No Laea Long Iuseleva

“WANEM nao iu duim?” God nao askem datwan long Eve bihaen hem kaikaim frut wea hem tambuim. Eve sei long God: “Snek nao trikim mi dastawe mi kaikaim.” (Gen. 3:​13) Satan nao snek wea mekem Eve for no obeyim God, and hem nao “datfala snek bilong bifor kam, . . . wea laea long olketa man long full earth.”​—Rev. 12:9.

Genesis storyim Satan hem man for laea and hem trae for switim man. Eve bilivim laea samting wea Satan talem. Nomata olsem, iumi shud no tingse Satan nomoa savve laea long iumi. Bible warnim iumi tu abaotem wei for ‘laea long iumiseleva.’​—Jas. 1:​22.

Maet iumi tingse hem hard tumas for iumi laea long iumiseleva. Bat datwan savve happen dastawe God warnim iumi. So hem gud for tingim hao nao man savve laea long hemseleva and wanem kaen tingting nao savve spoelem iumi. Wanfala example long Bible savve helpem iumi.

Samfala wea Laea Long Olketa Seleva

Long samting olsem 537 B.C.E., Cyrus, king bilong Persia, mekem law for olketa Jew wea prisoner long Babylon savve go bak long Jerusalem and wakem moa temple. (Ezra 1:​1, 2) Long year bihaen, olketa Jew finis for wakem faondeson bilong niu temple olsem Jehovah talem. Olketa Jew wea go bak long Jerusalem hapi tumas and praisem Jehovah from hem blessim important waka wea olketa startim. (Ezra 3:​8, 10, 11) Bat no longtaem bihaen, pipol start for againstim waka wea olketa Jew duim and datwan mekem olketa wikdaon. (Ezra 4:4) Samting olsem 15 year bihaen olketa Jew kamap free, olketa bigman bilong Persia tambuim construction waka wea gohed long Jerusalem. Olketa bigman kam long Jerusalem and “iusim army for stopem olketa Jew.”​—Ezra 4:​21-​24.

From olketa Jew kasem hard taem olsem, datwan mekem olketa for laea long olketa seleva. Olketa sei: “Hem no kasem taem yet for wakem haos bilong Jehovah.” (Hag. 1:2) Olketa tingse God no laekem olketa for wakem temple long datfala taem. Olketa no lukaotem eni wei for duim wanem Jehovah laekem, bat olketa lusim spesol waka wea olketa duim and busy nomoa for wakem haos bilong olketa seleva. Profet Haggai askem olketa: “Waswe, hem fitim for iufala stap long olketa stael haos bilong iufala, and letem disfala haos [temple bilong Jehovah] for kamap nogud?”​—Hag. 1:4.

Wanem nao iu lanem from disfala example? Sapos iumi no garem stretfala tingting abaotem wanem taem plan bilong Jehovah bae kamap, datwan savve mekem iumi for no tinghae long worship bilong iumi and for busy tumas long wanem iumiseleva laekem. Tingim diswan. Sapos iu invaetem samfala for kam stap long haos bilong iu, maet iu waka hard for redyim samfala samting bifor olketa arrive. Bat then iu herem nius olketa delay. Waswe, bae iu no redyim olketa samting hia nao?

Haggai and Zechariah helpem olketa Jew for luksavve Jehovah laekem olketa for no delay for wakem temple. Haggai sei: “Iufala wea stap long disfala ples, iufala mas strong and duim waka.” (Hag. 2:4) Olketa mas gohed for duim waka wea olketa kasem, and trustim God bae givim holy spirit for helpem olketa. (Zech. 4:​6, 7) Waswe, disfala example savve helpem iumi for garem stretfala tingting abaotem day bilong Jehovah?​—1 Cor. 10:11.

Garem Stretfala Tingting

Long mek-tu leta wea aposol Peter raetem, hem storyim Jehovah markem taem for “wanfala niu skae and wanfala niu earth” kamap. (2 Pet. 3:​13) Hem sei samfala daotem sapos God bae stretem olketa nogud samting wea kasem olketa man. Olketa tingse no eni samting bae happen, and “evri samting gohed semsem nomoa start kam long taem wea God wakem olketa man.” (2 Pet. 3:4) Peter laek for stretem tingting bilong olketa. Hem sei: “Mi laek for talem samfala samting moa long iufala mekem iufala savve garem stretfala tingting.” Hem talem olketa Christian hao olketa wea mekfani abaotem day bilong Jehovah no garem stretfala tingting. Long bifor, God mekem Flood kavarem full earth for finisim olketa nogud pipol.​—2 Pet. 3:​1, 5-7.

Long 520 B.C.E., Haggai givim kaonsel tu long olketa Jew wea wikdaon and wea no gohed long waka bilong olketa. Hem sei: “Tingim wanem hem happen long iufala.” (Hag. 1:5) For helpem olketa garem stretfala tingting, hem talem olketa for tingim plan bilong God and olketa promis wea hem talem for pipol bilong Hem. (Hag. 1:8; 2:​4, 5) No longtaem bihaen, olketa Jew start moa for wakem temple nomata olketa bigman tambuim datwan. Olketa trae moa for stopem datfala waka bat olketa no savve stopem. Gogo olketa bigman letem datfala waka for gohed and insaed faevfala year temple hem finis.​—Ezra 6:​14, 15; Hag. 1:​14, 15.

