Study—Givim Reward and Man Enjoyim
“Sapos iu go ahed for lukaotem . . . , iu bae faendem barava savve bilong God.”—PROVERBS 2:4, 5.
1. Hao nao wei for read for hapitaem savve givim iumi bigfala hapi?
PLANTI pipol read for hapitaem. Sapos samting wea olketa readim hem gud, wei for read hem healthy wei for relax. For join witim Bible reading program wea olketa duim evritaem, samfala Christian enjoyim wei for chusim eni part from Psalms, Proverbs, olketa Gospel, or nara part bilong Bible. Barava naes toktok and point insaed givim olketa bigfala hapi. Samfala moa chus for read for hapitaem long Yearbook of Jehovah’s Witnesses, Wekap! magasin, olketa laef story insaed disfala magasin, or article abaotem history, science abaotem earth, and nature.
2, 3. (a) Long wanem wei nao deep spiritual information hem olsem strong kaikai? (b) Wanem nao insaed long wei for study?
2 Wei for read for hapitaem hem difren from wei for study wea needim mind for waka. Savveman from England, Francis Bacon hem raet olsem: “Samfala buk for teistim, narawan for swallowim, and samfala moa for chewim and kaikaim.” Bible hem fitim mek-thri sekson. Aposol Paul raet olsem: “Mifala garem planti samting for talem abaotem hem [Christ, wea King-Priest Melchizedek hem piksarem] bat hem hard for minim long iufala, from iufala kamap slow tumas for herem samting. . . . Strong kaikai hem for mature pipol, for olketa wea thru long wei for iusim, trainim paoa bilong olketa for luksavve long olketa samting wea stret and rong.” (Hebrews 5:11, 14) Man mas chewim gud strongfala kaikai bifor hem swallowim. Deep spiritual information needim wei for ting raonem firstaem bifor man minim and rememberim.
3 Wanfala dictionary sei “study” hem minim “wei for iusim mind for kasem savve or minim samting, taem man read, faendaot, and duim olketa samting olsem.” Hem minim moa samting winim wei for kwiktaem read, nomata iumi maet markem samfala word taem iumi read. Study hem minim waka, mind hem waka, and wei for iusim paoa for luksavve long samting. Nomata study minim man mas waka, diswan no minim man no savve enjoyim.
Mekem Study Samting Iu Hapi Long Hem
4. Olsem man wea raetem Psalm hem talem, hao nao wei for studyim Word bilong God givim strong and reward?
4 Wei for read and studyim Word bilong God savve mekem man feel fresh and strong moa. Man wea raetem psalm hem sei: “Law bilong Jehovah hem perfect, hem mekem soul kam bak. Man fit for trustim reminder bilong Jehovah, mekem man wea no garem savve for kamap wise. Olketa order from Jehovah olketa stret, mekem heart hem hapi; komandment bilong Jehovah hem klin, mekem eye shaen.” (Psalm 19:7, 8) Olketa law and reminder mekem soul bilong iumi laef moa, strongim spiritual living bilong iumi, givim iumi hapi long insaed, and mekem eye bilong iumi shaen witim klia vision long olketa nambawan purpose bilong Jehovah. Datwan hem gud tumas!
5. Wanem nao olketa wei wea study savve givim iumi bigfala hapi?
5 Taem iumi lukim gudfala samting kamaot from waka bilong iumi, iumi savve enjoyim datwan. So, for enjoyim wei for study, iumi mas kwiktaem iusim niu savve wea iumi kasem. James hem raet olsem: “Man wea luk insaed long perfect law wea bilong freedom and wea go ahed long diswan, disfala man, from hem kamap, no man wea herem samting and forgetim, bat man wea duim waka, hem bae hapi taem hem duim diswan.” (James 1:25) Wei for stretawe followim olketa point wea man lanem bae givim bigfala wei for satisfae. Wei for duim research witim goal for ansarem wanfala kwestin wea samwan askem iumi taem iumi preach or teach bae givim iumi bigfala hapi tu.
