Chapter 3
Hu Nao Trufala God?
1. Why nao planti pipol agree withim olketa firstfela toktok bilong Bible?
TAEM yu luk ap long skae long wanfela kliafela naet, waswe, yu sapraes for lukim staka star tumas? Hao nao yu ting they kamap? And waswe long olketa samting wea laef long earth—olketa flaoa wea garem planti color, olketa bird wea singim nicefela song, strongfela whale wea jump long sea? Planti samting olsem stap. Every samting olsem kanduit for kamap seleva nomoa. Dastawe planti pipol agree withim olketa firstfela toktok bilong Bible: “Long firstaem, God hem create-im heven and earth”!—Genesis 1:1.
2. Wanem nao Bible talem abaotem God, and wanem nao hem encouragim yumi for duim?
2 Olketa man garem planti different kaen tingting abaotem God. Samfela say God hem wanfela paoa wea no garem feeling. Planti million pipol worshipim olketa laen dadi bilong them wea dae finis, from they believe God hem farawe tumas for yumi worshipim hem. But Bible hem showim aot hao trufela God hem wanfela really person wea barava interest long yumi each wan. Dastawe hem encouragim yumi for “lukaotem God,” taem hem say: “Hem no farawe from each wan long yumi.”—Acts 17:27.
3. Why nao hem hard for talemaot lukluk bilong God?
3 God hem luk hao? Fewfela servant bilong hem they lukim olketa vision bilong glory bilong hem. Long olketa vision hia hem showim hemseleva olsem man wea sidaon long wanfela throne, and braetfela laet hem shine kam from hem. But, olketa wea lukim olketa vision hia they nating story abaotem face bilong hem. (Daniel 7:9, 10; Revelation 4:2, 3) Diswan hem bikos “God hem wanfela Spirit”; hem no garem physical body. (John 4:24) Yumi kanduit for talemaot lukluk bilong body bilong Creator bilong yumi, from “man no lukim God anytaem.” (John 1:18; Exodus 33:20) Nomata olsem, Bible hem teachim yumi planti samting abaotem God.
TRUFELA GOD GAREM WANFELA NEM
4. Wanem nao samfela title wea Bible kolem long God wea barava fitim?
4 Bible hem show aot trufela God taem hem use-im olketa toktok olsem “Olmaeti God,” “Most Hae,” “Nambawan Creator,” “Nambawan Teacher,” “Sovereign Lord,” and “King bilong olawe.” (Genesis 17:1; Psalm 50:14; Ecclesiastes 12:1; Isaiah 30:20; Acts 4:24; 1 Timothy 1:17) Way for tingting raonem olketa title hia bae helpem disfela savvy wea yumi garem abaotem God for grow.
5. Wanem nao nem bilong God, and haomas taem nao hem kamap insaed long olketa Hebrew Scripture?
5 But, God garem wanfela spesel nem wea stap klosap 7,000 taem insaed long olketa Hebrew Scripture nomoa—diswan kamap planti taem winim any other title bilong hem. Samting olsem 1,900 year bifor, olketa Jew stop for use-im nem bilong God from they followim wanfela kastom. Hebrew langwis wea they use-im for raetem Bible hem no garem olketa vowel. So, no any way hem stap for savvy hao nao Moses, David, or pipol bifor they talem nem bilong God wea they raetem olsem fofela consonant (יהוה). Samfela savvyman say maet they talem nem bilong God olsem “Yahweh,” but they no really sure long diswan. Way for talem long English “Jehovah” they use-im for planti hundred year finis, and disfela way for talem long planti other langwis planti pipol distaem they acceptim.—Lukim Exodus 6:3 and Isaiah 26:4 long King James Version.
WHY YU MAS USE-IM NEM BILONG GOD
6. Psalm 83:18 talem wanem samting abaotem Jehovah, and why nao yumi need for use-im nem bilong hem?
6 Spesel nem bilong God, Jehovah, hem mekem hem different from every otherfela god. Dastawe disfela nem kamap planti taem insaed long Bible, and diswan hem barava show aot long Hebrew langwis. Planti man wea transletim Bible they no use-im nem bilong God, but Psalm 83:18 hem tok klia olsem: “Yu, wea garem nem Jehovah, yu nomoa Most Hae ovarem whole earth.” So hem fitim for yumi use-im nem bilong God taem yumi story abaotem hem.
7. Wanem nao meaning bilong disfela nem Jehovah hem teachim yumi abaotem God?
7 Disfela nem Jehovah hem from wanfela Hebrew word wea meanim “savvy kamap.” So, nem bilong God meanim “Hem Mekem Kamap.” Jehovah God showim hemseleva olsem Nambawan Man bilong Purpose. Hem mekem olketa purpose bilong hem fulfill everytaem. Hem fitim trufela God nomoa for garem disfela nem, from olketa man no savvy sure sapos olketa plan bilong them bae happen or no moa. (James 4:13, 14) Jehovah nomoa savvy say: “Olsem tu long toktok wea kamaot from mouth bilong mi. . . . Hem bae win long samting wea mi sendem for duim.”—Isaiah 55:11.
