Chapter Thri

Barava Hol Strong Long Word Bilong God

1. (a) Hao nao Israel bifor experiencem wei wea toktok bilong God hem tru? (b) Why nao iumi interest long datwan?

“IUFALA barava savve witim full heart bilong iufala and witim full soul bilong iufala hao no eni toktok long evri gudfala toktok wea Jehovah God bilong iufala hem talem long iufala hem fail. Evriwan kamap tru for iufala.” (Joshua 23:14-16) Diswan nao samting wea Joshua talem long olketa bigman bilong Israel bihaen olketa setol daon long Promis Land. Tru nao, olketa fit for trustim evri promis bilong Jehovah. Datfala story—and full Bible—hem stap kam kasem distaem mekem “iumi savve garem hope.”—Romans 15:4.

2. (a) Long wanem wei nao Bible “kam from God”? (b) From iumi savve Bible hem kam from God, wanem responsibility nao iumi garem?

² Nomata samting olsem 40-fala man raetem olketa word insaed Bible, Jehovah nao Man wea Givim Kam. Waswe, diswan minim hem directim evri samting saed long wei for raetem Bible? Yes. Hem duim diswan thru long strongfala holy spirit, or active force bilong hem. Aposol Paul tok tru taem hem sei: “Evri Scripture hem kam from God . . . mekem man bilong God hem fit evribit, barava redy for duim evri gudfala waka.” Long evri ples, pipol wea bilivim datwan followim samting wea Bible talem and mekem living bilong olketa for followim wanem hem talem.—2 Timothy 3:16, 17; 1 Thessalonians 2:13.

Helpem Nara Pipol for Tinghae Long Hem

3. Wanem nao best wei for helpem planti wea no biliv Bible hem Word bilong God?

³ Samfala pipol wea iumi story long olketa no biliv olsem iumi hao Bible hem Word bilong God. Hao nao iumi savve helpem olketa? Planti taem, best wei hem for openem Bible for showim wanem nao stap insaed. “Word bilong God hem laef and garem paoa and hem sharp winim eni tu-saed sword . . . and hem fit for luksavve long tingting and samting wea heart want for duim.” (Hebrews 4:12) “Word bilong God” hem no history nating nomoa; hem samting wea laef ! Olketa promis bilong Bible no savve miss for fulfill. Wei wea message bilong Bible affectim heart bilong man hem moa strong winim eni samting wea iumi maet talem.

4. Wanem nao olketa Bible truth wea changem tingting bilong pipol abaotem Bible, and why nao olsem?

⁴ Taem olketa lukim nem bilong God insaed, diswan mekem planti for luk deep go insaed long Bible. Olketa narawan disaed for studyim Bible taem olketa lukim samting wea hem talem abaotem purpose bilong laef, why God letem wicked fasin go ahed, mining bilong evri samting wea happen distaem, or hope for laef olowe insaed paradaes earth. Long olketa kantri wea religion duim samting wea openem wei for olketa wicked spirit spoelem pipol, samting wea Bible talem abaotem wanem nao kosim diswan and hao for kasem help hem mekem pipol for interest. Why nao honest pipol interest long olketa point hia? Bikos Bible nao only ples wea iumi savve faendem tru information long evri important point hia.—Psalm 119:130.

5. (a) Wanem samfala reason why pipol no bilivim Bible? (b) Hao nao iumi savve helpem kaen pipol olsem?

⁵ Bat, waswe sapos pipol talem iumi olketa no biliv long Bible? Waswe, datwan bae stopem story nao? Sapos olketa willing for story witim open tingting, and wei for ting raonem olketa tru samting long diswan, iumi bae story witim olketa. Maet olketa ting long Bible olsem buk bilong Christendom. Wei wea history bilong Christendom fulap witim hypocrite fasin and wei for join insaed politik, and tu wei for ask for selen, maet mekem olketa no interest long Bible. Hem gud for askem olketa sapos hem nao why olketa ting olsem. Wei wea Bible tok againstim wei bilong Christendom for mix witim world, and tu wei wea Christendom and trufala Christian Wei hem difren, maet mekem olketa interest.—Micah 3:11, 12; Matthew 15:7-9; James 4:4.

