Wat Nao Ark blo Covenant?

Ansa from Bible

Ark blo covenant hem wanfala holy box wea olketa Israelite bifor wakem followim komand and design wea God givim lo olketa. Insaed lo datfala Ark blo Covenant olketa putim datfala “Testimony,” wea hem Ten Komandment wea God raetem lo tufala ston tablet.​—Exodus 25:​8-​10, 16; 31:18, ftn.

• Construction. Datfala Ark hem 2.5 cubit long, 1.5 cubit waed, and 1.5 cubit hae (111 x 67 x 67 cm; 44 x 26 x 26 in.). Olketa wakem from acacia wood and coatim insaed and aotsaed blo hem witim gold, and olketa mekem design raonem top blo hem. Olketa wakem lid blo hem from pure gold, and olketa wakem tufala golden cherub lo tufala end blo lid hia. Tufala cherub hia feisim each other and spredim aot wing blo tufala, and wing blo tufala kavarem datfala lid. Datfala Ark garem fofala ring wea olketa wakem from gold and olketa pasim ontop fofala leg blo Ark hia. Then olketa wakem tufala long stik from acacia wood wea olketa coatim witim gold and pushim thru lo olketa ring hia mekem olketa savve karem datfala Ark.​—Exodus 25:10-​21; 37:​6-9.

• Location. Firstaem olketa keepim datfala Ark lo Most Holy Rum blo tabernacle. Tabernacle hem wanfala tent for worship wea olketa wakem lo semtaem wea olketa wakem datfala Ark. Wanfala curtain hem satem datfala Most Holy Rum mekem olketa priest and olketa pipol no savve luk go insaed. (Exodus 40:​3, 21) Only hae priest nomoa savve go insaed datfala Most Holy Rum, wan day evri year lo Atonement Day, and lukim datfala Ark. (Leviticus 16:2; Hebrews 9:7) Bihaen, olketa muvim datfala Ark go lo Most Holy Rum lo temple blo Solomon.​—1 Kings 6:​14, 19.

  

• Purpose. Datfala Ark hem wanfala archive for keepim olketa holy samting wea remindim olketa Israelite abaotem datfala covenant, or agreement, wea God mekem witim olketa lo Maunt Sinai. And tu, datfala Ark pleim important role lo Atonement Day ceremony.​—Leviticus 16:​3, 13-17.

• Content. First samting wea olketa putim insaed datfala Ark hem tufala ston tablet wea God raetem Ten Komandment lo hem. (Exodus 40:20) Bihaen, olketa putim wanfala gold jar wea manna stap insaed and “stik blo Aaron wea garem flaoa wea no open yet.” (Hebrews 9:4; Exodus 16:33, 34; Numbers 17:10) Hem klia, olketa aotem datfala jar and stik bihaen, bikos hem no stap insaed datfala Ark taem olketa muvim Ark hia go lo temple.​—1 Kings 8:9.

• Hao olketa transportim. Olketa Levite iusim tufala long stik wea olketa wakem from acacia wood for karem datfala Ark lo shoulder blo olketa. (Numbers 7:9; 1 Chronicles 15:15) Tufala long stik hia mas evritaem stap lo olketa ring blo datfala Ark, mekem olketa Levite no tasim datfala Ark. (Exodus 25:12-​16) Olketa iusim “datfala curtain” wea separatem Holy and Most Holy Rum for kavarem datfala Ark taem olketa karem.​—Numbers 4:​5, 6.a

• Symbol. Datfala Ark hem showim presence blo God. For example, cloud wea appear ontop datfala Ark insaed Most Holy Rum and wea stap lo camp blo olketa Israelite, hem wanfala saen wea showim presence and blessing blo Jehovah. (Leviticus 16:2; Numbers 10:33-​36) And tu, taem Bible sei Jehovah “sidaon for rul antap olketa cherub,” hem refer go lo tufala cherub wea stap ontop lid blo datfala Ark. (1 Samuel 4:4; Psalm 80:1) Dastawe, tufala cherub hia “piksarem datfala chariot” blo Jehovah. (1 Chronicles 28:18) From datfala Ark minim presence blo God, King David fit for sei Jehovah “hem stap lo Zion” bikos olketa muvim datfala Ark lo there.​—Psalm 9:​11.

• Olketa nem blo hem. Bible iusim olketa difren nem for datfala holy box, olsem “datfala ark blo Testimony,” “ark blo covenant,” “Ark blo Jehovah,” and “datfala Ark wea showimaot paoa blo [Jehovah].”​—Numbers 7:​89, ftn; Joshua 3:​6, 13; 2 Chronicles 6:​41.

  Lid blo datfala Ark olketa kolem lo “kava” or “chair blo mercy.” (1 Chronicles 28:11; King James Version) Disfala toktok refer for spesol waka blo datfala lid lo Atonement Day, taem hae priest blo Israel splasim blood blo olketa animal wea olketa sakrifaesim front lo datfala lid. Olketa samting hia wea hae priest duim mekem atonement for kavarem olketa sin blo “hemseleva, famili laen blo hem, and full kongregeson blo Israel.”​—Leviticus 16:14-​17.

Hao, datfala ark blo covenant still exist distaem?

No eni evidence pruvim datwan. Bible showim dat iumi no longer needim datfala Ark bikos covenant wea join witim datwan hem replace witim “wanfala niu covenant,” wea base lo sakrifaes blo Jesus. (Jeremiah 31:31-​33; Hebrews 8:​13; 12:24) Dastawe Bible sei wanfala taem bae kam taem datfala ark blo covenant bae no stap moa, and pipol blo God bae nating missim.​—Jeremiah 3:​16.

Afta datfala niu covenant hem establish, aposol John lukim insaed wanfala vision datfala ark blo covenant hem appear lo heven. (Revelation 11:15, 19) Disfala symbolic Ark representim presence blo God and blessing blo hem lo datfala niu covenant.

Hao, datfala Ark garem magic paoa?

Nomoa. Wei for garem datfala ark blo covenant hem no givim olketa Israelite guarantee dat evriting olketa duim bae succeed. For example, olketa Israelite garem datfala Ark insaed camp blo olketa taem olketa faet witim olketa blo Ai, nomata olsem olketa Israelite lus lo faet bikos wanfala lo olketa no faithful lo Jehovah. (Joshua 7:​1-6) Bihaen, olketa lus lo faet tu taem olketa feisim olketa Philistine, nomata lo datfala taem olketa Israelite tekem go datfala ark blo covenant lo ples wea olketa faet lo hem. Olketa lus lo datfala taem bikos lo wicked samting wea tufala Israelite priest, Hophni and Phinehas duim. (1 Samuel 2:​12; 4:​1-​11) Olketa Philistine tekem datfala Ark bihaen datfala faet, bat God panisim olketa witim olketa nogud boela go kasem taem olketa tekem go bak datfala Ark lo Israel.​—1 Samuel 5:⁠11–6:​5.