Wei for Klin Hem Really Minim Wanem?
From living long Europe and United States long mek-18 and mek-19 century hem barava dirty, olketa missionary long datfala taem preachim “wanfala teaching bilong wei for klin.” Insaed disfala teaching olketa markem dirty witim sin and wei for klin olsem wei for kam klosap long God. Maet diswan nao mekem kamap disfala toktok “Wei for klin hem barava join witim wei for followim God.”
Salvation Army wea William and Catherine Booth startim, followim diskaen wei for tingting. Toktok wea insaed buk Health and Medicine in the Evangelical Tradition, talem hao wanfala long olketa firstfala toktok wea olketa iusim hem “Soap, Supsup and Salvation.” Then, taem Louis Pasteur and samfala narawan barava showimaot klia hao sik kamap from bacteria, diswan strongim moa and givim faondeson from science for pipol aftarem olketa plan wea moabeta for health bilong pablik.
Samfala first samting wea olketa changem hem wei wea olketa witness insaed kot no need for kissim Bible taem olketa promis for talem truth and tu olketa stopem wei for sharem kap long skul and long olketa train station. Insaed lotu service bilong olketa, olketa waka hard tu for changem wei for sharem wanfala kap, go long wei for each man iusim difren kap. Tru nao, olketa hia wea duim diswan long firstaem barava win long wei for changem tingting bilong pipol abaotem wei for klin. Hem barava affectim pipol gogo wanfala woman for raet hem kolem diswan “wanfala strong feeling for wei for klin.”
Bat disfala “strong feeling for wei for klin,” hem no really strong. No longtaem bihaen, olketa bisnisman sellim soap olsem wanfala samting wea pipol needim for luk naes. Kleva wei for advertise mekem pipol ting sapos olketa iusim wankaen spesol soap bae hem mekem olketa luk naes and narawan bae jealous long olketa from olketa no savve luk naes olsem sapos olketa no iusim datfala sem soap. Television hem strongim go moa diskaen tingting. Long television hem hard for iumi lukim pipol wea win and wea luk naes duim waka long area bilong olketa, pikim rabis, or klinim siti bilong olketa puskat and dog bilong olketa.
And tu samfala tingim wei for go waka hem nao bae bringim kam selen for living, bat man no kasem selen from kaen waka for klinim haos or nara samting. And from olketa bae no kasem selen for lukaftarem environment, olketa no wari abaotem datwan. Samting wea kamaot from diswan hem wei wea pipol distaem tingim wei for klin hem minim for klin long body nomoa.
Tingting Bilong God Abaotem Wei for Klin
Tru nao, wei wea olketa long firstaem trae hard for teachim wei for klin hem helpem pipol insaed living bilong olketa. And hem barava fitim, from wei for klin hem wanfala fasin wea start kam from datfala holy and klin God, Jehovah. Hem teachim iumi for kasem gud samting taem iumi mekem evri wei bilong iumi kamap holy and klin.—Isaiah 48:17; 1 Peter 1:15.
Jehovah God hem nambawan example long diswan. Iumi savve lukim klia wei bilong hem for klin, and olketa nara fasin bilong hem, insaed creation wea iumi savve lukim. (Romans 1:20) Iumi savve lukim hao creation seleva no savve mekem rabis wea bae stap longtaem. Wei wea earth garem planti cycle bilong environment wea keepim hem klin mekem iumi sapraes, and hem mekem living klin and healthy. Kaen waka olsem showimaot hao hem kam from wanfala Man for Plan wea garem tingting for klin. Iumi luksavve from diswan hao olketa wea worshipim God shud klin long evri samting long laef bilong olketa.
Fofala Samting Saed Long Wei for Klin
Bible showimaot fofala samting saed long wei for klin wea olketa worshiper bilong God shud trae hard for kasem. Iumi lukluk long each wan long olketa.
Spiritual. Iumi fit for tingim disfala wei for klin olsem wan wea barava important, from insaed diswan hem chance bilong man wanwan for kasem laef olowe. Nomata olsem, staka taem planti no tingim disfala wei for klin. For tok stret, from God tingim enikaen giaman worship olsem dirty, wei for klin long spiritual wei hem minim for no akrosim spialaen wea God putim midolwan long tru worship and giaman wan. Aposol Paul raet olsem: “‘Go aot from midolwan long olketa, and separatem iufala seleva,’ Jehovah hem sei, ‘and no tasim samting wea no klin’; ‘and mi bae acceptim iufala.’” (2 Corinthians 6:17) Disaepol James tu hem talem klia diswan: “Kaen worship wea klin and no dirty front long God and Father bilong iumi hem olsem: . . . for stap klin from world.”—James 1:27.
God barava showimaot klia hem no laekem wei for mixim giaman worship witim tru worship bilong hem. Planti taem fasin wea no klin and olketa rabis idol and god hem part long giaman worship. (Jeremiah 32:35) Dastawe, olketa tru Christian kasem kaonsel for barava stap klia from wei for join insaed worship wea no klin.—1 Corinthians 10:20, 21; Revelation 18:4.
