Talem Moa Olketa Main Point

INSAED long gudfala wei for teach hem wei for talem samting moa. Taem speaker talem moa wanfala important point, hem moa isi for audience rememberim datwan. Sapos hem talem moa datfala idea long lelebet difren wei, maet datwan helpem olketa for minim moa klia.

Sapos olketa wea lisin forgetim samting wea iu talem, toktok bilong iu bae no affectim biliv or living bilong olketa. Maet olketa go ahed for tingim olketa point wea iu strongim.

Jehovah, Barava Nambawan Teacher bilong iumi, givim example long iumi long wei wea hem talem samting moa. Hem givim Tenfala Komandment long nation bilong Israel. Thru long wanfala angel wea tok for hem, hem mekem datfala nation herem olketa komandment long Maunt Sinai. Bihaen, hem raetem olketa and givim long Moses. (Ex. 20:1-17; 31:18; Deut. 5:22) Olsem Jehovah talem hem for duim, Moses talem moa olketa komandment hia long datfala nation bifor olketa go insaed long Promis Land, and thru long holy spirit, Moses recordim datwan long Deuteronomy 5:6-21. Insaed olketa komandment hia for Israel, hem komand for olketa man lovem and servem Jehovah witim full heart, soul, and strong. Disfala sem toktok hem kamap planti taem. (Deut. 6:5; 10:12; 11:13; 30:6) Why? Bikos, olsem Jesus talem, diswan nao “nambawan and firstfala komandment.” (Matt. 22:34-38) Thru long profet Jeremiah, Jehovah remindim pipol bilong Judah winim 20 taem hao hem barava important for obeyim hem long evri samting wea hem komandim long olketa. (Jer. 7:23; 11:4; 12:17; 19:15) And thru long Ezekiel, God talem winim 60 taem hao olketa nation “mas savve mi nao Jehovah.”—Ezek. 6:10; 38:23.

Insaed record abaotem ministry bilong Jesus, iumi lukim tu gudfala wei for talem samting moa. Olsem example, fofala Gospel—wea each wan storyim olketa important samting wea happen, bat long wei wea difren lelebet from narawan. Long teaching bilong hem, Jesus talem sem point long samfala difren taem bat long olketa difren wei. (Mark 9:34-37; 10:35-45; John 13:2-17) And taem hem long Maunten bilong Olives tu-thri day bifor hem dae, Jesus iusim wei for talem samting moa for strongim disfala barava important kaonsel: “Go ahed for lukaot, . . . bikos iufala no savve long wanem day nao Lord bilong iufala bae kam.”—Matt. 24:42; 25:13.

Long Field Ministry. Taem iu witness long pipol, iu hope olketa bae rememberim samting wea iu talem. Gudfala wei for talem samting moa savve helpem iu for kasem datfala goal.

Planti taem, wei for talem samting moa taem iu storyim bae help for mekem man wea herem for no forgetim. So, bihaen iu readim wanfala scripture, iu savve strongim datwan long wei for point go long wanfala main part insaed and ask olsem, “Waswe, iu lukim point hia?”

Iu savve iusim gud tu olketa lastfala toktok insaed story bilong iu. Olsem example, maet iu sei: “Main point wea mi laekem iu for rememberim from story bilong iumi hem . . . ” Then long simpol wei, talem moa. Maet hem samting olsem: “Purpose bilong God hem for earth kamap wanfala paradaes. Datfala purpose bae barava fulfill.” Or maet: “Bible showimaot klia iumi stap long olketa last day bilong disfala world. For iumi stap laef taem hem finis, iumi need for lanem wanem nao God laekem iumi for duim.” Or iu savve sei: “Olsem iumi lukim, Bible givim gudfala kaonsel for iumi deal witim olketa problem saed long famili.” Samfala taem maet iu just talem moa toktok bilong wanfala scripture olsem point for man rememberim. Bat, for duim diswan long gudfala wei minim iu mas planim gud firstaem.

For talem samting moa long olketa return visit and Bible study maet iu iusim samfala review kwestin.

Taem hem hard for wanfala man for minim or followim kaonsel from Bible, maet iu need for storyim datfala subject winim wanfala taem. Trae for storyim long samfala difren wei. Hem no minim story mas longfala, bat hem mas muvim datfala student for go ahed for tingim datfala subject. Remember, Jesus iusim diskaen wei for talem samting moa taem hem helpem olketa disaepol bilong hem for lusim feeling for laek garem first position.—Matt. 18:1-6; 20:20-28; Luke 22:24-27.

Taem Iu Givim Tok. Sapos iu givim olketa tok from platform, goal bilong iu hem no for givim information nomoa. Iu wantem audience for minim, rememberim, and followim. For duim datwan, iusim gud wei for talem samting moa.

Sapos iu ova tumas for talem moa olketa main point, maet interest bilong audience hem lus. Chusim gud olketa point wea iu shud barava strongim. Planti taem hem nao olketa main point long tok bilong iu, bat maet samfala nara point tu join witim diswan wea maet givim gud samting long audience.

For iusim gud wei for talem samting moa, maet iu firstaem talem olketa main point long introduction. Duim olsem witim shortfala toktok wea talem subject bilong iu, witim olketa kwestin, or olketa shortfala example olsem olketa problem wea needim ansa. Maet iu talem haomas main point stap and nambarem olketa. Then storyim each point hia insaed tok bilong iu. Iu savve strongim moa long body bilong tok bilong iu long wei for talem moa each main point bifor iu storyim next wan. Or iu savve duim long wei for iusim example wea showimaot hao for iusim datfala main point. Iu savve strongim moa olketa main point taem iu iusim conclusion wea talem moa olketa point hia, strongim olketa, ansarem olketa kwestin wea iu askem firstaem, or givim shortfala ansa for olketa problem wea iu storyim.

Witim evri samting hia, wanfala speaker wea garem savve hem lukluk gud long olketa wea insaed audience bilong hem. Hem luksavve sapos wanfala idea hem hard for samfala minim. Sapos datwan hem wanfala important point, hem storyim moa. Bat wei for talem moa long sem wei maet no kasem goal bilong hem. Moa samting hem insaed wei for teach. Hem need for change fitim samting wea kamap. Maet hem need for addim samting long tok bilong hem taem hem givim. Sapos iu lane for deal witim olketa need bilong audience long wei olsem, hem bae helpem iu for kamap gudfala teacher.