Iumi Fit for Expectim God for Duim Wanem?
LONG mek-eit century B.C.E., King Hezekiah bilong Judah wea hem 39 year hem faendaot hem garem wanfala sik wea bae killim hem dae. From hem sorre tumas long datfala nius, Hezekiah barava ask strong thru long prea for God healim hem. God ansarem hem thru long wanfala profet: “Mi herem prea bilong iu. Mi lukim iu krae. So mi bae addim go fiftin year long laef bilong iu.”—Isaiah 38:1-5.
Why nao God duim samting long datfala taem? Planti handred year bifor diswan, God promisim datfala raeteous King David: “Haos bilong iu and kingdom bilong iu bae stand strong for olowe; throne bilong iu bae stap strong olowe.” God talem tu hao datfala Messiah bae born long laen bilong David. (2 Samuel 7:16; Psalm 89:20, 26-29; Isaiah 11:1) Long datfala taem wea Hezekiah hem sik, hem no garem wanfala son yet. So, datfala laen bilong olketa king wea start kam from David hem klosap for end nao. So wei wea God duim samting for healim Hezekiah hem for protectim datfala laen wea Messiah bae born long hem.
For fulfillim olketa promis bilong hem, Jehovah planti taem duim samting for helpem pipol bilong hem insaed datfala taem bifor olketa Christian stap. Moses hem sei olsem abaotem wei wea God sevem olketa Israelite from wei for slave long Egypt: “Hem bikos Jehovah lovem iufala, and bikos hem keepim promis wea hem promisim long olketa laen dadi bilong iufala, dastawe Jehovah tek aotem iufala witim hand wea strong.”—Deuteronomy 7:8.
Long first century, God duim samfala samting tu for saportim olketa purpose bilong hem. Olsem example, long road wea go for Damascus, wanfala Jew wea nem bilong hem Saul hem kasem wanfala mirakol vision for stopem wei wea hem persecutim olketa disaepol bilong Christ. Wei wea disfala man change for kamap wanfala Christian and bihaen hem kamap aposol Paul, hem barava important saed long wei for mekem gud nius kasem olketa nation.—Acts 9:1-16; Romans 11:13.
Waswe, God Evritaem Duim Samting?
Waswe, wei for God duim samting hem samting wea happen evritaem or hem spesol samting nomoa? Bible showimaot hao diswan hem no happen evritaem. Nomata God sevem thrifala young Hebrew from wei for dae insaed bigfala fire and tu profet Daniel from hol bilong olketa lion, hem no duim olketa samting for sevem olketa nara profet bilong hem from dae. (2 Chronicles 24:20, 21; Daniel 3:21-27; 6:16-22; Hebrews 11:37) Long mirakol wei Peter hem go free from prison wea Herod Agrippa I hem putim hem insaed. Bat, sem king hia hem killim dae aposol James, and God nating stopem datfala criminal samting for happen. (Acts 12:1-11) Nomata God givim paoa long olketa aposol for healim olketa wea sik and tu for resurrectim olketa wea dae, hem no aotem nao datfala “nila long body” wea stap for spoelem aposol Paul, wea maet diswan wanfala physical sik.—2 Corinthians 12:7-9; Acts 9:32-41; 1 Corinthians 12:28.
God hem no duim eniting for stopem wei wea Roman Emperor Nero hem mekem bigfala persecution kamap againstim olketa disaepol bilong Christ. Olketa mekem olketa Christian safa, bonem olketa taem olketa laef nomoa, and torowem olketa go long olketa wild animal. Bat, olketa firstfala Christian no sapraes hao pipol againstim olketa, and hem nating mekem faith bilong olketa long God kamap wik. Diswan hem bikos Jesus warnim olketa disaepol finis hao olketa bae feisim olketa kot and hao olketa mas redy for safa and dae tu for samting wea olketa bilivim.—Matthew 10:17-22.
Olsem hem duim bifor, distaem God still savve sevem olketa servant bilong hem from danger, and no eniwan fit for tok daonem olketa wea feelim wei wea olketa kasem protection bilong hem. Bat, hem hard for iumi sure God duim or no duim eni samting long olketa kaen taem olsem. Jehovah hem nating duim eni samting for stopem wei wea planti faithful servant bilong hem garekil taem wanfala ples hem bosta long Toulouse, long France, and planti thousand faithful Christian dae long olketa Nazi and Communist camp or long olketa narataem wea nogud samting hem happen. Why nao God hem no evritaem duim samting for helpem olketa wea hem appruvim?—Daniel 3:17, 18.
