Iu No Fraet​—Jehovah Nao Bae Helpem Iu!

1, 2. Why nao hem no isi taem olketa wea waka long nara kantri go bak long hom bilong olketa? (Lukim piksa long start bilong study.)

TAEM Eduardo waka long nara kantri farawe from famili bilong hem, hem garem gud waka and kasem staka selen.a Bat taem hem studyim Bible witim Olketa Jehovah’s Witness hem luksavve famili no needim selen nomoa. Olketa needim hem for stap witim olketa and lukaftarem olketa. So hem go bak long famili bilong hem.​—Eph. 6:4.

² Eduardo savve Jehovah laekem hem for stap witim famili bilong hem, bat hem bae no isi taem hem go bak. Taem hem go bak hem mas strongim marit bilong hem and fren gud moa witim olketa pikinini bilong hem. And hem mas kasem inaf selen for lukaftarem olketa. Waswe, bae hem fit for duim datwan? Waswe, bae kongregeson helpem olketa?

FREN BAK WITIM JEHOVAH AND FAMILI BILONG IU

3. Taem dadi or mami go from olketa pikinini, hao nao datwan affectim olketa pikinini?

³ Eduardo sei: “Mi luksavve mi no lukaftarem and trainim olketa pikinini bilong mi long taem wea olketa barava needim mi for duim datwan. Mi no stap for readim Bible story long olketa, prea witim olketa, hagem olketa, and plei witim olketa.” (Deut. 6:7) Firstborn gele bilong hem, Anna, sei: “Taem dadi no stap witim mifala datwan mekem mi daotem miseleva evritaem.” Anna sei tu taem dadi kam bak, hem no laekem tumas for dadi hagem hem, and hem and olketa sista bilong hem no feel klos long dadi.

4. Why nao hem no isi for dadi duim waka olsem hed long famili taem hem no stap witim famili?

⁴ Taem dadi stap farawe from famili for longfala taem, datwan mekem hem no isi for duim waka olsem hed long famili. Waef bilong Eduardo, Ruby, sei: “Mi mas duim waka bilong Mami and Dadi long semtaem, and mi nao mas disaedem staka samting wea affectim famili. Taem Eduardo kam bak mi mas lane for stap anda long hem. Nomata distaem, mi savve forget hasband bilong mi nao hed long famili.” (Eph. 5:22, 23) Eduardo sei: “Taem mi no stap olketa gele bilong mi savve go askem mami for eni samting olketa laekem. Mi mas lane for duim waka bilong mi olsem hed long famili followim wei wea God talem.” Eduardo and Ruby laek showim long olketa pikinini tufala garem wan mind taem tufala mekem disison.

5. Wanem nao Eduardo duim for strongim bak wei wea hem fren witim famili taem hem kam bak, and hao nao datwan helpem famili?

⁵ Eduardo traem best for strongim bak wei wea hem fren witim famili bilong hem, and helpem olketa for fren gud witim Jehovah. Hem laek teachim truth long olketa pikinini long wanem hem talem and duim, no for sei hem lovem Jehovah nomoa, bat for showimaot tu. (1 John 3:18) Waswe, Jehovah blessim wanem Eduardo duim? Anna sei: “Mi tinghae long wei wea dadi traem best for lukaftarem and fren gud witim mifala. Taem mifala lukim hem trae for kasem samfala responsibility insaed kongregeson, datwan mekem mifala barava hapi. Disfala world trae for spoelem wei wea mifala fren witim Jehovah. Bat mifala lukim dadi and mami barava strong long truth, so mifala tu laek duim sem samting. Dadi promis no enitaem moa bae hem lusim mifala, and hem duim wanem hem promisim. Sapos hem go, maet mi no worshipim Jehovah distaem.”

