Faith and Waka Savve Mekem Iumi for Raeteous

1. Taem iumi tingim faith blo Abraham, wat kwestin nao maet iumi tingim?

NOMATA staka pipol herem story abaotem Abraham, staka lo olketa no savve gud lo hem. Bat iu savve lo staka samting abaotem Abraham. For example, iu savve hao Bible storyim Abraham hem “dadi bilong evriwan wea garem faith.” (Rome 4:11) Bat maet iu wonder, ‘Waswe, mi savve garem strong faith lo God olsem Abraham?’ Yes, iu savve garem strong faith olsem hem.

2. Why nao hem important for studyim example blo Abraham? (James 2:​22, 23)

² Wanfala samting wea iumi savve duim for garem strong faith olsem Abraham, hem for studyim example blo hem. Abraham evritaem duim wat God talem hem for duim. Hem muv lo wanfala farawe ples from hom blo hem, stap lo olketa tent for staka year, and willing for sakrifaesim son blo hem Isaac, wea hem lovem tumas. Abraham duim evri samting hia bikos hem garem strong faith lo Jehovah. From Abraham garem faith and duim waka, datwan mekem God hapi and hem kamap fren blo God. (Readim James 2:​22, 23.) Jehovah laekem iumi evriwan and iu tu, for duim samting wea mekem hem hapi and for kamap fren blo hem. From datwan, hem iusim holy spirit for helpem Paul and James for storyim example blo Abraham. Bae iumi storyim example blo Abraham lo Rome chapter 4 and James chapter 2. Tufala chapter hia storyim important samting abaotem Abraham.

3. Wat Bible verse nao Paul and James quote from?

³ Paul and James evriwan quotem toktok from Genesis 15:​6, wea sei: “Abram trustim Jehovah, and Hem ting lo Abram hem wanfala raeteous man.” So Jehovah savve ting lo man olsem hem raeteous or no garem blame, taem hem duim samting wea Jehovah hapi lo hem. Hem spesol samting for God ting lo samwan wea no perfect olsem hem raeteous! For sure, iu laekem God for ting olsem lo iu and hem possible. Distaem bae iumi storyim why Jehovah sei Abraham raeteous and wat iumi mas duim mekem hem sei iumi tu raeteous.

MAS GAREM FAITH MEKEM IUMI RAETEOUS

4. Wat nao mekem olketa man for no raeteous?

⁴ Lo leta wea Paul raetem for olketa Christian lo Rome, hem sei iumi evriwan sin. (Rome 3:23) So why nao God savve hapi lo iumi and ting lo iumi olsem iumi raeteous? For helpem olketa faithful Christian kasem ansa for datfala kwestin, Paul iusim example blo Abraham.

5. Why nao Jehovah ting lo Abraham olsem hem raeteous? (Rome 4:​2-4)

⁵ Jehovah kolem Abraham raeteous taem hem stap lo Canaan. Why nao Jehovah ting lo Abraham olsem hem raeteous? Hao, hem bikos Abraham obeyim Law blo Moses? Nomoa. (Rome 4:13) Jehovah givim datfala Law lo olketa Israelite 400 year bihaen hem sei Abraham raeteous. If olsem, then why nao God sei Abraham raeteous? From Jehovah kaen tumas, hem sei Abraham raeteous bikos lo faith blo hem.—Readim Rome 4:​2-4.

6. Why nao Jehovah ting lo samwan wea sin olsem hem raeteous?

⁶ Paul storyim taem man “garem faith long God, hem raeteous, nomata hem sin.” (Rome 4:5) Paul sei: “David tu hem story abaotem hapi wea man kasem from God ting long hem olsem hem raeteous, nomata samting wea hem duim no barava followim law. Hem sei: ‘Olketa wea God forgivim sin bilong olketa and samting wea olketa duim wea hem no stret, bae hapi. Man wea Jehovah no tingim moa sin bilong hem bae hapi.’” (Rome 4:​6-8; Ps. 32:​1, 2) God forgivim or kavarem sin blo olketa wea garem faith lo hem. Hem barava forgive and no tingim moa sin blo olketa. Lo tingting blo God, olketa hia klin and raeteous bikos lo faith blo olketa.

