Waswe, Iu Redyim Iuseleva for Stap Sef?
“Iu and evriwan wea stap witim iu mas go insaed long ark, bikos mi lukim hao iu nomoa iu raeteous midolwan long disfala genereson.”—GENESIS 7:1.
1. Wanem nao arrangement bilong Jehovah for sevem pipol long taem bilong Noah?
LONG taem bilong Noah, Jehovah “mekem flood kasem wanfala world wea fulap witim pipol wea no followim God.” Nomata olsem, hem mekem tu wanfala arrangement for sevem pipol. (2 Peter 2:5) Trufala God talem klia long datfala raeteous man, Noah, evri samting wea hem mas duim for buildim wanfala ark. Disfala ark hem for sevem laef bilong olketa taem flood kasem full world. (Genesis 6:14-16) Noah hem wanfala faithful servant bilong Jehovah, dastawe “hem gohed for duim evri samting wea God komandim hem for duim. Hem barava duim olsem.” Wanfala reason why iumi laef distaem hem bikos Noah hem obey.—Genesis 6:22.
2, 3. (a) Wanem nao pipol long taem bilong Noah duim taem olketa lukim samting wea Noah duim? (b) Wanem nao feeling bilong Noah taem hem go insaed ark?
2 For wakem ark hem no isi samting. Luk olsem pipol long datfala taem barava sapraes long waka wea Noah and famili bilong hem duim. Nomata olsem, disfala waka no mekem pipol biliv hao olketa mas go insaed datfala ark mekem olketa kasem salvation. Gogo, God hem no patient nao witim datfala wicked world.—Genesis 6:3; 1 Peter 3:20.
3 Bihaen Noah and famili bilong hem waka hard for plande year, Jehovah hem sei olsem long Noah: “Iu and evriwan wea stap witim iu mas go insaed long ark, bikos mi lukim hao iu nomoa iu raeteous midolwan long disfala genereson.” Noah garem faith and hem trustim toktok bilong Jehovah. So “Noah, waef bilong hem, olketa son bilong hem and waef bilong olketa, go insaed long ark.” Then Jehovah satem door for protectim olketa hia wea worshipim hem. Taem Flood kam, olketa stap sef insaed datfala ark. Olketa fit for trustim datfala ark wea God provaedem for sevem olketa.—Genesis 7:1, 7, 10, 16.
Taem Bilong Noah Hem Olsem Taem Bilong Iumi
4, 5. (a) Jesus markem taem wea hem stap moa witim wanem? (b) Wanem nao samfala samting wea semsem long taem bilong Noah and taem bilong iumi?
4 “Taem wea Son bilong man stap moa bae olsem taem bilong Noah.” (Matthew 24:37) Jesus talem toktok hia for showimaot hao taem wea hem bae stap moa hem olsem taem bilong Noah. Diswan hem barava tru. Start long 1919 nao pipol bilong Jehovah moa busy for talemaot message for warnim pipol long evri nation. Diswan semsem olsem warning wea Noah talem. Plande distaem wea herem disfala message duim sem samting olsem pipol long taem bilong Noah.
5 Jehovah iusim Flood for finisim datfala world wea “fulap witim raf fasin.” (Genesis 6:13) Pipol bifor wea lukim Noah and famili bilong hem luksavve hao olketa no join insaed eni raf fasin, and tu, olketa garem peace and gohed for buildim ark. Diswan hem semsem tu witim taem bilong iumi. Pipol wea garem honest heart lukim klia hao “raeteous man hem difren from wicked man, [and hao] man wea servem God hem difren from man wea no servem hem.” (Malachi 3:18) Plande pipol wea honest tinghae long wei wea Olketa Jehovah’s Witness honest, kaen, garem peace, and waka hard. Olketa fasin hia mekem olketa luksavve tu hao pipol bilong God difren from olketa narawan. Olketa Witness rejectim eni raf fasin and olketa letem spirit bilong Jehovah for leadim olketa. Dastawe, olketa garem peace and gohed for duim olketa raeteous samting.—Isaiah 60:17.
6, 7. (a) Wanem nao pipol long taem bilong Noah no luksavve long hem, and waswe pipol distaem? (b) Wanem nao samfala example wea showimaot hao pipol luksavve Olketa Jehovah’s Witness difren?