LUKSAVVE WEI WEA IU MEKEM PROBLEM KAMAP

6. Wanem nao staka dadi and mami lanem long taem wea wanfala war kamap?

⁶ Olketa pikinini laekem dadi and mami for stap witim olketa. Olsem example, taem wanfala war kamap long kantri wea olketa kolem Yugoslavia bifor, staka dadi and mami wea Olketa Jehovah’s Witness no savve go waka. From datwan olketa garem staka taem for stap witim pikinini bilong olketa long haos. Dadi and mami plei witim pikinini, story witim olketa, and study witim olketa. Olketa pikinini laekem tumas, and olketa hapi nomata laef hem no isi taem datfala war gohed. Wanem nao olketa lanem from datwan? Olketa pikinini barava laekem dadi and mami for stap witim olketa. Olketa laekem datwan winim selen or olketa present. Olsem Bible talem, olketa pikinini bae kasem gud samting taem dadi and mami spendem taem witim olketa and trainim olketa.—Prov. 22:6.

7, 8. (a) Why nao maet samfala dadi or mami seke taem olketa go bak long famili? (b) Wanem nao savve helpem dadi or mami for fren bak witim pikinini bilong olketa?

⁷ Samfala dadi or mami seke taem olketa go bak long famili. Maet samfala pikinini showimaot olketa no hapi for lukim olketa, or showimaot olketa no trustim dadi or mami wea just kam bak. Maet dadi or mami sei: “Hao nao iu nating tinghae long wanem mi duim for iu?” Bat pikinini hem feel nogud bikos dadi or mami lusim hem. Wanem nao dadi or mami savve duim for stretem kaen problem olsem?

⁸ Prea long Jehovah for helpem iu minim feeling bilong famili and showimaot iu lovem olketa. Iu mas story witim famili bilong iu tu and talemaot wei wea iu lusim olketa hem mekem datfala problem kamap. Maet hem gud tu for sei sorre from iu lusim olketa. Taem famili lukim iu evritaem traem best for helpem famili stap gud, olketa bae savve iu barava sorre. Sapos iu patient and no givap, maet famili bilong iu start for lovem and respectim iu moa.

PROVAEDEM NEED BILONG FAMILI

9. Why nao iumi shud no aftarem staka material samting?

⁹ Aposol Paul sei taem olketa Christian kamap olo and no fit for lukaftarem olketa seleva, olketa pikinini or grani bilong olketa nao shud helpem olketa. Paul sei tu, sapos iumi garem kaikai, kaleko, and ples for stap iumi mas satisfae nomoa witim olketa samting hia. Iumi shud no evritaem aftarem staka selen or staka material samting. (Readim 1 Timothy 5:4, 8; 6:6-10.) For provaedem need bilong famili, wanfala Christian no need for kamap rich long disfala world wea klosap for finis. (1 John 2:15-17) Iumi mas no letem “riches wea savve switim man” or “olketa samting long laef wea man savve wari abaotem,” for mekem famili bilong iumi no “hol strong long datfala tru laef” wea bae kamap long niu world bilong God!​—Mark 4:19; Luke 21:34-36; 1 Tim. 6:19.

10. Why nao hem wise for iumi no kaon?

¹⁰ Jehovah savve iumi needim samfala selen. Bat selen no savve helpem and protectim iumi long sem wei wea wisdom from Jehovah savve helpem and protectim iumi. (Eccl. 7:12; Luke 12:15) Staka taem pipol no luksavve hem expensive for muv go long nara kantri. And maet olketa no kasem selen wea olketa tingse bae olketa kasem long there. Barava nogud samting savve kamaot from wei for go long nara kantri for kasem selen. Staka wea lusim famili bilong olketa garem bigfala kaon taem olketa kam bak. Olketa mas waka for peim bak kaon, and from datwan olketa no garem staka taem for duim wanem God laekem. (Readim Proverbs 22:7.) Iumi wise taem iumi no duim eni samting wea bae mekem iumi for kaon.

11. Hao nao wei for mekem wanfala budget savve helpem famili?

¹¹ Eduardo savve, for hem lukaftarem gud famili bilong hem taem hem kam bak, hem mas tingting gud abaotem hao famili iusim selen bilong olketa. Hem and waef mas budgetem selen for peim nomoa wanem olketa really needim. For followim budget bilong olketa, olketa no savve peim staka samting olsem bifor taem olketa garem staka selen. Bat evriwan long famili waka tugeta and no peim olketa samting wea olketa no needim.b Eduardo sei: “Olsem example, mi aotem olketa pikinini bilong mi from olketa private skul and putim olketa long pablik skul.” Hem and famili askem Jehovah for hem faendem waka wea bae no spoelem olketa spiritual samting wea famili duim. Wanem nao Jehovah duim for ansarem prea bilong olketa?

