Young Pipol wea Lovem Truth

Planti thousand year go finis Hebrew man wea raetem psalm hem ask olsem: “Hao nao wanfala young man bae mekem road bilong hem klin?” (Psalm 119:9) Disfala kwestin fitim distaem tu bikos olketa young wan feisim planti problem long world. Dirty fasin hem mekem planti young wan garem AIDS, klosap haf long olketa wea garem disfala nogud sik olketa midolwan long 15 and 24 year. Wei for iusim drug kosim planti problem tu, and killim dae planti young wan. Nogud music; raf and dirty movie, television show and video; and dirty piksa long Internet hem barava spoelem young pipol. So kwestin wea man for raetem psalm askem hem samting wea planti dadi and mami and young wan tingim distaem.

Sem man for raetem psalm hia ansarem kwestin bilong hem olsem: “Long wei for go ahed for lukaot followim word bilong iu.” Tru nao, Word bilong God, Bible, garem gudfala information for young pipol, and taem olketa followim diswan planti young wan win long laef. (Psalm 119:105) Letem iumi lukluk long samfala example bilong olketa young wan wea lovem God and wea trae hard for stap strong long spiritual wei insaed wanfala world wea aftarem hapitaem and material samting.

Olketa Tinghae Long Help Bilong Dadi and Mami

Jacob Emmanuel hem wanfala full-taem pioneer minister for samfala year bifor hem serve long Mexico branch office bilong Olketa Jehovah’s Witness. Hem remember witim wei for tinghae hao love bilong hem for service bilong God hem grow: “Dadi and mami bilong mi nao main wan wea encouragem mi, nomata samfala spiritual brata wea mi fren witim olketa helpem mi tu. Olketa muvim mi for lovem preaching waka. Isisi olketa leadim mi long stretfala gogo; mi nating feel olsem olketa forcem mi.”

David, wea insaed full-taem ministry for samfala year finis, rememberim hao wei wea dadi and mami bilong hem serve olsem spesol pioneer taem hem and brata bilong hem smol barava muvim hem. Taem dadi bilong hem dae, mami bilong hem go ahed long spesol pioneer waka. Mami lukaftarem olketa and go ahed long waka for preachim gud nius. “Tufala nating forcem mi for pioneer,” David sei, “bat olsem famili mifala enjoyim tumas wei for pioneer and datwan muvim mi for duim sem samting tu.” Taem hem story abaotem wei wea gudfala goal and kea from dadi and mami hem important, David sei: “Evri naet, mami bilong mi savve readim From Paradise Lost to Paradise Regaineda long mifala. Wei wea hem readim olketa story hia long mifala helpem mifala for lovem wei for kasem spiritual kaikai.”

Wei for Tinghae Long Olketa Meeting

Samfala young pipol faendem hard for tinghae long olketa Christian meeting. Olketa attend bikos dadi and mami tekem olketa go. Bat, sapos olketa go ahed for attendim meeting, gogo olketa bae lovem olketa meeting. Tingim Alfredo, wea startim full-taem service taem hem 11 year. Hem sei taem hem samting olsem faev year, hem trae for no go long olketa meeting bikos hem laek sleep long there, bat dadi and mami bilong hem no letem hem for sleep long taem bilong meeting. Hem sei: “Taem mi grow kamap, isisi mi interest long olketa meeting, especially bihaen mi lane for read and raet, bikos long dat taem nao mi start for givim ansa long toktok bilong miseleva.”

Cintia, wanfala girl wea 17 year wea serve olsem regular pioneer, talem hao wei for kaban witim gudfala pipol hem affectim hem long bigfala wei for mekem grow love for service bilong God. Hem sei: “Wei for fren gud witim olketa brata and evritaem attendim olketa meeting hem mekem mi no missim olketa fren long world and samting wea olketa young pipol laek tumas for duim, olsem wei for go disco dance. Wei for lisin long olketa ansa and experience long olketa meeting startim feeling insaed long mi for givim Jehovah evri samting wea mi garem, and mi tingse best samting mi garem nao hem young laef bilong mi. So mi disaed for iusim long service bilong hem.”

Nomata olsem, hem no hol bak for talem diswan: “Bifor mi baptaes, mi faendem hem isi for missim olketa meeting, mi iusim wei for duim hom waka and olketa nara samting bilong skul olsem excuse. Mi missim samfala meeting, and diswan start for affectim mi long spiritual wei. Mi start for kaban witim wanfala boy wea no studyim Bible. Bat witim help bilong Jehovah, mi stretem diswan.”