6 Pipol long taem bilong Noah no luksavve God sapotim Noah and hao Noah duim samting followim komand bilong God. So, olketa nating lisin long message bilong Noah and nating followim warning wea hem talem. Waswe pipol distaem? Plande pipol tinghae long waka and fasin bilong Olketa Jehovah’s Witness. Nomata olsem, plande long olketa no bilivim message abaotem gud nius and olketa warning insaed Bible. Olketa neiba, boss, or relative maet praisem olketa nambawan fasin bilong olketa tru Christian, bat olketa savve tok olsem: “Samting rong nao olketa joinim Olketa Jehovah’s Witness!” Olketa pipol hia nating luksavve hao holy spirit bilong God nao leadim olketa Witness, dastawe olketa showimaot olketa fasin olsem love, peace, kaenfala fasin, gud fasin, kwaet fasin, and fasin for kontrolem seleva. (Galatians 5:22-25) Wei wea olketa showimaot olketa fasin olsem shud mekem pipol bilivim message wea olketa preach abaotem.
7 Olsem example, tingim disfala samting wea happen long Russia taem Olketa Jehovah’s Witness buildim wanfala Kingdom Hall. Wanfala man kam and story long wanfala brata wea waka long datfala Kingdom Hall. Hem sei: “Disfala ples for waka hem barava difren tumas—no eniwan smoke, no eniwan swear, and no eniwan drunk! Luk olsem iu wanfala Jehovah’s Witness, iaman?” Then datfala brata hem ask bak olsem: “Sapos mi sei nomoa, waswe, bae iu bilivim mi?” Datfala man kwiktaem sei, “Luk olsem nomoa.” Long wanfala nara taon long Russia, bigman bilong datfala taon hem sapraes tumas taem hem lukim olketa Witness buildim niu Kingdom Hall bilong olketa. Bifor hem tingse evri religion hem semsem nomoa, bat bihaen hem lukim wei wea Olketa Jehovah’s Witness barava waka tugeta, hem changem tingting bilong hem. Tufala story hia hem example wea showimaot hao pipol bilong Jehovah difren from pipol wea no followim olketa standard bilong Bible.
8. Wanem nao iumi mas duim for stap sef taem disfala nogud world hem distroe?
8 Long olketa last day bifor Flood hem distroem datfala “world wea stap bifor,” Noah faithful for “preach abaotem raeteous fasin.” (2 Peter 2:5) From distaem hem olketa last day bilong disfala world, pipol bilong Jehovah gohed for preach abaotem olketa raeteous mark bilong God. Olketa talemaot gud nius abaotem wei wea olketa man fit for stap sef and laef insaed niu world. (2 Peter 3:9-13) Noah and famili bilong hem wea fraet long God stap sef insaed long ark. Long sem wei tu, sapos olketa man wanwan distaem laek for laef olketa mas garem faith, hipap witim organization bilong Jehovah long earth, and loyal for followim datwan.
Garem Faith and Bae Iu Stap Sef
9, 10. Why nao hem barava important for iumi garem faith sapos iumi laek for stap sef taem world bilong Satan hem distroe?
9 Sapos man hem laek for stap sef taem world bilong Satan hem distroe, wanem nao hem mas duim? (1 John 5:19) First samting, man mas luksavve hem needim protection. Then hem mas mekius long datfala protection. Pipol long taem bilong Noah busy for duim olketa samting evriday and olketa nating luksavve hao olketa need for garem protection from bigfala trabol wea klosap for kasem olketa. And tu, olketa no garem wanfala samting. Olketa no garem faith long God.
10 Bat Noah and famili bilong hem difren, olketa luksavve olketa needim protection and salvation. Olketa showimaot tu, faith long Sovereign bilong Universe, Jehovah God. Aposol Paul hem sei: “Sapos man no garem faith hem kanduit mekem [Jehovah] hapi, from man wea kam long God mas biliv hao hem stap and hem kamap datwan for givim reward long olketa wea barava lukaotem hem.” Then Paul sei: “From Noah garem faith, bihaen God givim hem warning abaotem olketa samting wea hem no lukim yet, hem showimaot wei for fraet long God and wakem wanfala ark for sevem famili bilong hem; and from hem garem faith, faith bilong hem judgem world, and hem kasem promis bilong raeteous fasin wea kam from faith.”—Hebrews 11:6, 7.