“Taem and Samting wea Iumi No Expectim”
Taem wanfala trabol hem happen, hem savve affectim eniwan, and hem no depend sapos man faithful or nomoa. Taem datfala ples long Toulouse hem bosta, wea Alain and Liliane tufala no garekil insaed, 30 pipol nao dae and planti handred olketa garekil, nomata diswan hem no kamap from samting olketa duim. Long wei wea moa big, planti thousand pipol kasem nogud samting from criminal fasin, wei for no kea taem man draev, or from olketa war, and iumi kanduit blamem God for olketa samting hia wea happen. Bible remindim iumi hao “taem and samting wea iumi no expectim hem kasem” evriwan.—Ecclesiastes 9:11.
And tu, olketa man savve kasem sik, wei for olo, and dae. Nomata samfala wea tingse long mirakol wei God hem sevem laef bilong olketa or olketa sei hem mekem olketa kamap gud moa from wanfala nogud sik, gogo, olketa tu dae. Wei for aotem sik and dae and for ‘aotem evri krae’ from eye bilong olketa man hem samting wea bae kamap long future.—Revelation 21:1-4.
For diswan for happen, iumi needim God for duim wanfala barava big samting winim wei for samfala taem nomoa duim samting. Bible storyim wanfala samting wea bae happen wea hem kolem “bigfala day bilong Jehovah.” (Zephaniah 1:14) Insaed disfala barava big samting wea hem bae duim, God bae finisim evri wicked fasin. Olketa man bae kasem chance for laef olowe insaed perfect living, wea “olketa samting bilong bifor bae no kamap moa long mind, and hem bae no kamap moa long heart.” (Isaiah 65:17) Nomata olketa wea dae finis olketa bae laef bak, and diswan hem stretem bak datfala barava nogud samting wea kasem iumi olketa man. (John 5:28, 29) From barava bigfala love and gud fasin bilong hem God bae stretem evribit and for olowe olketa problem bilong olketa man.
Hao God Duim Samting Distaem
Bat, diswan hem no minim hao go kasem datfala taem God stap and lukluk nomoa taem creation bilong hem go ahed for safa. Distaem, God hem givim for evri man, nomata wanem nao tribe or living, chance for savve long hem and for mekem grow wei for fren witim hem. (1 Timothy 2:3, 4) Jesus storyim diswan taem hem sei: “No eni man savve kam long mi sapos Father, wea sendem mi, no pullim hem.” (John 6:44) God pullim kam pipol wea garem honest heart thru long Kingdom message bilong hem wea olketa servant bilong hem talemaot evriwea long world.
And tu, God savve duim samting for helpem olketa wea willing for letem hem leadim olketa. Thru long holy spirit bilong hem, God ‘openem heart bilong olketa’ for minim will bilong hem and followim olketa samting wea hem laekem olketa for duim. (Acts 16:14) Tru nao, taem hem givim iumi chance for savve long hem, Word bilong hem, and olketa purpose bilong hem, God showimaot pruv hao hem lovem and interest long iumi evriwan.—John 17:3.
And lastfala samting hem hao God helpem olketa servant bilong hem distaem, no thru long olketa mirakol wei for sev, bat thru long wei for givim holy spirit bilong hem and “paoa wea winim wanem iumi garem” for deal witim evri samting wea olketa maet feisim. (2 Corinthians 4:7) Aposol Paul raet olsem: “Long evri samting mi kasem strong from [Jehovah God] wea givim paoa long mi.”—Philippians 4:13.
Dastawe iumi garem planti reason for thankiu long God each day for laef and for hope wea hem givim iumi for laef olowe insaed wanfala world wea free from evri wei for safa. Man wea raetem psalm hem ask: “Wanem nao mi savve peim bak long Jehovah, for evri gud samting wea hem duim long mi? Kap bilong nambawan salvation mi bae tekem, and long nem bilong Jehovah mi bae singaot.” (Psalm 116:12, 13) Wei for readim evritaem disfala magasin bae helpem iu for minim samting wea God duim finis, wea hem go ahed for duim, and wea hem bae duim long future wea savve givim iu hapi distaem and wanfala strongfala hope for future.—1 Timothy 4:8.
[Blurb long page 6]
“Olketa samting bilong bifor bae no kamap moa long mind, and hem bae no kamap moa long heart.”—Isaiah 65:17
[Olketa Piksa long page 5]
Long taem bilong Bible, Jehovah no stopem wei wea olketa sutim dae Zechariah witim ston . . .
and wei wea Herod killim dae olketa wea no garem blame
[Piksa long page 7]
Klosap nao wei for safa bae finis; nomata olketa wea dae finis olketa bae laef bak