Chapter 3
Hold Strong long Word bilong God
1. (a) Hao nao Israel bifor luksavvy long way wea Word bilong God hem tru every bit? (b) Why nao datwan mekem yumi interest?
“YUFELA savvy withim whole heart and whole soul bilong yufela hao no any toktok long olketa gudfela toktok wea Jehovah God bilong yufela hem talem long yufela hem fail. Everywan kamap tru for yufela.” Diswan nao samting wea Joshua talem moa for olketa older man bilong Israel bihaen they stap finis long Promis Land. But long olketa year bihaen, they no listen everytaem long Word bilong God and they nating followim. Wanem nao kamap from diswan? Bible showim aot klia hao long sem way wea promis bilong Jehovah for givim blessing hem kamap tru, so, hem bae duim samting tu long olketa wea no obey. (Josh. 23:14-16) Datfela story, and every other part bilong Bible, they keepim for teachim yumi—mekem “yumi savvy garem hope” and mekem yumi no duim samting wea bae mekem yumi lusim datfela hope.—Rom. 15:4.
2. (a) Long wanem way nao Bible “kam from God”? (b) From yumi savvy long diswan, wanem responsibility nao yumi garem?
2 Nomata hem use-im abaot 40-fela man olsem “secretary” for raetem Bible, Jehovah seleva nao Man Wea Raetem. Waswe, datwan meanim hem nao leadim way for raetem every samting wea stap insaed? Yes. Olsem aposol Paul say, “Every Scripture kam from God.” From yumi believim datwan, yumi encouragim pipol everywea for followim samting insaed long Bible and for buildim living bilong them raonem samting wea stap insaed, olsem yumi tu trae hard for duim.—2 Tim. 3:16; 1 Thess. 2:13.
Wanem Nao Bae Helpem Other Pipol for Ting Hae long Hem?
3. Wanem nao best way for helpem planti pipol wea no believe Bible hem Word bilong God?
3 Hem tru, planti pipol wea yumi story withim, they no believe olsem yumi hao Bible hem really Word bilong God. Hao nao yumi savvy helpem them? Planti taem, best way hem for openem Bible and showim samting wea stap insaed. “Word bilong God hem laef and hem garem power and hem moa sharp winim sword wea sharp long tufela saed . . . and hem savvy meanim tingting and samting wea heart want for duim.” (Heb. 4:12) “Word bilong God” hem toktok bilong promis bilong hem, wea stap insaed long Bible. Hem no olsem history wea dae finis, but hem laef and hem go ahed for fulfill. Taem hem duim olsem, trufela samting wea muvim heart bilong pipol wea herem bae show aot klia long way wea they kasem olketa mark bilong hem. Way wea hem savvy affectim man hem moa strong winim any samting wea yumi seleva savvy talem.
4. Olketa wanem Bible truth nao change-im tingting bilong samfela pipol abaot Bible? Why nao olsem?
4 Taem they lukim nem bilong God insaed long Bible, diswan hem change-im planti pipol. Other pipol decide for studyim Bible taem they lukim samting wea hem talem abaot purpose bilong laef, why God letem badfela fashion go ahed, meaning bilong every samting wea happen distaem or gudfela hope bilong Kingdom bilong God. Long olketa kantri wea samting wea religion duim hem openem way for olketa badfela spirit for spoelem pipol, samting wea Bible talem abaot hu nao startim diswan and hao for kasem help hem mekem pipol interest. Why nao olketa point hia mekem them barava interest? Bikos Bible nomoa talem trufela samting abaot olketa important samting hia.—Ps. 119:130.
5. Taem wanfela man say hem no believim Bible, wanem nao maet mekem hem garem tingting olsem? Hao nao yumi savvy helpem hem?
