Stret or Rong: Iumi Fit for Trustim Bible

Iumi no sure if disison blo iumi bae gud if iumi followim nomoa tingting blo iumi or olketa narawan. Bible storyim why nao olsem, and samfala samting moa. Hem garem olketa best advaes wea savve helpem iumi for enjoyim laef.

IUMI NEEDIM ADVAES FROM GOD

Lo Bible, Jehovaha God explainim dat evri human being needim help blo hem, olketa no fit for duim evriting seleva. (Jeremiah 10:23) Dastawe hem provaedem olketa advaes wea stap lo Bible. Hem lovem iumi olketa man and no laekem iumi for mekem olketa nogud disison wea bae spoelem iumi and mekem laef hard. (Deuteronomy 5:29; 1 John 4:8) Winim datwan, from hem nao Creator, hem garem wisdom and knowledge wea mekem hem fit for givim iumi best advaes. (Psalm 100:3; 104:24) Nomata olsem, God no forcem pipol for followim standard blo hem.

Jehovah givim first man and woman, Adam and Eve, evriting wea tufala needim for barava hapi. (Genesis 1:28, 29; 2:8, 15) Hem givim tu olketa simpol instruction and hem expectim tufala for obeyim. Nomata olsem, hem letem tufala for disaed if tufala bae followim olketa instruction hia or nomoa. (Genesis 2:9, 16, 17) Sorre samting, Adam and Eve chus for followim tingting blo tufala seleva instead for followim standard blo God. (Genesis 3:6) Wat nao result blo datwan? Hao, evri human being hapi taem olketa disaedem samting seleva abaotem wat hem stret and wat hem rong? Nomoa. History pruvim dat for ignorem standard blo God no savve mekem man hapi and garem peace.—Ecclesiastes 8:9.

Bible provaedem olketa advaes wea iumi needim for mekem gud disison nomata wea iumi kam from. (2 Timothy 3:16, 17; lukim box “Buk wea Savve Helpem Evri Pipol.”) Lukim hao Bible storyim diswan.

Lanem moa abaotem why hem stret for sei Bible hem “toktok bilong God.”—1 Thessalonica 2:13. Watchim video Hu Nao Givim Kam Bible? lo jw.org.

WHY SAMFALA PIPOL TING BIBLE NO SAVVE HELP

Samfala pipol sei iumi no savve kasem gud advaes from Bible. Diswan nao wat samfala maet talem.

Pipol maet sei: “Olketa buk lo Bible no agree witim each other.”

Tru samting: Firstaem maet luk olsem samfala part blo Bible no agree witim nara part, bat if iu studyim hao and wat taem olketa raetem, bae iu lukim dat evri part blo Bible hem agree witim each other.

For lukim samfala specific example, readim datfala article “Are There Contradictions in the Bible?” lo jw.org.

Pipol maet sei: “Pipol wea sei olketa followim Bible duim olketa nogud samting, so ating Bible no savve help.”

Tru samting: Iumi no blamem Bible for nogud wei blo pipol wea no followim teaching lo Bible. Bible profesi abaotem hao staka pipol, includim olketa bigman blo religion wea sei olketa followim Bible bae duim samting wea difren from wat Bible talem. Hem talem tu dat from datwan, “pipol bae tok spoelem” olketa Bible teaching.—2 Peter 2:1, 2.

For lukim example lo hao staka bigman blo religion no followim wat Bible teachim, readim article “Is Religion Just Another Big Business?” lo jw.org.

Pipol maet sei: “Bible promotim wei for no respectim olketa narawan.”

Tru samting: Bible encouragem pipol for respectim each other. Hem no sapotim wei for . . .

tingse iumi gud winim olketa narawan. —Philippi 2:3.
disrespectim pipol wea wei and biliv blo olketa difren.—1 Peter 2:17.
forcem olketa narawan for followim tingting blo iu.—Matthew 10:14.

Bible showim hao God evritaem kaen and no fevarem eniwan and hem laekem iumi for duim sem samting.—Rome 9:14.

For moa information, readim article “Tolerance—How the Bible Can Help” lo jw.org.

BIBLE STORYIM WAT GOD LAEKEM IUMI FOR DUIM

Bible storyim hao Jehovah deal witim olketa man bifor. Wat hem storyim helpem iumi for minim tingting blo God abaotem wat hem stret and wat hem rong, wat savve helpem iumi and wat savve spoelem iumi. (Psalm 19:7, 11) Olketa leson wea iumi lanem savve helpem iumi for mekem olketa wise disison lo evriday laef blo iumi.

For example, lukim advaes wea stap lo Proverbs 13:20: “Man wea wakabaot witim olketa wea wise bae kamap wise, Bat man wea fren witim olketa wea stupid bae kasem nogud samting.” Datfala principle barava fitim bifor and distaem tu. Bible garem staka practical and important principle olsem, wea savve helpem iumi.—Lukim box “Wisdom lo Bible.”

Bat maet iu ting, ‘Hao nao mi savve sure olketa advaes lo Bible savve helpem mi?’ Next article bae storyim samfala experience.

a Jehovah hem nem blo God lo Bible.—Psalm 83:18.

WISDOM LO BIBLE

Nomata olketa finis for raetem Bible samting olsem 2,000 years ago, hem still fitim distaem. Pipol evritaem laek for hapi and garem gud laef. (Ecclesiastes 1:9) Wisdom lo Bible savve helpem iumi for kasem datwan.

Honest

“Mifala laek for honest long evri samting.” —Hebrew 13:18.
“Man wea steal mas lusim kaen wei olsem, and hem mas garem waka.”—Ephesus 4:28.

Fren Gud Witim Olketa Narawan

“Man mas no tingim hemseleva nomoa, bat hem mas tingim nara pipol tu.” —1 Corinth 10:24.
“Mas no kros bat mas evritaem forgivim [narawan].”—Colossae 3:13.

Mekem Olketa Disison

“Man wea no garem experience hem bilivim evri toktok, Bat man wea wise ting raonem each step blo hem.”—Proverbs 14:15.
“Wise man hem lukim danger and hem haed from datwan, Bat man wea no garem experience hem go nomoa and hem safa lo datwan.”—Proverbs 22:3