Helpem Olketa Narawan for Duim Best Bilong Olketa

1, 2. Wanem nao tingting bilong Jehovah abaotem olketa wea worshipim hem?

STAKA taem dadi and mami sapraes long olketa samting wea pikinini bilong olketa savve duim. Maet iu tu feel olsem taem iu lukluk long olketa samting wea pikinini bilong iu duim. Maet wanfala pikinini savve gud long hao for pleim sports, and narawan laek for drawim piksa or wakem samting. Nomata wanem samting pikinini savve duim, parents laek for helpem olketa for duim best bilong olketa long datwan.

² Jehovah hem olsem wanfala Dadi wea interest long wanem olketa pikinini bilong hem long earth duim. Long tingting bilong hem olketa “barava spesol” bikos olketa faithful for worshipim hem. (Hag. 2:7) Bat maet iu luksavve olketa brata and sista no semsem long wanem olketa fit for duim. Olsem example, samfala brata savve tumas hao for givim tok, and olketa narawan savve hao for organizem samting. Staka sista savve kwiktaem lanem difren languis for preach long pipol wea iusim datfala languis. Olketa narawan waka hard for lukaftarem olketa wea sik and encouragem olketa wea needim help. (Rome 16:1, 12) Iumi tinghae long olketa brata and sista olsem insaed long kongregeson.

3. Olketa wanem kwestin nao bae iumi storyim long disfala study?

³ Samfala Christian, especially olketa brata wea young or niu long truth, maet no feel olsem olketa part long kongregeson yet. Wanem nao iumi savve duim for helpem olketa duim best bilong olketa long kongregeson? Why nao iumi shud luksavve long gud samting wea olketa fit for duim, olsem Jehovah tu hem duim?

JEHOVAH LUKIM GUD SAMTING WEA IUMI FIT FOR DUIM

4, 5. Wanem nao Jehovah lukim long Gideon, and wanem nao iumi lanem from example bilong Jehovah?

⁴ Samfala example long Bible showimaot Jehovah no lukim nomoa gud samting wea iumi duim, bat hem luksavve tu long wanem wea iumi fit for duim. Olsem example, taem Jehovah chusim Gideon for helpem olketa Israelite kamap free from olketa Midianite, masbi Gideon hem seke taem wanfala angel sei long hem: “Jehovah hem stap witim iu, iu strongfala man for faet.” Long datfala taem Gideon no feel olsem hem “strongfala man for faet.” Hem feel olsem hem no fit for sevem pipol bilong God. Bat Jehovah no ting olsem. Hem luksavve wanem Gideon fit for duim, and hem sure Hem savve iusim Gideon for sevem olketa Israelite.—Readim Judges 6:11-16.

⁵ Jehovah trustim Gideon bikos hem savve wanem Gideon fit for duim. Olsem example, taem Gideon hammerim wheat, Jehovah lukim hem duim datwan witim full strong bilong hem. And tu, staka taem olketa farmer savve duim datwan long aotsaed. Bat Gideon hammerim wheat insaed wanfala ples for aotem juice bilong olketa grape, mekem olketa Midianite no lukim datfala wheat and stealim. Jehovah luksavve Gideon hem man for waka hard. And tu, hem man wea kleva, garem wei for luksavve, and savve disaedem samting long wisefala wei mekem hem no stap long danger. Tru nao, Jehovah lukim wanem Gideon fit for duim and trainim hem.

6, 7. (a) Hao nao tingting bilong Jehovah abaotem Amos hem difren from tingting bilong olketa narawan? (b) Hao nao iumi savve Amos nao stretfala man for talemaot message bilong Jehovah?

⁶ Profet Amos tu hem narawan wea Jehovah luksavve wanem hem fit for duim. Pipol long datfala taem ting long hem olsem man nating nomoa. Waka bilong hem for lukaftarem olketa animal and waka long planteison. Nomata olsem, Jehovah chusim Amos for talemaot judgment message long tenfala tribe bilong Israel wea no faithful long God. Taem Jehovah duim datwan, maet samfala Israelite tingse Amos hem no fit for duim datfala waka.—Readim Amos 7:14, 15.

⁷ Amos kam from wanfala smol vilij wea stap farawe from taon. Bat hem savve long staka samting abaotem olketa kastom and olketa bigman long datfala taem. Maet olketa bisnisman wea kam pas long vilij bilong hem nao storyim olketa samting hia long hem. Olsem example, Amos savve long staka samting abaotem olketa nara nation wea stap klosap long olketa Israelite and olketa nogud samting wea gohed long Israel. (Amos 1:6, 9, 11, 13; 2:8; 6:4-6) And tu, Amos hem savve tumas hao for raet. Hem savve iusim olketa simpol toktok wea garem bigfala mining. Hem no fraet for tok strong againstim datfala nogud priest Amaziah. Tru tumas, Jehovah chusim stretfala man for talemaot message bilong hem. Jehovah luksavve Amos fit for duim olketa samting hia, bat olketa narawan no luksavve long datwan.—Amos 7:12, 13, 16, 17.