5 But, waswe sapos wanfela man tok stret and say hem no believim Bible? Waswe, datwan stopem yumi for story nao? Sapos hem willing for reason long diswan, yumi savvy story withim hem. Yumi garem responsibility for talemaot strongfela belief bilong yumi for saed long Word bilong God. Man hia maet ting long Bible olsem buk bilong Kristendom. Way wea Kristendom hem olsem hypocrite and mix withim politik, and tu way wea hem askim shilling olawe maet mekem man hia garem no gud tingting abaot Bible. Hem gud sapos yumi askim tingting bilong hem long diswan. Way wea Bible tok againstim Kristendom wea followim olketa way bilong world, and tu way wea hem showim aot hao Kristendom and trufela Kristian religion they different, maet mekem man hia hem interest.—Lukim Matthew 15:7-9; James 4:4; Micah 3:11, 12.
6. (a) Wanem nao mekem yuseleva barava believim Bible hem Word bilong God? (b) Wanem nao otherfela point wea yu savvy use-im for reason withim pipol for helpem them luksavvy way wea Bible hem really kam from God?
6 For samfela other pipol, way for story stret abaot olketa proof bilong way wea Bible hem kam from God hem helpem them. Wanem nao barava prove-im long yu hao Bible hem kam from God? Waswe, hem from Bible seleva talem wea nao hem start kam from? (2 Tim. 3:16, 17; Rev. 1:1) Or waswe, hem from Bible garem planti profesi wea talem wanem nao happen long future, wea show aot olketa profesi hia mas kam from power wea winim olketa man? (2 Pet. 1:20, 21; Isa. 42:9) Waswe, hem from Bible hem wan mind every bit, nomata planti man nao raetem insaed 1,610 year? Or from hem stret long saed bilong science wea different from olketa buk wea they raetem long sem taem? Or from olketa man wea raetem they honest? Or from hem still stap nomata planti pipol they barava trae hard for finisim every bit? Samting wea mekem yu barava interest hem samting wea yu savvy use-im for helpem other pipol.
Way for Readim Bible Seleva
7, 8. (a) Wanem nao yumi seleva mas duim withim Bible? (b) Wanem samting moa yumi need for duim withim way for readim Bible seleva, and hao nao Bible seleva showim aot diswan? (c) Hao nao yuseleva kasem savvy abaot olketa purpose bilong Jehovah?
7 For join withim way for helpem other pipol for believim Bible, yumi seleva need for markem taem for readim Bible everytaem. Waswe, yu duim datwan? Long every buk wea stap, Bible nao barava important. But sapos yumi readim, datwan no meanim yumi no needim any otherfela samting moa. Olketa Scripture warnim yumi againstim way for stap seleva, for ting yumi savvy meanim every samting sapos yumi duim research seleva. Yumi needim way for study seleva and tu way for attendim meeting everytaem for kamap olketa Kristian wea balance.—Prov. 18:1; Heb. 10:24, 25.
8 Bible helpem yumi taem hem story abaot wanfela bigman bilong Ethiopia wea wanfela angel leadim Kristian man for preach, Philip, for go long hem taem bigman hia hem readim profesi bilong Isaiah. Philip askim disfela man: “Waswe, yu really meanim samting wea yu readim?” Man bilong Ethiopia hia hem answer long humble way olsem: “But hao nao mi savvy meanim, sapos no anywan helpem mi?” So hem askim Philip for meanim datfela Scripture long hem. Philip hem no wanfela man wea readim Bible seleva nomoa and givim tingting bilong hemseleva abaotem olketa Scripture. No moa; Bible show aot hao hem stap planti taem withim olketa aposol long kongregeson long Jerusalem and hem member bilong organization bilong Jehovah long earth. So hem savvy helpem man bilong Ethiopia for kasem gudfela samting from instruction wea kam from Jehovah, thru long datfela organization. (Acts 6:5, 6; 8:5, 14, 15, 26-35) Long sem way distaem, hu long yumi nao savvy meanim seleva olketa purpose bilong Jehovah long stret and kliafela way? No moa nao, yumi bin needim, and go ahed for needim, help wea Jehovah provide-im long loving way thru long organization bilong hem long earth.
