Wat Nao Bible Talem Abaotem Euthanasia?

Ansa from Bible

Bible no specifically story abaotem euthanasia.a Nomata olsem, wat hem talem abaotem laef and dae hem helpem iumi for garem balance tingting. Bible talem dat hem no acceptable for killim man dae, bat hem no talem tu for iumi traem best for mekem man gohed laef during taem wea hem klosap for dae.

Bible storyim dat God hem Creator blo iumi, hem nao “source blo laef.” (Psalm 36:9; Acts 17:28) Lo eye blo God, laef hem precious samting. From diswan, God stopem wei for man killim dae narawan and for man killim hemseleva dae. (Exodus 20:13; 1 John 3:​15) And tu, Bible sei iumi mas lukaftarem gud laef blo iumi and laef blo olketa narawan. (Deuteronomy 22:8) Hem klia, God laekem iumi for valuem gift blo laef.

Hao if wanfala person hem sik fogud?

Bible no talem for iumi endim laef blo man wea sik fogud and klosap for dae. Story blo King Saul lo Israel sapotim diswan. Taem hem garekil nogud lo faet, hem askem wakaman blo hem for killim hem dae. (1 Samuel 31:​3, 4) Wakaman blo Saul refuse. Bat, bihaen nara man laea for sei hem nao killim dae Saul followim wat Saul laekem. David judgem man hia bloodguilty from hem killim dae Saul. David garem tingting blo God abaotem laef.​—2 Samuel 1:​6-​16.

Hao, iumi mas duim evriting iumi fit for duim mekem man no dae kwiktaem?

Taem man hem klosap for dae, Bible no talem iumi for duim samting mekem man laef longtaem moa. Bat, Bible helpem iumi for garem balance tingting. Dae hem great enemy blo iumi, and iumi dae bikos iumi man wea sin. (Romans 5:​12; 1 Corinthians 15:26) Hem tru, iumi no laek for dae, bat iumi no need for fraet for dae tu, bikos God promis finis for resurrectim pipol wea dae. (John 6:​39, 40) Man wea respectim laef bae lukaotem best medical kea wea available. Nomata olsem, hem no minim iumi mas chusim olketa medical procedure wea bae mekem man wea klosap for dae finis for laef longtaem moa.

Hao, suisaed hem wanfala unforgivable sin?

Nomoa, Bible no talem dat suisaed hem wanfala unforgivable sin. Nomata man killim hemseleva dae hem wanfala serious sin,b God fully understandim olketa samting wea savve lead go lo wei for suisaed olsem mentol illness, stress tumas, or sik wea olketa inheritim from famili. (Psalm 103:13, 14) Thru lo Bible, hem provaedem comfort for olketa wea kasem hard taem. And tu, Bible sei “wanfala resurrection bae kamap for pipol wea raeteous and pipol wea no raeteous.” (Acts 24:15) Diswan showim resurrection hope hem stap for pipol wea duim serious mistek, olsem for commitim suisaed.