6. (a) Wanem nao pruvim long iuseleva hao Bible hem Word bilong God? (b) Wanem samfala nara point wea iumi savve iusim for helpem pipol luksavve Bible hem really from God?

⁶ For nara pipol, wei for story stret abaotem olketa point wea pruvim Bible kam from God maet helpem olketa. Wanem nao barava pruvim long iu hao Bible kam from Jehovah God? Waswe, hem from Bible seleva talem wea nao hem start kam from? Or waswe, hem from Bible garem planti profesi wea point go long future, olketa profesi wea kam from samwan wea winim man? (2 Peter 1:20, 21) Waswe, maet hem from wei wea Bible wan mind, nomata 40-fala man raetem insaed 1,600 year? Or waswe, hem from Bible stret saed long science, wea no olsem olketa raeting bilong taem wea olketa raetem Bible? Or waswe, hem wei wea olketa man wea raetem no haedem eni samting? Or wei wea hem stap kam kasem distaem nomata pipol barava trae for distroem? Samting wea iuseleva faendem wea muvim iu savve helpem tu nara pipol.a

Bible Reading Bilong Iumi

7, 8. (a) Wanem nao iumi shud duim witim Bible? (b) For join witim wei for readim Bible seleva, wanem moa iumi needim? (c) Kam kasem distaem, hao nao iuseleva kasem savve long olketa purpose bilong Jehovah?

⁷ For join witim wei for helpem nara pipol bilivim Bible, iumiseleva need for markem taem for readim evritaem. Waswe, iu duim datwan? Diswan nao hem buk wea important winim eni narawan. Bat, diswan no minim sapos iumiseleva readim Bible, iumi no needim eni samting moa. Bible givim warning againstim wei for stap seleva. Iumi shud no tingse iumi savve faendem ansa long evri samting long wei for study seleva. For kamap Christian wea balance, iumi needim wei for study seleva and evritaem attendim olketa meeting bilong pipol bilong God.—Proverbs 18:1; Hebrews 10:24, 25.

⁸ Saed long diswan, Bible story abaotem wanfala bigman bilong Ethiopia taem hem readim wanfala profesi bilong Isaiah. Wanfala angel leadim Philip, datfala Christian man for talemaot gud nius, for askem man hia olsem: “Waswe, iu minim samting wea iu readim?” Long hambol wei datfala man bilong Ethiopia sei: “Hao nao bae mi savve sapos no eniwan showim mi?” Hem askem Philip for explainim datfala Scripture long hem. Philip hem no kaen man wea just readim Bible and then givim tingting bilong hemseleva abaotem olketa Scripture. Hem stap klos long organization bilong God long earth. So dastawe hem savve helpem datfala man bilong Ethiopia for kasem gudfala samting from instruction wea Jehovah givim thru long datfala organization. (Acts 6:5, 6; 8:5, 26-35) Long sem wei distaem, no eniwan kasem stretfala savve abaotem olketa purpose bilong Jehovah sapos hem stap seleva. Iumi evriwan needim help wea Jehovah provaedem long loving wei thru long organization bilong hem long earth.

9. Wanem program for readim Bible nao savve helpem iumi evriwan?

⁹ For helpem iumi minim Bible, organization bilong Jehovah givim olketa nambawan Bible information insaed olketa difren pablikeson. And tu, schedule for readim Bible evritaem hem stap insaed Theocratic Ministry Skul wea kamap long olketa kongregeson bilong Olketa Jehovah’s Witness evriwea long world. Barava gudfala samting savve kamaot from wei for lukluk insaed long olketa Holy Scripture. (Psalm 1:1-3; 19:7, 8) Traem best for readim Bible evritaem. Nomata iu no minim gud evri samting, wei wea iu minim main idea bilong Bible bae gud tumas. Example, sapos iu readim foa or faevfala page each day, iu savve finisim full Bible insaed wanfala year.