11. Wanem nao iumi lanem from wei wea Jehovah protectim pipol bilong hem bifor?
11 Sapos iumi laek for stap sef taem disfala nogud world hem distroe, wei for bilivim hao disfala world bae distroe hem no inaf. Iumi mas showimaot faith and iusim gud evri samting wea God provaedem for sevem iumi. And tu, iumi mas showimaot faith long ransom sakrifaes bilong Jesus Christ, Son bilong God. (John 3:16, 36) Iumi mas tingim tu hao pipol wea stap sef taem Flood hem kam, hem nomoa olketa wea stap insaed ark bilong Noah. Long taem bilong Israel bifor hem olsem tu. Olketa garem olketa taon for protectim olketa man wea no min for killim dae narawan. Only samting wea bae sevem man olsem, hem sapos hem ran go long olketa taon hia, and stap insaed go kasem taem hae priest hem dae. (Numbers 35:11-32) Long taem bilong Moses, olketa firstborn bilong olketa long Egypt dae taem datfala mek-ten trabol kasem olketa. Bat, olketa firstborn bilong olketa Israelite no dae. Why nao olsem? Jehovah hem talem olsem long Moses: “Olketa [Israelite] mas tekem lelebet blood [bilong sheep wea olketa kaikaim long Passover] and putim long timba wea stap raonem door bilong olketa haos wea olketa bae kaikai insaed. . . . And no eniwan long iufala shud go aotsaed from haos bilong hem go kasem morning.” (Exodus 12:7, 22) Tingim diswan, waswe, eni firstborn bilong olketa Israelite bae les for obeyim olketa instruction wea God givim and go aotsaed from datfala haos wea olketa putim blood raonem door bilong hem?
12. Wanem kwestin nao iumi shud askem iumiseleva, and why nao olsem?
12 So iumi distaem mas tingting gud abaotem laef bilong iumi. Waswe, iumi really stap insaed arrangement bilong Jehovah for protectim iumi long spiritual wei? Taem datfala bigfala trabol hem kam, olketa wea insaed arrangement bilong Jehovah for protectim olketa bae krae from olketa hapi and thankiu long hem. Olketa narawan bae krae from olketa sorre and ting bak long samting wea olketa no duim.
Olketa Change wea Isisi Kamap for Redyim Iumi
13. (a) Why nao olketa changem samfala samting insaed organization? (b) Explainim wei wea samfala samting hem change.
13 Jehovah hem isisi changem samfala samting insaed organization bilong hem long earth. Olketa samting hia strongim arrangement bilong hem for protectim iumi long spiritual wei, and tu, diswan mekem datfala arrangement hem waka gud. Start long olketa year bilong 1870 go kasem 1932, olketa long kongregeson nao votem olketa elder and deacon. Long 1932 olketa changem datwan and kongregeson votem wanfala service komiti. Waka bilong datfala komiti hem for helpem brata wea kasem appointment wea waka olsem service director. Long 1938, organization bilong Jehovah disaed for followim theocratic wei for appointim olketa brata long kongregeson. Bikos long direction wea Governing Body givim, start kam long 1972, olketa elder mekem olketa recommendation and olketa kongregeson kasem olketa leta wea appointim olketa overseer and ministerial servant long theocratic wei. Insaed olketa year wea go pas, waka bilong Governing Body hem kamap moa big and from datwan plande samting hem change for mekem waka bilong olketa hem gohed gud.
14. Wanem training program nao start long 1959?
14 Long 1950, from olketa ting raonem Psalm 45:16 olketa mekem wanfala training program wea hem still gohed distaem. Datfala scripture hem sei: “Olketa son bilong iu bae changem olketa laen dadi bilong iu, and bae iu appointim olketa olsem olketa prince evriwea long earth.” Distaem, olketa elder wea leadim kongregeson kasem training for duim olketa theocratic waka distaem and bihaen long Armageddon. (Revelation 16:14, 16) Olketa startim Kingdom Ministry Skul long 1959. Firstaem, datfala course hem gohed for wan month and hem for olketa presiding overseer wea bifor olketa kolem olketa, kongregeson servant. Bat, distaem datfala skul hem for evri overseer and ministerial servant. Bihaen olketa brata hia kasem training, olketa gohed for trainim each Witness bilong Jehovah wea stap insaed kongregeson bilong olketa. So from datwan, evriwan kasem help long spiritual wei and kamap moabeta long ministry for talemaot gud nius bilong Kingdom.—Mark 13:10.
