Stretfala Reading

BIBLE talem hao hem will bilong God for evri difren kaen man for “kasem stretfala savve bilong truth.” (1 Tim. 2:4) Long wei wea agree witim datwan, taem iumi read big from Bible, wei wea iumi wantem narawan for minim stretfala savve shud affectim wei wea iumi read.

For savve hao for read big from Bible and from olketa pablikeson wea explainim Bible hem important for olketa young wan and olo tu. Olsem olketa Witness bilong Jehovah, iumi garem responsibility for sharem savve abaotem Jehovah and olketa wei bilong hem witim olketa narawan. Planti taem diswan minim for read long wanfala man or long wanfala smol grup. Iumi duim diskaen reading tu insaed long famili. Long Theocratic Ministry Skul, olketa chance stap for olketa brata and sista, young and olo, for kasem kaonsel wea bae helpem olketa for kamap moabeta long wei for read big.

Iumi shud ting strong long wei for readim Bible long pablik, nomata long man wanwan or long kongregeson. Bible hem kam from God. And tu, “word bilong God hem laef and garem paoa . . . and hem fit for luksavve long tingting and samting wea heart want for duim.” (Heb. 4:12) Word bilong God garem barava spesol savve wea man no savve kasem from eni nara samting. Hem savve helpem man for savve long trufala God and for mekem grow gudfala wei for fren witim hem and tu for deal witim olketa problem bilong laef. Hem explainim hao for kasem laef olowe insaed long niu world bilong God. Hem shud goal bilong iumi for duim best bilong iumi for readim Bible long gudfala wei.—Ps. 119:140; Jer. 26:2.

Hao for Read Long Stretfala Wei. Planti samting hem insaed long wei for read gud, bat first step hem for mekem grow stretfala wei for read. Diswan minim for readim barava samting wea olketa printim long page. Careful for no missim eni word, katem word, or talem rong from hem klosap semsem olsem olketa nara word.

For mekem iu savve readim olketa word long stretfala wei, iu need for minim wanem nao iu readim. Datwan minim iu bae need for prepare gud. Gogo, wei wea iu savve read stret bae kamap moabeta taem iu savve hao for luk long next tu-thri word and tingim wanem nao hem talem.

Punctuation and diacritics hem important part long languis wea iu savve raetem. Punctuation maet showimaot wea nao for stop lelebet, hao long for stop, and maet need for apim or daonem voice. Long samfala languis, sapos man no changem saond bilong voice witim punctuation hem savve mekem kwestin olsem hem no kwestin, or hem maet changem mining evribit. Samfala taem waka bilong punctuation hem saed long grammar. Long planti languis iu kanduit readim samting long stretfala wei sapos iu no tingim olketa diacritic wea olketa raetem or wea man savve long hem from mining bilong sentence. Olketa mark hia affectim saond bilong olketa leta wea olketa stap antap, andanit, bihaen, and thru long hem. Mek sure iu savve hao for followim punctuation and olketa diacritic long languis bilong iu. Diswan nao key for read long wei wea garem mining. Remember hao goal bilong iu hem for samting iu readim mas klia long man wea lisin, no for just talem olketa word nomoa.

For mekem grow savve for read long stretfala wei, iu need for practice. Readim wanfala paragraf nomoa, and then readim disfala paragraf moa and moa go kasem taem iu savve readim gud and no mekem eni mistek. Then muv go long next paragraf. Last samting, trae for readim tu-thri page long wei for no missim, talem moa, or talem rong eni word. Bihaen iu duim olketa step hia, askem samwan for lisin taem iu read and talem iu taem iu mistek.

Pipol long samfala part bilong world no savve read gud from eye wea nogud and from olketa no garem braet laet. Sapos man fit for stretem olketa problem hia, bae hem muv ahed long reading.

Gogo, olketa brata wea savve read gud maet kasem invitation for read long Kongregeson Buk Study and long Wastaoa Study. Bat for garem privilege olsem, man needim moa samting winim for just savve hao for talem stret olketa word. For kamap wanfala gudfala pablik reader insaed long kongregeson, iu bae need for waka hard long reading wea iu duim seleva. Insaed diswan hem for minim hao each word long sentence duim part bilong hem. Iu no savve missim samfala word sapos iu laek for minim klia wanem nao sentence talem. Sapos iu readim rong samfala word, nomata taem iu read long iuseleva, mining bilong sentence bae change. Wei for readim samting rong maet from iu no lukim olketa diacritic or iu no tingim olketa nara word and sentence wea stap raonem datwan. Trae for savve long mining bilong each word saed long sentence wea hem stap insaed long hem. Tingim wei wea punctuation insaed long sentence affectim mining bilong hem. Remember tu hao olketa idea kam from wei for minim olketa grup bilong olketa word no just wanfala word nomoa. Luksavve long olketa hia mekem taem iu read big iu bae readim olketa grup bilong olketa word and no olketa word wanwan nomoa. For minim klia samting wea iu readim hem wanfala important step long wei for givim stretfala savve long olketa narawan thru long pablik reading.

Paul hem raet long wanfala Christian elder wea garem bigfala savve taem hem sei: “Go ahed for waka hard long wei for read long pablik.” (1 Tim. 4:13) So luk olsem diswan hem samting wea iumi evriwan savve kamap moabeta long hem.