Disison Bilong Seleva

Taem olketa askem Pablo, narafala young wan wea servem Jehovah full-taem, abaotem wanem nao hem tingse hem key for mekem grow love for truth long Word bilong God, hem sei: “Mi ting tufala samting nao stap: wei for study seleva and strong for preaching waka. Mi thankiu tumas long dadi and mami bilong mi for teachim mi truth abaotem Jehovah, and mi tingse hem nao best samting wea tufala givim long mi. Nomata olsem, miseleva need for barava sure long why mi lovem Jehovah. Dastawe, hem important tumas for savve long ‘waed and deep’ bilong Bible truth. Long wei olsem nomoa iumi savve garem feeling for barava laekem Word bilong Jehovah, wea mekem ‘wanfala fire wea bone’ insaed long iumi for story long nara pipol abaotem datwan. Datfala strong for preaching waka bae mekem wei for tinghae long truth wea iumi garem hem go ahed stap laef.”—Ephesians 3:18; Jeremiah 20:9.

Jacob Emmanuel, wea iumi storyim finis, rememberim tu wei wea hem important for man seleva nao mas chus for servem Jehovah. Hem sei dadi and mami bilong hem no forcem hem for baptaes. “Mi sure diswan hem nao best samting bikos mi lukim gudfala samting wea kamaot from datwan. Olsem example, samfala young wan wea mi kaban witim disaed for olketa baptaes long semtaem. Nomata datwan hem gud samting, mi lukim hao samfala duim olsem from feeling nomoa, and no longtaem bihaen, strong bilong olketa for Kingdom waka hem wikdaon. For mi, dadi and mami no forcem mi for disaed for dedicatem miseleva long Jehovah. Miseleva nao disaed.”

Part Bilong Kongregeson

Samfala young pipol lanem truth long Word bilong God seleva, and no kasem help from dadi and mami bilong olketa. From diswan, hem barava wanfala challenge for lane for duim stret samting and for go ahed long hem.

Noé talem hao truth barava helpem hem. From taem hem smol yet hem savve kros and raf tumas. Taem hem 14 year and start for studyim Bible, fasin bilong hem start for kamap moabeta, and diswan mekem dadi and mami bilong hem, wea no interest long Bible long datfala taem, hapi tumas. Taem Noé muv ahed long spiritual wei, hem want for iusim laef bilong hem long bigfala wei insaed service bilong God. Distaem hem insaed long full-taem ministry.

Olsem tu, Alejandro start for interest long Christian truth taem hem barava young, nomata dadi and mami no interest. Taem hem talemaot wei wea hem tinghae long truth, hem sei: “Mi growap insaed long wanfala Catholic famili. Bat mi start for interest tumas long Communist tingting for biliv God no stap, bikos church no ansarem olketa kwestin wea mi konfius long hem from taem mi smol yet. Organization bilong Jehovah helpem mi for kasem savve abaotem God. Hem sevem laef bilong mi bikos sapos mi no studyim Bible, maet mi join insaed long dirty fasin, wei for drinkim tumas alcohol, or iusim drug. Maet mi kamap part bilong eni grup wea againstim gavman tu, wea maet spoelem mi.”

Hao nao wanfala young wan savve go ahed for lukaotem truth and followim nomata dadi and mami bilong hem no saportim hem? Tru nao, olketa elder and samfala moa insaed long kongregeson garem barava important part long diswan. Noé sei: “Mi nating feel lonely, from mi evritaem feel klos long Jehovah. And tu, mi garem saport bilong planti loving brata and sista wea kamap olketa spiritual dadi, mami, and brata bilong mi.” Distaem hem serve long Bethel and iusim taem bilong hem insaed long service bilong God. Alejandro tu hem sei: “Samting wea mi evritaem tinghae long hem hem nao blessing for stap long wanfala kongregeson wea olketa elder showimaot loving kea long mi olsem wanfala person. Mi tinghae tumas long diswan bikos mi 16 year taem mi start for studyim Bible and wei wea mind no stap kwaet wea planti young wan kasem hem affectim mi tu. Olketa famili insaed kongregeson nating lusim mi. Evritaem samwan welkamim mi and sharem no haos and kaikai nomoa bat heart bilong hem tu.” Alejandro hem insaed long full-taem service for winim 13 year finis.

Samfala pipol maet tingse religion hem for olketa wea olo nomoa. Nomata olsem, planti young pipol lanem truth bilong Bible taem olketa young tumas and olketa lovem Jehovah and stap faithful long hem. Toktok bilong David long Psalm 110:3 hem fitim olketa young wan hia: “Pipol bilong iu bae willing for givim olketa seleva long day bilong iu for faet. Long nambawan holy fasin, from taem hem klosap daylaet, iu garem olketa youngfala man olsem wata bilong naet.”

Hem wanfala challenge for young pipol for lanem truth and followim. Iumi hapi tumas for lukim planti stap klosap long organization bilong Jehovah, attendim olketa meeting evritaem, and strong for studyim Bible. Taem olketa duim olsem, olketa mekem grow trufala love for Word bilong God and service bilong hem!—Psalm 119:15, 16.

[Footnote]