Gohed Showimaot Love wea No Enitaem Savve Finis
‘Love mekem man for no givap. Love bae no finis enitaem.’—1 COR. 13:7, 8.
1. (a) Pipol story abaotem love long wanem wei? (b) Wanem nao plande pipol lovem?
PIPOL savve talem enikaen samting abaotem love. Staka mekhae long love and sing abaotem tu. Evriwan needim love. Staka buk and olketa movie stap wea hem nao olketa mek-ap story nomoa abaotem love. Distaem, staka pipol no lovem God and neiba. Iumi lukim samting wea Bible talem bae happen long olketa last day. Olketa man “lovem olketa seleva, lovem selen, . . . and lovem hapitaem winim wei for lovem God.”—2 Tim. 3:1-5.
2. Wanem nao Bible talem abaotem wei for lovem olketa samting wea no fitim for iumi lovem?
2 Iumi olketa man savve showimaot love. Nomata olsem, Bible hem talem iumi for no lovem samting wea hem no fitim for iumi lovem. Bible storyim tu wanem savve happen taem man barava lovem olketa samting olsem. (1 Tim. 6:9, 10) Waswe, iu tingim wanem nao aposol Paul talem abaotem Demas? Nomata Demas waka witim Paul and fren witim hem, hem lovem nao olketa samting long world. (2 Tim. 4:10) Aposol John tu warnim olketa Christian long disfala barava nogud samting. (Readim 1 John 2:15, 16.) Man wea lovem God and olketa samting wea hem talem and duim, bae hard for lovem wei bilong world and olketa samting long world wea klosap for finis.
3. Wanem nao hem no isi for iumi duim? Diswan mekem olketa wanem kwestin nao kamap?
3 Nomata iumi stap long world bat iumi no olsem pipol long world. Hem barava no isi for stap klia long tingting bilong world abaotem love wea no stret. Hem barava important for no duim eni samting wea bae mekem iumi for lovem olketa samting wea no fitim for iumi lovem. Hu nao iumi shud gohed showimaot love long hem? Wanem nao olketa samting wea helpem iumi gohed showimaot love wea helpem man for no givap and wea no enitaem bae hem finis? Wei for duim olsem, bae mekem iumi kasem wanem gud samting distaem and long future? For ansarem olketa kwestin hia, iumi mas savve long tingting bilong God for mekem iumi savve duim stretfala samting.
Waka Hard for Gohed Lovem Jehovah
4. Wanem nao savve helpem iumi for lovem God?
4 Tingim wanfala farmer wea waka hard for redyim graon and plantim olketa seed. Hem savve olketa seed bae grow. (Heb. 6:7) Long sem wei tu, iumi mas waka hard for mekem grow love wea iumi garem for Jehovah. Hao nao for iumi diswan? Iumi mas redyim gud heart bilong iumi wea hem olsem datfala graon mekem iumi savve plantim truth abaotem Kingdom long hem. Iumi savve duim olsem taem iumi waka hard for studyim Bible mekem iumi savve long samfala samting moa abaotem Jehovah. (Col. 1:10) Taem iumi go evritaem long olketa meeting and tekpart long meeting datwan bae mekem iumi kasem moa savve. Waswe, iumi wanwan waka hard for kasem moa savve olsem?—Prov. 2:1-7.
5. (a) Hao nao iumi savve lane abaotem olketa wei bilong Jehovah? (b) Wanem nao iu savve talem abaotem paoa and wisdom bilong God and wei bilong hem for duim stret samting evritaem?
5 Jehovah talem iumi olketa wei bilong hem long Bible. Taem iumi studyim Bible and gohed lane abaotem Jehovah, iumi bae barava tinghae long olketa wei bilong hem. Olketa wei hia nao hem paoa, wei for duim stret samting, wisdom, and main wan nao hem love bilong hem wea nambawan. Perfect law bilong Jehovah hem stret and evritaem Jehovah hem duim stret samting. (Deut. 32:4; Ps. 19:7) Iumi savve ting raonem evri samting wea Jehovah wakem and barava tinghae long bigfala wisdom wea hem garem. (Ps. 104:24) Universe tu showimaot Jehovah hem garem bigfala paoa wea no savve finis.—Isa. 40:26.
