No Hol Bak—From Iu Tingse Iu No Fit
1. Why nao samfala hol bak for askem pipol for studyim Bible witim olketa?
1 Waswe, iu hol bak for askem pipol for studyim Bible from iu tingse iu no fit for duim gud Bible study? Samfala taem olketa faithful man wea servem God bifor, olsem Moses and Jeremiah, tingse olketa no fit for duim assignment wea Jehovah markem olketa for duim. (Ex. 3:10, 11; 4:10; Jer. 1:4-6) So staka pipol nao savve garem kaen tingting olsem. Wanem nao iu savve duim for winim datwan?
2. Why nao iumi shud no tingse hem inaf for duim preaching long haos tu haos nomoa and olketa narawan nao for duim Bible study?
2 Iumi shud tingim Jehovah hem no enitaem askem iumi for duim wanem iumi no fit for duim. (Ps. 103:14) So iumi savve duim waka wea God givim iumi for helpem pipol “kamap disaepol” and “teachim olketa.” (Matt. 28:19, 20) Jehovah no givim nomoa disfala waka for olketa wea servem hem for longtaem finis or wea garem bigfala savve. (1 Cor. 1:26, 27) So iumi shud no tingse hem inaf for duim preaching long haos tu haos nomoa and olketa narawan nao bae duim Bible study.
3. Wanem nao Jehovah iusim for mekem iumi fit for duim Bible study?
3 Jehovah Mekem Iumi Fit: Jehovah nao mekem iumi fit for teachim pipol for kamap disaepol. (2 Cor. 3:5) Hem iusim organization bilong hem for teachim iumi olketa tru samting long Bible wea nomata olketa wea kasem big education long world olketa no savve. (1 Cor. 2:7, 8) Jehovah mek sure olketa man raetem long Bible olketa teknik wea Jesus iusim for teach for iumi followim. Hem iusim kongregeson tu for gohed trainim iumi. And tu, Jehovah givim iumi olketa samting wea iumi savve iusim for teachim pipol abaotem Bible. Hem givim iumi olketa buk olsem Wanem Bible Teachim buk, wea storyim truth long wei wea klia and isi for minim. So hem no hard tumas for studyim Bible witim samwan.
4. Wanem nao mekem iumi sure Jehovah bae helpem iumi?
4 Jehovah helpem Moses and Jeremiah for duim gud assignment bilong tufala. (Ex. 4:11, 12; Jer. 1:7, 8) Iumi tu savve askem Jehovah for helpem iumi. Taem iumi studyim Bible witim samwan, iumi teachim hem tru samting abaotem Jehovah, wea mekem Jehovah hapi. (1 John 3:22) Bae iu hapi and kasem gud samting sapos iu markem goal for studyim Bible witim samwan.