8. Wanem purpose nao Jehovah talem thru long Moses?
8 Olketa Hebrew man olsem Abraham, Isaac, and Jacob they “kol long nem bilong Jehovah,” but they no savvy long full meaning bilong nem bilong God. (Genesis 21:33; 26:25; 32:9; Exodus 6:3) Bihaen, taem Jehovah talemaot purpose bilong hem for sevem olketa pikinini bilong them, olketa Israelite, from way for slave long Egypt and for givim them “wanfela land wea fulap withim milk and honey,” diswan maet luk olsem hem hard tumas for duim. (Exodus 3:17) Nomata olsem, God strongim meaning bilong nem bilong hem taem hem tok olsem long profet Moses: “Diswan nao samting wea yu mas talem long olketa son bilong Israel, ‘Jehovah God bilong olketa laen dadi bilong yufela, God bilong Abraham, God bilong Isaac and God bilong Jacob, hem sendem mi kam long yufela.’ Diswan nao hem nem bilong mi for olawe, and diswan hem for they rememberim mi for olketa genereson.”—Exodus 3:15.
9. Hao nao Pharaoh ting long Jehovah?
9 Moses hem askim Pharaoh, king bilong Egypt, for letem olketa Israelite for go worshipim Jehovah long wilderness. But Pharaoh, wea pipol ting long hem olsem wanfela god and hemseleva tu worshipim otherfela god long Egypt, hem say: “Hu nao Jehovah, for mekem mi mas obeyim voice bilong hem for sendem Israel go? Mi nating savvy long Jehovah, and tu, bae mi no sendem Israel go.”—Exodus 5:1, 2.
10. Long Egypt bifor, wanem nao Jehovah duim for fulfillim purpose bilong hem long saed bilong olketa Israelite?
10 Then Jehovah duim samting for fulfillim purpose bilong hem, for fitim meaning bilong nem bilong hem. Hem mekem tenfela trabel kasem olketa long Egypt. Lastfela trabel killim dae every firstborn bilong Egypt, and tu son bilong Pharaoh wea proud. Then olketa bilong Egypt letem Israel for go. But, samfela bilong Egypt they barava ting hae long paoa bilong Jehovah and they go withim olketa Israelite taem they lusim Egypt.—Exodus 12:35-38.
11. Wanem mirakol nao Jehovah duim long Red Sea, and wanem nao olketa enemy bilong hem mas luksavvy long hem?
11 Pharaoh wea garem bighed fashion and army bilong hem, withim planti hundred war chariot, they ran aftarem olketa slave bilong them for kasholem them. Taem olketa bilong Egypt kam klosap, God mekem mirakol for divaedem Red Sea mekem olketa Israelite savvy katkros long drae graon. Taem olketa wea aftarem them they go insaed long sea, Jehovah “tek-aotem olketa wheel bilong olketa chariot bilong them mekem hem hard nao for draevem them.” Olketa soldia bilong Egypt they say: “Letem yumi ranawe from olketa bilong Israel, bikos Jehovah barava faet for olketa againstim olketa bilong Egypt.” But hem tu late nao. Bigfela wall bilong wata hem kam daon and “coverim olketa war chariot and olketa man wea raedem horse bilong army bilong Pharaoh.” (Exodus 14:22-25, 28) So Jehovah mekem bigfela nem for hemseleva, and pipol no forgetim datfela samting kam kasem distaem.—Joshua 2:9-11.
12, 13. (a) Nem bilong God garem wanem kaen meaning for yumi distaem? (b) Wanem nao pipol barava need for learnim, and why?
12 Nem wea God mekem for hemseleva hem garem bigfela meaning for yumi distaem. Nem bilong hem, Jehovah, hem olsem wanfela promis, hao hem bae mekem every purpose bilong hem kamap tru. Insaed datwan tu hem for fulfillim firstfela purpose bilong hem for earth bilong yumi for kamap wanfela paradaes. (Genesis 1:28; 2:8) For duim datwan, God bae finisim everywan wea againstim rul bilong hem distaem, from hem tok olsem finis: “Olketa mas savvy mi nao Jehovah.” (Ezekiel 38:23) Then God bae fulfillim promis bilong hem for sevem olketa worshiper bilong hem for go insaed long wanfela niu world bilong raeteous fashion.—2 Peter 3:13.
13 Everywan wea wantim God for hapi long them mas learn for kol long nem bilong hem long faith. Bible hem promis olsem: “Everywan wea singaot long nem bilong Jehovah bae stap laef.” (Romans 10:13) Yes, nem bilong Jehovah garem barava big meaning. Way for kol long nem bilong Jehovah olsem God and Man Wea Sevem yu savvy leadim yu for hapi olawe.
