Wat Nao Hem Minim for ‘Honorim Dadi and Mami blo Iu’?
Ansa from Bible
Datfala komandment for “honorim dadi and mami blo iufala” hem appear staka taem insaed lo Bible. (Exodus 20:12; Deuteronomy 5:16; Matthew 15:4; Ephesians 6:2, 3) Fofala main samting involve lo diswan.
Appreciatim wat tufala duim. Iu honorim dadi and mami blo iu taem iu talem thankiu for evri samting tufala duim for iu. Iu savve showim appreciation blo iu taem iu tinghae lo wat tufala duim for gaedem iu. (Proverbs 7:1, 2; 23:26) Bible encouragem iu for ting lo parents blo iu olsem “glory,” wea minim iu praod lo tufala.—Proverbs 17:6.
Acceptim authority blo tufala. Especially taem iu young, iu honorim dadi and mami blo iu taem iu recognizim authority wea God givim lo tufala. Colossians 3:20 talem olketa young wan: “Iufala mas obeyim dadi and mami blo iufala lo evri samting, bikos diswan hem mekem Lord for barava hapi.” Even Jesus tu taem hem young hem hapi for obeyim parents blo hem.—Luke 2:51.
Treatim tufala witim respect. (Leviticus 19:3; Hebrews 12:9) Staka taem diswan involvim wat iu talem and hao iu talem datwan. Hem tru, samtaems samfala parents duim samting wea mekem hem hard for pikinini respectim tufala. Nomata olsem, olketa pikinini savve honorim parents blo olketa taem olketa avoidim toktok and wat olketa duim wea no showim respect. (Proverbs 30:17) Bible teachim dat for tok spoelem dadi and mami hem wanfala serious offense.—Matthew 15:4.
Provaed for olketa. Taem parents kamap olo, olketa needim practical sapot. Iu savve honorim olketa taem iu traem best blo iu for mek sure olketa garem wat olketa needim. (1 Timothy 5:4, 8) For example, just bifor hem dae, Jesus arrange for samwan tek kea lo mami blo hem.—John 19:25-27.
Tingting wea no stret abaotem wei for honorim dadi and mami
Tingting wea no stret: For honorim dadi and mami blo iu, iu mas letem tufala for kontrolem marit blo iu.
Tru samting: Bible teachim dat taem man and woman marit tufala mas putim marit hem priority winim famili relationship. Genesis 2:24 sei: “Man bae lusim dadi and mami blo hem and hem bae stap olowe witim waef blo hem.” (Matthew 19:4, 5) Hem tru, marit couple savve benefit from advaes blo parents or olketa in-law. (Proverbs 23:22) Bat, wanfala couple garem raet for setim baondri for limitim involvement blo olketa relative insaed marit blo tufala.—Matthew 19:6.
Tingting wea no stret: Dadi and mami blo iu nao garem raet for mekem disison.
Tru samting: Nomata God givim authority lo parents insaed famili, authority wea olketa man garem hem garem limit, olketa no ovam authority blo God. For example, taem hae kot givim order for olketa disaepol blo Jesus disobeyim God, olketa reply olsem: “Mifala mas obeyim God olsem ruler and no olketa man.” (Acts 5:27-29) Lo sem wei, olketa pikinini obeyim parents blo olketa “for fitim wanem Lord hem laekem,” wea minim, lo evri samting wea olketa duim wea no conflict witim olketa law blo God.—Ephesians 6:1.
Tingting wea no stret: For honorim dadi and mami blo iu hem minim iu mas followim religious biliv blo tufala.
Tru samting: Bible encouragem iumi for testim wat iumi herem for lukim whether hem truth or nomoa. (Acts 17:11; 1 John 4:1) Man wea duim olsem, maet hem savve chusim biliv wea hem difren from parents blo hem. Bible story abaotem samfala faithful servant blo God wea no followim religion blo parents blo olketa includim Abraham, Ruth, and aposol Paul.—Joshua 24:2, 14, 15; Ruth 1:15, 16; Galatians 1:14-16, 22-24.
Tingting wea no stret: For honorim dadi and mami blo iu, iu mas share lo traditional rites blo ancestor worship.
Tru samting: Bible hem sei: “Iu mas baodaon lo Jehovah, God blo iu, and iu mas worshipim hem nomoa.” (Luke 4:8) God no hapi lo person wea worshipim olketa ancestor blo hem. And tu, Bible teachim dat “olketa wea dae no savve lo eni samting.” Olketa nating savve eni honor wea samwan givim lo olketa, or olketa no savve helpem or spoelem olketa wea laef.—Ecclesiastes 9:5, 10; Isaiah 8:19.