Wat Nao God Laek for Mi Duim?

Ansa from Bible

God laekem for iu savve gud lo hem, kamap fren blo hem, and then lovem and servem hem witim full heart blo iu. (Matthew 22:37, 38; James 4:8) Iu savve lanem hao for duim wat God laekem from laef and teaching blo Jesus. (John 7:16, 17) Jesus no just storyim nomoa wat God laekem, bat hem duim. Dastawe Jesus sei dat purpose lo laef blo hem, hem for “no for duim samting wea miseleva laekem, bat for duim samting wea Dadi wea sendem mi kam laekem mi for duim.”—John 6:38.

Hao, mi needim wanfala spesol saen, vision, or for God seleva story kam lo mi for savve wat nao Hem laekem mi for duim?

Nomoa, bikos Bible garem message blo God for olketa man. Hem garem finis wat iu needim for “redi for duim evri gudfala waka.” (2 Timothy 3:16, 17) God laekem iu for iusim Bible witim “wei for ting raonem samting” for lane abaotem wat hem laekem iu for duim.—Romans 12:1, 2; Ephesians 5:17.

Mi savve duim wat God laekem?

Yes, iu savve duim, Bible sei: “Olketa komand blo God hem no hard tumas for iumi obeyim.” (1 John 5:3, Easy-to-Read Version) Datwan no minim dat for obeyim olketa komand blo God hem evritaem isi. Bat benefit wea iu bae kasem hem winim nao effort wea iu mekem. Jesus seleva sei: “Hapi nao olketa wea herem word blo God and obeyim datwan!”—Luke 11:28, Good News Translation.