Christ Leadim Kongregeson Bilong Hem

“Lukim! Mi stap witim iufala evriday go kasem taem bilong end bilong disfala system.”—MATTHEW 28:20.

1, 2. (a) Taem hem givim komand for mek-disaepol, wanem nao Jesus promis for duim for olketa follower bilong hem? (b) Hao nao Jesus duim samting for leadim first Christian kongregeson?

BIFOR hem go ap long heven, Jesus Christ, Leader bilong iumi wea resurrect finis, showim hemseleva long olketa disaepol and sei: “Evri paoa nao mi kasem long heven and long earth. So go and mek-disaepol long pipol bilong evri nation, baptaesim olketa long nem bilong Father and bilong Son and bilong holy spirit, teachim olketa for duim evri samting wea mi komandim long iufala. And lukim! Mi stap witim iufala evriday go kasem taem bilong end bilong disfala system.”—Matthew 23:10; 28:18-20.

² Jesus no only givimaot waka long olketa disaepol for sevem laef and mekem staka moa disaepol, bat hem promis tu for stap witim olketa. History bilong olketa first Christian, wea stap insaed Bible buk bilong Acts, pruvim hao Christ hem iusim paoa wea hem kasem for leadim datfala niu kongregeson. Hem sendem “helper” wea hem promis for sendem—datfala holy spirit—for strongim olketa follower bilong hem and for leadim olketa. (John 16:7; Acts 2:4, 33; 13:2-4; 16:6-10) Jesus wea resurrect hem iusim olketa angel wea stap anda long hem for saportim olketa disaepol bilong hem. (Acts 5:19; 8:26; 10:3-8, 22; 12:7-11; 27:23, 24; 1 Peter 3:22) And tu, Leader bilong iumi arrange for olketa man wea fit for serve olsem wanfala governing body.—Acts 1:20, 24-26; 6:1-6; 8:5, 14-17.

3. Wanem nao olketa kwestin wea disfala article bae ansarem?

³ Bat, waswe long taem bilong iumi, “end bilong disfala system”? Hao nao Jesus Christ leadim Christian kongregeson distaem? And hao nao iumi savve showaot iumi acceptim wei wea hem lead?

Masta Hem Garem Wanfala Faithful Slave

4. (a) Hu nao insaed long datfala “faithful and wise slave”? (b) Wanem nao Masta givim for datfala slave lukaftarem?

⁴ Taem hem givim profesi abaotem saen bilong taem wea hem stap moa, Jesus sei: “Hu nao faithful and wise slave wea masta bilong hem markem for lukaftarem olketa wakman bilong hem, for givim olketa kaikai long barava taem? Hapi nao datfala slave sapos masta faendem hem duim olsem taem hem kam bak. Tru nao, mi talem iufala, Hem bae markem hem for ovarem evri samting bilong hem.” (Matthew 24:45-47) Datfala “masta” hem Leader bilong iumi, Jesus Christ, and hem markem “faithful and wise slave”—sekson bilong olketa anointed Christian long earth—for ovarem evri samting bilong hem long earth.

5, 6. (a) Long wanfala vision wea aposol John lukim, wanem nao “sevenfala gold lampstand” and “sevenfala star” piksarem? (b) Wei wea “sevenfala star” stap insaed raet hand bilong Jesus hem minim wanem?

⁵ Bible buk bilong Revelation showimaot wei wea datfala faithful and wise slave hem barava stap anda long kontrol bilong Jesus Christ. Insaed wanfala vision abaotem “day bilong Lord,” datfala aposol John lukim “sevenfala gold lampstand, and midolwan long olketa lampstand samwan wea luk olsem son bilong man” wea “garem sevenfala star long raet hand bilong hem.” Taem hem explainim datfala vision long John, Jesus sei: “And for saed bilong holy secret bilong sevenfala star wea iu lukim olketa stap long raet hand bilong mi, and for saed bilong sevenfala gold lampstand: Sevenfala star minim olketa angel long sevenfala kongregeson, and sevenfala lampstand minim sevenfala kongregeson.”—Revelation 1:1, 10-20.

