Wei wea Hem No Givap Kasem Reward

Planti wea garem stretfala heart wantem olketa wea olketa lovem for lane abaotem olketa purpose bilong God and garem hapi living. Taem samwan dedicatem hemseleva long God, maet gudfala fasin bilong olketa narawan, young and olo nao helpem hem for mekem datfala wise disison. Datwan nao happen long Jearim, wanfala teenage girl long Mexico, wea givim disfala note long olketa brata long wanfala spesol assembly day bilong Olketa Jehovah’s Witness:

“Mi laek for sharem hapi bilong mi witim iufala. Mi laek for talem iufala why. Eitin year go finis, taem mi no born yet, dadi and mami bilong mi lanem truth. Mami bilong mi muv ahed, and bihaen mi and brata bilong mi tu. Mi thrifala prea long Jehovah for dadi bilong mi tu for start for wakabaot long road bilong laef. Eitin year go finis, and tuday hem wanfala barava spesol day for mifala. Dadi bilong mi hem baptaes. Mi thankiu long Jehovah from hem no mekem end hem kam bifor disfala taem wea mifala weitim for longtaem. Thankiu Jehovah!”

Insaed olketa year, famili bilong young girl hia tingim olketa principle wea insaed long disfala kaonsel bilong 1 Peter 3:1, 2, wea sei: “Iufala waef, stap anda long hasband bilong iufala, mekem sapos eniwan no obeyim word, iufala maet savve pullim kam olketa, no long toktok, bat thru long fasin bilong waef bilong olketa, from olketa lukim klinfala fasin bilong iufala witim wei for showaot bigfala respect.” And young Jearim barava followim disfala toktok bilong Deuteronomy 5:16: “Honorim dadi and mami bilong iu, olsem Jehovah God bilong iu komandim long iu.” Wei for followim olketa principle olsem and patient for weit long Jehovah hem barava mekem Jearim and famili bilong hem kasem olketa blessing.