Mekem Grow Feeling for Laekem Tumas Word Bilong God
6. Hao nao man wea raetem Psalm 119 talemaot wei wea hem laekem tumas word bilong Jehovah?
6 Man wea raetem Psalm 119, maet hem Hezekiah taem hem young prince, talemaot love bilong hem for word bilong Jehovah. Hem iusim poetry taem hem raet: “For olketa law bilong iu mi bae showaot mi laekem. Mi bae nating forgetim toktok bilong iu. And tu, olketa reminder bilong iu nao mi laekem tumas . . . Mi bae laekem tumas olketa komandment bilong iu wea mi lovem. Letem olketa mercy bilong iu kam long mi, mekem mi savve go ahed for laef; law bilong iu nao samting wea mi laekem tumas. Mi luk forward tumas for salvation bilong iu, O Jehovah, and law bilong iu mi laekem tumas.”—Psalm 119:16, 24, 47, 77, 174.
7, 8. (a) Olsem wanfala buk hem talem, wanem nao hem minim for “showaot mi laekem” Word bilong God? (b) Hao nao iumi savve showimaot love bilong iumi for Word bilong Jehovah? (c) Hao nao Ezra redyim hemseleva bifor hem readim Law bilong Jehovah?
7 Taem wanfala dictionary bilong olketa Hebrew Scripture explainim word wea olketa transleitim “showaot mi laekem” long Psalm 119, hem sei: “Wei wea hem stap long v. 16 hem semsem witim olketa [verb] for feel hapi . . . and for ting raonem . . . Olketa followim disfala order: feel hapi, ting raonem, feel satisfae . . . Diswan showimaot wei for ting raonem samting nao savve mekem man hapi long word bilong Yahweh. . . . Insaed mining bilong diswan hem feeling bilong man.”a
8 Tru nao, love bilong iumi for Word bilong Jehovah shud kam from heart bilong iumi, ples wea feeling hem kam from. Iumi shud hapi for ting raonem olketa scripture wea iumi readim. Iumi shud ting strong long olketa deep spiritual point, minim evribit, and ting raonem olketa. Diswan needim kwaet wei for ting raonem and prea. Olsem Ezra, iumi need for redyim heart bilong iumi for readim and studyim Word bilong God. Bible sei olsem abaotem hem: “Ezra nao redyim heart bilong hem for lukluk long law bilong Jehovah and for duim and for teachim rul and justice long Israel.” (Ezra 7:10) Lukim thrifala goal bilong Ezra taem hem redyim heart bilong hem: for study, for hemseleva followim, and for teach. Iumi shud followim example bilong hem.
Study Olsem Wanfala Part Bilong Worship
9, 10. (a) Wanem nao olketa wei wea man wea raetem psalm showimaot hem ting strong long Word bilong Jehovah? (b) Wanem nao Hebrew verb wea olketa transleitim “[man] tinghevi” hem minim? (c) Why nao hem important for iumi ting long wei for studyim Bible olsem “wanfala part bilong worship”?
9 Man wea raetem psalm sei hem tingim olketa law, komandment, and reminder bilong Jehovah. Hem sing olsem: “Witim olketa order bilong iu mi bae tinghevi, and mi bae luk long olketa road bilong iu. . . . Mi bae liftimap hand bilong mi long olketa komandment bilong iu wea mi lovem, and mi bae tingting strong long olketa law bilong iu. Mi barava lovem law bilong iu! Long full day mi tingim. Mi kasem moa savve winim olketa teacher bilong mi, bikos mi tinghevi long olketa kaonsel bilong iu.” (Psalm 119:15, 48, 97, 99) Wanem nao hem minim for ‘man tinghevi’ long Word bilong Jehovah?
10 Hebrew verb wea olketa transleitim “[man] tinghevi” hem minim tu “ting raonem, for tingting long wanfala samting insaed mind bilong man.” “Hem minim for tingim long kwaet wei olketa waka bilong God . . . and word bilong God.” (Theological Wordbook of the Old Testament) Noun for datfala word “tinghevi” hem minim “datfala fasin for ting raonem wea man wea raetem psalm hem garem,” “datfala love wea muvim hem for studyim” law bilong God, olsem “wanfala part bilong worship.” For tingim study long Word bilong God olsem part bilong worship mekem iumi luksavve hem serious samting. So mas duim diswan evribit and witim prea. Study hem part long worship bilong iumi and iumi duim for mekem worship kamap moabeta.
Dig Moa Deep Insaed Word Bilong God
11. Hao nao Jehovah showimaot olketa deep spiritual tingting long pipol bilong hem?
11 Witim praise, man wea raetem psalm hem sei: “Olketa waka bilong iu barava nambawan, O Jehovah! Olketa tingting bilong iu barava deep.” (Psalm 92:5) And aposol Paul story abaotem “olketa deep samting bilong God,” deep tingting wea Jehovah showimaot long pipol bilong hem “thru long spirit bilong hem” taem diswan waka long faithful and wise slave sekson. (1 Corinthians 2:10; Matthew 24:45) Datfala slave sekson waka hard for provaedem spiritual kaikai for evriwan—“milk” for olketa niu wan bat “strong kaikai” for “mature pipol.”—Hebrews 5:11-14.
