Welkamim Olketa wea Iumi Invaetem

Long March 23, samting olsem 12 million pipol raonem world bae hipap witim iumi Olketa Jehovah’s Witness for celebratem Memorial. Bae olketa herem wanfala tok wea bae storyim dae bilong Jesus and olketa blessing wea iumi bae kasem long future bikos long datwan. (Isa 11:6-9; 35:5, 6; 65:21-23; Joh 3:16) Bat iumi tu savve mekhae long Jehovah long datfala taem long wei for welkamim olketa wea kam. (Ro 15:7) Iumi savve duim thrifala samting hia.

• Hem gud for iu go and welkam olketa wea kam winim wei for sidaon and weitim program for start

• Iumi laek for welkamim olketa wea iumi savve long olketa and wea iumi invaetem, bat iumi laek for welkamim olketa narawan tu. Askem eni niu wan wea kam for sidaon witim iu. Iutufala savve lukluk tugeta long Bible and song buk bilong iu

• Bihaen meeting hem finis iu savve ask sapos olketa garem eni kwestin. Sapos iu no garem inaf taem for story long olketa wea interest bikos nara kongregeson bae iusim Kingdom Hall, iu savve arrange for go lukim hem bihaen tu-thri day nomoa. Iu savve askem hem for givim iu mobile namba bilong hem mekem iu savve go lukim hem for storyim moa datfala program