OLKETA FASHION BILONG TRUFELA GOD
14. Wanem nao olketa main fashion bilong God wea Bible mek hae long hem?
14 Way for study abaotem taem wea Israel kamap free from Egypt hem mek hae long fofela main fashion bilong God wea balance long perfect way. Way wea hem deal withim Pharaoh showim aot barava bigfela paoa bilong hem. (Exodus 9:16) Gudfela way wea God deal withim olketa bigfela samting wea kamap long datfela taem hem showim aot wisdom bilong hem wea winim everywan. (Romans 11:33) Hem showim aot justice bilong hem taem hem panisim olketa bighed pipol wea againstim and daonem pipol bilong hem. (Deuteronomy 32:4) Wanfela barava bigfela fashion bilong God nao hem love. Jehovah showim aot bigfela love taem hem fulfillim promis wea hem givim long olketa pikinini bilong Abraham. (Deuteronomy 7:8) Hem showim aot love tu taem hem letem samfela bilong Egypt for lusim olketa giaman god and kasem gudfela samting taem they stand ap long saed bilong only trufela God.
15, 16.Wanem nao olketa way wea God showim aot love?
15 Taem yu readim Bible, yu bae lukim hao love nao hem main fashion bilong God, and hem showim diswan long planti way. For example, love nao muvim hem for kamap wanfela Creator and share-im hapi for stap laef firstaem withim olketa spirit person. Olketa hundred million angel hia they love-im God and praisim hem. (Job 38:4, 7; Daniel 7:10) God showim aot love tu taem hem create-im and readyim earth for olketa man for stap hapi insaed.—Genesis 1:1, 26-28; Psalm 115:16.
16 Hem hard for kaontem every gudfela samting wea yumi kasem from love bilong God. Wanfela nao, hem loving way wea God workim body bilong yumi for mekem yumi savvy enjoyim laef. (Psalm 139:14) Love bilong hem show aot long way wea hem provide-im “rain from heven and olketa taem bilong harvest, hem mekem heart [bilong yumi] fulap withim kaikai and hapi.” (Acts 14:17) God “mekem sun bilong hem shine long badfela pipol and long gudfela pipol, and hem mekem rain fall daon long raeteous pipol and pipol wea no raeteous.” (Matthew 5:45) Love muvim Creator bilong yumi for helpem yumi kasem disfela savvy bilong God and for hapi for servim hem olsem olketa worshiper bilong hem. Tru nao, “God hem love.” (1 John 4:8) But fashion bilong hem garem planti otherfela saed long hem.
“GOD WEA SHOW AOT MERCY AND KAENFELA FASHION”
17. Wanem nao yumi learnim abaotem God long Exodus 34:6, 7?
17 Bihaen olketa Israelite katkros long Red Sea, they still need for savvy gud moa abaotem God. Moses luksavvy long disfela need and hem pray olsem: “Please, sapos mi stap gud front long eye bilong yu, mekem mi savvy, please, long olketa way bilong yu, so mi bae savvy long yu, mekem mi stap gud front long eye bilong yu.” (Exodus 33:13) Moses kasem moa savvy abaotem God taem hem herem samting wea God seleva talem: “Jehovah, Jehovah, God wea show aot mercy and kaenfela fashion, no savvy kros kwiktaem and garem bigfela loving-kaeness and truth. Keepim loving-kaeness for olketa thousand, forgivim mistek and rong and sin, but hem bae no letem man wea duim rong for misstim panis.” (Exodus 34:6, 7) God balance-im love bilong hem withim justice, hem letem olketa wea mean for duim sin for kasem samting wea kamaot from rong bilong them.
18. Hao nao Jehovah show aot mercy?
18 Olsem Moses hem learnim, Jehovah hem man wea savvy showim aot mercy. Man wea showim aot mercy hem feel sorry long olketa wea suffer and trae for helpem them. Dastawe God hem showim aot fashion for feel sorry long olketa man taem hem bae finisim for olawe way for suffer, sik, and dae. (Revelation 21:3-5) Olketa wea worshipim God maet kasem trabel from every samting wea go ahed insaed long disfela badfela world, or they maet duim samting wea no wise and kasem trabel. But sapos they humble and tan long Jehovah for helpem them, hem bae comfortim and helpem them. Why nao olsem? Bikos long way bilong mercy hem care for olketa wea worshipim hem.—Psalm 86:15; 1 Peter 5:6, 7.
