Jesus Sevem Pipol—Hao?
“Jesus sevem pipol!” “Jesus hem Savior bilong iumi!” Long planti kantri raonem world, olketa raetem olketa toktok olsem long olketa wall bilong building and long nara pablik ples. Planti million pipol barava bilivim Jesus hem Savior bilong olketa. Sapos iu askem olketa, “Hao nao Jesus sevem iumi?” olketa maet ansa olsem, “Jesus hem dae for iumi” or, “Jesus dae for olketa sin bilong iumi.” Tru nao, dae bilong Jesus nao sevem iumi. Bat hao nao dae bilong wanfala man savve pei for sin bilong staka pipol? Sapos olketa askem iu, “Hao nao dae bilong Jesus sevem iumi?” wanem nao bae iu sei?
ANSA wea Bible givim long disfala kwestin hem barava isi, klia and garem big mining. Bat, for minim wei wea hem important, firstaem iumi mas luksavve hao laef and dae bilong Jesus nao hem ansa for wanfala hard problem. From diswan nao bae iumi minim gud hao dae bilong Jesus garem barava hae price.
Taem hem sendem Jesus for givim laef bilong hem, God hem deal witim wanfala problem wea kamap taem Adam hem sin. Datfala sin mekem barava bigfala trabol! Firstfala man and waef bilong hem, Eve, tufala perfect. Datfala naesfala garden bilong Eden nao hom bilong tufala. God givim tufala datfala nambawan waka for lukaftarem garden hom bilong tufala. Tufala mas lukaftarem olketa nara creation long earth long loving wei. And taem olketa man kamap planti and fulimap earth witim planti million pipol, olketa bae mekem paradaes for kamap long full earth. (Genesis 1:28) Hem barava hapi waka! Nara samting moa, tufala garem loving wei for fren witim each other. (Genesis 2:18) Tufala no short long eni samting. Hapi laef for olowe stap front long tufala.
Hem hard for tingim hao Adam or Eve bae sin. Bat firstfala man and woman go againstim man wea wakem tufala—Jehovah God. Taem hem iusim wanfala snek, datfala spirit creature Devil Satan hem giamanim Eve for no obeyim Jehovah, and Adam followim hem.—Genesis 3:1-6.
No eni daot stap abaotem wanem Creator bae duim long Adam and Eve. Hem talemaot klia finis samting wea bae happen sapos tufala no obey, taem hem sei: “From evri tree bilong garden iu savve kaikai. Bat long datfala tree bilong savve long gud and nogud samting iu mas no kaikai from hem, from long day wea iu kaikai from hem iu mas dae.” (Genesis 2:16, 17) Wanfala barava important kwestin needim ansa.
Olketa Man Feisim Wanfala Hard Problem
Datfala firstfala sin mekem wanfala barava big problem kamap for olketa man. Adam startim laef olsem wanfala perfect man. So, olketa pikinini bilong hem fit for enjoyim perfect laef for olowe. Bat, Adam hem sin bifor hem garem eni pikinini. Full sekson bilong olketa man no kamaot from hem yet taem hem kasem disfala judgment: “Long swet bilong feis bilong iu, iu bae kaikaim bred go kasem taem iu go bak long graon, bikos iu kamaot from hem. Iu dust nomoa and iu bae go bak long dust.” (Genesis 3:19) So taem Adam sin and start for dae olsem God talem finis, evri man nao kasem judgment for dae witim hem.
Long wei wea fitim, aposol Paul hem raet olsem bihaen: “Thru long wanfala man [Adam] sin hem kam insaed long world and dae hem kam from sin, dastawe dae hem kasem evri man bikos evriwan sin.” (Romans 5:12) Tru nao, bikos long firstfala sin, olketa pikinini wea shud born kam perfect witim laef wea no garem end front long olketa, born kam witim sik, old age, and dae olsem samting wea mas kasem olketa.
Samwan maet sei, “Datwan no followim justice. Iumi no chus for no obeyim God—Adam nao duim. Why nao iumi mas lusim hope bilong iumi for laef olowe and hapi?” Iumi savve hao sapos wanfala kot disaed for putim wanfala son insaed prison bikos dadi bilong hem stealim wanfala car, hem stret for datfala son komplen: “Datwan no followim justice! Mi no duim eni rong.”—Deuteronomy 24:16.
Taem hem pullim datfala first man and woman for duim sin, Satan maet tingse hem bae mekem wanfala hard samting for God. Devil hem attak early long history bilong famili bilong olketa man—bifor eni pikinini born kam. Insaed datfala taem wea Adam duim sin, wanfala important kwestin kamap, Wanem nao Jehovah bae duim long olketa pikinini wea Adam and Eve bae garem?