12, 13. Wanem nao Eduardo duim for sapotim famili bilong hem, and wanem nao Jehovah duim for blessim disison bilong hem for garem simpol laef?

¹² Selen wea Eduardo kasem long tufala year bihaen hem kam bak, hem fitim for peim nomoa olketa samting wea famili needim evriday. Gogo olketa mas iusim tu selen wea olketa keepim long bank, and Eduardo hem barava taed. Bat Eduardo sei: “Mifala savve go long evri meeting and go preaching tugeta.” Hem disaed for no duim eni waka wea bae mekem hem for lusim famili. Hem sei: “Mi lanem tu-thri difren kaen waka mekem taem mi no faendem wanfala waka, then mi savve duim narawan.”

¹³ From Eduardo mas isisi peim kaon bilong hem, hem mas peim big interest for selen wea hem kaonem. Nomata olsem, Eduardo willing for duim datwan, mekem hem savve worshipim Jehovah witim famili bilong hem. Eduardo sei: “Distaem selen wea mi kasem hem smol tumas, no olsem selen wea mi kasem taem mi waka long ovasea, bat mifala no short long kaikai. ‘Hand bilong Jehovah no short.’ And mifala disaed for pioneer.” Bihaen datwan, economy long kantri start for kamap gud, and datwan mekem hem moa isi for Eduardo lukaftarem famili bilong hem.​—Isa. 59:1.

HEVI FROM OLKETA RELATIVE

14, 15. (a) Wanem nao olketa famili savve duim sapos olketa relative laekem olketa for aftarem material samting winim spiritual samting? (b) Wanem nao savve happen sapos iumi showimaot gudfala example?

¹⁴ Long staka kantri, pipol feel olsem olketa mas givim selen and olketa present long olketa relative and fren bilong olketa. Eduardo sei: “Hem culture bilong mifala, and mifala hapi for givim samting long narawan.” Bat hem sei tu: “Mifala no savve givim evri samting wea olketa relative laekem.” Hem tok kaen long olketa relative and sei hem bae givim olketa wanem hem fit for givim sapos datwan no spoelem famili, and bae hem no duim eni samting wea spoelem wei wea famili worshipim Jehovah.

¹⁵ Samfala relative maet no hapi long man wea no laek lusim famili for go waka long nara ples or wea disaed for kam bak long hom. Maet samfala sei hem no lovem relative or hem selfish. Why nao olketa tok olsem? Bikos olketa relative hia laekem hem for givim selen long olketa. (Prov. 19:6, 7) Gele bilong Eduardo, Anna, hem sei sapos famili showimaot wei for worshipim Jehovah hem important winim selen, maet olketa relative bae luksavve hem important for worshipim Jehovah. Bat sapos famili no showimaot datwan, maet olketa relative no luksavve hem important for worshipim Jehovah.​—Comparem 1 Peter 3:1, 2.

SHOWIMAOT FAITH LONG GOD

16. (a) Wanem rong tingting nao maet samwan garem? (Jas. 1:22) (b) Olketa wanem disison nao Jehovah savve blessim?

¹⁶ Wanfala sista wea lusim famili bilong hem for go waka long nara kantri, sei olsem long olketa elder: “Mifala mas mekem big sakrifaes for mi savve kam long hia. Hasband bilong mi mas go daon from elder. So mi hope Jehovah bae blessim wei wea mi kam long hia.” Sapos iumi showimaot iumi garem faith and mekem olketa disison followim wanem Jehovah laekem, Jehovah bae blessim iumi. Jehovah bae no blessim eni disison wea no followim wanem hem laekem. And Jehovah bae no hapi sapos iumi lusim privilege long kongregeson for reason wea no stret.​—Readim Hebrew 11:6; 1 John 5:13-15.

17. Why nao iumi shud askem Jehovah for helpem iumi bifor iumi disaed for duim eni samting, and hao nao iumi savve duim datwan?