7. Why nao iumi savve sei olketa wea worshipim God lo bifor olketa raeteous?

⁷ Nomata God sei Abraham, David, and olketa narawan wea faithful for worshipim hem olketa raeteous, olketa no perfect. Bat from faith wea olketa garem, God ting lo olketa olsem olketa raeteous, especially taem hem comparem olketa witim pipol wea no garem faith. (Eph. 2:12) Lo leta wea Paul raetem for olketa Christian lo Rome, hem storyim hao iumi mas garem faith mekem iumi savve fren witim God. Abraham and David kamap fren blo God bikos tufala garem faith lo hem. Iumi tu savve kamap fren blo God bikos lo faith blo iumi.

HAO NAO FAITH AND WAKA CONNECT TUGETA?

8-9. Wat nao samfala rong idea wea pipol garem abaotem wanem Paul and James raetem, and why nao olsem?

⁸ For staka handred years finis, olketa bigman lo religion debate abaotem hao faith and waka hem connect. Samfala bigman blo religion teachim hao if man biliv lo Lord Jesus Christ, hem savve sev nao. Maet iu savve herem olketa sei: “Biliv lo Jesus and iu bae sev.” Maet samfala bigman blo religion even quotem toktok blo Paul wea sei: “God ting long [man] olsem hem raeteous, nomata samting wea hem duim no barava followim law.” (Rome 4:6) Bat, olketa narawan sei iu “savve sev” if iu visitim olketa ples wea church sei hem holy and iu duim olketa gud samting. Maet olketa quotem tu James 2:​24, wea sei: “Hem no faith nomoa wea mekem God ting long man olsem hem raeteous bat hem bikos long gudfala samting wea man duim tu.”

⁹ From pipol garem olketa difren biliv olsem, samfala Bible scholar sei Paul and James no agree abaotem wanem man mas duim for mekem God hapi. Samfala bigman maet tingse Paul sei man only needim faith for mekem God hapi, bat James sei man need for duim gud samting for mekem God hapi. Wanfala religious professor sei hao James no minim why Paul sei man only needim faith for hem raeteous, and James no agree witim wat Paul talem. Bat Jehovah nao givim holy spirit lo Paul and James for raetem olketa toktok hia. (2 Tim. 3:16) So wanfala simpol mas stap for minim wat tufala talem. And hem nao for lukluk lo context lo wat tufala raet abaotem.

10. Wat nao Paul minim taem hem sei “for duim samting wea law talem”? (Rome 3:​21, 28) (Lukim tu piksa.)

¹⁰ Wanem waka nao Paul storyim lo Rome chapter 3 and chapter 4? Lo tufala chapter hia, Paul storyim wei for “duim samting wea law talem,” wea hem nao Law blo Moses, wea Jehovah givim lo Maunt Sinai. (Readim Rome 3:​21, 28.) Luk olsem lo taem blo Paul, samfala Jew Christian faendem hard for acceptim hao Law blo Moses and olketa samting wea Law sei for man duim hem finis. So Paul iusim example blo Abraham for pruvim hao man no need for followim Law for God sei hem raeteous. Bat Paul sei iumi need for garem faith. Datwan hem encouragem iumi bikos taem iumi savve dat if iumi garem faith lo God and Christ, God savve ting lo iumi olsem iumi raeteous.

11. Wat nao olketa gudfala samting wea man mas duim wea James storyim?

¹¹ Bat olketa waka wea James chapter 2 storyim hem no wei for “duim samting wea law talem,” olsem Paul storyim. James story abaotem olketa gud samting or waka wea olketa Christian duim evriday for helpem olketa narawan. Olketa samting wea wanfala Christian duim hem showim if hem garem strong faith lo God or nomoa. Tingim tufala example wea James iusim lo leta blo hem.

12. Hao nao James explainim dat faith and gudfala samting wea man duim hem connect tugeta? (Lukim tu piksa.)

¹² First example, James storyim hao olketa Christian need for treatim evriwan fair. Hem storyim disfala point taem hem iusim example blo man wea kaen lo wanfala rich man bat hem no kaen lo poor man. James storyim hao man hia maet sei hem garem faith, bat olketa samting wea hem duim no pruvim datwan. (Jas. 2:​1-5, 9) Second example, James storyim samwan wea lukim “wanfala brata or sista hem no garem kaleko and hem no garem inaf kaikai,” bat hem no helpem hem. Nomata datfala man sei hem garem faith, olketa samting wea hem duim showimaot hem no garem faith and datwan hem iusles nomoa. Dastawe James sei: “Sapos man no duim gudfala samting for showimaot hem garem faith, datfala faith hem dae finis.”—Jas. 2:​14-17.