9. Wanem nao olketa program bilong Bible reading wea savvy helpem yumi everywan?
9 For helpem yumi for use-im and meanim Bible, organization bilong Jehovah givim olketa nambawan samting from Scripture insaed long Watchtower and otherfela buk. And tu, yumi garem schedule for readim Bible everytaem for Theocratic Ministry Skul insaed long olketa kongregeson bilong olketa Jehovah’s Witness. Samfela Jehovah’s Witness duim moa Bible reading for join withim diswan. Barava gudfela samting savvy kam aot from way for spendem taem for lukluk long olketa Holy Scripture. (Ps. 1:1-3; 19:7, 8) Waswe, yu readim finis full Bible? Sapos no moa, barava trae hard for duim olsem. Nomata yu no meanim every samting, way wea yu luksavvy long whole story bae barava helpem yu. Sapos yu readim samting olsem forfela or faevfela page every day, yu bae finisim full Bible insaed wanfela year.
10. (a) Wanem taem nao yu duim Bible reading bilong yu? (b) Why nao way for duim everytaem hem barava important?
10 Wanem taem nao yu savvy arrangim for duim disfela Bible reading? Sapos yu fit for markem 10 or 15 minute every day, hem bae gud tumas! Sapos no moa, mekem schedule for duim diswan every week, and followim datfela schedule. Bible reading olsem mas kamap part long living, olsem way for kaikai. Yu savvy finis, sapos wanfela man no kaikai gud, hem bae suffer long saed bilong health. Hem semsem tu, withim spiritual living bilong yumi. Laef bilong yumi depend long kaikai wea yumi kasem everytaem from “every toktok wea kam from mouth bilong Jehovah.”—Matt. 4:4.
11. Wanem goal nao yumi mas garem for readim Bible?
11 Wanem goal nao yumi mas garem for readim Bible? Hem bae rong sapos goal bilong yumi hem for trae hard nomoa for readim staka page or maet for kasem laef olawe nomoa. For kasem gudfela samting olawe, moa samting nao mas muvim yumi—love for God, way for want for savvy gud long hem, for meanim will bilong hem and for worshipim hem long way wea hem acceptim. (John 5:39-42) Yumi mas garem tingting olsem man for raetem Bible wea say: “Mekem mi savvy long olketa way bilong yu, O Jehovah; teachim mi long olketa way bilong yu.”—Ps. 25:4.
12. (a) Why nao yumi mas kasem “stretfela savvy”? For kasem diswan, wanem nao yumi mas duim taem yumi read? (b) Olsem page 27 showim, wanem nao olketa gudfela point for use-im taem yumi tingting raonem samting wea yumi readim insaed Bible? (c) Showim aot hao for followim faevfela point hia taem yu answerim olketa question wea stap long end bilong disfela paragraf. Use-im Bible bilong yu.
12 Taem yumi kasem datfela teaching, yumi mas want for kasem “stretfela savvy.” Sapos yumi no garem, hao nao yumi savvy followim Word bilong God long proper way insaed living bilong yumi or meanim long stretfela way long other pipol? (Col. 3:10; 2 Tim. 2:15) Way for kasem stretfela savvy meanim yumi mas read gud, and sapos samting wea yumi readim hem deep tumas, yumi maet need for readim moa for meanim. Yumi bae kasem gudfela samting tu sapos yumi use-im taem for tingting raonem samting wea yumi readim, and ting abaotem from olketa different saed. Faevfela gudfela way for tingting raonem samting stap long page 27 bilong disfela buk. Yu savvy meanim gud planti Scripture sapos yu use-im wanfela or moa long olketa way hia. Taem yu answerim olketa question long daon, yu bae lukim hao diswan hem tru.
(1) Planti taem sekson bilong Scripture wea yu readim hem showim aot fashion bilong Jehovah.
Taem yumi ting hae and tingting raonem samting wea Bible talem long yumi abaotem creation bilong Jehovah, hao nao diswan affectim tingting bilong yumi abaotem hem? (Ps. 139:13, 14; from Job chapter 38-42 lukim Job 38:1, 2 and Job 40:2, 8, then Job 42:1-6.)