6. Wanem nao God duim for showimaot hem lovem iumi? Wanem nao tingting bilong iu abaotem datwan?
6 Wanem nao iumi savve talem abaotem barava nambawan wei bilong God wea hem nao love? Hem showim love long evriwan. Hem duim datwan taem hem givim datfala ransom for sevem olketa man wea sin. (Readim Romans 5:8.) Disfala samting wea God duim hem for evriwan long full world, bat olketa wea lovem God and showimaot faith long Son bilong hem nomoa bae kasem gud samting from datwan. (John 3:16, 36) Taem iumi tingim diswan, hem shud mekem iumi for lovem God.
7, 8. (a) Wanem nao iumi mas duim for showimaot iumi lovem God? (b) Olketa wanem samting nao no savve stopem pipol bilong God for gohed obeyim olketa law bilong hem?
7 Wanem nao iumi savve duim for showimaot iumi lovem God from hem duim evri samting hia for iumi? Ansa from Bible hem barava important. Hem sei: “Sapos iumi lovem God, bae iumi obeyim olketa law bilong hem, from olketa law bilong hem no hard for iumi followim.” (1 John 5:3) Tru tumas, taem iumi lovem Jehovah God datwan bae mekem iumi laek for obeyim olketa law bilong hem. Dastawe iumi story long pipol abaotem nem bilong God and Kingdom bilong hem wea datwan hem helpem pipol. Taem iumi laek tumas for duim olsem, datwan showimaot stret samting nao mekem iumi for obeyim olketa law bilong God.—Matt. 12:34.
8 Nomata pipol no interest long message abaotem Kingdom or les for herem datwan, olketa brata bilong iumi evriwea long world gohed for obeyim olketa law bilong God. Olketa nating givap for duim gud ministry bilong olketa. (2 Tim. 4:5) Iumi tu laek for story long pipol abaotem God and for obeyim evri nara law bilong hem.
Why Iumi Lovem Lord Bilong Iumi Jesus Christ
9. Olketa wanem hardfala samting nao kasem Christ and wanem nao mekem hem no givap?
9 Iumi lovem God, and iumi garem staka reason tu for lovem Son bilong hem. Nomata iumi no lukim Jesus, taem iumi lanem moa samting abaotem hem, datwan helpem iumi for barava lovem hem. (1 Pet. 1:8) Wanem nao samfala hard samting wea kasem Jesus? Taem Jesus duim wanem Dadi bilong hem laekem, olketa pipol heitim hem, persecutim hem, tok spoelem hem, and talem laea samting abaotem hem. Hem safa tu long plande nara samting. (Readim John 15:25.) Nomata olsem, love bilong Jesus for Dadi bilong hem mekem hem no givap taem hem kasem olketa hard taem olsem. And tu, love mekem hem willing for sakrifaesim laef bilong hem for sevem pipol.—Matt. 20:28.
10, 11. Taem iumi tingim samting wea Christ duim, wanem nao iumi laek for duim?
10 Taem iumi ting raonem wanem Jesus duim for iumi, iumi bae barava lovem hem. From iumi olketa follower bilong Christ, iumi shud gohed showimaot love wea hem showimaot mekem iumi gohed for obeyim law bilong Jesus for preach abaotem Kingdom and helpem pipol kamap disaepol.—Matt. 28:19, 20.
11 From Christ lovem evriwan, datwan mekem iumi laek for duim gud waka bilong iumi for preach bifor end hem kam. (Readim 2 Corinthians 5:14, 15.) Love wea Christ showimaot hem barava helpem hem for duim samting wea God planim for olketa man. Taem iumi followim example wea Christ showimaot for iumi, iumi tu savve sapotim wei wea disfala plan bilong God bae kamap tru. For iumi duim olsem iumi mas barava lovem God. (Matt. 22:37) Taem iumi obeyim samting wea Jesus teachim and followim olketa komand bilong hem datwan showimaot iumi lovem hem. Datwan showimaot tu iumi disaed strong for sapotim rul bilong God nomata wanem samting hem happen. Hem nao samting wea Jesus duim.—John 14:23, 24; 15:10.
