Hao, Wanfala Christian Savve Acceptim Medical Treatment?

Ansa from Bible

Yes. Jesus storyim olketa follower blo hem savve kasem medical treatment taem hem sei dat “pipol wea sik nao need for go lukim doctor, no olketa wea healthy.” (Matthew 9:12) Nomata Bible hem no wanfala medical manual, hem garem olketa principle for gaedem olketa wea laek for mekem God hapi.

Olketa kwestin for ting raonem

1. Mi understandim treatment wea olketa givim? Bible advaesem iumi fo lukaotem olketa reliable information winim for “bilivim evri toktok.”—Proverbs 14:15.

2. Hao, mi shud askem opinion blo wan or tufala doctor moa? Advaes from “staka advaesa” hem important, especially if condition blo iu hem serious.—Proverbs 15:22.

3. Eni samting lo datfala treatment hem brekem komand lo Bible for “stap klia . . . from blood”?—Acts 15:20.

4. Hao, olketa iusim spiritism for lukim sik and givim treatment? Bible stopem wei for duim “spiritism.” (Galatians 5:19-21) For savve if spiritism hem involve, tingim olketa kwestin hia:

• Hao, doctor hem iusim spiritism?

• Hem givim treatment from hem biliv dat mi sik bikos olketa god no hapi lo mi or olketa enemy poisonim mi?

• Hem mekem sakrifaes, singsing, or duim nara samting wea join witim spiritism for wakem datfala medicine or hem talem mi duim datwan bifor mi tekem datfala medicine?

5. Hao, mi ova wari tumas abaotem health blo mi? Bible sei: “Showimaot lo evriwan dat iufala willing for acceptim tingting blo narawan.” (Philippians 4:5) For reasonable bae helpem iu for focus lo “olketa samting wea moa important,” olsem olketa spiritual samting.—Philippians 1:10; Matthew 5:3.