Olketa International Convention Long 2003
LONG Saturday, October 6, 2001, annual meeting bilong olketa member bilong Watch Tower Bible and Tract Society of Pennsylvania kamap long Jersey City, New Jersey, U.S.A. Bihaen datfala meeting, olketa member and guest bilong olketa enjoyim wanfala spesol program. Long next day, long olketa narafala meeting wea kamap long fofala taon long Canada and United States, olketa member bilong Governing Body bilong Olketa Jehovah’s Witness talem disfala announcement bihaen last tok wea olketa givim:
“Taem iumi luk go long future, hem barava important for evri pipol bilong God for no lusim wei for hipap tugeta. Aposol Paul encouragem iumi for duim diswan, witim wei for encouragem each other long bigfala wei moa taem iumi lukim bigfala day bilong Jehovah wea mekem man fraet kam klosap. (Hebrews 10:24, 25) For fitim disfala komand long Bible, iumi hope for garem olketa distrik convention long evri part bilong world next year [2002]. Then long year 2003, sapos hem will bilong Jehovah, maet iumi savve garem olketa spesol international convention long samfala difren kantri. Distaem nao hem taem for stap wekap and go ahed for lukaot, luksavve hao olketa samting wea happen long world go ahed.”
Nomata olketa hevi and feeling for no savve wanem bae happen hem kamap moa big from disfala system gogo for end, waka bilong pipol bilong God mas go ahed. Iumi mas talemaot gud nius bilong Kingdom, and tu, disfala warning message bilong Bible, long evri nation, tribe, tongue, and pipol, wea talem olketa for ‘fraet long God and givim hem glory, from hour bilong judgment bilong hem kam finis.’ (Revelation 14:6, 7) So, sapos hem will bilong Father bilong iumi long heven, mifala plan for garem olketa international convention long olketa difren ples long world long year 2003.
First samting, mifala plan for olketa bigfala hipap hia kamap long tu-thri taon long North America and then no longtaem bihaen long Europe. Then bihaen, olketa arrangement bae kamap for olketa grup savve travel long tu-thri taon long Asia; and then klosap long end bilong year, olketa nara grup bae go long Africa, South America, and area bilong Pacific. Mifala bae askem samfala branch for sendem smol namba bilong olketa brata long olketa convention wea mifala nao bae markem for olketa, so mifala no savve invaetem eniwan wea laekem for go attend. Nomata olsem hem bae encouragem olketa brata for garem smol namba bilong olketa brata from olketa difren kantri kam long each convention.
Klosap nao olketa kongregeson bilong Olketa Jehovah’s Witness bae kasem information abaotem olketa convention hia. Olketa branch office bilong olketa wea kasem invitation, bae givim information abaotem wanem taem and wanem ples nao for convention wea olketa markem for olketa. So, mifala askem iufala for plis no askem moa information abaotem diswan yet.
Olketa wea bae kasem invitation for attend hem olketa Witness wea dedicate and baptaes wea bae showimaot gud example and bae showimaot love long olketa brata long there. Olketa tu bae garem gudfala chance for showimaot fasin for welkam and love long olketa wea kam. (Hebrews 13:1, 2) Samting wea bae kamaot from diswan hem “wei for givimaot encouragement.” (Romans 1:11, 12) Olketa branch wea kasem invitation for sendem olketa brata go long olketa kantri wea mifala markem bae givim moa information abaotem diswan.
Olketa thri-day distrik convention for year 2003 bae kamap long planti kantri olsem evri year. Long wei for hipap tugeta, evriwan bae garem chance for ‘lisin, lane, and kasem encouragement.’ (Deuteronomy 31:12; 1 Corinthians 14:31) Diswan bae givim chance long evri servant bilong God for “teistim and lukim hao Jehovah hem gud.” (Psalm 34:8) Long evri international convention, and tu, planti long olketa distrik convention, olketa missionary bae stap, and samfala bae garem part insaed program.
Long disfala year 2002, iumi enjoyim olketa “Pipol wea Strong for Talemaot Kingdom” Distrik Convention, wea bae muvim iumi for givim witness wea moa big. Taem iumi go ahed for duim diswan, for sure, wei wea iumi luk forward for samting wea Jehovah hem markem for year wea bae kam bihaen bae grow. Diswan bae helpem iumi for “go ahed for lukaot, stap wekap, and redy evritaem’ from iumi stap insaed disfala nogud and important taem.—Matthew 24:42-44.