Report Bilong Olketa wea Talemaot Kingdom

“Mi Lanem Niu Samting!”

DOROTA, wanfala full-taem minister bilong Olketa Jehovah’s Witness long Poland, hem go witim son bilong hem wea 14 year for chekap long clinic bilong skul. Taem datfala chekap go ahed, doctor, Janina,a askem Dorota abaotem wanem kaen waka nao hem markem son bilong hem for duim long haos.

Dorota ansa olsem: “Taem mi no fit for duim, son bilong mi nao savve redyim kaikai for sixfala long mifala insaed famili. Hem savve klinim haos tu and help for repairim olketa samting raonem haos bilong mifala. Hem laekem wei for read. Hem wanfala gudfala student.”

Janina hem sei, “Datwan barava gud tumas. Mi waka long hia for 12 year finis, and mi nating herem eniting olsem.”

From hem lukim chance for givim witness, Dorota explainim long hem: “Planti parents distaem fail for givim stretfala training long pikinini bilong olketa. Hem nao why planti taem pikinini no respectim seleva.”

Janina ask, “Hao nao iu savve long evri samting hia? Planti parents no savve long olketa samting hia.”

“Nambawan information olsem hem kam from Bible,” Dorota hem ansa. “Olsem example, Deuteronomy 6:6-9 talem hao wei for teachim olketa pikinini bilong iumi hem start witim wei for teachim iumiseleva. Iumi shud putim deep insaed heart and mind bilong iumi firstaem olketa fasin wea iumi want for putim deep insaed olketa pikinini bilong iumi.”

“Diswan hem nambawan samting,” Janina sei. “Diswan hem nambawan samting!” Then hem askem Dorota hao nao Bible helpem hem for bringimap and teachim olketa pikinini bilong hem.

“Mifala studyim Bible evri week witim olketa pikinini bilong mifala,” Dorota explainim. “Mifala iusim wanfala buk wea garem title Questions Young People Ask—Answers That Work.”b Then hem go ahed for storyim datfala buk and talem samfala long olketa topic wea buk hia story abaotem.

“Mi lanem niu samting!” Janina sei. “Waswe, mi savve lukim datfala buk?”

Wan hour bihaen, Dorota hem kam bak witim datfala buk.

Taem hem go ahed for lukluk long datfala buk Janina hem ask: “Iu bilong wanem religion?”

“Mi wanfala Jehovah’s Witness.”

“Hao nao Olketa Jehovah’s Witness deal witim pipol bilong nara religion?”

Dorota sei: “Long sem wei wea mi deal witim iu—witim respect,” and hem sei moa: “Bat, mifala laekem olketa for savve long truth bilong Bible.”

“Mi barava feel gud nao,” Janina sei.

Long end bilong visit bilong hem, Dorota encouragem Janina for readim Bible. “Hem bae mekem laef bilong iu garem mining and helpem iu long waka bilong iu.”

Janina talemaot, “Iu barava muvim mi for duim olsem.”

Witim gudfala wei and wei for disaed strong, Dorota mekius long wanfala visit long office bilong doctor for givim nambawan witness.—1 Peter 3:15.

[Olketa Footnote]