10. (a) Wanem taem nao iu duim Bible reading bilong iu? (b) Hu nao shud join insaed taem iu readim Bible, and why nao hem important for duim evritaem?

¹⁰ Wanem taem nao iu savve duim Bible reading bilong iu? Sapos iu markem maet 10 or 15 minute evriday for datwan, bae iu kasem barava gud samting. Sapos nomoa, markem olketa taem for duim diswan evri week, and then followim evribit. Sapos iu marit, iu and partner bilong iu savve enjoyim wei for read big from Bible long each other. Sapos iu garem olketa big pikinini wea savve read, olketa savve share for read big. Wei for readim Bible hem shud olsem part long living, olsem wei for kaikai. Olsem iu savve, sapos man no savve kaikai gud, bae hem no healthy. Spiritual laef bilong iumi, wea minim tu laef olowe for iumi, barava depend long wei wea iumi evritaem kaikaim “evri toktok wea kamaot from mouth bilong Jehovah.”—Matthew 4:4.

Goal Bilong Iumi

11. Wanem nao shud goal bilong iumi taem iumi readim Bible?

¹¹ Wanem nao shud goal bilong iumi taem iumi readim Bible? Goal bilong iumi hem no for readim staka page. Samting wea shud muvim iumi hem feeling for savve moa abaotem God mekem love bilong iumi for hem grow and iumi savve worshipim hem long wei wea hem acceptim. (John 5:39-42) Tingting bilong iumi shud olsem man wea raet long Bible wea sei: “Mekem mi savve long olketa wei bilong iu, O Jehovah; teachim mi olketa road bilong iu.”—Psalm 25:4.

12. (a) Why nao man need for kasem “stretfala savve,” and for kasem datfala savve wanem nao maet man need for duim taem hem read? (b) Wanem nao fofala point wea iumi savve iusim for ting raonem samting wea iumi readim long Bible? (Lukim box long page 30.) (c) Showim hao for followim olketa point hia taem iu ansarem olketa kwestin long disfala paragraf. Chekim olketa scripture long Bible bilong iu.

¹² Taem iumi kasem olketa teaching from Jehovah, iumi shud trae for kasem “stretfala savve.” Sapos iumi no garem datwan, hao nao iumi savve followim Word bilong God long stretfala wei insaed living bilong iumi or explainim gud long nara pipol? (Colossians 3:10; 2 Timothy 2:15) Wei for kasem stretfala savve minim iumi mas read gud, and sapos wanfala part hem hard, maet iumi need for readim moa and moa for kasem mining bilong hem. Iumi bae kasem gud samting tu sapos iumi tek taem for ting raonem datfala information, ting abaotem long olketa difren wei. Fofala gudfala wei for ting raonem samting hem stap long page 30. Iu savve minim gud planti difren part bilong Bible sapos iu iusim wanfala or moa long olketa difren idea hia. Taem iu ansarem olketa kwestin hia, bae iu lukim hao diswan hem tru.

(1)Planti taem, part long Scripture wea iu readim savve talem iu samting abaotem wanem kaen person nao Jehovah. Olsem example, long Psalm 139:13, 14, iumi lane abaotem bigfala interest wea God garem for baby wea no born yet: “Iu nao haedem mi insaed bele bilong mami bilong mi. Mi bae praisem iu from iu wakem mi long nambawan wei. Olketa waka bilong iu barava nambawan, and soul bilong mi luksavve tu.” Olketa waka bilong Jehovah barava nambawan! Wei wea Jehovah wakem man hem pruvim bigfala love wea hem garem for iumi.

Olsem samting wea John 14:9, 10 talem, taem iumi readim wei wea Jesus deal witim nara pipol, hem really showimaot wei wea Jehovah savve duim samting. Wanem nao iumi savve sei abaotem Jehovah from olketa samting wea happen long Luke 5:12, 13 and Luke 7:11-15?