⁶ “Sevenfala gold lampstand” piksarem evri tru Christian kongregeson wea stap long “day bilong Lord,” wea start long 1914. Bat waswe long “sevenfala star”? Long firstaem, olketa piksarem evri anointed overseer wea spirit anointim wea lukaftarem olketa kongregeson hia long first century.a Olketa overseer hia stap long raet hand bilong Jesus—hem nao kontrolem and directim olketa. Tru nao, Christ Jesus leadim datfala slave sekson. Nomata olsem, distaem, olketa anointed overseer no staka. Hao nao wei wea Christ lead hem go kasem winim 93,000 kongregeson bilong Olketa Jehovah’s Witness evriwea long world?

7. (a) Hao nao Jesus iusim Governing Body for provaedem wei for lead insaed long olketa kongregeson long earth? (b) Why nao iumi savve sei olketa Christian overseer kasem appointment thru long holy spirit?

⁷ Olsem long first century, wanfala smol sekson bilong olketa man wea fit from midolwan long olketa anointed overseer serve distaem olsem Governing Body, wea stand for datfala faithful and wise slave. Leader bilong iumi iusim disfala Governing Body for markem olketa man wea fit—nomata olketa sekson wea spirit anointim or nomoa—for olsem olketa elder insaed evri kongregeson. Holy spirit nao garem important waka long diswan, wea Jehovah givim paoa long Jesus for iusim. (Acts 2:32, 33) Firstaem, olketa overseer hia mas kasem olketa mark wea stap insaed Word bilong God, wea holy spirit muvim olketa man for raetem. (1 Timothy 3:1-7; Titus 1:5-9; 2 Peter 1:20, 21) Bihaen prea and anda long direction bilong holy spirit nao olketa mekem recommendation and appointment. And tu, olketa wea kasem appointment pruvim olketa showimaot frut bilong datfala spirit. (Galatians 5:22, 23) So, kaonsel bilong Paul barava fitim evri elder distaem, nomata olketa bilong anointed sekson or nomoa: “Lukluk gud long iufala seleva and long evri sheep, wea holy spirit appointim iufala olsem olketa overseer.” (Acts 20:28) Olketa appointed man hia kasem direction from Governing Body and willing for shepherdim kongregeson. Long wei olsem, Christ hem witim iumi distaem and hem strong for leadim kongregeson.

8. Hao nao Christ iusim olketa angel for leadim olketa follower bilong hem?

⁸ Jesus iusim tu olketa really angel for leadim olketa follower bilong hem distaem. Tokpiksa bilong wheat and rabis grass showaot hao taem bilong harvest bae kam long “taem bilong end bilong system.” Hu nao Masta bae iusim for duim waka for harvest? Christ hem talem: “Olketa wea duim harvest nao olketa angel.” Hem sei moa: “Son bilong man bae sendem go olketa angel bilong hem, and olketa mas tekem aot from kingdom bilong hem evri samting wea mekem man stambol and pipol wea nating followim law.” (Matthew 13:37-41) And tu, long sem wei wea angel leadim Philip for faendem datfala Ethiopian eunuch, staka samting distaem pruvim Christ hem iusim olketa angel bilong hem for leadim waka bilong olketa tru Christian for faendem pipol wea garem honest heart.—Acts 8:26, 27; Revelation 14:6.

9. (a) Thru long wanem nao Christ leadim Christian kongregeson distaem? (b) Wanem kwestin nao iumi shud tingim sapos iumi want for kasem gudfala samting from wei wea Christ hem lead?

⁹ Iumi feel moa sure taem iumi savve hao Jesus Christ hem leadim olketa disaepol distaem thru long Governing Body, holy spirit, and olketa angel! Nomata sapos samfala wea worshipim Jehovah mas separate for lelebet taem from Governing Body bikos long persecution or kaen samting olsem, Christ bae still showimaot wei for lead thru long holy spirit and saport bilong olketa angel. Bat, iumi kasem gudfala samting from wei wea hem lead only taem iumi acceptim datwan. Hao nao iumi savve showaot iumi acceptim wei wea Christ hem lead?