Gohed Showimaot Datfala Nambawan Wei Bilong Love
12. Wanem nao Paul hem minim taem hem talem disfala toktok “nambawan wei bilong love”?
12 Aposol Paul hem followim wei bilong Christ. From hem duim olsem, hem savve encouragem olketa Christian brata bilong hem for followim wei bilong hemseleva. (1 Cor. 11:1) Hem encouragem olketa Christian long Corinth for barava laek kasem samfala present bilong holy spirit wea showaot finis long first century, olsem for healim man and for toktok long difren languis. Nomata olsem, Paul storyim wanfala samting wea moa important for olketa duim winim olketa samting hia. Long 1 Corinthians 12:31, hem sei: “Bat mi showim iufala wanfala wei for followim wea winim olketa samting hia.” Olketa verse bihaen diswan showimaot hem storyim nambawan wei bilong love. Long wanem wei nao hem nambawan? Paul gohed for minim kam diswan. (Readim 1 Corinthians 13:1-3.) Sapos hem savve tumas for duim samfala samting and hem duim olketa bigfala samting bat hem no showimaot love, samting wea hem duim hem iusles nomoa! Holy spirit bilong God helpem hem for explainim disfala important point abaotem love long wei wea barava mekem iumi for ting raonem diswan!
13. (a) Wanem nao yeartext for 2010? (b) Long wanem wei nao love bae no finis enitaem?
13 Bihaen datwan, Paul explainim long iumi wanem nao love and olketa samting wea no showimaot love. (Readim 1 Corinthians 13:4-8.) Ting raonem sapos samting iumi duim hem showimaot love or nomoa. Tingting strong abaotem lastfala toktok long verse 7 and firstfala toktok long verse 8, wea sei: ‘Love mekem man for no givap. Love bae no finis enitaem,’ wea hem nao yeartext bilong iumi for 2010. Tufala samting wea spirit mekem olketa long Christian kongregeson duim taem kongregeson hem just start hem for talem profesi and toktok long difren languis. Bat long verse 8, Paul sei tufala samting hia bae finis. Bat love bae no finis enitaem. Jehovah hem love and hem stap for olowe. So love bae no finis enitaem. Love bae gohed for olowe from hem wei bilong God bilong iumi wea stap for olowe tu.—1 John 4:8.
Love Mekem Man for No Givap
14, 15. (a) Long wanem wei nao love helpem iumi for no givap taem iumi kasem hard taem? (b) Why nao wanfala young brata hem gohed for faithful?
14 Wanem nao helpem olketa Christian for gohed strong and no givap nomata long wanem hard taem or problem kasem olketa? Diswan hem from olketa showimaot love. Kaen love olsem mekem man willing for lusim material samting bilong hem for hem savve gohed faithful long Christ. Bae hem willing tu for lusim laef bilong hem for duim datwan. (Luke 9:24, 25) Tingim olketa faithful Witness wea safa long olketa raf prison long World War II and olketa wea stap long prison bihaen datwan.
15 Samting wea wanfala young Witness long Germany duim hem showimaot kaen love olsem. Nem bilong hem Wilhelm. Hem faithful go kasem taem wea olketa Nazi sutim hem dae. Long lastfala leta wea hem raetem long famili bilong hem, hem sei: “Winim eni nara samting, iumi evriwan mas lovem God, olsem Leader bilong iumi Jesus Christ hem talem. Sapos iumi no givap, hem bae blessim iumi.” Bihaen datwan, wanfala long famili bilong hem sei olsem long wanfala Wastaoa article: “Long olketa hard taem wea famili kasem, main important samting long mifala nao hem for lovem God.” Olketa brata wea stap long prison distaem long Armenia, Eritrea, South Korea, and olketa nara kantri tu showimaot semkaen wei for no givap. Olketa brata hia gohed for lovem Jehovah and no givap.
16. Wanem nao kasem olketa brata long Malawi?
16 Long plande kantri, olketa brata kasem olketa nara hard samting wea mekem olketa mas gohed for faithful and no givap. For 26 year long Malawi, gavman tambuim waka bilong Olketa Jehovah’s Witness. Olketa persecutim olketa and duim barava rabis samting long olketa. Gud samting kamaot from wei wea olketa no givap. Taem olketa kasem persecution, 18,000 Witness nomoa stap. Bat thirti year bihaen, namba bilong olketa hem 38,393. Long olketa nara kantri tu olketa kasem semkaen samting olsem.
