Hapi and Praisim God Long Olketa Assembly
Bihaen long 1880 Olketa Bible Student luksavvy hao, for join withim olketa meeting bilong olketa, hem gud for olketa savvy gud long olketa Kristian brata bilong olketa from otherfala ples. So olketa start for arrangim convention bilong olketa Bible Student evri year long evri ples long United States, and bihaen long Canada tu. Olketa taem hia strongim olketa long spiritual way; for samfala day olketa kasem planti instruction from Bible, and evriwan enjoyim way for encouragim each other. Baptism bilong olketa niu wan wea believe hem start for kamap evritaem long olketa convention. Olketa iusim convention for givim bigfala witness long pablik tu.—Romans 1:11, 12.
Distaem Olketa Witness Bilong Jehovah garem samfala assembly evri year. Samting olsem 18 go kasem 25 kongregeson nao insaed long wanfala grup wea olketa kolem circuit, wea olketa traveling ovaseer nao visitim, or servim. Tufala taem insaed long year, olketa arrangim samfala assembly wea olketa kongregeson bilong wanfala circuit, or part bilong datfala circuit, hipap tugeta long Saturday and/or Sunday.
Wanfala taem insaed long year, bigfala three- or foa-day convention, hem nao distrik convention, kamap long each kantri, wea planti thousand maet hipap tugeta long wanfala ples. Olketa convention hia buildim ap long spiritual way Olketa Witness Bilong Jehovah and otherfala pipol wea interest long work bilong olketa, and olketa givim witness long pablik tu.
Governing Body bilong Olketa Witness Bilong Jehovah nao readyim program for olketa assembly and convention hia and hem fitim need bilong olketa Witness evriwea long world. Hem garem olketa tok, part wea samfala story tugeta, and olketa demonstration wea showim aot samting wea really happen long laef, wea olketa traveling ovaseer and samfala Witness from olketa kongregeson wea fit nao tek part. Samfala different wan talem experience tu long hao olketa face-im challenge for stap olsem Kristian insaed world wea no followim God, or samting wea olketa kasem long ministry. Long distrik convention wanfala extra part tu stap—wea samfala actim Bible drama or drama abaot living distaem, wea showim aot way wea olketa Kristian deal withim problem wea olketa kasem distaem.
Evriwan garem chance for kampani tugeta taem spel kamap long program. Olketa Witness Bilong Jehovah wea volunteer nao duim evri work wea insaed long diswan. Olketa contribution wea pipol willing for givim nao peim kost bilong olketa building and otherfala kost. Hem free nomoa for kam hipap, and olketa no collectim eni selen.
Iu savvy ask long kongregeson bilong Olketa Witness Bilong Jehovah long ples bilong iu for taem and ples wea olketa garem olketa meeting hia long area bilong iu. Olketa bae talem iu tu abaotem eni arrangement long saed bilong traveling, and hao for kasem accommodation tu.
Olketa assembly and convention hia helpem Olketa Witness Bilong Jehovah and evriwan wea kampani withim olketa for no just tingim kongregeson bilong olketa seleva but for tingim tu evri brata bilong olketa long world.—1 Peter 2:17.
• Wanem gud samting nao olketa firstfala Bible Student kasem from convention bilong olketa?
• Storyim arrangement and program for circuit assembly and distrik convention.
[Piksa long page 18]
Bible drama long distrik convention, United States
International convention, Poland
International convention, Argentina
Circuit assembly, Japan
Samfala long assembly kasem Bible buk, Switzerland
Baptism long international convention, South Africa
Release-im niufala Bible buk, Canada
Olketa long convention join for singsing, Spain