12. Givim wanfala example bilong “olketa deep samting bilong God” wea slave sekson explainim.
12 For minim “olketa deep samting bilong God,” man need for study witim prea and ting raonem Word bilong hem. Olsem example, gudfala information kamaot abaotem wei wea Jehovah savve showimaot justice and mercy. Wei wea hem showimaot mercy hem no daonem justice bilong hem; bat, mercy bilong God hem wanfala wei wea God showimaot justice and love bilong hem tu. Taem Jehovah judgem wanfala sinner, firstaem Jehovah disaedem sapos hem savve showimaot mercy long faondeson bilong ransom sakrifaes bilong Son bilong hem. Sapos man wea duim sin hem no repent or hem bighed, God letem justice for go ahed and no showimaot mercy long wei wea no fitim. Nomata wanem, hem faithful long olketa hae principle bilong hem.b (Romans 3:21-26) ‘O hao deep nao wisdom bilong God!’—Romans 11:33.
13. Hao nao iumi shud showimaot wei for tinghae long “bigfala hip” bilong olketa spiritual truth wea iumi kasem?
13 Olsem man wea raetem psalm, iumi hapi tumas long wei wea Jehovah sharem planti tingting bilong hem witim iumi. David raet olsem: “Olketa tingting bilong iu barava spesol long mi! O God, olketa hia kasem barava bigfala hip! Sapos mi trae for kaontem, olketa staka tumas winim sandbis.” (Psalm 139:17, 18) Nomata savve bilong iumi distaem hem barava smol part nomoa long staka tingting bilong Jehovah wea bae hem showimaot for olowe, iumi barava tinghae long “bigfala hip” bilong spesol spiritual truth wea showaot finis and iumi dig moa deep insaed long datfala hip, or mining, bilong Word bilong God.—Psalm 119:160, footnote.
Needim Hard Waka and Olketa Gudfala Tul
14. Hao nao Proverbs 2:1-6 mekhae long need for waka hard for studyim Word bilong God?
14 Deep study long Bible needim hard waka. Diswan barava showaot klia sapos iumi readim gud Proverbs 2:1-6. Lukim olketa word for akson wea wise King Solomon hem iusim for strongim need for waka hard for kasem savve, wisdom, and fasin for luksavve from God. Hem raet olsem: “Son bilong mi, sapos iu acceptim toktok bilong mi and tinghae long komandment bilong mi, for iu lisin gud long wisdom witim ear bilong iu, mekem iu savve tanem heart bilong iu long fasin for luksavve; and tu, sapos iu singaot for minim samting and ask for fasin for luksavve, sapos iu go ahed for lukaotem olsem silver, and olsem riches wea haed iu go ahed for lukaotem, then iu bae minim wei for fraet long Jehovah, and iu bae faendem barava savve bilong God. Jehovah seleva givim wisdom; savve and fasin for luksavve kamaot from mouth bilong hem.” Tru nao, for study gud man need for duim research, digdig, olsem hem lukaotem riches wea haed.
15. Wanem tokpiksa long Bible nao showimaot need for garem gudfala wei for study?
15 For study strongim man long spiritual wei, man mas followim gudfala wei for study tu. Solomon hem raet olsem: “Sapos wanfala iron tul hem no sharp and samwan no sharpenem moa, then hem bae iusim staka strong bilong hem.” (Ecclesiastes 10:10) Sapos wanfala wakman iusim wanfala tul for katkat wea no sharp or hem no iusim tul hia long stret wei, hem bae westem energy bilong hem and waka bilong hem no mas gud. And tu, gudfala samting wea kamaot from study no semsem evritaem, bikos hem depend long wei bilong iumi for study. Planti idea wea savve waka gud for mekem wei wea iumi study kamap moabeta hem stap insaed Study 7 bilong Theocratic Ministry School Guidebook.c
16. Wanem gudfala idea nao stap for helpem iumi duim deep study?
16 Taem wanfala savveman hem redy for duim waka bilong hem, hem redyim olketa tul wea hem bae needim. Olsem tu, taem iumi redy for study, iumi shud chusim long library bilong iumi olketa study tul wea iumi bae needim. From study hem minim waka and mind mas waka, hem gud tu for sidaon long wei wea fitim waka. Sapos iumi laekem mind bilong iumi for wekap, wei for sidaon long wanfala chair long tebol maet moabeta winim wei for leidaon long bed or sidaon long soft chair. Taem iu go ahed long study, maet hem gud for standap samfala taem and go aotsaed for fresh air lelebet.