8. (a) Wanem nao Jehovah promisim long David? (b) Hao nao Psalm 32:8 encouragem olketa wea tingse olketa no fit?

⁸ Jehovah luksavve tu wanem evriwan wea worshipim hem fit for duim, and hem laek for helpem each wan long iumi for duim best bilong iumi. Olsem example, Jehovah promisim King David bae hem evritaem leadim David and givim advaes long hem. (Readim Psalm 32:8.) Hao nao datwan encouragem iumi? Nomata iumi tingse iumi no fit, Jehovah savve helpem iumi for duim samting wea iumi tingse iumi no fit for duim. Olsem gudfala teacher hem gohed for helpem student for savve gud long wanfala subject long skul, Jehovah savve gohed helpem iumi mekem iumi savve duim best bilong iumi. Maet hem iusim tu olketa brata and sista for helpem iumi. Hao nao hem duim datwan?

LUKSAVVE LONG GUD SAMTING WEA NARAWAN SAVVE DUIM

9. Hao nao iumi savve “evritaem tingim” olketa brata and sista bilong iumi?

⁹ Paul encouragem evri Christian for “evritaem tingim” olketa brata and sista bilong olketa. (Readim Philippi 2:3, 4.) Hao nao iumi savve followim datfala kaonsel? Iumi shud luksavve long wanem olketa brata bilong iumi savve duim and praisem olketa for datwan. Hao nao iu feel taem samwan praisem iu for gudfala wei bilong iu or for gud samting wea iu duim? Datwan encouragem iu for duim moa samting. Olketa brata bilong iumi olsem tu. Sapos iumi luksavve long gudfala waka wea olketa duim and praisem olketa, datwan bae encouragem olketa for duim moa samting long waka bilong Jehovah.

10. Hu long kongregeson nao barava needim help bilong iumi?

¹⁰ Hu nao olketa insaed kongregeson wea barava needim help bilong iumi? Hem tru, iumi evriwan needim help samfala taem. Bat olketa wea barava needim help nao hem olketa brata wea young or niu long truth. Iumi laek helpem olketa for feel olsem olketa important insaed kongregeson, and organization bilong Jehovah needim olketa. Jehovah laekem olketa brata hia for kamap fit for duim moa waka. (1 Tim. 3:1) Bat sapos iumi no showimaot iumi tinghae long waka wea olketa duim, maet olketa no laek for duim moa samting long waka bilong Jehovah.

11. (a) Wanem nao wanfala elder duim for helpem wanfala young brata wea savve shame? (b) Wanem nao iu lanem from datfala experience?

¹¹ Wanfala elder wea nem bilong hem Ludovic sei taem wanfala brata kasem praise from olketa narawan, datwan savve mekem hem laek for duim moa samting. Tingim wanfala brata wea nem bilong hem Julien. Ludovic luksavve Julien hem brata wea savve shame. Taem Julien duim waka long kongregeson, olketa akson bilong hem fani lelebet from hem fraet and daotem hemseleva. Ludovic sei: “Bat mi luksavve hem kaenfala brata and barava laek for helpem olketa narawan.” So Ludovic no tok daonem Julien, bat hem tingim olketa gudfala wei bilong hem and encouragem hem. From datwan, Julien kamap fit for ministerial servant, and bihaen hem regular pioneer.

HELPEM OLKETA FOR DUIM BEST BILONG OLKETA

12. For helpem olketa brata bilong iumi, wanem nao iumi mas duim? Storyim example.

¹² For helpem olketa brata bilong iumi for duim best bilong olketa, iumi mas luksavve long gudfala wei bilong olketa and wanem olketa fit for duim, and no lukluk nomoa long olketa wik point bilong olketa. Hem nao hao Jesus ting long aposol Peter. Nomata hem luk olsem samfala taem pipol no savve depend long Peter, Jesus kolem hem Cephas. Long Greek languis disfala nem Cephas hem Peter, wea minim ston. Taem Jesus givim hem datfala nem hem showimaot Peter bae kamap man wea stedy and pipol fit for depend long hem.—John 1:42.

13, 14. (a) Hao nao Barnabas ting long Mark? (b) Wanem gud samting nao Alexandre kasem taem wanfala elder helpem hem? (Lukim piksa long start bilong study.)

¹³ Distaem bae iumi storyim example bilong Barnabas and Mark. (Acts 12:25) Mark kasem assignment for helpem Paul and Barnabas long firstfala missionary gogo bilong olketa. Bat taem olketa kasem Pamphylia, seknomoa Mark lusim olketa nao. So Paul and Barnabas mas go seleva long wanfala area wea barava danger. (Acts 13:5, 13) Wanem nao Barnabas duim? Luk olsem hem tingim olketa gudfala wei bilong Mark, and no tingim nomoa olketa wik point bilong hem. Hem no ting long Mark olsem man wea narawan no savve depend long hem. Bat bihaen Barnabas trainim Mark, and from datwan, Mark kamap wanfala mature Christian. (Acts 15:37-39) Samfala year bihaen, Mark hem helpem Paul taem Paul stap long prison long Rome. And taem Paul raet for olketa long Colossae hem talem gud samting abaotem Mark. (Col. 4:10) Taem Barnabas herem Paul laekem Mark for go helpem hem, masbi datwan mekem Barnabas barava hapi.—2 Tim. 4:11.

