Wat Nao Resurrection?

Ansa from Bible

Lo Bible, word wea olketa transleitim lo “resurrection” hem kam from Greek word a·naʹsta·sis, wea minim “raise ap” or “standap moa.” Man wea resurrect hem raise ap from dae and laef moa olsem firstaem.​—1 Corinthians 15:12, 13.

Nomata word “resurrection” no stap lo olketa Hebrew Scripture wea staka taem olketa kolem lo Old Testament, teaching abaotem resurrection hem stap lo there. For example, God iusim profet Hosea for talem disfala promis: “From paoa blo Grev mi bae baem olketa bak. From dae mi bae tekem olketa kam bak.”​—Hosea 13:14; Job 14:13-​15; Isaiah 26:19; Daniel 12:​2, 13.

Pipol bae resurrect lo wea? Samfala pipol bae resurrect for laef lo heven and rul witim Christ. (2 Corinthians 5:1; Revelation 5:​9, 10) Bible kolem diswan “datfala first resurrection” and disfala expression showim dat nara resurrection bae kamap bihaen. (Revelation 20:6; Philippians 3:​11) Nara resurrection hia hem for laef lo earth, wea staka pipol wea laef bak bae enjoyim laef.​—Psalm 37:29.

Hao nao bae pipol resurrect? God givim paoa lo Jesus for raisim olketa wea dae for laef bak. (John 11:25) Jesus bae mekem “evriwan wea stap insaed lo olketa memorial tomb” for laef bak, each wan lo olketa bae garem sem identity, personality, and sem memory. (John 5:​28, 29) Pipol wea resurrect for go ap lo heven garem spirit body, bat pipol wea resurrect for laef lo earth garem healthy physical body, wea no eniting spoelem.​—Isaiah 33:24; 35:​5, 6; 1 Corinthians 15:42-​44, 50.

Hu nao bae resurrect? Bible sei “resurrection bae kamap for pipol wea raeteous and pipol wea no raeteous.” (Acts 24:15) Pipol wea raeteous hem includim olketa faithful wan olsem Noah, Sarah, and Abraham. (Genesis 6:9; Hebrews 11:11; James 2:​21) Olketa wea no raeteous hem includim pipol wea no followim olketa standard blo God, and wea no garem opportunity for lane abaotem hem and followim wat olketa lanem.

Bat, olketa wea wei blo olketa hem nogud tumas and no savve change bae no resurrect. Taem olketa man olsem dae, olketa dae for olowe and no garem hope for laef bak moa.​—Matthew 23:33; Hebrews 10:26, 27.

Wat taem nao resurrection bae happen? Bible talem dat resurrection for heven hem kamap lo presence blo Christ, wea start lo 1914. (1 Corinthians 15:21-​23) Resurrection for laef lo earth bae kamap during Wan Thousand Year Rul blo Jesus Christ, taem earth bae kamap paradaes.​—Luke 23:43; Revelation 20:​6, 12, 13.

Why nao iumi fit for bilivim resurrection? Bible storyim naenfala resurrection, each wan staka pipol nao eye witnessim. (1 Kings 17:17-​24; 2 Kings 4:​32-​37; 13:20, 21; Luke 7:​11-​17; 8:​40-​56; John 11:38-​44; Acts 9:​36-​42; Acts 20:​7-​12; 1 Corinthians 15:​3-6) Resurrection blo Lazarus hem barava spesol, bikos Lazarus hem dae for fo days finis and Jesus duim datfala mirakol front lo staka pipol. (John 11:39, 42) Even pipol wea againstim Jesus no savve denyim wat olketa lukim, so olketa plan for killim dae Jesus and Lazarus.​—John 11:47, 53; 12:​9-​11.

Bible showim dat God garem ability and desire for resurrectim olketa wea dae finis. Hem keepim full record blo each person wea hem bae resurrectim lo limitless memory blo hem, and hem bae iusim maeti paoa blo hem for duim datwan. (Job 37:23; Matthew 10:30; Luke 20:37, 38) God fit for mekem man wea dae finis for laef bak, and hem laek for duim datwan! Taem Bible story abaotem resurrection, hem sei olsem abaotem God: “Iu bae laekem tumas for lukim mi wea hand blo iu creatim.”​—Job 14:15.

Tingting wea no stret abaotem resurrection

Laea: Resurrection hem for reunitim soul witim body.

Tru samting: Bible teachim dat soul hem datfala full person, no samfala part wea survive afta man dae. (Genesis 2:7, footnote; Ezekiel 18:4) Man wea resurrect hem no reunite witim soul blo hem, bat hem bae laef bak olsem wanfala niu living soul.

Laea: Samfala pipol resurrect and then olketa distroe tu.

Tru samting: Bible hem sei dat “olketa wea duim nogud samting bae resurrect for kasem judgment.” (John 5:​29) Bat, olketa bae kasem judgment base lo wat olketa duim afta olketa resurrect, no bifor olketa dae. Jesus sei: “Olketa wea dae finis bae herem voice blo Son blo God, and olketa wea obeyim hem bae olketa laef.” (John 5:​25) Pipol wea followim wat olketa lanem afta olketa resurrect, nem blo olketa hem stap lo “scroll blo laef.”​—Revelation 20:12, 13.

Laea: Taem wanfala person resurrect, hem bae garem bak exactly sem body wea hem garem bifor hem dae.

Tru samting: Afta man dae, body blo man hem rotten and kamap graon nao.—Ecclesiastes 3:​19, 20.