Kwestin From Reader
Waswe, olketa Israelite hangem olketa criminal long post for killim olketa dae?
Long bifor, staka kantri nilam samfala criminal long post for killim olketa dae. Olketa bilong Rome taengem or nilam criminal long post, and maet hem laef for tu-thri day bifor hem dae from pain, hangre, hem no drink wata, and from sun and rain. Long tingting bilong olketa long Rome, wei for nilam man long post bae mekem hem kasem shame, and diswan nao hao olketa panisim olketa worst criminal.
Waswe long Israel bifor? Waswe, olketa Israelite hangem olketa criminal long post for killim olketa dae? Law bilong Moses hem sei: “Sapos man hem duim wanfala sin wea panis bilong datwan hem dae, and iufala killim hem dae and iufala hangem hem long post, dead body bilong hem mas no hange long datfala post for full naet. Bat iufala mas berem hem long datfala day.” (Deut. 21:22, 23) Diswan showimaot long taem bilong olketa Hebrew Scripture, olketa mas killim dae datfala man firstaem bifor olketa hangem hem long post.
Long Leviticus 20:2 hem sei: “Iufala mas killim dae eniwan long olketa son bilong Israel, and eniwan from difren ples wea stap long Israel wea givim pikinini bilong hem long Molech. Olketa pipol mas sutim hem dae witim olketa ston.” Olketa mas killim dae tu “olketa kastom man and olketa wea duim samting wea join witim devildevil.” Hao nao bae olketa duim datwan? Olketa ‘mas sutim olketa dae witim olketa ston.’—Lev. 20:27.
Long Deuteronomy 22:23, 24 hem sei: “Sapos wanfala young gele hem engage long wanfala man, and nara man meetim hem long taon and sleep witim hem, iufala mas tekem tufala go aotsaed long gate bilong datfala taon and sutim tufala witim ston, and olketa mas dae. Datfala gele mas dae bikos hem no singaot insaed datfala taon, and datfala man mas dae bikos hem spoelem waef bilong nara man. Iufala mas aotem olketa wea duim nogud samting.” So main wei bilong olketa Israelite bifor for killim dae man wea duim bigfala sin hem for sutim hem dae witim ston.a
Long taem bilong olketa Hebrew Scripture, olketa mas killim dae datfala man firstaem bifor olketa hangem hem long post
Long Deuteronomy 21:23 hem sei: “Evri man wea hange long post hem panis nao.” Wei wea olketa hangem dead body bilong nogud criminal long post wea evriwan savve lukim, hem olsem bigfala warning for olketa Israelite.
a Plande savveman sei olketa Israelite wea followim Law bilong Moses killim dae criminal firstaem bifor olketa hangem hem long post. Nomata olsem, samfala pruv stap wea showimaot long first century olketa Jew hangem samfala criminal long post for killim olketa dae.