Klosap Nao Wei for Safa Bae Finis!
Tingim sapos iu stap long world wea no garem eni criminal, war, natural disaster, and no eniwan sik. Waswe, iu laek for stap long world wea bae iu no warim hard taem saed long selen, pipol no ting daonem narawan, and no eniwan spoelem narawan? Waswe, iu tingse diswan savve happen tu? Iumi savve no eni man or organization bilong man fit for duim olketa samting hia. Bat God promis for finisim evri samting wea mekem olketa man safa, olsem olketa samting wea iumi storyim long article bifor diswan. Bae iumi storyim samfala promis wea stap long Bible.
GUDFALA GAVMAN BAE RUL
“God long heven bae startim wanfala kingdom wea bae nating savve finis. And bae no eni pipol moa tekova long datfala kingdom. Datfala kingdom bae smasem and finisim evri gavman hia, and hem nomoa bae stap olowe.”—Daniel 2:44.
Kingdom bilong God hem wanfala gavman wea bae rul long heven. God chusim Jesus Christ for King long datfala gavman. Gavman hia bae changem evri gavman bilong man and Jesus bae duim wanem God laekem long heven and long earth tu. (Matthew 6:9, 10) No eni gavman bilong man bae changem datfala gavman bikos hem nao “Kingdom wea no savve finis and wea hem bilong Lord bilong iumi, Jesus Christ, wea hem nao sevem iumi.” Iumi bae stap long peace for olowe.—2 Peter 1:11.
FALSE RELIGION BAE FINIS
“Satan nao act olsem wanfala angel wea givim laet. So . . . olketa wakaman bilong hem tu act olsem olketa duim stret samting. Gogo bae olketa kasem samting wea hem fitim wanem olketa duim.”—2 Corinth 11:14, 15.
God bae finisim false religion bikos hem wanfala long olketa samting wea Devil hem bihaenem. Evri nogud samting wea religion join insaed bae finis tu olsem olketa war and wei for heitim narawan. From diswan, olketa wea lovem “trufala God wea laef” bae garem “wanfala faith” and olketa bae worshipim hem “followim holy spirit and followim samting wea tru.” Diswan bae mekem pipol garem peace and wan mind!—1 Thessalonica 1:9; Ephesus 4:5; John 4:23.
WEI WEA OLKETA MAN NO PERFECT BAE FINIS
“God nao bae stap witim olketa. Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—Revelation 21:3, 4.
Disfala promis bae kamap tru bikos Jehovah God hem givim Son bilong hem Jesus for dae for iumi olketa man. (John 3:16) Jesus bae mekem olketa man perfect. No eniwan bae safa bikos “God nao bae stap witim olketa” and hem bae “draem evri tias long eye bilong olketa.” Klosap nao wei wea olketa man no perfect and safa bae finis. Bible hem sei: “Olketa gudfala pipol nomoa bae stap long earth, and olketa bae stap long hem for olowe.”—Psalm 37:29.
OLKETA DEMON BAE FINIS
“Hem [Jesus Christ] kasholem datfala big snek. Hem datfala snek bilong bifor kam, wea hem nao Devil and Satan, and hem taemapem hem for 1,000 year. Hem torowem hem insaed datfala hol wea deep tumas. Hem satem and lokim gud mekem hem no laea moa long olketa pipol long evri kantri long world.”—Revelation 20:2, 3.
Taem Jesus taemapem Satan and olketa demon and torowem olketa long “datfala hol wea deep tumas,” Satan bae no savve duim eni samting for spoelem iumi. Olketa bae no garem paoa ovarem olketa man. Iumi bae hapi tumas for stap long world wea Satan and olketa demon no kontrolem pipol!
“OLKETA LAST DAY” BAE FINIS
Last samting for happen long “olketa last day” hem datfala ‘big trabol.’ Jesus hem sei: “Bihaen datwan nao bae bigfala trabol kamap wea hem winim eni trabol wea happen start kam long taem world hem start, kam kasem distaem, and no eni trabol wea kam bihaen bae nogud olsem.”—Matthew 24:21.
Datfala trabol bae hem big tumas bikos olketa barava nogud samting wea no happen enitaem bifor nao bae happen long datfala taem. Olketa samting hia bae finis long “Armageddon,” wea hem nao “datfala war wea bae kamap long bigfala day bilong Olmaeti God.”—Revelation 16:14, 16.
Evriwan wea laekem stret samting luk forward long end bilong disfala nogud world. Tingim samfala blessing wea olketa bae kasem anda long Kingdom bilong God.
OLKETA NARA SAMTING WEA GOD BAE DUIM
“Wanfala big crowd” bae laef long niu world: Bible hem storyim “wanfala big crowd” wea no eniwan savve kaontem. Olketa hia bae “no dae long datfala big trabol” and bae laef long datfala niu world wea evri samting hem raeteous. (Revelation 7:9, 10, 14; 2 Peter 3:13) Datfala big crowd bae luksavve Jesus Christ nao sevem olketa. Hem datfala “Pikinini Sheepsheep bilong God wea aotem sin bilong evri pipol long disfala world.”—John 1:29.
Education bilong Jehovah bae helpem man: Long niu world, “earth bae fulap witim savve bilong Jehovah.” (Isaiah 11:9) Jehovah bae teachim iumi hao for stap gud witim evri pipol and hao for lukaftarem gud disfala earth. God hem sei: “Mi Jehovah, mi God bilong iufala. Mi nao teachim iufala mekem iufala kasem gud samting, and mi nao leadim iufala for followim stretfala wei.”—Isaiah 48:17.
Olketa wea dae finis bae laef bak: Taem Jesus stap long earth hem mekem fren bilong hem Lazarus for laef bak. (John 11:1, 5, 38-44) Datwan showimaot anda long Kingdom bilong God Jesus savve mekem evriwan wea dae finis for laef bak.—John 5:28, 29.
Evriwan bae garem peace and evri samting bae raeteous for olowe: Anda long rul bilong Christ evri nogud samting bae finis. Hao nao iumi savve long datwan? Jesus savve lukim samting wea stap long heart bilong man, and bae hem duim datwan taem hem judgem olketa wea raeteous and olketa wea no raeteous. Olketa wea no laek for lusim nogud wei bilong olketa bae no stap long niu world bilong God.—Psalm 37:9, 10; Isaiah 11:3, 4; 65:20; Matthew 9:4.
Long disfala article iumi storyim nomoa tu-thri long olketa Bible profesi wea bae kamap tru long future. Taem Kingdom bilong God hem rul ovarem disfala earth “evriwan bae garem peace.” (Psalm 37:11, 29) God bae finisim evri samting wea kosim wei for safa and wea mekem olketa man kasem pain. Iumi savve sure long diswan bikos God hem sei: “Mi wakem evri niu samting. . . . Man savve trustim olketa toktok hia and hem barava tru.”—Revelation 21:5.