Mas Followim Tingting blo God Taem Iumi Disaed for Drinkim Alcohol

FOR sure, iu enjoyim staka present wea Jehovah givim, wea insaed diswan hem freedom for disaedem hao for iu enjoyim olketa present hia. Bible sei wine hem present from God. Bible sei: “Gudfala kaikai save mekem yu hapi, an waen save mekem yu hapi tu.” (Eklesiastes 10:​19, SIPB; Ps. 104:15) Bat maet iu lukim hao samfala pipol garem problem saed lo wei for drinkim alcohol. And tu, evriwea lo world pipol garem difren culture, tingting, and standard wea affectim hao olketa ting lo alcohol. Wat nao savve helpem olketa Christian for mekem wise disison saed lo alcohol?

Nomata wea nao iumi stap or wat nao culture blo iumi, iumi shud followim tingting blo God taem iumi mekem olketa disison. Taem iumi duim datwan, bae iumi kasem gud samting and hapi.

Maet iu lukim staka pipol lo world savve drinkim alcohol olowe and drink tumas. Samfala pipol maet drinkim alcohol bikos hem mekem olketa for feel relax. Olketa narawan drink mekem olketa no tingim tumas problem blo olketa. And lo samfala ples, pipol ting lo man wea drinkim staka alcohol olsem hem strong.

Bat iumi olketa Christian kasem wise advaes from loving Creator blo iumi. For example, hem storyim nogud samting wea savve kasem samwan wea ova tumas for drinkim alcohol. Provebs 23:​29-35 hem describem samwan wea savve drunk and samfala problem wea savve kasem hem.a Daniel, wanfala elder lo Europe, tingim bak laef blo hem bifor hem savve lo Jehovah. Hem sei: “Mi savve drinkim tumas alcohol and diswan mekem for mi disaedem olketa bad disison. From datwan, mi kasem olketa nogud samting and mi savve feel nogud taem mi tingim bak.”

Hao nao iumi olketa Christian savve iusim freedom wea iumi garem for chus and avoidim olketa problem wea alcohol savve kosim? Main samting hem for followim tingting blo God lo olketa disison blo iumi and lo wat iumi duim.

Distaem bae iumi lukim wat Bible talem abaotem alcohol and samfala reason why pipol drinkim alcohol.

WAT BIBLE TALEM ABAOTEM ALCOHOL

Bible no stopem wei for drinkim alcohol. Really, Bible talem dat for drinkim wine savve mekem man hapi. Hem sei: “Yu save hapi tumas taem yu kaikai gudfala an dringim waen blong yu.” (Eklesiastes 9:​7, SIPB) Samfala taem Jesus drinkim wine, and olketa narawan wea faithful for worshipim Jehovah tu.—Matt. 26:​27-29; Luke 7:34; 1 Tim. 5:23.

Nomata Bible no stopem wei for drinkim alcohol, hem stopem wei for drunk. Bible sei: “Iufala mas no drunk long wine.” (Eph. 5:18) And hem talem tu hao “pipol wea savve drunk . . . bae no kasem Kingdom bilong God.” (1 Cor. 6:10) Tru tumas, Jehovah barava stopem wei for ova tumas for drink alcohol and for drunk. So, disison blo iumi saed lo wei for drinkim alcohol shud no base lo culture blo iumi, bat hem shud followim tingting blo God.

Samfala tingse nomata olketa drinkim staka alcohol, olketa no savve drunk. Bat datwan hem barava dangerous. Bible talem klia hao wei for “drinkim tumas wine” savve kosim man (or woman) for mekem olketa serious mistek and sin againstim Jehovah. (Titus 2:3; Prov. 20:1) Jesus talem tu hao samwan wea “drink tumas” bae no kasem niu world. (Luke 21:​34-36) Wat nao savve helpem wanfala Christian for avoidim olketa problem wea join witim wei for drinkim alcohol?   

TING ABAOTEM WHY IU DRINK AND HABIT BLO IU

Hem danger for followim culture blo iumi taem iumi mekem disison saed lo alcohol. Olketa Christian laek for mekem Jehovah hapi taem olketa disaedem samting saed lo kaikai and drink. Bible sei: “Nomata iufala kaikai or drink or duim eni nara samting, evri samting wea iufala duim mas givim glory long God.” (1 Cor. 10:31) Distaem bae iumi storyim samfala kwestin and Bible principle:

Hao, mi drink alcohol mekem olketa narawan acceptim mi? Exodus 23:2 sei: “Iu mas no followim crowd.” Lo disfala verse, Jehovah warnim olketa Israelite for no followim pipol wea duim olketa samting wea hem no hapi lo hem. Datwan hem gud advaes for olketa Christian distaem tu. If iumi letem pipol for influencim tingting and disison blo iumi saed lo alcohol, gogo bae iumi stop for followim olketa standard blo Jehovah and lusim frenship blo iumi witim hem.—Rome 12:2.