Jehovah God duim samting wea stret and followim justice. Datfala raeteous man Elihu sei: “Hem hard for trufala God duim nogud samting, and for Olmaeti no followim justice!” (Job 34:10) And profet Moses raet olsem abaotem Jehovah: “Datfala Rok, waka bilong hem perfect, from evri wei bilong hem followim justice. Wanfala God bilong faithful fasin, wea showimaot justice evribit; hem nao raeteous and stret.” (Deuteronomy 32:4) Ansa wea trufala God givim for disfala problem wea sin bilong Adam mekem kamap no spoelem chance bilong iumi for laef olowe long wanfala paradaes earth.
God Provaedem Wanfala Perfect Ansa
Tingim datfala ansa wea God givim insaed judgment wea hem talem long Devil Satan. Jehovah sei long Satan: “Mi bae putim fasin for heit midolwan long iu and long woman [organization bilong God long heven] and midolwan long seed bilong iu [world wea stap anda long kontrol bilong Satan] and seed bilong hem [Jesus Christ]. Hem bae killim iu [Satan] long hed and iu bae killim hem long leg [dae bilong Jesus].” (Genesis 3:15) Insaed disfala first profesi bilong Bible, Jehovah talemaot purpose bilong hem for sendem spirit Son bilong hem long heven for kam stap long earth olsem datfala perfect man Jesus and then dae—for kasem kill long leg—taem hem no garem sin.
Why nao God needim wanfala perfect man for dae? Well, wanem nao Jehovah God sei bae kasem Adam sapos hem sin? Hem wei for dae. (Genesis 2:16, 17) Aposol Paul hem raet: “Pei bilong sin hem dae.” (Romans 6:23) Adam pei for sin bilong hem taem hem dae. God givim hem laef, bat hem chus for duim sin, so hem dae from sin bilong hem. (Genesis 3:19) Waswe long judgment wea full famili bilong olketa man mas kasem bikos long datfala sin? Hem needim dae bilong wanfala man for kavarem sin bilong olketa. Bat dae bilong hu nao fit for kavarem sin bilong evri man fitim law?
Law bilong God for nation bilong Israel bifor askem “soul for soul [or, laef for laef].” (Exodus 21:23) For fitim stretfala principle bilong law hia, datfala dae for kavarem sin bilong olketa man mas semsem witim samting wea Adam lusim. Dae bilong narafala perfect man nomoa fit for peim wages bilong sin. Jesus nomoa fitim diswan. Tru nao, Jesus hem “ransom wea semsem” for sevem evri man wea kam from laen bilong Adam.—1 Timothy 2:6; Romans 5:16, 17.
Dae Bilong Jesus Garem Hae Price
Dae bilong Adam no savve helpem eniwan; hem fit for dae from sin bilong hem. Bat dae bilong Jesus, garem hae price bikos hem dae olsem perfect man. Jehovah God fit for acceptim price bilong perfect laef bilong Jesus olsem ransom for olketa pikinini bilong Adam wea obey. And price bilong sakrifaes bilong Jesus hem no for olketa sin bilong iumi bifor nomoa. Sapos olsem, iumi bae no garem future. From iumi born kam long sin, hem isi for duim sin moa. (Psalm 51:5) Iumi sei thankiu from dae bilong Jesus givim iumi chance for kasem datfala perfect laef wea Jehovah minim firstaem for olketa pikinini bilong Adam and Eve!
Iumi savve markem Adam olsem wanfala dadi wea dae and leavim iumi witim bigfala kaon (sin) wea no eni wei stap for finisim kaon hia. Long narasaed, Jesus hem olsem wanfala gud dadi wea dae and leavim wanfala barava rich samting wea no just mekem iumi kamap free from bigfala kaon wea Adam putim long iumi bat givim inaf for helpem iumi for olowe. Dae bilong Jesus hem no just wei for finisim olketa sin bilong bifor nomoa; hem wanfala nambawan samting wea bae helpem iumi long future.
Jesus hem savior bilong iumi bikos hem dae for iumi. And dae bilong hem hem barava nambawan arrangement! Taem iumi tingim hem olsem part long ansa wea God givim for hardfala problem bilong sin bilong Adam, faith bilong iumi long Jehovah and wei bilong hem for duim samting kamap strong. Tru nao, dae bilong Jesus hem samting wea sevem “evriwan wea showimaot faith” long hem from sin, sik, wei for olo, and dae. (John 3:16) Waswe, iumi thankiu long God for mekem disfala loving arrangement for salvation bilong iumi?
[Piksa long page 5]
Adam kosim sin and dae for olketa man
[Piksa long page 6]
Jehovah provaedem wanfala perfect ansa