Fasin. Long diswan tu God hem barava talem klia samting wea klin and samting wea no klin. Long Ephesians 4:17-19 hem story abaotem disfala world olsem: “Mind bilong olketa stap long darkness, and olketa stap farawe from laef wea kam from God. . . Bikos olketa no garem eni stretfala tingting, olketa followim olabaot fasin for duim evrikaen fasin wea no klin witim greedy fasin.” Kaen nogud tingting hem showaot long planti difren wei, samfala taem hem showaot klia and samfala taem hem haed, dastawe olketa Christian need for lukaot gud.
Olketa wea lovem God savve hao jury fasin, homosexual fasin, sex bifor marit, and pornography brekem standard bilong Jehovah long wei for klin saed long fasin. Nomata olsem, olketa fasin hia olsem samting nating nomoa insaed world bilong olketa wea mekem entertainment and stael. Olketa Christian mas gard againstim olketa kaen wei olsem. Wei for werem kaleko wea short tumas or kaleko wea showim body long olketa Christian meeting or hapitaem bae mekem pipol lukluk long body and hem showimaot hao long datfala taem, man no garem klin fasin. Diswan savve bringim kam dirty tingting bilong world insaed Christian wei for kaban, and long semtaem wei for werem kaleko olsem savve mekem dirty tingting kamap long mind bilong narawan. Diswan hem samting wea olketa Christian need for waka hard for showimaot “wisdom from antap.”—James 3:17.
Tingting. Mind bilong man shud no kamap wanfala ples for keepim olketa dirty tingting. Jesus talem warning againstim dirty tingting taem hem sei: “Evriwan wea go ahed for lukluk long wanfala woman for barava laekem hem, hem duim adultery finis witim hem insaed long heart bilong hem.” (Matthew 5:28; Mark 7:20-23) Olketa toktok hia fitim tu wei for lukluk long olketa dirty piksa and movie, wei for readim story abaotem sex and lisin long olketa song wea word bilong hem maet mekem man tingim kaen samting olsem. Dastawe, olketa Christian mas stap klia long wei for mekem olketa seleva kamap dirty from wei for garem olketa dirty tingting wea savve mekem man talem and duim samting wea dirty.—Matthew 12:34; 15:18.
Physical. Wei for holy and wei for klin long physical saed tufala join tugeta insaed Bible. Olsem example, Paul raet olsem: “Olketa wea mi lovem, letem iumi klinim iumiseleva from evri samting wea spoelem body and spirit, mekem holy fasin kamap perfect taem iumi fraet long God.” (2 Corinthians 7:1) From diswan, olketa tru Christian shud trae hard for keepim body, haos and area bilong olketa klin, fitim living bilong olketa. Nomata long ples wea wata hem hard for kasem, olketa Christian shud trae for duim best bilong olketa for klin and luk naes.
Wei for klin long physical saed hem minim tu for no iusim eni tobacco, for no ova tumas for drinkim alcohol, and no iusim eni drug, wea savve spoelem body and mekem dirty. Datfala shepherd wea Song of Solomon storyim barava tinghae long swit smel bilong kaleko bilong datfala Shulammite girl. (Song of Solomon 4:11) For mek sure iumi klin hem showimaot love, from iumi no laek for narawan feel nogud from wei wea iumi smel nogud. Olketa perfume maet barava smel naes, bat hem no minim man no need for swim evritaem and werem klin kaleko.
Garem Balance tingting
Long saed bilong wei for klin long physical saed, pipol savve ova tumas tu. Long wansaed, man savve wari tumas abaotem wei for klin gogo hem no savve kasem hapi insaed living. And tu hem savve iusim tumas taem wea important. Long narasaed, dirty haos wea man no klinim savve kost tumas for repairim. Midolwan tufala wei hia balance tingting hem stap long hao for keepim haos klin and luk naes.
Keepim simpol. Olketa haos or rum wea fulap witim planti samting hem hard for klinim and maet hem hard for lukim dirty. Simpol haos, wea no garem planti samting hem moa kwiktaem for klinim. Simpol living hem samting wea Bible mekhae long hem: “Sapos iumi garem kaikai and kaleko, iumi mas satisfae witim olketa samting hia.”—1 Timothy 6:8.
No mek-mes. Hem responsibility bilong evriwan wea stap insaed haos for keepim klin. Olketa haos wea no klin start firstaem witim rum wea no klin. For no mek-mes hem minim evri samting mas stap long barava ples bilong hem. Olsem, ples for putim dirty kaleko hem no long floor long rum. And tu samting wea moa serious hem wei for leavim olketa toy and tul olabaot long floor from diswan hem danger tumas. Planti accident wea happen long haos hem kamap from wei for mek-mes.
Wei wea klin fasin and Christian living hem barava join tugeta hem showaot klia. Taem profet Isaiah story abaotem living wea followim God, hem story abaotem “Wei bilong Holy Fasin.” And hem talem tu disfala samting for man tingim: “Man wea no klin bae no wakabaot long hem.” (Isaiah 35:8) Tru nao, for mekem grow olketa gudfala wei for klin hem strongfala pruv long faith bilong iumi long promis bilong God hao hem bae klosap mekem earth kamap wanfala klin paradaes. Long dat taem, long evri ples long disfala earth wea luk naes, evri pipol bae givim glory long Jehovah God taem olketa obeyim evribit perfect standard bilong hem long wei for klin.—Revelation 7:9.
[Piksa long page 6]
Hem responsibility bilong evriwan wea stap insaed haos for keepim klin
[Piksa long page 6]
Wei wea earth savve keepim hemseleva klin hem mekem iumi sapraes