19. Why nao yumi savvy say God hem kaen tumas?
19 Planti pipol wea garem paoa they raf tumas taem they deal withim otherfela pipol. Long narafela saed, Jehovah hem kaen tumas long olketa humble servant bilong hem! Nomata hem nao garem paoa wea winim anywan long universe, hem showim aot bigfela kaenfela fashion long every man. (Psalm 8:3, 4; Luke 6:35) Jehovah hem kaen tu long olketa man wanwan, and hem givim samting wea they askim. (Exodus 22:26, 27; Luke 18:13, 14) Hem tru, God no need for showim aot kaenfela fashion and mercy long anywan. (Exodus 33:19) Dastawe, yumi need for showim aot fashion for barava ting hae long mercy and kaenfela fashion bilong God.—Psalm 145:1, 8.
NO KROS KWIKTAEM, NO SAED WITHIM ANYWAN, AND RAETEOUS
20. Wanem nao show aot Jehovah hem no savvy kros kwiktaem and no saed withim anywan?
20 Jehovah no savvy kros kwiktaem. But, diswan no meanim hem bae no duim samting, from hem finisim every bit Pharaoh wea bighed and army bilong hem insaed long Red Sea. Jehovah no savvy saed withim anywan tu. Dastawe go-go, olketa Israelite pipol wea hem laekem, they lusim way wea hem laekem them from they go ahed for duim rong samting. God acceptim pipol from every nation for worshipim hem, but only olketa wea followim olketa raeteous way bilong hem.—Acts 10:34, 35.
21. (a) Wanem nao Revelation 15:2-4 teachim yumi abaotem God? (b) Wanem nao bae mekem hem moa easy for yumi duim samting wea God say hem stret?
21 Bible buk bilong Revelation strongim way wea hem important tumas for learn abaotem “olketa raeteous rul” bilong God. Hem talem yumi hao olketa angel long heven they sing olsem: “Jehovah God, Olmaeti Wan, olketa work bilong yu big tumas and they nambawan. Olketa way bilong yu they raeteous and tru, King bilong olawe. Hu nao bae no fraet long yu, Jehovah, and givim glory long nem bilong yu, from yu nomoa yu loyal? Every nation bae kam and worshipim yu, from olketa raeteous rul bilong yu they show aot klia.” (Revelation 15:2-4) Yumi showim aot gudfela way for fraet long Jehovah, or bigfela respect for hem, taem yumi followim samting wea hem talem hem stret. Diswan hem moa easy for duim sapos yumi rememberim wisdom and love bilong God. Every komand bilong hem they for helpem yumi.—Isaiah 48:17, 18.
“JEHOVAH GOD BILONG YUMI HEM WANFELA”
22. Why nao olketa wea acceptim Bible no worshipim wanfela Trinity?
22 Olketa bilong Egypt bifor they worshipim planti god, but Jehovah nomoa hem “God wea mas kasem worship.” (Exodus 20:5)Moses talem moa long olketa Israelite hao “Jehovah God bilong yumi hem wanfela Jehovah.” (Deuteronomy 6:4) Jesus Kraest talem moa olketa toktok hia. (Mark 12:28, 29) So, olketa wea acceptim Bible olsem Word bilong God no worshipim wanfela Trinity wea garem threefela person or god insaed long wanfela. And tu, datfela word “Trinity” nating stap insaed long Bible. Trufela God hem wanfela Person, hem different from Jesus Kraest. (John 14:28; 1 Corinthians 15:28) Holy spirit bilong God hem no wanfela person. Hem paoa bilong Jehovah, wea Olmaeti Wan hem use-im for fulfillim olketa purpose bilong hem.—Genesis 1:2; Acts 2:1-4, 32, 33; 2 Peter 1:20, 21.
23. (a) Hao nao love bilong yu for God bae grow? (b) Wanem nao Jesus talem abaotem way for love-im God, and wanem nao yumi need for learnim abaotem Kraest?
23 Taem yu tingting long way wea Jehovah hem gud tumas, waswe, yu agree hao hem fit for kasem worship bilong yu? Taem yu studyim Word bilong hem, Bible, yu bae savvy gud moa long hem and learnim samting wea hem wantim yu for duim for kasem gudfela samting and hapi olawe. (Matthew 5:3, 6) And tu, love bilong yu for God bae grow. Datwan hem fitim, from Jesus hem say: “Yu mas love-im Jehovah God bilong yu withim whole heart bilong yu and withim whole soul bilong yu and withim whole mind bilong yu and withim whole strong bilong yu.” (Mark 12:30) Yes, Jesus garem love olsem for God. But wanem nao Bible showim aot abaotem Jesus Kraest? Wanem work nao hem garem insaed purpose bilong Jehovah?
TESTIM SAVVY BILONG YU
Wanem nao nem bilong God, and haomas taem nao hem stap insaed long olketa Hebrew Scripture?
Why nao yu need for use-im nem bilong God?
Wanem nao olketa fashion bilong Jehovah God wea yu laekem tumas?
[Piksa long page 29]
Waswe, yu savvy gud long Creator bilong every samting?