¹⁴ Wanfala elder wea nem bilong hem Alexandre tingim tu hao wanfala brata helpem hem. Hem sei: “Taem mi young, mi faendem hem no isi for prea front long olketa narawan. Wanfala elder story witim mi and helpem mi for redyim tingting bilong mi bifor mi prea, and datwan helpem mi for no fraet. Bihaen datwan hem savve askem mi for prea long grup for preaching, wea bifor hem no savve duim datwan. Gogo mi faendem hem moa isi for duim diswan.”

15. Wanem nao Paul duim wea showimaot hem tinghae long olketa nara Christian?

¹⁵ Wanem nao iu savve duim taem iu lukim olketa gudfala wei bilong olketa nara Christian? Waswe, iu praisem olketa? Long Rome chapter 16, Paul talem nem bilong winim 20 brata and sista and hem storyim gudfala wei bilong olketa. (Rome 16:3-7, 13) Olsem example, Paul praisem Andronicus and Junias bikos tufala followim Christ firstaem long hem and tufala gohed faithful. Paul story tu abaotem mami bilong Rufus, wea lukaftarem hem gud.

16. Wanem gud samting nao savve kamaot from wei wea iumi praisem olketa narawan?

¹⁶ Taem iumi praisem olketa narawan, gud samting savve kamaot from datwan. Tingim example bilong Rico, wanfala young boy long France wea dadi bilong hem no worshipim Jehovah. Rico hem sorre tumas bikos dadi bilong hem no laekem hem for baptaes. So Rico tingse bae hem mas weit go kasem taem hem big bifor hem savve baptaes. Rico sorre tu bikos olketa pikinini long skul mekfani long hem from biliv bilong hem. Bat Frédéric, wanfala elder praisem Rico and talem hem reason why olketa hia againstim Rico hem bikos hem no fraet for preach. From elder hia encouragem hem, datwan strongim Rico for gohed faithful, and datwan helpem hem for stap gud witim dadi bilong hem. Rico baptaes taem hem 12 year.

17. (a) Hao nao iumi savve helpem olketa brata for duim best bilong olketa long waka bilong Jehovah? (b) Hao nao wanfala missionary helpem olketa young brata, and wanem nao kamaot from datwan?

¹⁷ Taem iumi praisem olketa brata for gud samting wea olketa duim, datwan bae encouragem olketa for duim best bilong olketa long waka bilong Jehovah. Sylvie,a wea waka long Bethel long France for staka year, hem sei olketa sista tu savve praisem olketa brata. Sylvie sei hem feel olsem datwan hem wanfala samting wea hem mas duim. (Prov. 3:27) Staka taem olketa sista savve tingim samting wea olketa brata no tingim. So taem olketa sista givim praise long olketa brata, datwan savve strongim go moa praise wea olketa brata hia kasem from olketa mature brata. Jérôme, wanfala missionary long French Guiana, hem helpem staka young brata for markem goal for kamap missionary. Hem sei: “Mi lukim taem mi praisem olketa young brata long wanfala samting wea olketa duim long ministry, or for gudfala ansa bilong olketa long meeting, datwan encouragem olketa and strongim olketa for gohed duim moa samting.”

18. Why nao hem gud for waka tugeta witim olketa young brata?

¹⁸ Iumi savve encouragem olketa nara Christian for gohed gud long spiritual wei tu taem iumi waka tugeta witim olketa. Olsem example, maet wanfala elder askem wanfala young brata for printim information from jw.org Web site wea savve helpem olketa olo long kongregeson wea no garem computer. Or iu savve askem wanfala young brata for helpem iu for klinim or fixim Kingdom Hall. Taem iu waka tugeta witim olketa young wan, iu garem chance for luksavve long wanem olketa fit for duim, praisem olketa, and lukim wei wea olketa gohed long spiritual wei.—Prov. 15:23.

DUIM SAMTING WEA BAE HELPEM ORGANIZATION LONG FUTURE

19, 20. Why nao iumi shud helpem olketa narawan for gohed gud long spiritual wei?

¹⁹ Taem Jehovah chusim Joshua for leadim olketa Israelite, hem talem Moses for “encouragem” and “strongim” Joshua. (Readim Deuteronomy 3:28.) Distaem staka pipol moa kam insaed organization bilong Jehovah. Iumi needim olketa mature brata for lead insaed long organization. So evriwan long kongregeson mas helpem olketa brata wea young or niu long truth for duim best bilong olketa long waka bilong Jehovah. Sapos iumi duim datwan, staka brata moa bae duim full-taem service and kamap ‘fit for teachim narawan.’—2 Tim. 2:2.

²⁰ Nomata iumi insaed big kongregeson wea garem staka mature brata, or iumi long wanfala smol grup, iumi evriwan savve duim samting for encouragem narawan wea diswan bae helpem organization bilong God long future. For duim datwan, iumi mas followim example bilong Jehovah for evritaem luksavve long olketa gud samting wea olketa narawan duim.