Hapi Long Wei wea Hem “Win Witim Lamb”
LONG leta wea Carey Barber raetem long 1971, hem ting go bak long firstfala 50 year wea hem servem tru God. Hem sei: “Olketa year wea mi servem Jehovah hem barava gud tumas. Wei for kampani witim pipol bilong hem; protection from nogud pipol long world bilong Satan; chance for win witim datfala Lamb, Jesus Christ; and pruv wea showimaot love bilong Jehovah, hem join witim peace and wei for satisfae wea gardim heart and wea givim mi really hope wea long end mi bae win.”
Sixfala year bihaen, Brata Barber, wea hem wanfala anointed Christian, kamap member bilong Governing Body bilong Olketa Jehovah’s Witness. Insaed long next 30 year wea hem member bilong Governing Body, hem gohed luk forward for “win witim Lamb.” Hem kasem datwan from hem faithful go kasem taem hem dae long Sunday, April 8, 2007. Age bilong hem 101 year.—1 Corinthians 15:57.
Carey Barber hem born long England long 1905. Hem baptaes long Winnipeg long 1921, wea datwan hem long Canada. Tufala year bihaen, hem and twin brata bilong hem Norman, muv go long Brooklyn, long New York, for help long wanfala niu project. Long datfala taem, pipol bilong Jehovah start for wakem olketa buk bilong olketa seleva for sharem gud nius abaotem Kingdom “evriwea long earth.” (Matthew 24:14) Wanfala first assignment wea Brata Barber kasem hem for waka long wanfala smol printing machine. Wanfala samting wea datfala machine printim hem olketa document for olketa legal case wea bae kamap long United States Supreme Court. Gogo, Brata Barber waka long Service Department, and main waka wea hem duim hem for deal witim olketa samting saed long olketa kongregeson and preaching waka long datfala kantri.
Long 1948, Brata Barber kasem assignment for go waka olsem traveling overseer, and hem go long olketa assembly evriwea long west part bilong United States. Waka wea hem duim long printing and Service Department mekem hem fit for duim datwan. Hem sei hem barava enjoyim preaching waka bikos hem laekem moa for waka aotsaed long field. Disfala assignment mekem Brata Barber for meetim plande brata and sista. Wei wea hem kwiktaem savve long samting and strong long ministry barava helpem hem taem hem attendim mek-26 class bilong Watchtower Bible Skul bilong Gilead. Taem hem long datfala skul yet, hem start for fren witim nara student from Canada, wea nem bilong hem nao Sydney Lee Brewer. Bihaen long graduation tufala marit, and tufala enjoyim lelebet holiday insaed long ship taem tufala gogo for servem olketa kongregeson long Chicago, Illinois. Long 20 year wea tufala duim traveling waka, Sista Barber hem evritaem encouragem and sapotim hasband bilong hem.
Olketa wea meetim Brata Barber and savve long hem insaed long plande year wea hem waka olsem district or circuit overseer, or long 30 year wea hem waka olsem member bilong Governing Body bae rememberim olketa interesting tok and koment bilong hem. Iumi garem plande reason for hapi long “wei wea hem win witim Lamb.”