(2)Tingim hao story wea iu readim join witim theme bilong Bible: wei for vindicatem sovereign rul bilong Jehovah and mek holy long nem bilong hem thru long Kingdom anda long Jesus Christ, datfala promis Seed.

Hao nao Ezekiel and Daniel mekhae long theme bilong Bible? (Ezekiel 38:21-23; Daniel 2:44; 4:17; 7:9-14)

Hao nao Bible barava showimaot klia Jesus nao datfala promis Seed? (Galatians 3:16)

Hao nao Revelation storyim nambawan end bilong Kingdom theme? (Revelation 11:15; 12:7-10; 17:16-18; 19:11-16; 20:1-3; 21:1-5)

(3)Askem iuseleva hao iu savve followim samting wea iu readim. Example, iumi readim long Exodus go kasem Deuteronomy abaotem dirty fasin and bighed fasin bilong Israel. Iumi lane hao olketa tingting and fasin hia mekem olketa kasem nogud samting. So, diswan shud muvim iumi for mekem Jehovah hapi taem iumi no followim nogud example bilong Israel. “Olketa samting hia go ahed for kasem olketa olsem example, and olketa raetem olsem warning for iumi wea stap long end bilong system.”—1 Corinthians 10:11.

Record abaotem wei wea Cain killim dae Abel hem garem wanem leson for iumi? (Genesis 4:3-12; Hebrews 11:4; 1 John 3:10-15; 4:20, 21)

Waswe, kaonsel bilong Bible for olketa Christian wea garem hope for go long heven hem fitim tu olketa wea garem hope for laef olowe long earth? (Numbers 15:16; John 10:16)

Nomata iumi garem gud nem insaed long Christian kongregeson, why nao iumi need for tingim hao for followim long bigfala wei moa kaonsel bilong Bible wea iumi savve finis? (2 Corinthians 13:5; 1 Thessalonians 4:1)

(4)Tingim hao iu savve iusim samting wea iu readim for helpem narafala pipol. Evriwan wari abaotem olketa problem saed long health, so iumi savve read witim olketa abaotem samting wea Jesus duim for showimaot wanem hem bae duim long bigfala wei taem hem rul insaed Kingdom: “Planti pipol kam long hem, and tekem kam pipol wea leg nogud, hand nogud, blind, no savve toktok, and planti moa, . . . and hem healim olketa.”—Matthew 15:30.

Hu nao savve kasem help from story abaotem resurrection bilong dota bilong Jairus? (Luke 8:41, 42, 49-56)

13. Wanem samting nao iumi savve expectim sapos iumi go ahed for followim wanfala program for readim Bible and study witim organization bilong Jehovah?

¹³ Bible reading savve givim richfala reward taem iumi tingting long fofala point antap! For tok stret, wei for readim Bible hem wanfala challenge. Bat hem savve helpem iumi for full laef, from taem iumi readim Bible, bae iumi grow moa strong long spiritual wei. Wei for readim Bible bae mekem iumi kam moa klos long loving Father bilong iumi, Jehovah, and long olketa Christian brata bilong iumi. Hem bae helpem iumi for followim kaonsel for go ahed for “barava hol strong long word bilong laef.”—Philippians 2:16.

[Footnote]

Review

• Why nao olketa raetem Bible and hem stap sef kam kasem taem bilong iumi?

• Hao nao iumi savve helpem narafala pipol for tinghae long Bible?

• Why nao hem gud for evritaem duim Bible reading seleva? Wanem nao fofala gudfala point wea iumi savve iusim for ting raonem samting wea iumi readim?

[Box/Piksa long page 30]

TAEM IU READIM WANFALA PART BILONG BIBLE, TINGIM

Wanem hem talem iu abaotem Jehovah olsem wanfala person

Hao hem join witim full theme bilong Bible

Hao hem shud affectim laef bilong iuseleva

Hao iu savve ius- im for helpem nara pipol