13. Wat example nao James storyim wea showim iumi need for garem faith and duim gud samting? (James 2:​25, 26)

¹³ James storyim Rehab olsem example blo samwan wea duim samting for showim hem garem faith. (Readim James 2:​25, 26.) Rehab herem olketa samting wea Jehovah duim and luksavve hao Jehovah helpem olketa Israelite. (Josh. 2:​9-11) Hem duim samting wea showimaot hem garem faith, hem haedem tufala Israelite spae taem laef blo tufala stap lo danger. From datwan, nomata Rehab no perfect and hem no wanfala Israelite woman, God sei hem raeteous olsem Abraham tu. Example blo Rehab showim hao hem important for iumi duim samting for pruvim iumi garem faith.

14. Why nao iumi savve sei samting wea Paul and James storyim hem no againstim each other?

¹⁴ So Paul and James explainim faith and for duim waka lo tufala difren wei. Paul talem olketa Jew Christian hao nomata olketa duim samting followim Law blo Moses, Jehovah bae nating hapi lo olketa. Bat James storyim hao olketa Christian need for duim gud samting for olketa narawan for showim olketa garem faith.

15. Wat nao samfala samting wea iumi savve duim wea showim iumi garem faith? (Lukim tu olketa piksa.)

¹⁵ Jehovah no sei for iumi duim olketa sem samting wea Abraham duim for hem sei iumi raeteous. Staka samting stap for iumi duim for showimaot iumi garem faith. Iumi savve welkamim olketa niu wan wea kam lo kongregeson, helpem olketa brata and sista wea garem need, and duim gud samting for famili blo iumi. Taem iumi duim olketa samting hia, God bae hapi and blessim. (Rome 15:7; 1 Tim. 5:​4, 8; 1 John 3:18) Wanfala important samting wea iumi savve duim for showimaot iumi garem faith, hem for gohed strong for preachim gud nius. (1 Tim. 4:16) Wanem iumi duim savve showimaot iumi garem faith dat olketa promis blo Jehovah bae kamap tru and wei blo hem nao best. And if iumi duim datwan, iumi savve barava sure hao God bae sei iumi raeteous and kolem iumi olketa fren blo hem.

FOR FOCUS LO HOPE BAE MEKEM FAITH BLO IUMI STRONG

16. Wat nao Abraham hope for kasem and garem faith lo hem?

¹⁶ Rome chapter 4 storyim nara important leson from Abraham. Lo datfala chapter, iumi lanem hao iumi mas gohed luk forward lo samting wea iumi hope for hem. Jehovah promisim Abraham hao “staka nation” bae kasem blessing bikos lo hem. Tingim nambawan promis wea Abraham luk forward for kasem! (Gen. 12:3; 15:5; 17:4; Rome 4:17) Bat, taem Abraham hem 100 years old and Sarah 90 years, tufala no garem yet pikinini wea God promisim. Lo tingting blo olketa man, maet hem hard nao for Abraham and Sarah garem wanfala pikinini. Datwan hem wanfala test for Abraham. Bat Bible sei: “Abraham garem faith and barava bilivim hem bae kamap dadi bilong pipol long plande kantri.” (Rome 4:​18, 19) And gogo, wat Abraham hope for hem kamap tru. Hem kamap dadi blo Isaac, pikinini wea hem hope for hem for long taem finis.—Rome 4:​20-22.

17. Hao nao iumi savve dat God savve ting lo iumi olsem olketa fren blo hem wea raeteous?

¹⁷ Olsem Abraham, iumi tu savve mekem God hapi and God savve ting lo iumi olsem olketa fren blo hem wea raeteous. Hem nao wat Paul storyim taem hem sei: “Datfala toktok, ‘long tingting bilong God hem raeteous,’ hem no for Abraham nomoa bat hem for iumi tu, wea God ting long iumi olsem iumi raeteous bikos iumi biliv long hem wea hem nao mekem Lord bilong iumi Jesus for laef bak.” (Rome 4:​23, 24) Olsem Abraham, iumi tu garem faith lo Jehovah, duim olketa gud samting or waka, and barava sure hao olketa samting wea Jehovah promisim bae kamap tru. Lo Rome chapter 5, Paul gohed for discussim hope blo iumi, and bae iumi storyim datwan lo next article.