“Obeyim . . . Stap Anda”

10. Hao nao iumi savve showaot iumi tinghae long olketa elder insaed kongregeson?

¹⁰ Leader bilong iumi hem givim long olketa kongregeson “olketa present olsem man”—“samfala olsem pipol for talemaot gud nius, samfala olsem shepherd and teacher.” (Ephesians 4:8, 11, 12) Tingting and samting iumi duim for olketa hem barava showimaot klia sapos iumi acceptim wei wea Christ lead or nomoa. Hem fitim for iumi ‘showimaot iumi thankiu’ long olketa man wea fit long spiritual wei wea Christ givim. (Colossians 3:15) Fitim for iumi respectim olketa tu. Aposol Paul raet olsem: “Letem olketa elder wea lead long gudfala wei kasem dabol honor.” (1 Timothy 5:17) Hao nao iumi savve showimaot thankiu and wei for tinghae long olketa older man—olketa elder, or overseer—insaed kongregeson? Paul ansa olsem: “Obeyim olketa wea lead long iufala and stap anda long olketa.” (Hebrews 13:17) Tru nao, iumi mas obeyim and stap anda long olketa, willing for mekwe for olketa.

11. Why nao respect for elder arrangement hem join long wei for live followim dedication bilong iumi?

¹¹ Leader bilong iumi hem perfect. Olketa man wea hem givim olsem present olketa no perfect. So samfala taem olketa maet mekem mistek. Nomata olsem, hem important for iumi stap loyal long arrangement bilong Christ. Tru nao, wei for live followim dedication and baptism bilong iumi hem minim for luksavve hao paoa ovarem olketa wea spirit appointim insaed long kongregeson hem stret and iumi willing for stap anda long hem. Wei wea iumi baptaes ‘insaed nem bilong holy spirit’ hem wei for showimaot long pablik hao iumi luksavve long holy spirit and waka bilong hem insaed olketa purpose bilong Jehovah. (Matthew 28:19) Baptism olsem hem minim iumi waka tugeta witim datfala spirit and no duim eni samting for spoelem wei wea hem waka midolwan olketa follower bilong Christ. From holy spirit hem garem important waka long wei for recommendim and appointim olketa elder, iumi no faithful evribit long dedication bilong iumi sapos iumi fail for waka tugeta witim elder arrangement insaed kongregeson.

12. Jude storyim olketa wanem example saed long wei for no respectim olketa wea garem paoa, and wanem nao iumi lanem from olketa example hia?

¹² Bible garem olketa example wea teachim iumi gudfala samting bilong wei for obey and stap anda. Taem hem storyim pipol wea tok nogud long olketa appointed man insaed kongregeson, disaepol Jude talem thrifala warning example, taem hem sei: “Sorre tumas long olketa, from olketa followim wei bilong Cain, and kwiktaem for followim rong wei bilong Balaam for kasem reward, and finis evribit long bighed toktok bilong Korah!” (Jude 11) Cain no laek lisin long loving kaonsel bilong Jehovah and hem min for followim gogo bilong heit wea mekem hem killim dae brata bilong hem. (Genesis 4:4-8) Nomata hem kasem planti warning from God, Balaam trae for cursim pipol bilong God mekem hem savve kasem selen from datwan. (Numbers 22:5-28, 32-34; Deuteronomy 23:5) Korah garem gudfala position long Israel, bat hem no satisfae. Hem mekem grow wei for againstim Moses, servant bilong God, man wea hambol winim eni nara man long earth. (Numbers 12:3; 16:1-3, 32, 33) Trabol kasem Cain, Balaam, and Korah. From olketa example hia iumi barava lane for lisin long kaonsel bilong olketa wea Jehovah iusim and givim responsibility and for respectim olketa!

