Why Nao Staka Pipol Safa?

OLKETA NOGUD GAVMAN SPOELEM PIPOL

Bible hem sei: “Pipol sorre taem nogud man hem rul.”—Proverbs 29:2.

History showimaot staka man rul long raf wei, and datwan mekem pipol wea stap anda long olketa barava safa. Bat no evriwan wea rul olketa olsem. Samfala man wea rul laek for duim gud samting for olketa narawan. Bat taem olketa holem paoa, wei wea olketa bigman long gavman raoa and laek winim narawan savve spoelem gud samting wea olketa laek for duim. Or olketa maet iusim paoa wea olketa garem for kasem samting for olketa seleva, wea datwan savve spoelem pipol. U.S. Secretary of State long bifor, Henry Kissinger hem sei: “History showimaot no eni gud samting kamaot from staka samting wea man waka hard for duim and staka samting wea man planim no savve happen.”

Bible hem sei tu: “Hem no fitim man for kontrolem gogo bilong hemseleva.” (Jeremiah 10:23) Olketa man wea no perfect no fit for luksavve wanem bae happen long future and staka taem olketa no savve hao for deal witim olketa samting wea happen long olketa seleva. Sapos man no fit for kontrolem gogo bilong hemseleva, hao nao bae hem fit for leadim wanfala kantri? Waswe, iu luksavve why olketa gavman no fit for finisim wei wea pipol safa? Staka taem nogud gavman nao kosim wei wea pipol safa!

FALSE RELIGION SPOELEM PIPOL

Jesus hem sei: “Sapos iufala lovem iufala evriwan, pipol bae savve iufala olketa disaepol bilong mi.”—John 13:35.

Olketa bigman bilong olketa difren religion evritaem storyim love and peace. Nomata olsem, olketa no savve helpem member bilong olketa for lusim wei for favorim narawan. Staka taem olketa religion no helpem pipol for lovem narawan, bat olketa nao bihaenem wei wea pipol and olketa kantri divaed, raoa, and heitim narawan. Hans Küng, wea hem wanfala savveman abaotem religion, hem raetem disfala buk, Christianity and the World Religions. Long end bilong datfala buk hem sei: “Evritaem olketa religion bihaenem and sapotim olketa barava nogud war and raoa bilong olketa gavman wea mekem staka pipol safa.”

And tu, olketa bigman bilong staka religion acceptim nomoa wei for durong bifor marit, for duim adultery, and for man durong witim man and woman durong witim woman. Diswan mekem staka pipol kasem sik, killim dae baby insaed bele, babule nating, spoelem olketa marit and famili, and olketa savve kasem pain and barava sorre tumas.

OLKETA MAN NO PERFECT AND TINGIM SELEVA

“Samting wea man seleva laekem nao savve traem hem. Taem datfala feeling for laekem samting hem kamap strong tumas, hem mekem man for duim sin.”—James 1:14, 15.

From iumi evriwan sin, iumi savve duim mistek and mas faet againstim feeling for laek “duim olketa nogud samting wea body laekem.” (Ephesus 2:3) Taem chance for duim nogud samting wea body laekem hem kamap, iumi mas barava faet againstim datwan. Sapos iumi followim feeling bilong iumi and duim samting wea body laekem, barava nogud samting savve kamaot from datwan.

Phiroz Mehta, wanfala man for raet, hem sei: “Staka taem pipol safa bikos olketa aftarem nomoa samting wea olketa tingse bae mekem olketa hapi, olketa greedy, tingim seleva nomoa, and laek for garem bignem.” From olketa laekem tumas for drinkim alcohol, tekem drug, gambol, and durong, datwan spoelem samfala wea pipol respectim and hem mekem famili bilong olketa, olketa fren and olketa narawan for safa. Evri samting hia hem pruvim wanem Bible talem hem tru. Hem sei: “Iumi savve evri samting wea God wakem gohed for krae long heart and safa tugeta kam kasem distaem.”—Rome 8:22.

OLKETA DEMON GAREM BIGFALA PAOA

Bible showimaot Satan hem “god bilong disfala world” and olketa demon wea garem bigfala paoa sapotim hem.—2 Corinth 4:4; Revelation 12:9.

Olsem Satan, olketa demon gohed for kontrolem and laea long pipol. Aposol Paul storyim datwan taem hem sei: “Iumi insaed wanfala faet wea iumi no faetem olketa man bat iumi faetem olketa gavman, olketa leader, and olketa ruler bilong disfala world wea hem dark, wea hem nao bigfala sekson bilong olketa demon wea stap long heven.”—Ephesus 6:12.

Olketa demon laekem tumas for spoelem pipol, bat datwan hem no main goal bilong olketa. Samting wea olketa laekem nao hem for mekem pipol for no worshipim datfala Barava Haefala God, Jehovah. (Psalm 83:18) Pipol duim magic, samting wea join witim devildevil, studyim olketa star for savve long future, and talem samting wea bae happen long future. Olketa demon iusim olketa samting hia for kontrolem pipol and for laea long olketa. Dastawe Jehovah warnim iumi abaotem olketa samting hia and hem sei bae hem protectim olketa wea againstim Satan and olketa demon.—James 4:7.

IUMI STAP LONG “OLKETA LAST DAY”

Samting olsem tu thousand year go finis, Bible hem sei: “Iu mas savve, long olketa last day bae hem barava difren and bae evri samting hem hard tumas.”

Bible storyim tu olketa samting wea bae mekem laef hem hard tumas. Hem sei: “Pipol bae tingim olketa seleva nomoa, laekem tumas selen, tok praod, mekhae long olketa seleva,  . . . no garem love insaed long famili, and no willing for agree. Olketa bae laea for spoelem narawan, no savve kontrolem seleva, raf, and no laekem gud samting. Olketa bae spoelem fren bilong olketa, bighed, and praod tumas. Olketa bae no lovem God, bat bae interest nomoa for enjoyim seleva.” So nara samting wea mekem pipol safa distaem hem bikos iumi stap long “olketa last day.”—2 Timothy 3:1-4.

Nomata olketa man maet laek for duim samting for finisim wei for safa, olketa samting wea iumi storyim finis showimaot klia why olketa man no fit for duim datwan! So hu nao savve helpem iumi? Iumi savve depend long God, wea promis for “finisim evri samting wea Devil” and olketa follower bilong hem duim. (1 John 3:8) Long next article bae iumi storyim wanem God bae duim for finisim evri samting wea kosim wei for safa.