Wat Iumi Lanem From Last 40 Days blo Jesus lo Earth

1-2. Wat nao happen taem tufala disaepol blo Jesus wakabaot go for Emmaus?

LO NISAN 16, 33 C.E., olketa disaepol blo Jesus feel sorre tumas and barava fraet. Tufala disaepol lusim Jerusalem and wakabaot go for Emmaus, wanfala vilij wea samting olsem 11 kilometer (7 mi) from Jerusalem. Tufala feel discourage bikos olketa pipol killim dae Jesus wea olketa bin followim. Samting wea olketa hope for Messiah duim, luk olsem bae no kamap tru. Bat then wanfala samting hem happen wea tufala no expectim.

² Wanfala man meetim tufala and olketa wakabaot tugeta, tufala no luksavve lo hem. Tufala storyim hao tufala feel sorre bikos lo nogud samting wea happen lo Jesus. Then datfala man start for storyim olketa samting wea tufala bae no forgetim lo full laef blo tufala. Datfala man iusim olketa scripture wea “Moses and evri profet raetem” for explainim why datfala Messiah mas safa and dae. Taem thrifala arrive lo Emmaus, datfala man just showimaot hu nao hem, hem nao Jesus wea resurrect! Imaginim tufala disaepol mas hapi tumas for faendaot dat Messiah hem laef bak!—Luke 24:​13-35.

3-4. Wat nao happen lo olketa disaepol blo Jesus, and wat nao bae iumi lanem lo disfala article? (Acts 1:3)

³ Jesus appear lo olketa disaepol blo hem staka taem during lo last 40 days blo hem lo earth. (Readim Acts 1:3.) During lo datfala taem, olketa disaepol barava sorre and fraet, so Jesus encouragem olketa. From datwan, olketa hapi, confident, and no fraet for preach and teachim gud nius blo Kingdom.a

⁴ Iumi savve lane staka samting taem iumi study abaotem disfala interesting taem lo laef blo Jesus. Lo disfala article, bae iumi lanem hao Jesus iusim datfala taem for (1) encouragem olketa disaepol, (2) helpem olketa understandim gud olketa Scripture, and (3) trainim olketa for lukaftarem samfala responsibility moa. Taem iumi storyim each point, bae iumi lukim hao iumi savve followim example blo Jesus.

ENCOURAGEM OLKETA NARAWAN

5. Why nao olketa disaepol blo Jesus needim encouragement?

⁵ Olketa disaepol blo Jesus barava needim encouragement. Why? Bikos samfala lo olketa lusim haos, famili, and bisnis blo olketa for go followim Jesus full taem. (Matt. 19:27) Olketa narawan, pipol rejectim olketa bikos olketa kamap disaepol. (John 9:22) Olketa willing for mekem olketa sakrifaes olsem bikos olketa biliv Jesus nao hem datfala promis Messiah. (Matt. 16:16) Bat taem olketa killim dae Jesus, olketa disaepol sorre and feel hopeles.

6. Wat nao Jesus duim afta hem resurrect?

⁶ Taem Jesus lukim olketa disaepol blo hem sorre, hem understandim hao datwan hem normal feeling wea man savve kasem taem sorre samting happen, and datwan no minim olketa spiritually wik. So lo sem day wea Jesus resurrect, hem start for encouragem olketa fren blo hem. For example, Jesus appear lo Mary Magdalene taem Mary krae lo tomb blo hem. (John 20:​11, 16) Hem appear tu lo tufala disaepol wea iumi storyim lo start blo disfala article. And hem appear lo aposol Peter. (Luke 24:34) Wat nao iumi lanem from example blo Jesus? Bae iumi storyim samting wea happen taem hem appear lo Mary Magdalene.

7. Olsem John 20:​11-16 storyim, wat nao Jesus lukim Mary duim, and wat nao Jesus duim? (Lukim tu piksa.)

⁷ Readim John 20:​11-16. Lo early morning lo Nisan 16, samfala loyal woman go lo ples wea olketa putim dead body blo Jesus. (Luke 24:​1, 10) Tingim wat happen lo wanfala lo olketa woman hia, Mary Magdalene. Taem Mary arrive lo tomb, datfala tomb hem emti. So hem ran go for talem lo Peter and John, and then taem tufala ran kam lo tomb, hem followim tufala. Taem tufala man hia lukim tomb hem emti, tufala go bak. Bat Mary no go bak. Hem stay lo there and gohed for krae. Hem no savve dat Jesus lo there and gohed watchim hem. Jesus lukim disfala faithful woman hem krae and datwan muvim hem for laek comfortim hem. So hem appear lo Mary and duim wanfala simpol samting for encouragem hem. Jesus story lo Mary and givim hem wanfala important assignment, wea hem nao for go and talem olketa disaepol dat hem resurrect finis.—John 20:​17, 18.