13. Wanem nao olketa blessing wea profet Isaiah talem for olketa wea stap anda long elder arrangement?

¹³ Iumi evriwan bae want for kasem gudfala samting from nambawan arrangement bilong wei for lead wea Leader bilong iumi putim insaed Christian kongregeson. Profet Isaiah talem profesi abaotem olketa blessing wea kamaot from diswan taem hem sei: “Lukim! Wanfala king bae rul for raeteous fasin; and long saed long olketa prince, olketa bae rul olsem prince for justice. Evriwan mas kamap olsem wanfala ples for haed from wind and wanfala ples for haed from bigfala rain, olsem river long drae ples, olsem shadow bilong bigfala ston long hotfala ples.” (Isaiah 32:1, 2) Each wan long olketa elder mas “wanfala ples” olsem for kasem protection and stap sef. Nomata sapos wei for stap anda long olketa wea garem paoa ovarem iumi hem hard, witim wei for prea iumi mas duim best for obey and stap anda long olketa wea God appointim insaed kongregeson.

Hao Olketa Elder Stap Anda Long Lead Bilong Christ

14, 15. Hao nao olketa wea lead insaed kongregeson showaot olketa stap anda long lead bilong Christ?

¹⁴ Evri Christian—especially olketa elder—mas followim Christ olsem leader. Olketa overseer, or elder, garem samfala paoa insaed kongregeson. Bat olketa no trae for ‘masta long faith bilong olketa brata bilong olketa’ long wei for kontrolem laef bilong olketa. (2 Corinthians 1:24) Olketa elder followim disfala toktok bilong Jesus: “Iufala savve hao olketa ruler bilong olketa nation bossim olketa and olketa bigman iusim paoa ovarem olketa. Diswan hem no wei for iufala.” (Matthew 20:25-27) Taem olketa elder fulfillim responsibility bilong olketa, olketa barava trae for servem nara pipol.

¹⁵ Olketa Christian kasem encouragement for: “Tingim olketa wea leadim iufala, . . . and taem iufala lukim fasin bilong olketa, followim faith bilong olketa.” (Hebrews 13:7) Iumi no duim diswan from olketa nao leader. Jesus sei: “Leader bilong iufala hem wanfala, hem nao Christ.” (Matthew 23:10) Faith bilong olketa elder nao iumi followim bikos olketa followim really Leader bilong iumi, Christ. (1 Corinthians 11:1) Tingim samfala wei wea olketa elder traem best for followim Christ long wei wea olketa stap tugeta witim olketa narawan insaed kongregeson.

16. Nomata hem garem paoa ovarem olketa, long wanem wei nao Jesus deal witim olketa follower bilong hem?

¹⁶ Nomata Jesus hem hae winim olketa man wea no perfect and garem bigfala paoa from Dadi bilong hem, hem hambol taem hem deal witim olketa disaepol. Hem no mekem pipol wea lisin long hem feel iusles from hem showimaot bigfala savve bilong hem. Jesus showimaot wei for tingim feeling and kea for pipol bilong hem, and tingim samting wea olketa needim. (Matthew 15:32; 26:40, 41; Mark 6:31) Hem nating askem from olketa disaepol moa samting winim wanem olketa savve givim, and no enitaem hem askem samting wea hard tumas for olketa duim. (John 16:12) Jesus hem “garem kwaet fasin and hambol long heart.” Dastawe iumi no sapraes hao planti kasem strong from hem.—Matthew 11:28-30.

17. Hao nao olketa elder shud showimaot hambol fasin olsem Christ taem olketa deal witim olketa narawan insaed long kongregeson?

¹⁷ Sapos Christ datfala Leader hem showimaot fasin for no ova tumas, hem barava fitim for olketa wea lead insaed kongregeson for showimaot diswan long big wei! Tru nao, olketa careful for no iusim long rong wei paoa wea olketa garem. And olketa “no kam witim planti stael toktok,” for trae for mekem nara pipol sapraes. (1 Corinthians 2:1, 2) Bat, olketa trae for talem trufala Bible toktok long simpol and honest wei. And tu, olketa elder trae for balance long samting olketa expectim from nara pipol and for tingim need bilong olketa tu. (Philippians 4:5) From olketa luksavve hao evriwan garem wik point, long loving wei olketa tingim diswan taem olketa deal witim olketa brata. (1 Peter 4:8) And waswe, olketa elder wea barava hambol and garem kwaet fasin strongim man? Barava nao.

