Wat Nao Bible Talem Abaotem Wei for Lovem Seleva?
Ansa from Bible
Bible showim dat hem no rong for man lovem hemseleva, if hem no ova tumas lo datwan. Man lovem hemseleva taem hem kea for body blo hem, respectim and no ting daonem hemseleva. (Matthew 10:31) Instead for man mekhae lo hemseleva, Bible putim wei for man lovem hemseleva lo stret ples blo hem.
Hu nao iumi mas lovem firstaem?
Iumi mas lovem God firstaem. Bible teachim dat important komandment nao hem: “Iufala mas lovem Jehovah, God blo iufala, witim full heart blo iufala.”—Mark 12:28-30; Deuteronomy 6:5.
Second important komandment hem: “Iufala mas lovem neiba blo iufala olsem iufala lovem iufala seleva.”—Mark 12:31; Leviticus 19:18.
Nomata Bible no includim specific komand for man lovem hemseleva, datfala komand for “lovem neiba olsem iufala lovem iufala seleva” hem showim dat hem normal for man lovem and respectim hemseleva and no ova tumas.
Hu nao Jesus lovem firstaem?
Jesus showim hao for balancem love for God, love for neiba, and for lovem seleva, and hem teachim olketa disaepol blo hem for followim example blo hem.—John 13:34, 35.
Hem lovem Jehovah God firstaem and devotim hemseleva for duim waka blo God. Jesus sei: “For mekem pipol lo world savve mi lovem Dadi, mi duim samting wea Dadi talem mi for duim.”—John 14:31.
Jesus showim hem lovem neiba blo hem taem kea for need blo olketa, and even givim own laef blo hem for olketa.—Matthew 20:28.
Hem showim hem lovem hemseleva lo reasonable wei taem hem spendem taem for rest, kaikai, and enjoyim association witim olketa follower blo hem and olketa narawan wea fit for kamap disaepol.—Mark 6:31, 32; Luke 5:29; John 2:1, 2; 12:2.
Hao, wei for lovem olketa narawan firstaem bae reducim hapi blo iu and wei wea iu respectim iuseleva?
Nomoa, bikos God creatim iumi lo image blo hem, and main quality blo hem nao love. (Genesis 1:27; 1 John 4:8) Diswan minim dat hem designim iumi for lovem olketa narawan. For man lovem hemseleva hem garem ples blo hem, bat iumi bae hapi tumas taem iumi lovem God winim eni nara samting and focus for duim gud samting for olketa narawan. Bible hem sei, “bigfala hapi hem kam from wei for givim samting winim wei for kasem samting.”—Acts 20:35.
Distaem staka pipol sei man hem hapi taem hem putim hemseleva first. Olketa replacem “lovem neiba blo iufala” witim toktok “lovem iufala seleva.” Bat, staka experience distaem confirmim dat taem man followim datfala advaes from Bible bae health blo hem impruv and bae hem kasem hapi. Bible sei: “Each wan mas gohed lukaotem chance for duim gud samting for narawan, and no just gud samting for hemseleva.”—1 Corinthians 10:24.