8. Hao nao iumi savve followim example blo Jesus?

⁸ Hao nao iumi savve followim example blo Jesus? Olsem Jesus, iumi tu savve encouragem olketa brata and sista for gohed servem Jehovah, if iumi luksavve lo hard taem wea olketa deal witim and story kaen lo olketa. Tingim experience blo Jocelyn, wea sista blo hem dae lo wanfala accident. Hem sei: “For staka month, mi savve feel sorre tumas.” Bat wanfala brata and waef blo hem invaetem Jocelyn for go lo haos blo tufala, tufala kaen and lisin lo hem, and helpem hem for luksavve God barava kea for hem. Jocelyn sei: “Mi feel olsem Jehovah iusim tufala for pullim mi aot from wanfala big raf sea and liftim mi insaed lo laefboat. Tufala strongim bak feeling blo mi for laek servem Jehovah.” Iumi tu savve encouragem narawan taem iumi lisin gud lo samwan wea storyim evriting wea stap lo heart blo hem, and taem iumi story kaen, datwan savve helpem hem for gohed strong for duim service blo hem for God.—Rome 12:15.

HELPEM NARAWAN UNDERSTANDIM OLKETA SCRIPTURE

9. Wat nao challenge wea olketa disaepol blo Jesus feisim, and hao nao Jesus helpem olketa?

⁹ Olketa disaepol blo Jesus bilivim toktok blo God and duim best blo olketa for obeyim. (John 17:6) Bat taem olketa lukim Jesus dae olsem wanfala criminal lo torture stake, olketa konfius. Jesus luksavve wei wea olketa disaepol daot hem no bikos olketa no garem faith, bat hem bikos olketa no understandim gud olketa scripture. (Luke 9:​44, 45; John 20:9) So hem teachim olketa for savve hao for understandim olketa scripture. Distaem bae iumi storyim hao hem duim datwan taem hem appear lo tufala disaepol lo road for Emmaus.

10. Wat nao Jesus duim for helpem olketa disaepol for sure hem nao datfala Messiah? (Luke 24:​18-27)

¹⁰ Readim Luke 24:​18-27. Tingim, Jesus no kwiktaem for talem hu nao hem. Instead, hem askem olketa kwestin. Why nao hem duim datwan? Maet hem laekem tufala disaepol hia for storyim tingting and wat hem stap lo heart blo tufala. And hem nao wat tufala duim. Tufala storyim hao olketa expectim Jesus for sevem Israel from rul blo Rome. Bihaen tufala storyim tingting blo tufala, Jesus iusim olketa Scripture for helpem tufala for understandim hao olketa profesi abaotem Messiah hem fulfill.b Lo datfala evening, Jesus spendem taem for helpem olketa nara disaepol tu for minim olketa truth hia. (Luke 24:​33-48) Wat nao iumi savve lanem from disfala story?

11-12. (a) Wat nao iumi lanem from wei wea Jesus teachim olketa Bible truth? (Lukim tu olketa piksa.) (b) Hao nao study conductor blo Nortey helpem hem?

¹¹ Hao nao iumi savve followim example blo Jesus? First, taem iumi teachim olketa Bible student, askem olketa kwestin wea bae helpem iu for savve lo tingting and wat hem stap lo heart blo olketa. (Prov. 20:5) Afta iu luksavve, showim olketa hao for faendem olketa specific scripture wea fitim situation blo olketa. Then iumi shud traem best for no talem olketa wat olketa shud duim. Bat, helpem olketa for ting raonem olketa Bible verse and luksavve hao for followim olketa Bible principle lo laef blo olketa. Tingim experience blo wanfala brata lo Ghana, wea nem blo hem Nortey.

¹² Taem Nortey 16 years old, hem start for studyim Bible. No longtaem bihaen, famili blo hem start for againstim hem. Wat nao helpem hem for gohed study? Study conductor blo hem iusim Matthew chapter 10 for explainim dat olketa tru Christian bae kasem persecution. Nortey sei: “Taem olketa start for persecutim mi, mi barava convince dat mi faendem truth.” Study conductor iusim tu Matthew 10:16 for helpem hem for careful and showimaot respect taem hem explainim biliv blo hem lo famili blo hem. Afta Nortey baptaes, hem laek for pioneer, bat dadi blo hem expectim hem for go skul lo university. Study conductor blo Nortey no talem hem wat for duim, bat hem askem olketa kwestin and helpem hem for ting raonem olketa Bible principle. Wat nao result? Nortey disaed for duim full-taem service. Dadi blo hem raosem hem from haos. Hao nao Nortey feel abaotem samting wea happen? Hem sei: “Mi convince dat mi mekem stret disison.” Taem iumi helpem olketa narawan for ting raonem olketa Scripture, iumi helpem olketa for kamap strong Christian.—Eph. 3:​16-19.