18. Wanem nao olketa elder savve lanem from wei wea Jesus deal witim olketa pikinini?

¹⁸ Pipol feel free for kam and story long Jesus, nomata olketa man nating tu. Tingim samting hem talem taem olketa disaepol tok strong long pipol wea “tekem kam olketa smol pikinini for hem.” “Letem olketa smol pikinini kam long mi,” Jesus talem, “no trae for stopem olketa.” Then “hem holem olketa pikinini hia insaed arm bilong hem and start for blessim olketa and putim hand bilong hem long olketa.” (Mark 10:13-16) Jesus hem showimaot feeling and kaen, and diswan mekem pipol laekem hem. Pipol no fraet long Jesus. Nomata olketa pikinini tu feel free witim hem. Pipol shud no fraet tu for go lukim olketa elder, and taem olketa showimaot feeling and kaenfala fasin, nara pipol—nomata olketa pikinini—feel free witim olketa.

19. Wanem nao insaed wei for garem “mind bilong Christ,” and hao nao for kasem diswan?

¹⁹ Wei wea olketa elder followim Christ Jesus hem depend long hao big nao savve wea olketa garem abaotem hem. Paul hem ask olsem: “Hu nao savve long mind bilong Jehovah, mekem hem savve teachim hem? Bat iumi garem mind bilong Christ.” (1 Corinthians 2:16) For garem mind bilong Christ hem minim iumi savve long wei bilong hem for tingting and evri saed long fasin bilong hem mekem iumi savve wanem nao hem maet duim taem hem feisim wanfala samting. Tingim sapos iumi savve long Leader bilong iumi long wei olsem! Tru nao, diswan minim for lukluk gud long olketa Gospel and evritaem fulimap mind bilong iumi witim wei for minim laef and example bilong Jesus. Taem olketa elder waka hard for followim lead bilong Christ go kasem disfala standard, olketa insaed kongregeson bae feel moa willing for followim faith bilong olketa. And olketa elder bae satisfae for lukim nara pipol hapi for followim step bilong datfala Leader.

Go Ahed Anda Long Lead Bilong Christ

20, 21. Taem iumi luk go insaed promis niu world, wanem nao iumi shud disaed strong for duim?

²⁰ Hem important tumas for iumi evriwan stap anda long lead bilong Christ. Taem iumi gogo for end bilong disfala system, iumi stap insaed taem olsem olketa Israelite wea stap long Flat Ples bilong Moab long 1473 B.C.E. Olketa redy for go insaed Promis Land, and thru long profet Moses, God hem sei: “Iu [Joshua] bae tekem disfala pipol long land wea Jehovah promisim long olketa laen dadi bilong olketa for givim long olketa.” (Deuteronomy 31:7, 8) Joshua nao hem leader wea God markem. For go insaed datfala Promis Land, olketa Israelite mas stap anda long Joshua olsem leader.

²¹ Bible sei long iumi: “Leader bilong iufala hem wanfala, hem nao Christ.” Christ nomoa bae leadim iumi go insaed promis niu world wea raeteous fasin bae stap. (2 Peter 3:13) So, iumi mas disaed strong for stap anda long lead bilong hem long evri part bilong living.

[Footnote]

Waswe, Iu Remember?

• Hao nao Christ hem leadim first kongregeson?

• Hao nao Christ leadim kongregeson bilong hem distaem?

• Why nao iumi shud stap anda long olketa wea lead insaed kongregeson?

• Wanem nao olketa wei wea olketa elder showimaot Christ hem Leader bilong olketa?

[Piksa long page 15]

Christ leadim kongregeson and holem olketa overseer insaed raet hand bilong hem

[Olketa Piksa long page 16]

“Obeyim olketa wea lead long iufala and stap anda long olketa”

[Piksa long page 18]

Jesus garem feeling and pipol feel free for go long hem. Olketa Christian elder trae hard for olsem hem