17, 18. Givim olketa example long hao for iusim olketa gudfala tul wea stap.
17 Planti nambawan study tul stap for helpem iumi. Main wan long olketa hia nao New World Translation Bible, wea distaem full wan or samfala part stap long 37 languis. New World Translation hem garem olketa cross-reference and wanfala “Tebol bilong olketa Bible Buk” wea showimaot nem, man wea raetem, ples wea olketa raetem, and taem wea datwan storyim. Hem garem index tu bilong olketa Bible word, hem garem wanfala appendix, and olketa map. Long samfala languis, olketa printim disfala Bible olsem big wan, wea nem bilong hem Reference Bible. Hem garem olketa samting wea iumi storyim antap and planti moa, insaed diswan staka footnote, wea garem index tu. Waswe, iu mekius evribit long samting wea stap long languis bilong iu for helpem iu dig deep insaed Word bilong God?
18 Narafala barava nambawan tul for study hem tufala Bible encyclopedia volume Insight on the Scriptures. Sapos datwan hem stap long languis wea iu savve minim, hem shud stap witim iu evritaem iu study. Hem bae givim iu information abaotem klosap evri Bible subject. Nara gudfala tul hem “All Scripture Is Inspired of God and Beneficial.” Taem iu start for readim wanfala Bible buk, hem gud for lukluk long information abaotem datfala buk insaed long “All Scripture” for savve long ples and history, and tu olketa samting wea stap insaed long datfala Bible buk and wei wea hem helpem iumi. Nara niu study tul tu hem Watchtower Library long computer wea distaem hem stap insaed naenfala languis.
19. (a) Why nao Jehovah givim iumi olketa gudfala tul for studyim Bible? (b) Wanem nao man needim for duim Bible reading and study long gudfala wei?
19 Jehovah provaedem evri tul hia thru long “faithful and wise slave” mekem olketa servant bilong hem long earth ‘lukaotem and faendem barava savve bilong God.’ (Proverbs 2:4, 5) Gudfala wei for study mekem iumi fit for kasem moa savve abaotem Jehovah and enjoyim klos wei for fren witim hem. (Psalm 63:1-8) Tru nao, study minim waka, bat hem waka wea man enjoyim and hem kasem reward. Bat, study needim taem, and maet iu ting, ‘Hao nao bae mi faendem taem for barava duim gud Bible reading bilong mi and study seleva?’ Bae iumi lukluk long diswan long lastfala article.
[Olketa Footnote]
a New International Dictionary of Old Testament Theology & Exegesis, Volume 4, page 205-7.
b Lukim Wastaoa, August 1, 1998, page 13, paragraf 7. Olsem project for studyim Bible, maet iu reviewim tufala study article insaed datfala issue and tu olketa article olsem “Justice,” “Mercy,” and “Raeteous Fasin” insaed Bible encyclopedia Insight on the Scriptures, wea Watchtower Bible and Tract Society of New York, Inc. nao pablisim.
c Watchtower Bible and Tract Society of New York, Inc. nao pablisim. Sapos disfala buk no stap long languis bilong iu, gudfala kaonsel long wei for study stap insaed long Wastaoa magasin bilong December 1, 1993, page 20-4, and English Wastaoa bilong May 15, 1986, page 19-20.
Olketa Review Kwestin
• Hao nao iumi savve mekem wei for study seleva givim iumi strong and reward?
• Olsem man wea raetem psalm, hao nao iumi savve “showaot mi laekem” and “tinghevi” long Word bilong Jehovah?
• Hao nao Proverbs 2:1-6 showimaot need hem stap for waka hard for studyim Word bilong God?
• Wanem nao olketa gudfala study tul wea Jehovah provaedem?
[Piksa long page 14]
Wei for ting raonem and prea helpem iumi for mekem grow love for Word bilong God
[Piksa long page 17]
Waswe, iu iusim evribit olketa study tul for dig moa deep insaed Word bilong God?