¹⁷ Prea long Jehovah for helpem iu bifor iu disaed for duim eni samting, mekem iu no sorre bihaen. Askem Jehovah for givim iu holy spirit, wisdom, and for leadim iu. (2 Tim. 1:7) Ting raonem olketa kwestin hia: ‘Wanem nao mi willing for lusim mekem mi worshipim Jehovah? Waswe, bae mi followim wanem Jehovah talem for stap witim famili bilong mi, nomata sapos datwan minim bae mifala no garem staka material samting?’ (Luke 14:33) Askem olketa elder for helpem iu, and followim advaes from Bible wea olketa givim iu. Sapos iu duim datwan, iu showimaot iu trustim promis wea Jehovah talem for helpem iu. Olketa elder bae no talem iu wanem for duim, bat olketa bae helpem iu for mekem olketa wise disison wea bae mekem iu hapi.​—2 Cor. 1:24.

18. Hu nao garem responsibility for lukaftarem famili, bat wanem nao iumi savve duim for helpem olketa?

¹⁸ Jehovah givim responsibility for lukaftarem famili evriday long olketa famili hed. Iumi shud praisem and prea for olketa famili hed wea lukaftarem and no lusim famili bilong olketa, nomata olketa laek for go waka long nara ples or olketa narawan talem olketa for duim datwan. And tu, iumi garem chance for showimaot iumi lovem olketa faithful brata hia, taem iumi helpem olketa long taem bilong disaster or taem eniwan long famili kasem big sik. (Gal. 6:2, 5; 1 Pet. 3:8) Waswe, iu savve helpem olketa for faendem waka klosap long ples olketa stap, or givim samting wea olketa barava needim, olsem selen or kaikai? Sapos iu duim olsem, maet datwan mekem olketa no ting for lusim famili for faendem waka long nara ples.​—Prov. 3:27, 28; 1 John 3:17.

NO FORGET, JEHOVAH BAE HELPEM IU!

19, 20. Why nao olketa Christian barava sure Jehovah bae helpem olketa?

¹⁹ Jehovah promis olsem: “Iufala mas no laekem tumas selen, bat iufala mas hapi nomoa long samting wea iufala garem, bikos God hem sei: ‘Bae mi nating lusim iu.’ So iumi mas no fraet, bat sei: ‘Jehovah nao hem helpem mi. Bae mi no fraet. No eniwan savve spoelem mi.’” (Heb. 13:5, 6) Hao nao samting wea disfala scripture talem hem kamap tru?

²⁰ Wanfala elder long wanfala poor kantri sei staka taem pipol sei Olketa Jehovah’s Witness olketa hapi pipol. Hem sei, olketa luksavve tu nomata olketa Witness wea poor olketa evritaem werem naes kaleko and garem olketa samting wea olketa needim. Diswan nao samting wea Jesus promisim. (Matt. 6:28-30, 33) Jehovah lovem iumi and laekem iumi for kasem gud samting. Jehovah barava interest long evri wakaman bilong hem, and hem evritaem redi for “iusim strong bilong hem for helpem” iumi. (2 Chron. 16:9) Dastawe hem givim iumi olketa law abaotem famili laef and hao for provaedem material samting wea famili needim. Taem iumi obeyim olketa law hia, datwan showimaot long Jehovah iumi lovem and trustim hem. Bible sei: “Samting wea showimaot iumi lovem God, hem taem iumi obeyim olketa law bilong hem, and olketa law bilong hem no hard tumas for obeyim.”​—1 John 5:3.

21, 22. Wanem nao mekem iu disaed for trustim Jehovah?

²¹ Eduardo sei hem sorre hem lusim waef and olketa pikinini, bat hem luksavve hem no savve changem samting wea happen finis. Staka wea hem waka witim bifor olketa rich bat olketa nating hapi. Olketa kasem staka problem long famili bilong olketa. Bat famili bilong Eduardo barava hapi! Nomata famili bilong Eduardo and olketa nara famili long kantri bilong hem olketa poor, olketa trustim Jehovah bae helpem olketa. Eduardo sei: “Promis wea Jesus talem hem barava kamap tru long laef bilong mifala evriwan.”​—Readim Matthew 6:33.

²² Iu no fraet! Obeyim Jehovah and trustim hem. Iu savve kamap wanfala gud famili hed sapos iu lovem Jehovah, waef bilong iu, and olketa pikinini bilong iu. Taem iu duim datwan iu bae lukim ‘Jehovah nao hem helpem iu.’