TRAINIM MAN FOR QUALIFY FOR KAMAP OLSEM “PRESENT”

13. Wat nao Jesus duim for mek sure preaching waka gohed afta hem go bak lo heven? (Ephesus 4:8)

¹³ Taem Jesus stap lo earth, hem barava duim gud waka wea Dadi blo hem askem hem for duim. (John 17:4) Bat Jesus no garem diskaen attitude, ‘If man laekem samting for hem gud, hemseleva nao mas duim.’ During lo thri and haf year wea hem duim ministry blo hem, hem trainim olketa narawan for duim datfala waka. Bifor Jesus go bak lo heven, hem trustim olketa disaepol blo hem. Hem givim responsibility for olketa preachim gud nius and teachim pipol and for lukaftarem olketa sheepsheep blo Jehovah. Samfala wea duim olketa responsibility hia olketa young, maet olketa insaed lo 20’s blo olketa. (Readim Ephesus 4:8.) Wat nao Jesus duim lo last 40 days blo hem lo earth, for trainim olketa man hia wea dedicate, loyal, and waka hard, for olketa qualify for kamap “olsem present”?—Lukim English study note blo Ephesus 4:8.

14. Hao nao Jesus teachim olketa disaepol blo hem during lo last 40 days blo hem lo earth? (Lukim tu piksa.)

¹⁴ Jesus givim kaonsel wea olketa disaepol needim bat lo loving wei. For example, hem luksavve samfala lo olketa garem disfala wei for daot, so hem kaonselem olketa. (Luke 24:​25-27; John 20:27) Hem helpem olketa for luksavve dat waka for lukaftarem olketa sheepsheep blo Jehovah hem important winim waka for selen. (John 21:15) Hem remindim olketa for no comparem privilege blo olketa, witim privilege wea narawan maet kasem lo service blo Jehovah. (John 21:​20-22) And Jesus stretem samfala rong idea wea olketa garem abaotem Kingdom and helpem olketa for focus lo preaching waka. (Acts 1:​6-8) Wat nao olketa elder savve lanem from example blo Jesus?

15-16. (a) Hao nao olketa elder savve followim example blo Jesus? Explainim. (b) Hao nao kaonsel wea Patrick kasem helpem hem?

¹⁵ Hao nao olketa elder savve followim example blo Jesus? Olketa mas trainim and helpem olketa brata for qualify for duim samfala moa responsibility, even if olketa young.c Olketa elder no expectim olketa wea kasem training for barava duim evriting lo perfect wei. Olketa shud givim loving kaonsel wea olketa young brata hia needim mekem olketa savve kasem moa experience and lane for hambol, faithful, and willing for helpem olketa narawan.—1 Tim. 3:1; 2 Tim. 2:2; 1 Pet. 5:5.

¹⁶ Tingim hao wanfala brata wea nem blo hem Patrick kasem gud samting from kaonsel. Taem hem young, hem savve tok raf and no kaen, even lo olketa sista tu. Wanfala mature elder luksavve lo wik point lo Patrick and hem givim hem wanfala klia kaonsel abaotem datwan bat lo kaenfala wei. Patrick sei: “Mi hapi hem duim datwan. Mi savve discourage taem mi lukim olketa nara brata kasem olketa privilege wea mi laek kasem lo service blo Jehovah. Bat kaonsel blo datfala elder helpem mi for luksavve mi need for hambol and showimaot love lo olketa brata and sista, instead for laek kasem position or samfala privilege lo kongregeson.” Gud samting wea kamaot from datwan, taem Patrick hem 23 years old, hem kamap elder.—Prov. 27:9.

17. Wat nao Jesus duim wea showim hem trustim olketa disaepol blo hem?

¹⁷ Jesus givim responsibility lo olketa disaepol blo hem for no just preach nomoa, bat for teach tu. (Lukim “teaching them” lo English study note blo Matthew 28:20.) Maet olketa disaepol feel olsem olketa no qualify for duim datfala assignment. Bat, Jesus no daot dat olketa savve duim datfala waka, and hem talem lo olketa. Wat Jesus talem showimaot hem barava trustim olketa, hem sei: “Mi sendem iufala go olsem Dadi long heven hem sendem mi kam.”—John 20:21.

18. Hao nao olketa elder savve followim example blo Jesus?

¹⁸ Hao nao olketa elder savve followim example blo Jesus? Olketa elder wea garem experience savve givim samfala responsibility for olketa narawan duim. (Phil. 2:​19-22) For example, olketa elder savve askem olketa young wan for help for klinim and duim maintenance lo Kingdom Hall. Afta olketa givim waka for olketa brata duim, olketa savve showimaot olketa trustim olketa brata hia taem olketa trainim olketa and letem olketa for duim datfala waka. Wanfala niu elder wea nem blo hem Matthew sei hem barava appreciatim taem olketa elder wea garem experience, trainim hem gud lo hao for duim wanfala assignment, and trustim hem for completim datwan. Hem sei, “Mi kasem gud samting taem olketa ting lo olketa mistek blo mi olsem samting wea mi need for lanem from and helpem mi for impruv lo datwan.”d

19. Wat nao iumi shud disaed strong for duim?

¹⁹ Jesus iusim last 40 days blo hem lo earth for encouragem, teachim, and trainim olketa disaepol blo hem. Iumi tu laek disaed strong for barava followim gud example blo Jesus. (1 Pet. 2:21) Hem bae helpem iumi for duim datwan. Bikos hem promis olsem: “Bae mi stap witim iufala go kasem taem wea world hem finis.”—Matt. 28:20.