Waswe, mi drink alcohol for showim mi strong? Lo samfala culture, for drink olowe and drinkim staka alcohol hem normal and pipol acceptim. (1 Pet. 4:3) Bat lukim wat 1 Corinth16:13 encouragem iumi for duim. Hem sei: “Iufala mas lukaot gud, gohed for faithful, no fraet, and kamap strong.” Waswe, alcohol savve really mekem man for strong? Nomoa. Alcohol savve mekem man for no tingting klia and affectim hem for no mekem olketa gud disison. So for drinkim tumas alcohol hem no pruvim man strong bat hem showim hem wik. Isaiah 28:7 sei samwan wea drinkim tumas alcohol hem no wakabaot stret and hem mekem disison wea no stret.

Strong wea iumi needim hem kam from Jehovah and hem helpem iumi for lukaot gud and gohed for faithful. (Ps. 18:32) Wanfala Christian savve duim diswan taem hem gohed careful and mekem olketa wise disison wea protectim frenship blo hem witim Jehovah. Jesus fren gud witim Jehovah, and staka pipol respectim hem from hem no fraet and disaed strong for duim wat hem stret.

Waswe, mi drink alcohol for no tingim tumas olketa problem blo mi? Wanfala man wea raetem psalm hem sei: “Taem olketa wari blo mi hem tumas for mi, iu [Jehovah] comfortim and mekem tingting blo mi hem kwaet.” (Ps. 94:19) If iu wari tumas abaotem olketa problem blo iu, depend lo Jehovah, no alcohol. Wanfala samting iu savve duim for helpem iu hem for prea lo Jehovah staka taem. And tu, staka faendem hem help taem olketa kasem advaes from wanfala mature fren lo kongregeson. Tru samting nao, taem samwan drink alcohol for deal witim olketa problem blo hem, hem savve affectim hem for no disaed stret. (Hos. 4:11) Daniel wea iumi storyim finis sei: “Mi stragol witim feeling for wari and feel guilty. Mi drink for deal witim datfala situation, bat datwan lead go for staka problem moa and hem affectim frenship blo mi witim olketa narawan, and hem mekem mi ting daonem miseleva.” Wat nao helpem Daniel? Hem sei: “Mi luksavve dat mi need for depend lo Jehovah and no alcohol. Taem mi duim datwan, Jehovah helpem mi for ovakamim olketa problem blo mi.” Tru nao, Jehovah evritaem redi for helpem iumi nomata situation blo iumi hem luk hopeles.—Phil. 4:​6, 7; 1 Pet. 5:7.

If samfala taem iu savve drink alcohol, hem gud for iu tingim olketa kwestin hia: ‘Waswe, wanfala famili member or klos fren talem hao hem wari abaotem habit blo mi for drink olowe?’ If olsem, maet datwan hem saen wea showim iu start for garem habit or problem wea iu no luksavve lo hem. ‘Hao, mi drink tumas winim bifor?’ Maet datwan hem situation wea savve kasem samwan wea tingse hem no addict lo alcohol bat hem lead go for hem. ‘Waswe, mi faendem hem hard for stay aot from alcohol for samfala day or for longtaem?’ If olsem, maet datwan showim iu garem habit for drink or addict lo alcohol. And maet iu need for kasem help from doctor mekem iu ovakamim problem hia.

From wei for drink savve kosim staka problem, samfala Christian disaed for no drinkim eni alcohol. Samfala maet chus for no drink bikos olketa no laekem teist blo hem. If wanfala fren blo iu mekem disison olsem, iu savve showim iu kaen taem iu respectim hem and no tok spoelem hem.

Maet wanfala Christian luksavve hem wise for markem haomas alcohol hem bae drinkim. Or maet hem putim rul for hemseleva abaotem haomas taem bae hem drink, maet wantaem lo week or hem bae tekem lelebet alcohol taem hem kaikaim samfala kaikai. Olketa narawan putim baondri lo olketa type alcohol wea bae olketa drinkim, olsem wine or beer bat olketa bae no drinkim olketa strong alcohol nomata olketa mixim. Taem samwan hem markem limit lo haomas bae hem drinkim, hem bae isi for followim datwan. And wanfala mature Christian bae no wari abaotem hao olketa narawan bae ting lo hem bikos hem markem finis haomas drink bae hem tekem and disaed strong for followim datwan.

Taem iumi disaed for drink, iumi need for tingim tu feeling blo olketa narawan. Rome 14:21 sei: “Hem gud for no kaikaim meat, drinkim wine, or duim eni samting wea savve spoelem faith bilong brata bilong iu.” Hao nao iu savve followim disfala kaonsel? Mas garem love. For example, if iu savve dat for drinkim alcohol bae mekem narawan stambol, love bae mekem iu for no drink. Taem iu duim datwan, hem showim iu respectim and lovem olketa narawan and no tingim iuseleva.—1 Cor. 10:24.

Gavman maet putim tu samfala law abaotem alcohol. If olsem, olketa Christian mas obeyim. Maet datfala law markem age wea samwan mas kasem bifor hem savve drink alcohol. Or maet datfala law stopem for drink and draev or for no drink taem iu waka lo samfala machine.—Rome 13:​1-5.

Jehovah givim iumi staka naes present, wanfala lo olketa present hia, hem freedom wea iumi garem for chusim wat for iumi kaikaim and drinkim. So iumi laek showim hao iumi tinghae lo datfala freedom, taem iumi chusim olketa samting wea mekem Dadi blo iumi lo heven hapi.