17. Wanem nao kasem samfala wea famili bilong olketa no Witness, and wanem nao helpem olketa for no givap?
17 Hem tru, taem pipol barava spoelem and killim pipol bilong God datwan hem wanfala hard samting, bat samting wea hard tu hem taem wanfala Christian kasem hard taem from eniwan long famili bilong hem. Olketa relative or famili savve mekem man wari. Jesus talem finis datwan bae happen! Samting wea kasem staka Christian finis showimaot wanem Jesus hem talem hem barava tru. (Matt. 10:35, 36) Olketa young wan gohed strong nomata mami and dadi bilong olketa wea no Witness againstim olketa. Olketa raosem samfala young wan hia from haos and olketa nara Witness nao lukaftarem olketa. Samfala mami and dadi les long pikinini bilong olketa wea Witness. Wanem nao helpem olketa young wan hia for gohed strong nomata olketa kasem hard taem olsem? Olketa lovem olketa spiritual brata and sista bilong olketa bat main wan nao olketa lovem tumas Jehovah and Son bilong hem.—1 Pet. 1:22; 1 John 4:21.
18. Long wanem wei nao kaen love wea mekem man for no givap savve helpem olketa wea marit?
18 Samfala nara samting long laef tu man mas garem kaen love wea helpem hem for no givap. Love helpem hasband and waef for respectim wanem Jesus hem talem. Hem sei: “No eni man mas aotem samting wea God joinim finis.” (Matt. 19:6) Taem hasband and waef kasem “trabol long laef bilong olketa,” tufala shud evritaem tingim Jehovah nao hem main wan long marit bilong tufala. (1 Cor. 7:28) Bible hem sei: ‘Love helpem man for no givap.’ Love bae helpem hasband and waef for no lusim narawan and waka hard for marit bilong tufala gohed gud.—Col. 3:14.
19. Wanem nao pipol bilong God duim bihaen olketa disaster happen?
19 Love helpem iumi for no givap long taem bilong disaster. Diswan nao samting wea happen taem earthquake kasem south Peru and taem Hurricane Katrina spoelem samfala ples long Gulf area bilong America. Plande long olketa brata bilong iumi lusim haos or olketa material samting bilong olketa long datfala taem. Love mekem pipol long organization bilong Jehovah for givim relief supply, and olketa brata and sista volunteer for go buildim moa olketa haos and fixim olketa Kingdom Hall. Wei for duim olketa samting hia pruvim olketa brata bilong iumi lovem and tingim narawan nomata olketa wanem samting hem happen.—John 13:34, 35; 1 Pet. 2:17.
Love Bae No Finis Enitaem
20, 21. (a) Why nao love hem barava nambawan? (b) Why nao iu disaed strong for gohed showimaot love?
20 Samting wea kamaot from pipol bilong Jehovah lovem narawan showimaot why hem gud for iumi duim datwan. Nomata wanem samting hem happen, love hem savve barava helpem man winim eni nara samting. Lukim hao aposol Paul mekhae long datfala tru samting. Hem sei olketa present bilong spirit bae finis and Christian kongregeson bae kamap strong. Then hem sei: “Bat thrifala samting nomoa stap, hem nao faith, hope, and love. Bat love nao hem winim faith and hope.”—1 Cor. 13:13.
21 Gogo olketa samting wea iumi garem faith long hem bae kamap tru, so wei for garem faith long olketa samting hia bae finis. Taem evri samting kamap niu long future iumi bae no need for hope moa long olketa promis bilong Jehovah abaotem diswan bikos evri samting kamap niu finis. Bat waswe long love? Love bae no finis enitaem. Bae hem stap for olowe. Iumi bae barava minim olketa nara samting abaotem love bilong God taem iumi bae laef olowe long disfala earth. Sapos iu duim wanem God laekem, long wei for gohed showimaot nambawan wei bilong love wea bae no finis enitaem, iu savve laef olowe.—1 John 2:17.
Wanem Nao Ansa Bilong Iu?
• Why nao iumi mas no lovem rong samting?
• Love savve helpem iumi for gohed strong long olketa wanem samting?
• Long wanem wei nao love bae no finis enitaem?
[Blurb on page 27]
Yeartext for 2010 hem: ‘Love mekem man for no givap. Love bae no finis enitaem.’—1 Cor. 13:7, 8.
[Piksa long page 25]
Iumi preach from iumi lovem God
[Piksa long page 26]
Trufala love helpem olketa brata and sista bilong iumi long Malawi for gohed strong nomata olketa kasem hard taem