Tingim Wanem Hem Happen Long Iumi

Taem iumi kasem hard taem, waswe, iu tingse iumi tu bae wikdaon olsem olketa Jew long taem bilong Haggai? Sapos datwan kasem iumi, maet hem no isi for gohed strong for preachim gud nius. Bat wanem nao savve mekem iumi for wikdaon? Maet iumi safa bikos pipol duim olketa samting wea no stret. Tingim wanem Habakkuk askem long God. Hem sei: “Hao long nao bae iu no lisin long mi taem mi krae long iu for helpem mi? Hao long nao bae iu no sevem mifala taem olketa nogud pipol gohed for mekem mifala safa?” (Hab. 1:​2) Maet samfala tingse day bilong Jehovah hem delay, and datwan savve mekem olketa Christian for isisi and tingim nomoa wei for garem gudfala living distaem. Waswe, iu tingse datwan savve happen long iu? Sapos iumi tingse day bilong Jehovah hem delay, iumi laea long iumiseleva. Hem important for followim kaonsel long Bible for ‘tingim wanem hem happen long iumi,’ and for “garem stretfala tingting”! Tingim diswan: ‘Waswe, mi shud feel nogud bikos disfala nogud world no finis long taem wea mi expectim?’

Iumi Mas Gohed for Weit

Tingim wanem Jesus talem abaotem taem wea world hem gogo for finis. Staka taem hem talem iumi for gohed wekap and lukaot. (Mark 13:​33-​37) Profesi abaotem Armageddon tu storyim sem samting. (Rev. 16:14-​16) Why nao iumi kasem datfala warning staka taem? Iumi needim olketa warning hia bikos sapos iumi tingse day bilong Jehovah no kam kwiktaem, datwan savve mekem iumi no gohed strong long waka bilong iumi.

Jesus storyim tokpiksa for helpem iumi luksavve why iumi need for gohed wekap taem iumi weitim end for kam. Hem storyim wanfala man wea samwan kam stealim haos bilong hem. Wanem nao datfala man long haos shud duim mekem datwan no happen? Hem shud gohed wekap full naet. Jesus kaonselem iumi olsem: “Iufala tu mas redi gudfala, bikos Son bilong man bae kam long taem wea iufala nating tingim.”​—Matt. 24:​43, 44.

Datfala tokpiksa showimaot hem important for iumi weit, nomata iumi mas weit longtaem. Iumi shud no wari abaotem why disfala nogud world hem no finis long taem wea iumi expectim. Iumi shud no laea long iumiseleva and tingse ‘day bilong Jehovah bae no kam yet.’ Kaen tingting olsem savve mekem iumi no strong for preachim gud nius abaotem Kingdom.​—Rom. 12:11.

Aotem Nogud Tingting

Sapos tingting bilong iumi hem no stret, principle long Galatians 6:7 savve helpem iumi. Hem sei: “No laea long iufala seleva . . . Eni samting wea [man] plantim, datwan nao bae hem harvestim.” Sapos iumi no plantim eni samting long garden, rabis grass savve kwiktaem for grow long datfala ples. Semsem tu, sapos iumi no garem stretfala tingting, bae iumi start for garem olketa nogud tingting. Olsem example, maet iumi ting olsem: ‘Day bilong Jehovah bae kam, bat bae hem no kam kwiktaem.’ Kaen tingting olsem savve mekem iumi isisi nomoa for duim olketa spiritual samting. Gogo iumi start for no strong nao for worshipim Jehovah. Taem day bilong Jehovah kam, maet iumi seke long datwan.​—2 Pet. 3:​10.

Bat bae iumi no garem nogud tingting sapos iumi luksavve long “samting wea God laekem iumi for duim, wea hem gudfala and stret and wea hem hapi long hem.” (Rom. 12:2) Wei for readim Bible evritaem nao bae helpem iumi. Bible savve strongim faith bilong iumi hao Jehovah evritaem duim samting long taem wea hem markem.​—Hab. 2:3.

Wei for study seleva, prea, go evritaem long olketa meeting, duim preaching waka, and duim kaenfala samting long narawan bae helpem iumi for “tingim evritaem datfala day bilong Jehovah.” (2 Pet. 3:​11, 12) Jehovah bae lukim wei wea iumi redi evritaem. Aposol Paul sei: “Iumi mas gohed for duim gudfala samting, bikos long taem wea God markem, bae iumi kasem gud samting sapos iumi no givap.”​—Gal. 6:9.

Tru tumas, iumi mas no laea long iumiseleva and tingse day bilong Jehovah bae no kam kwiktaem. Iumi mas strongim faith bilong iumi bikos day bilong Jehovah hem klosap tumas.

[Piksa long page 4]

Haggai and Zechariah encouragem olketa Jew for wakem temple

[Piksa long page 5]

Waswe sapos man long haos savve long taem wea man for steal bae kam?