovah, iu nomoa Most Hae ovarem full earth.” (Psalm 83:18) Datfala nem Jehovah hem minim “Hem Mekem Kamap.” Hem nao Nambawan Man Bilong Purpose, wea evritaem mekem purpose bilong hem kamap and win. And datfala only tru God nomoa fit for garem datfala nem, bikos olketa man no savve sure sapos samting wea olketa duim bae win. (James 4:13, 14) Jehovah nomoa fit for sei toktok bilong hem “bae barava win” long samting wea hem sendem for duim. (Isaiah 55:11) Planti pipol hapi tumas taem olketa lukim nem bilong God for firstaem insaed Bible bilong olketa and lanem mining bilong hem. (Exodus 6:3) Bat olketa bae kasem gud samting from disfala savve only sapos olketa “wakabaot long nem bilong Jehovah . . . for olowe.”—Micah 4:5.
13. Wanem nao insaed long wei for savve long nem bilong Jehovah and wakabaot long nem bilong hem?
13 Saed long nem bilong God, Psalm 9:10 talem: “Olketa wea savve long nem bilong iu bae trust long iu.” Diswan no minim for savve nomoa hao datfala nem Jehovah hem stap. Bikos savve olsem no minim man trust long hem. For savve long nem bilong God hem minim for luksavve long wanem kaen God nao Jehovah, for respectim paoa bilong hem, obeyim olketa komand bilong hem, and trustim hem long evri samting. (Proverbs 3:5, 6) Olsem tu, wei for wakabaot long nem bilong Jehovah minim for dedicate long hem and stand for hem olsem wanfala worshiper bilong hem, for iusim laef bilong iumi for fitim will bilong God. (Luke 10:27) Waswe, iu go ahed for duim datwan?
14. Sapos iumi want for servem Jehovah for olowe, wanem nao iumi needim winim wei for ting long diswan olsem samting iumi shud duim nomoa?
14 Sapos iumi bae servem Jehovah for olowe, moa samting mas muvim iumi winim wei for ting long diswan olsem samting iumi shud duim nomoa. Aposol Paul encouragem Timothy, wea bin servem Jehovah for planti year finis: “Trainim iuseleva witim fasin for lovem God olsem goal bilong iu.” (1 Timothy 4:7) Diskaen love hem kam from heart wea fulap witim wei for tinghae long datwan wea iumi worshipim. “Fasin for lovem God” minim wei for givim bigfala honor and respect long Jehovah seleva. Iumi showim diskaen love from iumi tinghae long hem and olketa wei bilong hem long bigfala wei. Hem mekem iumi wantem evriwan for apim nem bilong hem. Iumi mas mekem grow fasin for lovem God long living bilong iumi sapos iumi laek for wakabaot long nem bilong Jehovah, datfala only tru God, for olowe.—Psalm 37:4; 2 Peter 3:11.
15. Hao nao iumi savve givim worship long God bilong iumi nomoa?
15 For servem God long wei wea hem acceptim, iumi mas worshipim hem nomoa, bikos hem “nomoa God wea mas kasem worship.” (Exodus 20:5) Iumi kanduit lovem God and long semtaem lovem wicked world, wea god bilong hem Satan. (James 4:4; 1 John 2:15-17) Jehovah savve wanem kaen man nao each wan long iumi trae for kamap olsem. (Jeremiah 17:10) Sapos iumi really lovem raeteous fasin, hem lukim datwan and bae helpem iumi for stand strong long olketa test wea kamap evriday. From hem saportim iumi witim strongfala holy spirit bilong hem, bae hem mekem iumi fit for winim wicked fasin wea big tumas long world distaem. (2 Corinthians 4:7) Hem bae laekem iumi for keepim tu strongfala hope bilong iumi for laef olowe long paradaes earth. Datwan hem wanfala nambawan hope! Iumi shud barava tinghae long datwan and willing for servem trufala God, Jehovah, wea givim diswan.
16. Wanem nao iu witim planti million narafala pipol shud want for duim?
16 Planti million pipol evriwea long world hapi for acceptim invitation wea man wea raetem psalm hem raetem: “O mekhae long Jehovah witim mi, iufala pipol, and letem iumi praisem nem bilong hem tugeta.” (Psalm 34:3) Jehovah invaetem iu for stap midolwan long datfala big crowd from evri nation wea kamap moa big and wea go ahed for duim diswan.
Review
• Jehovah hem wanem kaen person? Olketa wanem gud samting nao iumi kasem taem iumi minim gud olketa fasin bilong hem?
• Hao nao iumi savve helpem narafala pipol for lanem truth abaotem God?
• Wanem nao insaed long wei for savve long nem bilong Jehovah and wakabaot insaed nem bilong hem?
[Piksa long page 14]
From bigfala love bilong Jehovah, hem ‘bae openem hand bilong hem and givim long evriting wea laef samting wea olketa wantem’