15. Wanem nao tufala samting wea protectim Christian kongregeson?
15 Each man wea laek for kamap part long Christian kongregeson mas kasem olketa mark for mekem hem fit. Dastawe, pipol distaem wea tok spoelem organization no fit for kamap part long Christian kongregeson. Diswan hem olsem taem bilong Noah, from pipol wea garem disfala fasin no fit for go insaed ark. (2 Peter 3:3-7) Long 1952, Olketa Jehovah’s Witness start for barava followim wanfala arrangement for protectim kongregeson. Hem nao wei for disfellowshipim olketa wea sin and no repent. Bat, olketa wea sin and really repent kasem help for ‘stretem gogo bilong olketa.’—Hebrews 12:12, 13; Proverbs 28:13; Galatians 6:1.
16. Long spiritual wei, pipol bilong Jehovah hao?
16 Pipol bilong Jehovah barava rich long spiritual wei and diswan no samting wea kamap seleva or wea mekem iumi sapraes. Thru long profet Isaiah Jehovah talem finis: “Olketa servant bilong mi bae kaikai, bat iufala bae hangre. Olketa servant bilong mi bae drink, bat iufala bae thirsty. Olketa servant bilong mi bae hapi, bat iufala bae feel nogud. Olketa servant bilong mi bae singaot from hapi bikos heart bilong olketa hem fulap witim gudfala samting, bat iufala bae singaot from pain long heart and iufala bae krae big from iufala barava feel nogud tumas.” (Isaiah 65:13, 14) Jehovah hem gohed for givim iumi staka spiritual kaikai wea strongim iumi and wea iumi kasem long barava taem. Diswan helpem iumi for gohed stap strong long spiritual wei.—Matthew 24:45.
Mas Redi for Stap Sef
17. Wanem nao bae redyim iumi for stap sef?
17 Winim enitaem bifor, distaem nao taem for “iumi mas tingim and muvim each other for showimaot love and duim gudfala waka, [and] no lusim wei for hipap tugeta, olsem fasin bilong samfala, bat encouragem each other.” (Hebrews 10:23-25) Taem iumi kaban evritaem and busy for waka witim wanfala long olketa 98,000 kongregeson bilong Olketa Jehovah’s Witness, diswan bae redyim iumi for stap sef. Olketa brata and sista bae sapotim iumi taem iumi trae hard for showimaot datfala “niu fasin,” and tu, taem iumi helpem narawan for lane abaotem olketa samting wea Jehovah givim for helpem iumi for kasem salvation.—Ephesians 4:22-24; Colossians 3:9, 10; 1 Timothy 4:16.
18. Why nao iu disaed strong for stap klos long Christian kongregeson?
18 Satan and wicked world bilong hem barava laek for pullim iumi go aot from Christian kongregeson. Bat, iumi savve gohed for stap insaed Christian kongregeson and stap sef taem disfala wicked world hem distroe. Love for Jehovah and wei wea iumi tinghae long olketa nambawan arrangement bilong hem, hem muvim iumi for disaed strong go moa for againstim wei wea Satan trae hard for spoelem iumi. Taem iumi ting raonem olketa blessing wea iumi kasem distaem hem bae strongim iumi for no givap. Bae iumi story raonem samfala long olketa blessing hia long next article.
Wanem Nao Ansa Bilong Iu?
• Hao nao taem bilong iumi hem semsem witim taem bilong Noah?
• Wanem kaen fasin nao hem important for iumi garem mekem iumi stap sef?
• Olketa wanem change nao strongim arrangement bilong Jehovah for protectim iumi?
• Hao nao iumi wanwan savve redi for stap sef?
[Piksa long page 8]
Pipol wea stap long taem bilong Noah nating bilivim Noah
[Piksa long page 9]
Hem important for tingting strong long olketa warning bilong God
[Piksa long page 10]
Wanem nao goal bilong Kingdom Ministry Skul?
[Piksa long page 11]
Distaem nao hem taem for stap klosap long Christian kongregeson