For fitim toktok bilong Jesus long John 14:9, 10, wanem nao yumi savvy talem abaot Jehovah from olketa samting wea happen olsem datwan wea stap long Luke 5:12, 13?
(2) Tingim hao datfela story join withim theme bilong Bible, hem nao, for vindicate-im nem bilong Jehovah thru long Kingdom under long Jesus Kraest datfela Promis Seed.
Hao nao olketa trabel long Egypt they join withim disfela theme? (Lukim Exodus 5:2; 9:16; 12:12.)
Waswe long nambawan story abaot Ruth datfela Moabite woman? (Ruth 4:13-17; Matt. 1:1, 5)
Hao nao samting wea Gabriel talem long Mary abaot taem wea Jesus bae born hem fitim diswan? (Luke 1:26-33)
Why nao way wea olketa disaepol bilong Jesus kasem anointing withim holy spirit long Pentecost hem important? (Acts 2:1-4; 1 Pet. 2:4, 5, 9; 2 Pet. 1:10, 11)
(3) Olketa verse wea stap raonem wanfela verse they affectim meaning bilong hem.
Hu nao olketa wea Romans 5:1 and Ro 8:16 story abaot? (Lukim Romans 1:7.)
Waswe, olketa verse wea stap raonem 1 Corinthians 2:9 they show aot datfela verse hem story abaot laef wea bae kamap long Niu World bilong God? Olsem 1 Co 2 verse 6-8 showim aot, eye and ear bilong hu nao no meanim olketa samting wea Paul raet abaot?
(4) Askim yuseleva hao yu savvy followim samting wea yu readim.
Waswe, story abaot way wea Cain killim dae Abel hem samting bilong history nomoa or hem for givim kaonsel long yumi? (Gen. 4:3-12; 1 John 3:10-15; Heb. 11:4)
Taem yumi read (long Exodus go kasem Deuteronomy) abaot olketa experience bilong Israel long wilderness, wanem nao yumi seleva learnim from diswan? (1 Cor. 10:6-11)
Waswe, kaonsel wea fitim olketa anointed Kristian hem fitim olketa wea garem hope bilong laef olawe long earth? (Lukim Numbers 15:16; John 10:16.)
Nomata yumi stap gud long Kristian kongregeson, waswe, yumi need for lukaotem olketa beta way for followim olketa Bible kaonsel wea yumi savvy finis long them? (2 Cor. 13:5; 1 Thess. 4:1)
(5) Ting abaotem hao yu savvy use-im samting wea yu readim for helpem other pipol.
Hu nao yu savvy helpem withim story bilong resurrection bilong dota bilong Jairus? (Luke 8:41, 42, 49-56)
13. Wanem samting nao yumi bae kasem sapos yumi go ahed for duim Bible reading and study withim organization bilong Jehovah?
13 Taem yumi duim Bible reading long way olsem, yumi savvy kasem richfela reward! Tru nao, way for readim Bible hem wanfela challenge—wanfela samting wea yumi savvy work long hem for full laef bilong yumi. But taem yumi duim, yumi savvy kamap moa strong long spiritual way. Hem bae mekem yumi kamap moa klos long loving Father bilong yumi, Jehovah, and long olketa Kristian brata bilong yumi tu. Hem bae helpem yumi for followim kaonsel for “barava hold strong long word bilong laef.”—Phil. 2:16.
Samting for Review
● Why nao they raetem and keepim Bible kam kasem taem bilong yumi?
● Hao nao yumi savvy helpem other pipol for ting hae long hem?
● Why nao way for duim Bible reading seleva everytaem savvy givim gudfela samting? Wanem nao faevfela gudfela point for use-im taem yumi tingting raonem samting wea yumi readim?
[Box/Piksa long page 27]
Taem Yu Readim Bible Tingim—
Wanem each sekson talem yu abaot Jehovah olsem wanfela person
Hao hem join withim theme bilong Bible
Hao olketa verse wea stap raonem affectim meaning bilong hem
Hao hem mas affectim laef bilong yuseleva
Hao yu savvy use-im for helpem other pipol